وحدت نیوز (لاہور) مجلس وحدت مسلمین پنجاب کے زیراہتمام گلگت بلتستان کے عوام سے اظہار یکجہتی کیلئے لاہور پریس کلب کے سامنے علامتی احتجاجی مظاہرہ کیا گیا مظاہرین نے ہاتھوں میں پلے کارڈ اُٹھا رکھے تھے جس پر گلگت بلتستان کے عوام کے حقوق کے حق میں نعرے درج تھے مظاہرے کی قیادت مجلس وحدت مسلمین پنجاب کے ڈپٹی سیکرٹری جنرل سید اسد عباس نقوی ،یوتھ آف گلگت بلتستان کے رہنماوُں ابراہیم اسدی اور انجینئر شبیر آخونزادہ نے کی مظاہرین سے خطاب کرتے ہوئے مجلس وحدت مسلمین کے رہنما سید اسد عباس نقوی کا کہنا تھا کہ گلگت بلتستان کے عوام آج اپنے حقوق کے حصول کے جدوجہد میں عوامی ایکشن کمیٹی کے پرچم تلے جمع ہیں اور مجلس وحدت مسلمین اُن کے بھر پور حمایت کا اعلان کرتی ہے آج کا یہ علامتی احتجاج وفاقی اور گلگت بلتستان کے کٹھ پتلی کرپٹ حکومت کو متنبہ کرنے کیلئے ایک جھلک ہے اگر عوامی ایکشن کمیٹی کے مطالبات پر عمل درآمد نہ ہوا تو ہم پاکستان سمیت دنیا بھر میں ان مظلوموں کے حق میں آواز بلند کریں گے اُن کا کہنا تھا کہ گلگت بلتستان کے عوام بائی چانس پاکستانی نہیں بلکہ بائی چوائس پاکستانی ہے گلگت بلتستان کے عوام کا پاکستان پرانگنت احسانات ہیں یہ پاکستان سے وفا کرنے والوں کی سر زمین ہے یہاں کے عوام پاکستان سے محبت کرتے ہیں اور پاکستانی ہونے پر فخر محسوس کرتے ہیں اور اس ملک کے نااہل حکمرانوں کے رویے اس خطے کے عوام کو پاکستان سے دور لے کر جا رہے ہیں
مظاہرین سے گلگت بلتستان یوتھ کے رہنما ابراہیم اسدی نے بھی خطاب کیا ان کا کہنا تھا کہ گلگت بلتستان کے عوام سے گندم سبسڈی کا حق چھین کر وفاق اور گلگت بلتستان کے ظالم حکمرانوں نے عوام دشمنی کی انتہا کر دی ہے ہم گلگت بلتستان میں عوامی ایکشن کمیٹی  کے چارٹرڈ آف ڈیمانڈ کی بھر پور حمایت کرتے ہیں اور عوامی ایکشن کمیٹی کے مطالبات کی منظوری تک ہم چین سے نہیں بیٹھیں گے ۔پاکستان کے ناداں حکمرانوں کو ملکی حالات کو مد نظر رکھتے ہوئے اس خطے کے عوام سے نہیں الجھنا چاہیے ہم اپنے حقوق کی بھیک مانگتے ہوئے پینسٹھ سال گذر گئے اب ہم اپنا حق چھین کر لیں گے ان کا مزید کہنا تھا کہ پاکستان دشمن طاقتیں گلگت بلتستان کے عوام کے حقوق پر شب خون مارنے میں ملوث ہیں ہم ان مکروہ چہروں کو عنقریب بے نقاب کریں گے مظاہرے میں مجلس وحدت مسلمین کے کا رکنوں سمیت گلگت بلتستان سے تعلق رکھنے والے نوجوانوں نے بھی شرکت کی۔

وحدت نیوز(کراچی) مجلس وحدت مسلمین پاکستان کراچی ڈویژن اور گلگت بلتستان یوتھ کے زیر اہتمام ملک بھر کی طرح کراچی میں بھی مجلس وحدت مسلمین پاکستان کے مرکزی سیکرٹری جنرل علامہ راجہ ناصر عباس جعفری کی اپیل پر کراچی پریس کلب کے باہر احتجاجی مظاہرہ کیا گیا جس میں سیکڑوں افراد نے شرکت کی اور گلگت بلتستان میں عوام کو گندم پر دی جانے والی سبسڈی کے خاتمے پرپاکستان پیپلز پارٹی اور گلگت بلتستان حکومت کے خلاف سخت نعرے بازی کی، احتجاج میں شریک مظاہرین نے ہاتھوں میں بینرز اور پلے کارڈز اٹھا رکھے تھے جن پر استحصالی حکومت مردہ باد، مہدی شاہ سرکار نا منظور، گندم سبسڈی بحال کرو ، گلگت بلتستان حکومت مردہ باد سمیت متعدد نعرے آویزاں تھے۔

مجلس وحدت مسلمین پاکستان کراچی اور گلگت بلتستان یوتھ کے زیر اہتمام منعقدہ احتجاجی مظاہرے سے خطاب کرتے ہوئے مجلس وحدت مسلمین پاکستان سندھ کے سیکرٹری جنرل مولانا مختار امامی ،کراچی کے رہنما حسن ہاشمی، عوامی ایکشن کمیٹی کراچی کے رہنما مولانا علی محمد،، اور گلگت بلتستان یوتھ کے رہنماصداقت علی اشتر کاکہنا تھا کہ گلگت بلتستان کے عوام کے حقوق کا استحصال کیا جا رہا ہے اور انتظامیہ کی جانب سے گندم پر سبسڈی کا خاتمہ عوام کو قتل کرنے کے مترادف ہے، رہنماؤں نے کہا کہ گلگت بلتستان کے عوام اپنے حقوق کے حصول کی خاطر کسی بھی قسم کی قربانی سے دریغ نہیں کریں گے ، انہوں نے مزید کہا کہ گلگت بلتستان ایک ایسا خطہ ہے کہ جہاں سے پورے ملک کو پانی کی فراہمی ہو رہی ہے اور اس پانی سے بجلی بن کر پورے ملک کو سپلائی کی جا رہی ہے لیکن جس سر زمین سے یہ وسائل برآمد ہو رہے ہیں اسء خطے کے عوام کو بنیادی حقوق سے محروم رکھنے کے ساتھ ساتھ بین الاقوامی قوانین کی روشنی میں فراہم کی جانے والی گندم پر سبسڈی کے خاتمے کا اعلان حکومت کی نا اہلی اور بد فعلی اور عوام دشمن ہونے کا کھلا ثبوت ہے۔

شرکائے احتجاجی مظاہرے سے خطاب کرتے ہوئے مقررین نے کہا کہ اگر گلگت اور بلتستان کے عوام کے بنیادی حقوق کی فراہمی میں رکاوٹوں کا سلسلہ بند نہ کیا گیا تو ملک بھر میں شیعہ او ر سنی عوام مل کر گلگت بلتستان کی طرح نا ختم ہونے والے احتجاج کا آغاز کر دیں گے اور ملک بھر میں حالات کی سنگینی کی تمام تر ذمہ داری حکومت وقت پر عائد ہو گی۔انہوں نے پاکستان پیپلز پارٹی کی اعلیٰ قیادت بشمول آصف علی زرداری ، بلاول بھٹو سے مطالبہ کیا کہ وہ گلگت بلتستان کی مقامی انتظامیہ کے اس فیصلے کا نوٹس لیں بصورت دیگر ملت گلگت بلتستان کے عوام اس عوام دشمن سازش میں ان کو بھی برابر کا شریک کار سمجھیں گے۔اس موقع پر شرکاء نے مردہ باد پیپلز پارٹی اور شیم شیم کے نعرے لگائے ۔

وحدت نیوز(گلگت ، بلتستان ) گندم پرسبسڈی کے خاتمے کے خلاف عوامی ایکشن کمیٹی گلگت بلتستان اور مجلس وحدت مسلمین  کی کال پر گلگت بلتستان سمیت لاہور ، کراچی ، اسلام آباد اور دیگر شہروں میں احتجاجی مظاہرے کیئے گئے جب بلتستان بھر میں آج مکمل طور پر شٹرڈاون ہڑتال ، اہم چوراہوں اور شاہراہوں پر دھرنے دیے گئے۔ اس سلسلے میں ضلع گنگچھے کے متعدد مقامات ، کھرمنگ،شگر ،روندو،اور گمبہ اسکردو میں بھی دھرنے دئیے گئے۔آج بلتستان بھر میں کاروبار زندگی یکسر معطل رہی تمام تجارتی مراکز،بنکیں اور عدالت مکمل طور پر بند رہی جبکہ سرکاری اور تعلیمی اداروں میں حاضری نہ ہونے کے برابر تھی۔ بلتستان میں اسلام آباد اسکردو سڑک،شاہراہ ریشم،کے ٹو جانے والی شاہراہ،سیاچن اور کرگل لداخ جانے والی سڑک بھی بند رہی۔ اسکردو میں شہر کے تمام داخلی و خارجی راستوں پر علی الصبح دھرنے میں عوام بیٹھ گئی ۔ ان مقامات میں حسین آباد ،گمبہ اسکردو،جیل روڈاور پریشان چوک شامل ہے۔ جبکہ اہم چوراہوں اور چوکوں پر ٹائز نذر آتش کئے گئے اور دھرنے دئیے گئے۔ اسکردو شہر میں امامیہ چوک، بے نظیر چوک،کلفٹن پل،علمدار چوک،پریشان چوک،جامعہ نجف چوک اور علی مسجد چوک پر دھرنے دئیے گئے۔ بعد از آن مجوزہ شیڈیول کے مطابق شہر کے تمام چوکوں پر دئیے گئے دھرنوں کو ریلی کی شکل میں مرکزی دھرنے کی طرف بڑھی۔ امامیہ چوک اسکردو پر دئیے گئے دھرنے کے شرکاء نے ریلی کی شکل میں یاد گار شہداء اسکردو کے بڑھے۔ ریلی کی قیادت عوامی ایکشن کمیٹی کے سربراہ علامہ آغا علی رضوی فرما رہے تھے۔ ریلی عبداللہ ہسپتال چوک سے ہوتا ہوا کلفٹن پل تک جاپہنچی جہاں دھرنے کے شرکاء سے آغا علی رضوی نے خطاب کیا اور ریلی کو آگے بڑھائی۔ ریلی حکومت مخالف نعروں کی گونج میں پہلے بے نظیر چوک اور اس کے بعد علمدار چوک اسکردو پہنچ گئی۔ دونوں مقامات پر علامہ آغا علی رضوی نے شرکاء سے خطاب کیا اور یاد گار شہداء اسکردو کی جانب بڑھی۔ دوسری طرف عوامی ایکشن کمیٹی کے رکن غلام شہزادآغا کی قیادت میں ایک ریلی جیل روڈ سے نکلی ۔ اس ریلی کے انتظار میں الڈینگ چوک پر موجود شرکاء دھرنا نے فلک شگاف نعروں کی گونج میں استقبال کیا جسکی قیادت علامہ شیخ زاہد حسین زاہدی فر ما رہے تھے۔ دونوں ریلی ضم ہو کر ایک عظم الشان ریلی کی صورت میں جینا ہوگا مرنا ہوگا حق کی خاطر لڑنا ہوگا اور دھرنا ہوگا دھرنا ہوگا کے نعروں کی گونج میں حسینی چوک اسکردو پر دوسری ریلی سے جاملی جسکی قیادت علامہ آغا علی رضوی فرما رہے تھے۔ عوام کا ٹھاٹھیں مارتا ہوا سمند ر جب عوامی ایکشن کمیٹی کے رہنماوں کی قیادت میں یادگار شہداء اسکردو پر جاری دھرنے میں پہنچا تو حکومت مخالف نعروں سے اسکردو کی فضا گونج اٹھی ۔حقوق سے محروم غریب اور لاچار عوام کے جذبات دیدنی تھی۔ واضح رہے کہ انتظامیہ کی جانب سے اس ہڑتال اور دھرنے کو ناکام کرنے کے لیے کو دقیقہ فروگذاشت نہیں کی تھی۔ ابتدا میں دھونس ، دھکمیوں کے بعد ایک ہی ہفتے میں دو بار دفعہ 144 نافذ کرکے عوام کو گھروں تک محدود کرنے کی کوشش کی تھی۔ پہلی مرتبہ جب اضلاع کے ڈپٹی کمشنرز نے دفعہ عائد کیاتو عوامی ایکشن کمیٹی نے عدالت سے رجوع کیا تو عدالت نے اسے غیر قانونی قرار دے کر کلعدم قرار دیا تھا۔ اس کے بعد ہوم سیکرٹری نے ایک بار پھر دفعہ 144 نافذ کرکے دھرنوں کو ناکام بنانے کی بھرپور کوشش کی گئی۔ اسکے علاوہ انتظامیہ نے عوامی ایکشن کمیٹی میں شامل متعدد افراد اور تنظیموں سے بھی رابطے کیے اور انہیں مختلف مراعات کی بھی یقین دہانی کرائی ۔ لیکن عوامی ایکشن کمیٹی کا ایک ہی نعرہ تھا کہ مطالبات کی منظوری یا موت۔ البتہ عوامی ایکشن کمیٹی کے غیر فعال چند افراد کے قدم راتوں رات لڑکھڑاتے بھی نظر آرہے ہیں۔دیکھنا یہ ہے یہ اس دھرنوں کی منطقی حل تک کن کن افراد اور تنظیموں کے پائے استقامت میں لغزش نہیں آئے گی۔

اسکردو یادگار شہداء پر گندم سبسڈی کے خاتمے کے خلاف دئیے گئے دھرنے سے شریف کاکڑ،حاجی منظور یولتر،حسن جوہری،کیپٹن سکندر،غلام شہزاد آغا،محمد حسن، شیخ زاہد حسین زاہدی ،مولانا اسحاق،مولاناحافظ محمدبلا ل زبیری اور علامہ آغا علی رضوی نے خطاب کیا۔ مقررین نے اپنے خطاب میں کہا کہ گلگت بلتستان انتظامیہ بوکھلاہٹ کا شکا ر ہے اور اوچھے ہتھکنڈے استعمال کرنا چاہتی ہے۔دھرنا ، احتجاج اور ہڑتال جمہوری دور میں عوام کا بنیادی حق ہے جسے کوئی نہیں چھین سکتا ۔گندم سبسڈی کے خاتمے کی تحریک کے خلاف طاقت کا استعمال حکومت کی تابوت میں آخری کیل ہوگا۔ 67 سالوں سے ہم ذلت سے جیتے رہیں اب عزت سے مریں گے۔انہوں نے کہا کہ عوامی ایکشن کمیٹی گلگت بلتستان گندم سبسڈی کو بحال کر کے دم لے گی اور عوامی حقوق پر کسی قسم کا سمجھوتہ نہیں کیا جائے گا۔ اگر انتظامیہ ہمیں دھمکیوں کے ذریعے ہمیں خوفزدہ کرنا چاہتی ہے تو یہ انتظامیہ کی بھول ہے ، حکومت گرفتاری اور دیگر اوچھے ہتھکنڈوں کے شوق بھی پورا کر کے دیکھیں ۔ قیدوبند، اسارتیں اور طاقت ہمارے جذبوں کو مات نہیں دے سکتی۔ انتظامیہ سمیت جو بھی عوامی حقوق کی راہ میں رکاوٹیں ڈالیں گے رسوا ہوجائیں گے۔