وحدت نیوز(گلگت) عالم مبارز، شب زندہ دار، جرّی اور جملہ کمالات کے مالک، گلگت بلتستان کے ہر دلعزیز شخصیت علامہ سید ضیاءالدین رضوی کی نویں برسی کے موقع پر بلتستان کے علماء کی نمائندگی کرتے ہوئے مجلس وحدت مسلمین پاکستان بلتستان ڈویژن کے سیکرٹری جنرل آغا سید علی رضوی نے کہا کہ ایک منظّم سازش کے تحت گلگت اور بلتستان کو الگ کیا جا رہا ہے اور اس سلسلے میں لسانی تعصبات کو ہوا دی جا رہی ہے۔ گلگت و بلتستان یک جان دو قالب کی مانند ہیں۔ اب گلگت و بلتستان کے عوام مل کر سیاسی جدوجہد اور حقوق کیلئے مل کر جنگ کرنے کا باقاعدہ اعلان کریں گے۔ آج سے گلگت بلتستان کو ملک کا پانچواں صوبہ بنانے کے لئے مل کر جدوجہد کا آغاز کیا جائے گا۔ انہوں نے کہا کہ تمام اداروں میں کرپشن اور اقرباپروری کو فروغ دینے کے لئے بدامنی پیدا کی جا رہی ہے۔ گلگت بلتستان کو امن کا گہوارہ بنانے کے لیے اور دہشت گردوں کے خاتمے کے لئے بلا رنگ و نسل اور مذہب ایک ہو کر جدوجہد کرنے کی ضرورت ہے۔ شیعہ اور سنی کے درمیان تفرقہ ڈالنے اور گلگت بلتستان کی امن کو سبوتاژ کرنے والی قوتوں کو ختم کرنے کا عزم کرنا ہوگا۔

آغا علی رضوی نے کہا کہ یوں تو گلگت بلتستان کے تمام سرکاری محکموں میں کرپشن اور اقرباپروری عروج ہے، لیکن کیا کہنا محکمہ تعلیم کا جہاں قوم کی نئی نسل کو زیور تعلیم سے آراستہ کیا جاتا ہے، محکمہ تعلیم ہی کسی قوم کی کامیابی اور ناکامی کی ضمانت ہے۔ مگر نااہل، عاقبت نااندیش حکمرانوں نے محکمہ تعلیم گلگت بلتستان کو تباہ کیا ہوا ہے۔ ہم محکمہ تعلیم میں جاری بدعنوانیوں کے خلاف انکوائری کی کوششوں کو سراہتے ہیں۔ انہوں نے کہا کہ جہاں محکمہ تعلیم میں تعلیم کا جنازہ جس طرح نکالا جا رہا ہے وہ دنیا ہے سامنے ہے اور تربیت بھی تعلیم کے ساتھ ساتھ لازمی ہے۔ میں واضح کر دینا چاہتا ہوں نام نہاد تعلیمی ماہرین تعلیم کو کہ ہمارے تعلیمی اداروں میں جو غیر اخلاقی اور فحش و بے غیرتی کی تقریبات رکھی جاتی ہیں، وہ بھی قوم و ملت کے لیے ناسور ہے۔ عجیب ہے ہمارے تعلیمی اداروں میں رقص و فحش کی محفلوں کے لیے وسائل بھی ہیں اور اجازت بھی، مگر یوم حسین (ع) پر پابندی عائد کر کے نہیں معلوم ہماری انتظامیہ اور تعلیمی ادارے کے سربراہ کس کو خوش کرنا چاہتے ہیں۔

انہوں نے اپنی تقریر میں کہا کہ قیام امن کے لئے تکفیری گروہ اور آغا سید ضیاءالدین کے قاتلوں کو کیفر کردار تک پہنچانا بہت ضروری ہے۔ شیعہ سنی کے درمیان تفرقہ اور امن کو سبوتاژ کرنے والی قوتوں کو ختم کرنے کا عزم کرنا ہوگا۔ زمانہ اب تبدیل ہوچکا ہے، نوجوانوں کے اندر تعلیم کے ساتھ انقلابی فکر اور جدوجہد بھی ضروری ہے۔

وحدت نیوز(مشہد مقدس) آج پاکستان تاریخ کے نازک تریں دور سے گذر رہا ہے،اندرونی اور بیرونی دشمن نے پاکستان کے ساتھ فیصلہ کن جنگ شروع کر رکھی ہے اور یہ جنگ فیصلہ کن مر حلہ پر ہے لیکن بد قسمتی سے ہمارے نااہل اور نالائق حکمران اور کریپٹ سیاستدان ابھی تک فیصلہ نہیں کر پائے کہ پاکستان کا دفاع کس طرح کیا جائے۔ان خیالات  کا اظہار مجلس وحدت مسلمین پاکستان شعبہ مشہد مقدس کے سیکرٹری جنرل حجۃ الاسلام والمسلمین عقیل حسین خان نے  اپنے ایک بیان میں کیادھشت گرد صرف  دھشت گرد ہی نہیں علی الاعلان آْئین پاکستان کے مخالف ہیں،مساجد ،امام بارگاہیں،اسکول ،ہسپتال ،پولیس ،آرمی  غرض کوئی بھی ان کے شر سے محفوظ نہیں  ،ستم ظریفی یہ ہے  کہ ملک کے پارلیمینٹ کے اندر بیٹھ کر کچھ نا  فہم ملاں  دھشت گردوں کی حمایت اور پاکستانی افواج کے خلاف  بک رہے ہیں لیکن کو ئی ان غداروں کو لگام دینے والا نہیں ہے۔قرآن و سنت اور آئین پاکستان میں ان کا حکم واضح ہے  یہ لوگ مفسد فی الارض بھی ہیں اور غدار بھی ہیں اور کے ساتھ مذاکرات نہیں بلکہ ان کے  منحوس اور ناپاک  وجود سے اس مملکت خداداد کے مکینوں کو نجات  دلانا حکومت کی ذمہ داری ہے اور یہی پوری ملت کی آرزو ہے۔

وحدت نیوز(گلگت) شہید اسلام و قرآن، داعی اتحاد بین المسلمین اور گلگت بلتستان کے لاکھوں عوام کے ہر دلعزیز راہنما شہید ولایت علامہ سید ضیاءالدین رضوی اور انکے باوفا جانثاروں کی نویں برسی کے سلسلے میں مرکزی اجتماع مرقد شہید، بمقام مرکزی امامیہ جامع مسجد گلگت میں "سوگواران ملت تشیع" کے عنوان سے منعقد ہوا۔ اجتماع میں علاقہ بھر سے ہزاروں کی تعداد میں شہید کے پیروکاروں کے علاوہ کثیر تعداد میں خانوادہ شہداء ملت جعفریہ اور علماء کرام نے شرکت کی۔

اس موقع پر اپنے خطاب میں امام جمعہ والجماعت مرکزی امامیہ جامع مسجد گلگت علامہ سید راحت حسین الحسینی، صوبائی سیکرٹری جنرل مجلس وحدت مسلمین مولانا شیخ نیئر عباس مصطفوی ، ڈویژنل سیکریٹری جنرل ایم ڈبلیو ایم بلتستان علامہ سید علی رضوی اور دیگر علماء کرام و مقررین نے شہید رضوی (رہ) کی ہمہ جہت شخصیت اور انکی شجاع قیادت کو خراج تحسین پیش کرتے ہوئے اس عزم کا اظہار کیا کہ شہید ضیاءالدین رضوی (رہ) کے مشن کی تکمیل اور انکی فکر کی ترویج و احیاء کیلئے بھرپور جدوجہد جاری رکھی جائیگی۔ اس موقع پر علامہ سید راحت حسین الحسینی نے ملت جعفریہ کے تمام مسائل کا حل داخلی اتحاد میں مضمر قرار دیتے ہوئے تمام علماء کرام اور تنظیموں کو دعوت اتحاد دی۔ برسی کے موقع پر سکیورٹی کے سخت انتظامات کئے گئے تھے، جبکہ مختلف تنظیموں اور اداروں کی جانب سے اسٹالز بھی لگائے گئے تھے۔

وحدت نیوز(لاہور) مجلس وحدت مسلمین نے 12 سے 17 ربیع الاول تک ہفتہ وحدت منانے کا اعلان کرتے ہوئے اپنے کارکنوں کو اہلسنت کے عید میلاد النبی کے جلوسوں اور میلاد کی محافل میں شرکت کی ہدایت کی ہے۔ ایم ڈبلیو ایم پنجاب کے سیکرٹری جنرل علامہ عبدالخالق اسدی نے ''اسلام ٹائمز'' سے ٹیلی فون پر گفتگو کرتے ہوئے بتایا کہ مجلس وحدت مسلمین جسیا کہ ہماری جماعت کے نام سے واضح ہے کہ ہم مسلمین کی وحدت کے لئے کام کر رہے ہیں اسی مقصد کے پیش نظر ہم نے پاکستان بھر کے شیعہ اور سنی حضرات میں وحدت کو فروغ دیا ہے اور اس حوالے سے مثبت نتائج برآمد ہوئے ہیں اور شیعہ اور سنی ایک دوسرے کے بہت قریب ہو گئے۔

انہوں نے کہا کہ اسلام دشمن قوتیں مسلمانوں کو آپس میں لڑا کر تفرقہ بازی کو فروغ دے رہی ہیں اور اس حوالے سے ایک تکفیری گروہ کو خصوصی طور پر ہدف دیا گیا ہے جو اہلسنت کا نام استعمال کر کے شہریوں کو بالعموم اور اہلسنت کا بالخصوص گمراہ کر رہے ہیں۔ انہوں نے کہا کہ سنی تحریک اور سنی اتحاد کونسل نے ان تکفیریوں کے خلاف عدالت سے رجوع کرنے کا فیصلہ کیا کہ وہ اہلسنت کا نام استعمال نہ کریں کیونکہ ان کے اس فعل سے سادہ لوح اہلسنت ان کی باتوں میں آ جاتے ہیں۔ انہوں نے واضح کہا کہ تکفیریوں کا اہلسنت سے کوئی تعلق نہیں بلکہ یہ اسلام دشمن قوتوں کے ایجنٹ ہیں۔

علامہ اسدی نے پنجاب بھر کے اپنے کارکنوں کو ہدایت کی ہے کہ وہ اہلسنت بھائیوں کےساتھ میلاد کے جلوسوں میں شریک ہوں اور 12 سے 17 ربیع الاول تک میلاد کی محافل کا انعقاد کریں اور ان میں اہلسنت علما اور عوام کو مدعو کریں اور اس طرح وحدت کو فروغ دے کر اسلام و پاکستان دشمن قوتوں کی سازشوں کو ملیا میٹ کر دیں۔ انہوں نے کہا کہ مجلس وحدت کے پلیٹ فارم سے بھی ایک کانفرنس کرانے پر غور کیا جا رہا ہے جس میں تمام عالم اسلام کے مکاتب فکر کو شرکت کی دعوت دی جائے گی اور یہ کانفرنس اسلام دشمن قوتوں کےلئے ان کے ناپاک عزائم مٹی میں ملانے کےلئے سنگ میل ثابت ہو گی۔