The Latest
وحدت نیوز (اسلام آباد) نواز شریف کی طالبان نواز حکومت کی ایماء پر جناح کنونشن سینٹر میں قومی امن کنونشن کا اجازت نامہ منسوخ کرنے کے بعد پارلیمنٹ ہاؤس کے باہر ڈی چوک پر کنونشن کی تیاریاں مکمل کرلی گئیں۔ تفصیلات کے مطابق رات گئے اسلام آباد انتظامیہ کی جانب سے قومی امن کنونشن کا اجازت نامہ منسوخ ہونے کے بعد مجلس وحدت مسلمین پاکستان، سنی اتحاد کونسل اور وائس آف شہداء کے رہنماؤں کے حکم پر ڈی چوک پر پنڈال کی تیاری کا کام شروع کیا گیا جو کارکنان کی انتھک محنت کے بعد اب مکمل ہوگیا ہے۔ پنڈال میں اسٹیج کے ساتھ شہید قائد علامہ عارف حسین الحسینی (رہ) اور صاحبزادہ فضل کریم (رہ) کی بڑی تصاویر آویزاں کی گئیں ہیں۔ پروگرام کی تیاری کے دوران مجلس وحدت مسلمین کے مرکزی ڈپٹی سیکریٹری جنرل علامہ شفقت شیرازی اور سنی اتحاد کونسل کے رہنما مفتی سعید رضوی بھی موجود ہیں۔ پنڈال کی سیکورٹی کے فرائض وحدت یوتھ کے رضاکار انجام دے رہے ہیں۔ اس موقع پر میڈیا سیل سے گفتگو کرتے ہوئے علامہ شفقت شیرازی نے مجلس وحدت مسلمین کے کارکنان کو خراج تحسین پیش کرتے ہوئے کہا ہے کہ برادران نے رات گئے خون جما دینے والی سردی کے باوجود جس ہمت کا مظاہرہ کیا اس کی نظیر نہیں ملتی، برادران کا یہ خلوص ہے کہ اسلام آباد انتظامیہ کی سازشوں کے باوجود ہم اپنے پروگرام کو منعقد کررہے ہیں اور انشاء اللہ دنیا دیکھے گی کہ ملک کو فرقہ واریت کی آگ میں دھکیلنے کی سازش کرنے والوں کے خلاف قومی امن کنونشن ایک سنگ میل ثابت ہوگا۔
وحدت نیوز (اسلام آباد) نواز شریف کی طالبان نواز حکومت نے شیعہ سنی اتحاد سے خوفزدہ ہوکر ’’ قومی امن کنونشن‘‘ کا اجازت نامہ منسوخ کردیا۔ سنی اتحاد کونسل، مجلس وحدت مسلمین اور وائس آف شہداء کے زیراہتمام ہونے والا کنونشن اب ڈی چوک پارلیمنٹ ہاؤس کے سامنے منعقد ہوگا۔ راولپنڈی اسلام آباد کے شیعہ سنی عوام کو اس کنونشن میں بھرپور شرکت کی دعوت دی جاتی ہے۔ کنونشن میں انٹری کیلئے کسی دعوت نامہ کی ضرورت نہیں ہے۔ قومی امن کنونشن کے چیئرمین کنونشن اسد عباس نقوی نے میڈیا سیل سے جاری ایک بیان میں کہا ہے کہ نواز شریف کی حکومت نے طالبان کی سرپرستی کا ثبوت دیدیا ہے، وارثان شہداء اور پاکستان کے بانیان کی جانب سے ملکی سلامتی کیلئے منعقدہ کانفرنس کا اجازت نامہ منسوخ کرنا وطن عزیز سے غداری ہے، سپریم کورٹ فی الفور اس معاملے کا نوٹس لے اور نواز شریف کی جانب سے دہشت گردوں کی سرپرستی کے اس اقدام کا نوٹس لے۔
وحدت نیوز(اسلام آباد) وفاقی حکومت اپنا رویہ تبدیل کرے ، شہداء کی آواز کو اب دنیا کی کوئی طاقت نہیں دبا سکتی، اگر کنونشن میں قومی امن کنونشن منعقد کر نے کی اجازت نہیں دی گئی تو ، قومی امن کنونشن پارلیمنٹ ہائوس کے سامنے ڈی چوک پر منعقدس کیا جائے گا۔ جبکہ 12ربیع الاول کے جلوسوں میں کسی قسم کی رکاوٹ برداشت نہیں کی جائے گی۔ان خیالات کا اظہار مجلس وحدت مسلمین کے مرکزی ڈپٹی سیکریٹری جنرل علامہ امین شہیدی ، سنی اتحاد کونسل کے چیئر مین صاحبزادہ حامد رضا اور وائس آف شہداء کے ترجمان سینیٹر فیصل رضا عابدی نے نیشنل پریس کلب میں مشترکہ پریس کانفرنس سے خطاب کرتے ہوئے کیا ۔
علامہ امین شہیدی کا کہنا تھا کہ موجودہ حکومت تحریک طالبان کی ہے۔ مذہبی بنیادوں پر اہلکاروں کے تبادلے کئے جا رہے ہیں اور پاکستان کو توڑنے کی بات کی جا رہی ہے اگر کنونشن سنٹر میں اس پروگرام کو منعقد کرنے کی اجازت نہ دی گئی تو ہم ڈی چوک میں یہ کنونشن منعقد کریں گے۔ پہلے چہلم سیدالشہداء کے جلوس کو روکنے کی کوشش کی گئی اور اب بارہ ربیع الاول کے جلوسوں کو روکنے کی سازش کی جا رہی ہے۔ فیصل آباد میں الصلوۃ والسلام کے بورڈ اتارے جا رہے ہیں۔ ہم ہر شہر میں دھرنے دیں گے۔ رہنماؤں نے کہا کہ کالعدم جماعتوں کو تحفظ فراہم کیا جا رہا ہے اگر ہمارے پروگرام میں کوئی واقعہ رونما ہوا تو صوبائی حکومت کے عہدیداران کے خلاف ایف آئی آر درج کروائیں گے۔ ہم پاکستان کو توڑنے والے نہیں بچانے والے ہیں۔انہوں نے کہا کہ تمام مسالک کے لوگوں اور شہداء کے وارثین کو اس کانفرنس میں مدعو کیا ہے اس کنونشن کے انعقاد سے پاکستان مضبوط ہوگا۔ حکومت نے دہشت گردوں کو کھلی چھٹی دے رکھی ہے لیکن شیعہ سنی اتحاد کے حوالے سے منعقد ہونے والے کنونشن کی اجازت نہیں دی جا رہی۔ یہ کانفرنس ہر حال میں منعقد ہوگی۔
سنی اتحاد کونسل کے چیئرمین صاحبزادہ حامد رضا نے کہا کہ پانچ جنوری کا کنونشن محب وطن لوگوں اور شہداء کے لواحقین کا کنونشن ہے جس میں ہر شعبہ زندگی کے لوگ شرکت کریں گے۔ یہ کنونشن عقیدے، مذہب اور لسانی تعصب سے بالاتر ہوگا۔ ملک کے پرامن عوام کو قتل کرنے والی جماعتوں کو پروگرام کرنے کی اجازت دی گئی ہے جبکہ محبان وطن لوگوں کو پروگرام کرنے سے روکا جا رہا ہے۔حکومت کنونشن کے اجازت نامے کو منسوخ نہ کرے ورنہ ہم یہ کنونشن ڈی چوک میں منعقد کرنے پر مجبور ہو جائیں گے۔ جبکہ 12ربیع الاول کے جلوسوں میں کسی قسم کی رکاوٹ برداشت نہیں کی جائے گی
وائس آف شہداء کے ترجمان سینٹر فیصل رضا عابدی نے کہا کہ ہم پرامن کنونشن کرنے جا رہے تھے اور ملک کے موجودہ حالات کی وجہ سے یہ کنونشن سنٹر میں منعقد کرنا چاہتے تھے۔ ڈی سی نے دو مرتبہ اجازت کو کنفرد کیا، وفاقی حکومت نہیں چاہتی کہ یہ کنونشن منعقد ہو تاکہ طالبان سے مذاکرات متاثر نہ ہوں۔ ہم ڈی چوک پر یہ کنونشن منعقد کریں گے اگر ہمارے کسی شخص کو نقصان پہنچا تو پھر یہ حکومت نہیں رہے گی۔ حالات مارشل لاء کی طرف جا رہے ہیں۔ رسول پاک (ص) کی ولادت کے حوالے سے جلوسوں میں بھرپور شرکت کریں گے۔ ہم مفتی منیر معاویہ کے قتل کی بھرپور مذمت کرتے ہیں۔ شمس الرحمن معاویہ کے قتل میں بھی خود کو پیش کر دیا تھا۔ چہلم کے جلوس کو شرپسندوں نے روکنے کی کوشش کی ہم عقیدے کیلئے سر کٹانے کیلئے تیار ہیں۔ طارق محمود، ناصر شیرازی اور علی اکبر نعیمی نے بھی قومی امن کنونشن کو ہرحال میں منعقد کروانے کا اعادہ کیا۔
وحدت نیوز(کوئٹہ) مجلس وحدت مسلمین کوئٹہ کے میڈیا سیل سے جاری کردہ بیان میں رکن بلوچستان اسمبلی آغا رضا رضوی نے کہا ہے کہ مشیر وزیر اعلیٰ برائے حج واوقاف، زکوٰۃ وعشر میر عبدل ماجد ابڑو پر بزدلانہ حملے کی جتنی بھی مذمت کی جائے کم ہے۔ ایم پی اے سید محمد رضا نے کہا کہ دہشت گرد انسان تو دُور حیوان کہلانے کے بھی لائق نہیں ہیں۔ حکومت سانحہ اختر آباد اور میر عبدل ماجد ابڑو صاحب پر دھماکے کرنے والے دہشت گردوں کے خلاف سخت کاروائی کر کے اُنھیں کیفر کردار تک پہنچائے۔ سانحہ اختر آباد میں زخمی ہونے والے زائرین کے لیے امدادی رقوم کا اعلان نہ کرنا قابل افسوس ہے۔ سنجیدہ آپریشنز نہ ہونے کے باعث قاتل دہشت گرد کوئٹہ اور گرد ونواح کے علاقوں میں دندناتے پھر رہے ہیں اور آئے دن معصوم عوام کو لقمہ اجل بنا لیتے ہیں لیکن حکومت اور قانون خاموش ہے۔
بیان میں مزید کہاگیا کہ گزشتہ شب کراچی کے علاقے گلشن اقبال میں واقع آغاجوس سینٹر میں گُھس کر دہشت گردوں نے فائرنگ کرکے واحد علی ، نادر علی اور غلام حسین ہزارہ کو شھید کردیا جو کہ درندگی کی بد ترین مثال ہے ۔کراچی دہشت گردوں کی آماجگاہ بن چکاہے اور رفتہ رفتہ یہ وباء پورے ملک میں پھیل رہی ہے جو انتہائی تشویشناک ہے اگر ظلم وبربریت کا یہ سلسلہ جاری رہا تو وہ دن دُور نہیں جب وفاقی اور سندھ کی صوبائی حکومت مظلوم عوام کے ٹھاٹھیں مارتے ہوئے سمندر میں ڈوب کر غرق ہوجائینگے لہٰذا حکومت کو ہوش کے ناخن لیتے ہوئے عوام کے جان ومال کے تحفظ کو یقینی بنانا چاہیئے۔ بیان کے آخر میں سانحہ کراچی کے شھداء کے لواحقین سے دلی اظہار ہمدردی بھی کی گئی اور مشیر وزیراعلیٰ اور اُنکے گارڈز کی صحتیابی کے لیے دُعائے خیر کی۔
وحدت نیوز(مشہد مقدس) مجلس وحدت مسلمین پاکستان کےشعبہ مشہد المقدس کے دفتر میں مجالس عزا کا انعقاد کیا گیا۔ مجالس عزا سے حجتہ الاسلام والمسلمین علامہ ڈاکٹرغلام محمد فخرالدین ، حجتہ الاسلام والمسلمین علامہ یعقوب بشوی، حجتہ الاسلام والمسلمین علامہ سیدمرتضیٰ نقوی سمیت دیگر علمائے کرام نے خطاب کیا، مجالس ہائے عزا میں علماء اور طلاب کی کثیر تعداد نے شرکت فرمائی ۔بعد ختم مجلس مومنین کی خدمت میں نیاز امام حسین علیہ السلام بھی پیش کی گئی ۔
وحدت نیوز(لندن) پاکستان میں جاری شیعہ نسل کشی اور کراچی میں علامہ دیدارعلی جلبانی، عالم ہزارہ، صفدرعباس، علی شاہ سمیت دیگر شیعہ عمائدین کی ٹارگٹ کلنگ کے خلاف لندن میں متحدہ قومی موومنٹ انٹرنیشنل سیکریٹریٹ کے باہر احتجاجی مظاہرہ کیا گیا، احتجاجی مظاہرے میں بڑی تعداد میں مظاہرین شریک تھے۔ مظاہرے کے شرکاء شیعہ نسل کشی بند کرو کے نعرے بلند کررہے تھے۔ اس موقع پر مظاہرین سے خطاب کرتے ہوئے رہنماؤں نے کہا کہ کراچی میں شیعہ عمائدین کے قتل میں ایم کیو ایم کے کارکنان کا ملوث ہونا باعث تشویش ہے، لندن میں موجود ایم کیو ایم کی قیادت اس حوالے سے اپنی پالیسی واضح کرے ، وگرنہ دنیا بھر میں ایم کیو ایم کے دفاتر کے باہر احتجاج کریں گے۔
رہنماؤں نے مزید کہا کہ علامہ دیدار علی جلبانی، عالم ہزارہ، صفدر عباس، علی شاہ سمیت دیگر شیعہ عمائدین کی شہادت اور علامہ مرزا یوسف حسین پر قاتلانہ حملہ میں ایم کیو ایم کے افراد کا ملوث ہونا کراچی میں جاری فرقہ واریت کی سازش کو بے نقاب کررہا ہے، انشاء اللہ ہم اپنے شہداء سے تجدید کرتے ہیں کہ ہر صورت میں ان مشن کو جاری رکھیں گے اور ان کے قاتلوں کو دنیا بھر میں رسوا کریں گے۔ اس موقع پر شرکاء نے ایم کیو ایم کے انٹرنیشنل سیکریٹریٹ کے سامنے شیعہ نسل کشی کیخلاف شدید نعرے بازی کی اور ایم کیو ایم کے رہنماؤں کو احتجاجی قرارداد بھی پیش کی۔ واضح رہے کہ ایم ڈبلیو ایم کے سربراہ علامہ ناصر عباس جعفری نے شیعہ نسل کشی کیخلاف ملک بھر میں احتجاج کی کال دی تھی جس کے بعد لندن میں احتجاجی مظاہرہ کیا گیا۔
وحدت نیوز(لاڑکانہ) ملک بھرمیں جاری شیعہ نسل کشی ، کوئٹہ میں زائرین پر خودکش حملے اور کراچی میں بلدیاتی امیدواروں کی بہیمانہ ٹارگٹ کلنگ کے خلاف علامہ راجہ ناصر عباس جعفری کی اپیل پر لاڑکانہ میں بھی ایم ڈبلیوایم کی زیر اہتمام احتجاجی ریلی نکالی گئی، مرکزی جامع مسجد جعفریہ سے نکالی گئی احتجاجی ریلی پریس کلب کے سامنے پہنچ کر احتجاجی جلسے کی صورت اختیار کر گئی، شرکائے احتجاج سے خطاب کر تے ہو ئے مجلس وحدت مسلمین ضلع لاڑکانہ کے سیکریٹری جنرل طارق بدوی کا کہنا تھا کہ مجلس وحدت مسلمین کے کارکنان کو پاکستان میں حق و سچ کی آواز بلند کر نے کی پاداش میں نشانہ بنایا جا ررہا ہے، کراچی میں بلدیاتی امیدواروں کی شہادت بھی اسی سلسلے کی ایک کڑی ہے، ایم ڈبلیو ایم کے شہید کارکنان اپنے علاقے کی محروم و مظلوم عوام کی نمائندگی کی غرض سے بلدیاتی انتخابات میں حصہ لے رہے تھے ، لیکن کراچی پر قابض لسانی فاشسٹ جماعت کے تکفیری دہشت گردوں کو ان کا یہ عمل ایک آنکھ نہ بھایا ، ہم آج متحدہ قومی موومنٹ اور اس کی قیادت کو یہ بات بارو کروادینا چاہتے ہیں کہ اگر ہمارے کارکنان کے قتل میں ملوث دہشت گردوں کے خلاف کو ئی اقدامات نہیں اٹھائے گئے تو ہم خود عالمی سطح پر ان دہشت گرد عناصر کو بے نقاب کریں گے۔
وحدت نیوز(مظفرآباد) مجلس وحدتِ مسلمین کا سانحہ کوئٹہ،کراچی بلدیاتی امیدواروں کی ٹارگٹ کلنگ کے خلاف احتجاجی مظاہرہ، آئی او، آئی ایس او ، اور جملہ شیعہ تنظیموں کے کارکنوں نے شرکت کی، احتجاجی ریلی کا آغاز علمدار چوک سے ہوا جس کی قیادت سربراہ مجلس وحدتِ مسلمین علامہ سید تصور نقوی الجوادی نے کی۔ ریلی پریس کلب پر پہنچ کر احتجاجی دھرنے کی صورت اختیار کرگئی۔اس موقع پر سکیورٹی اہلکاروں کی بھاری نفری تعینات تھی۔شرکاء نے مجلس وحدتِ مسلمین، آئی ایس او کے جھنڈے اور پلے کارڈز اٹھارکھے تھے جن پرایم کیوایم کے تکفیری دہشت گردوں کی کراچی میں دہشتگردی، بلدیاتی امیدواروں کی ٹارگٹ کلنگ،کوئٹہ اخترآبادمیں زائرین کی بسوں پر بم دھماکوں، دہشتگردوں کوحکومتی سرپرستی کے خلاف کلمات درج تھے،احتجای ریلی کے شرکاء ، لبیک یا حسین ؑ ،دہشتگردی مردہ باد،ٹارگٹ کلنگ بند کرو کے نعرے بلند کرتے رہے۔ پریس کلب کے باہر احتجاجی مظاہرے سے خطاب کرتے ہوئے سیکریٹری جنرل مجلس وحدتِ مسلمین آزادکشمیر علامہ سید تصور نقوی الجوادی ، سیکریٹری جنرل ضلع مظفرآباد مولانا طالب حسین ہمدانی، سیکریٹری سیاسیات سید تصور عباس موسوی، صدر آئی ایس او آزادکشمیرسید وقار کاظمی، سید حمید نقوی، سید سجاد سبزواری اور دیگر نے خطاب کرتے ہوئے کہا کہ یکم جنوری کو اخترآباد کوئٹہ میں زائرین کی بسوں پر بم دھماکے نوازشریف حکومت کی جانب سے ملت تشیع کویہ پیغام دیا گیا ہے کہ نواز حکومت دہشتگردوں کی پشت پناہی کررہی ہے اور سال کے پہلے دن ملت تشیع کو لاشوں کو تحفہ دیا گیا۔بلوچستان کے وزیراعلیٰ ڈاکٹر عبدالمالک کو متنبہ کرناچاہتے ہیں کی اپنے پیش رونواب اسلم رےئسانی سے سبق سیکھیں کہ جب انہوں نے بلوچستان میں دہشتگردوں کوکھلی چھٹی دے رکھی دی تھی توملت تشیع نے اپنی وحدت اور اتحاد کے زریعے رئیسانی حکومت کا تختہ الٹ دیا لہذابلوچستان حکومت کوچاہیے کہ وہ اپنی بقاء کیلئے زائرین کے راستوں اور شیعیانِ بلوچستان کی جان ومال اور املاک کے تحفظ کو یقینی بنائیں۔
مقررین نے کہا کہ دہشتگرد اس ملک کے دشمن ہیں،ملک میں قانون سازی کا اختیات پارلیمنٹ کو ہے،کسی بھی شخص کو پارلیمنٹ کے باہربیٹھے ہوئے اپنی مرضی کا قانون لانے کی اجازت نہیں ہے، پاکستان اسلام کے نام پر بنا ہے مضبوط پارلیمنٹ کے ذریعے اسلامی قوانین کا نفاذ ممکن ہے، حکومت اخترآباد کوئٹہ اور دہشتگردی کے دیگر ملک گیر واقعات کے بعد دہشتگردوں سے مذاکرات کا راگ الاپنے کو ترکری کرقی ،ے، مذاکرات ہمیشہ برابری کی سطح پر ہوتے ہیں حکومت کو مٹھی بھر دہشتگردوں کے سامنے سرنڈر کرنے کی اجازت نہیں دیں گے، حکومت دہشت گردوں کے ذریعے دہشگردوں سے مذاکرات کی سوچ کو ترک کرتے ہوئے دہشتگردوں کے خلاف افواج پاکستان کے ذریعے آپریشن راہ امن کا آغاز کرے، انہوں نے کراچی میں ایم ڈبلیوایم کے بلدیاتی امیدواروں کے قتل کی شدید الفاظ میں مذمت کرتے ہوئے اسے لسانی جماعت ایم کیو ایم کی طرف سے کراچی کو مہاجر سٹیٹ کی سازش قرار دیا ،لاہور میں خطیب حسینیت علامہ ناصر عباس آف ملتان کے قتل کو حکومت پنجاب کی ایما پر دہشتگردانہ کاروائی قرار دیتے ہوئے کہا کہ پنجاب کے وزیر لاقانونیت رانا ثناء اللہ دہشت گردوں کی پشت پناہی اور سر پرستی کر رہا ہے، محافظ حسینیت غلام رضا نقوی کئی دہایوں سے جیل میں ہیں، جبکہ دہشتگرد پنجاب حکومت کی سرپرستی میں پورے پنجاپ خاص طور پر جنوبی پیجاب میں دندناتے پھر رہے ہیں ، اب وقت آ چکا ہے کہ وفاقی و صوبائی حکومتیں دہشتگردوں کے خلاف سخت اقدامات کرے اور قومی ادارے اس سلسلے میں اپنا کردار ادا کرے، سیکرٹری سیاسیات سید تصور عباس موسوی نے کہا کہ کراچی میں ہمارے بلدیاتی امیدواروں کا قتل ایم کیو ایم نے ایک سازش کے تحت کروایا،ہم دہشتگردی کا جواب سیاست کے میدان میں رہ کر دیں گے۔
وحدت نیوز(کوئٹہ) علامہ سید ہاشم موسوی نے کہا ہے کہ چند روز قبل اخترآباد میں مظلوم بچوں اور مرد و خواتین زائرین پر دھماکہ شیطان پرست امریکہ، اسرائیل اور عرب ممالک کے ایجنٹ ہی کرسکتے ہیں۔ بس میں امام حسین علیہ السلام کی زیارت سے آئے ہوئے غریب زائرین کو نشانہ بنایا گیا، جو انتہائی قابل مذمت ہے۔ انہوں نے کہا کہ خودکش دھماکے کے نتیجے میں بس میں رکھے گئے قرآن پاک کو بھی جلایا گیا، انار کے کریٹوں میں قرآنی آیات کی بےحرمتی کا ڈرامہ رچانے والوں کو زائرین کی بس میں جلنے والے قرآن پاک کی بے حرمتی ہوتی دکھائی نہیں دیتی۔ انہوں نے زائرین بس کی حفاظت کرنے والے اے ٹی ایف اہلکاروں کی بہادری کو سلام پیش کرتے ہوئے ان کی جلد صحت یابی کیلئے دعا کی۔ موجودہ وفاقی و صوبائی حکومت کی دہشتگردوں کی پشت پناہی بھی کسی صورت برداشت نہیں کی جائے گی، اگر بلوچستان میں موجود دہشتگردوں کے تمام ٹھکانوں کو ختم نہ کیا گیا، تو حکومت کے خلاف شدید احتجاج کیا جائے گا۔ امام جمعہ کا نمازیوں سے خطاب کرتے ہوئے مزید کہنا تھا کہ 10 جنوری کو شُہدائے علمدار روڈ کی پہلی برسی عقیدت و احترام سے منائی جائے گی، جس میں ملک بھر سے معزز مہمانوں کو بھی شرکت کی دعوت دی جائے گی۔ انہوں نے کہا کہ شُہداء کی یاد کو زندہ رکھنے میں ہی ہماری کامیابی ہے، لہذا عوام کو چاہیئے کہ وہ شہداء کی پہلی برسی کی تقریب میں بھرپور شرکت کریں۔
وحدت نیوز(چنیوٹ) مجلس وحدت مسلمین ضلع چنیوٹ کے سیکرٹری جنرل سید انیس عباس زیدی نے کوئٹہ میں زائرین کی بس پر دہشت گردوں کے حملے کی مذمت کرتے ہوئے کہا ہے کہ حکومت دہشت گردی میں ملوث تکفیری قاتل گروہ کے خلاف گرینڈ آپریشن کرے۔ انکا کہنا تھا کہ اگر حکمران دہشت گردوں کے خلاف موثر کارروائی نہیں کریں گے تو ہم ملک گیر عوامی تحریک چلا کر انکا صفایا کر دیں گے۔ اسلام ٹائمز سے بات کرتے ہوئے، مجلس وحدت مسلمین کے ضلعی رہنما نے کہا کہ حکومت زبانی جمع خرچ کرنے کی بجائے ٹھوس حکمت عملی کے ذریعے ملت تشیع کی حفاظت کو یقینی بنانے کے لیے اقدامات کرے۔
