وحدت نیوز(اسلام آباد) مجلس وحدت مسلمین کے مرکزی  سیکرٹری جنرل علامہ ناصرعباس جعفری نے کہا ہے کہ وفاقی دارالحکومت اسلام آباد میں چھوٹے چھوٹے متعدد وزیرستان آباد ہیں، جہاں برین واشنگ کی جاتی ہے۔ اس معاملے میں انتظامیہ کی دانستہ چشم پوشی کسی بہت بڑے سانحے کا سبب بن سکتی ہے۔ وہ مجلس وحدت مسلمین کے زیراہتمام منعقدہ تین روزہ کنونشن کے اختتام پر پریس کانفرنس سے خطاب کر رہے تھے۔ انہوں نے کہا کہ مذاکرات ان قوتوں سے کیے جاتے ہیں جو ہتھیار پھینک کر ملکی قوانین کی پاسداری کی یقین دہانی کروائیں۔ دہشت گرد ہماری فورسز کو نشانہ بنا رہے ہیں، بےگناہ معصوم انسانی جانوں کے خون سے ہاتھ رنگنے کا عمل بدستور جاری ہے اور حکومت مذاکرات کا مسلسل راگ الاپتی جا رہی۔ ہمارے حکمرانوں نے ذاتی اغراض کی خاطر وطن عزیز کو دنیا بھر کے دہشت گردوں کی محفوظ پناہ گاہ بنا رکھا ہے۔ دنیا میں بدامنی و انتشار کی ذمہ دار تکفیری قوتوں کو جب تک کچلا نہیں جاتا، تب تک دنیا میں امن و سکون ممکن نہیں۔ انہوں نے کہا کہ تشیع مظلوم کی طرفدار ہے۔ مظلوم کا تعلق کسی بھی مذہب و مسلک سے ہو ہماری مکمل حمایت اس کو جاری رہے گی اور ظالم چاہے اہل تشیع سے کیوں نہ ہو، ہماری اس سے مخالفت ہے۔

 گلگت بلتستان کے حوالے سے علامہ ناصر عباس جعفری نے کہا کہ گلگت کی عوام نے بلامشروط پاکستان کے ساتھ الحاق کیا، لیکن گذشتہ تریسٹھ سالوں سے یہاں کی عوام کے ساتھ حکومت پاکستان کی جانب سے امتیازی سلوک روا رکھا جا رہا ہے جو انتہائی نامناسب ہے۔ ریاست کی طرف سے اس طرح کا رویہ احساس محرومی کو جنم دیتا ہے اور ملک دشمن تحریکوں کو سر اٹھانے کا موقع ملتا ہے۔ انہوں نے کہا کہ دنیا بھر سے دہشت گردوں کو شام پہنچائے جانے کا اصل مقصد اسرائیل کے مذموم عزائم کو تقویت دینا ہے۔ انہوں نے کہا کہ فلسطین کی غیور عوام ایک ایسی طاقت بن کر سامنے آئی ہے جس سے اسرائیل کی بقا کو بیشتر خطرات لاحق ہوگئے ہیں۔ شام ان مظلوم افراد کی حمایت کر رہا ہے۔ اب عرب ممالک مسلمانوں کے خلاف ان یہودی قوتوں کی بقا کی جنگ لڑ ہیں جو سراسر غیر اسلامی اور غیر اخلاقی ہے۔ تحفظ پاکستان بل کالا قانون ہے جسے عوام قبول نہیں کرتے۔

وحدت نیوز(کراچی) مجلس وحدت مسلمین لیڈیز وونگ کے صوبائی سیکریٹری جنرل خانم زہرا نجفی نے کہا ہے کہ دہشت گردی ، ٹارگٹ کلنگ اور بم دھماکے ملک کو غیر مستحکم کر نے کی سازش ہے ، کراچی انسانی خون کا کنواں بن چکا ہے ، روزانہ ایک درجن سے زائد بے گناہ شہریوں کا قتل معمول بن چکا ہے، حکمرانوں کی بے حسی ملک کو مذید نقصان پہنچا رہی ہے جنہوں نے ملک کے کسی شہری کی جان نہیں بخشی حکمران ان سے اپنے اقتدار کی بخشش کی بھیک مانگ رہے ہیں ، ان خیالات کا اظہار انہوں نے کراچی پریس کلب پرایم ڈبلیوایم خواتین ونگ کراچی کے زیر اہتمام ٹارگٹ کلنگ اور دہشت گردی کے خلاف احتجاجی مظاہرے کے شرکاء سے خطاب کر تے ہو ئے کیا۔ اس موقع پر شہر قائد میں ٹارگٹ کلنگ کا نشانہ بنے والے افراد کے لواحقین سمیت خواتین کارکنان اور معصوم بچوں کی بڑی تعداد احتجاجی مظاہرے میں شریک تھی جنہوں نے ہاتھوں میں بینرز اور پلے کارڈز اٹھا رکھے تھے جن پر نامنظور نا منظور دہشت گردی نا منظور ، ٹارگٹ کلرز کو گرفتار کرو، امریکہ مردہ ، طالبان مردہ باد، اسرائیل نامنظور اور مذاکرات نامنظور کے نعرے درج تھے۔

خانم زہرا نجفی نے کہا کہ وطن عزیز کو کسی بیرونی نہیں بلکہ داخلی دشمن سے خطرہ ہے، طالبان اور ان کے پشت پناہ سیاسی و مذہبی جماعتیں پاکستان اور پاکستانی عوام کے لئے زہر قاتل ہیں ، ایک منظم پلاننگ کے تحت ملک کو غیر ملکی ایجنڈے پر دہشت گردوں کے سپرد کیا جا رہا ہے، مشرق وسطیٰ میں تیزی سے بدلتی صورتحال اور شام میں تکفیری دہشت گردوں کو اسلامی مقاومت کے ہاتھوں ہو نے والی تاریخی شکست کے بعد پاکستان تکفیری دہشت گردوں کے آقاؤں کا تختہ مشق بننے جا رہا ہے ، پاکستان کے نا عاقبت اندیش حکمران محض چند ڈالروں اور ریالوں کے خاطر قومی سالمیت اور استحکام کو داؤپر لگانے میں مصروف ہیں ،انہوں نے مذید کہا کہ کراچی میں جاری مسلسل ٹارگٹ کلنگ خصوصاً شیعہ مکتب فکر سے تعلق رکھنے والے پروفیشنلز کی اندہوناک قتل و غارت گری بے حس حکمرانوں ، قانون نافذ کر نے والے اداروں اور عوام کے لئے لمحہ فکریہ ہے، شدید مالی پریشانیوں ، تنگ دستیوں اور معاشی مشکلات کے بعد اعلیٰ تعلیم حاصل کرکے ڈاکٹر، انجینئر اور وکیل بننے والے افراد کو بلاجواز دن دھاڑے قتل کر دیا جانا قومی المیے کا سبب بننے گا، یہ تمام کاروائیاں ملک کو پڑھے لکھے لوگوں سے نجات دلاکر جاہل انپڑھ دہشت گردوں کو مسلط کر نے کے لئے کی جارہی ہیں ۔روزانہ کی بنیاد پر شہید ہو نے والے بے گناہ شہریوں کے معصوم بچوں ، بیواؤں ، بوڑھی ماؤں کی آہیں اور سسکیاں بے حس حکمرانوں کے قتدار کے زوال کو سبب بنیں گی۔ انہوں نے صوبائی وزیر اعلیٰ قائم علی شاہ، گورنر سندھ ڈاکٹر عشرت العباد، آئی جی پولیس، ڈی جی رینجرز اور اعلیٰ حکام کو متنبہ کیا کے اگر ٹارگٹ کلنگ کی روک تھام اور گرفتار دہشت گردوں کو فوری سزا دینے میں مذید سستی اور کاہلی کا مظاہرہ کیاتو ایم ڈبلیو ایم شہداء کے اہل خانہ کے ہمراہ سڑکوں پر سراپا احتجاج ہو گی اور پھر ہمارا احتجاج دہشت گردوں اور نا اہل حکومت کے خاتمے تک جاری رہے گا ۔

وحدت نیوز(بلتستان)عوامی ایکشن کمیٹی بلتستان کے اراکین جن میں علامہ آغا علی رضوی، مولانا محمد بلال زبیری، علامہ شیخ زاہد حسین زاہدی، سیاسی رہنما غلام شہزاد آغا، شیخ محمد اسلم نیازی نے 15 اپریل کے گندم سبسڈی کے خاتمے کے خلاف دیئے جانے والے دھرنوں کی تیاری کے سلسلے میں ضلع گنگچھے کا ہنگامی دورہ کیا۔ انہوں نے اپنے دورہ کے دوران گول کے علماء و عمائدین سے بھی ملاقات کی۔ گول میں بزرگ عالم دین سید عنایت سے ملاقات کی اور 15 اپریل کے پروگرام کے حوالے سے آگاہ کیا۔ اس موقع پر عوامی ایکشن کمیٹی نے دارالعلوم غواڑی میں بھی غواڑی اور نواحی علاقوں کے علماء و زعماء سے تفصیلی ملاقات کی۔ دارالعلوم غواڑی کے مہتمم مولانا عبدالواحد نے عوامی ایکشن کمیٹی بلتستان کو خوش آمدید کہا اور گندم سبسڈی کے خاتمے کے خلاف جاری تحریک کو سراہتے ہوئے کہا کہ اس عظیم عوامی مسئلے کے حل تک ہر ممکن تعاون کے لیے تیار ہے۔

عوامی ایکشن کمیٹی نے خپلو میں بھی علماء، زعماء اور عمائدین خپلو سے ملاقات کی اور 15 اپریل کی تیاریوں کے سلسلے میں تفصیلی گفتگو کی اور حکومتی سردمہروں پر گفتگو ہوئی۔ خپلو میں چیئرمین شیعہ علماء کونسل علامہ شیخ غلام حسین جوہری، سید حمایت خطیب امام جمعہ خانقاہ معلٰی، مولانا عبدالواحد خطیب مسجد چقچن، محمد اسحاق امیر جماعت اہلحدیث خپلو، محمد قاسم رجائی سیکرٹری جنرل مجلس وحدت مسلمین ضلع گنگچھے، محسن علی صدر ایم وائی ایف و خطیب جامع مسجد صوفیہ نور بخشیہ، جعفر علی نائب صدر NYF گنگچھے، جعفر علی ڈپٹی سیکرٹری جنرل NYF، بشارت علی اخوندی رکن انجمن امامیہ صوفیہ نوربخشیہ شریک تھے۔ اس دورہ کے موقع پر تمام مکاتب فکر کے علماء اور تمام سیاسی، مذہبی اور سماجی تنظیموں کے رہنماوں نے اجتماعی طور پر اس عزم کا اعادہ کیا کہ گندم سبسڈی کے خاتمے تک ہر طرح کی مشکلات برداشت کرنے اور سخت ترین اقدامات اٹھانے کے آمادہ ہیں۔ خپلو کے علماء و زعماء اور رہنماوں نے فیصلہ کیا کہ عوامی حقوق پر کسی قسم کا سمجھوتہ نہیں کیا جائے گا اور گندم سبسڈی کے خاتمے کی تحریک کو منطقی انجام تک پہنچا کر دم لیں گے۔

وحدت نیوز(اسلام آباد) مجلس وحدت مسلمین پاکستان کے سربراہ علامہ راجہ ناصرعباس جعفری نے کہا ہے کہ حکمران حق حکمرانی کھوچکے ہیں ، نواز شریف نے پورے ملک کو اتفاق فاونڈری مل سمجھ لیا ہے،ایک بزنس مین کبھی ملک کے مفاد کا تحفظ نہیں کرسکتا، یہی وجہ ہے کہ ڈیڑھ ارب ڈالر کے عوض قومی غیرت کو بیچا جارہا ہے، عرب حکمران کبھی بھی کسی کو کوئی چیز مفت نہیں دیتے پھر پاکستان پر ان نوازشات کا کیا مقصد ہے اور قوم سے حقائق کو کیوں چھپایا جارہا ہے، حکمران عوام کے محرم ہوا کرتے ہیں لیکن یہاں گنگا الٹی بہتی ہے، ملک کے مفاد کے بجائے غیروں کے مفاد کی جنگ لڑی جارہی ہے۔ پورا ملک وزیرستان بن چکا ہے ہر شہر میں دہشتگرد دانداتے پھر رہے ہیں لیکن انہیں روکنے والاکوئی نہیں، کبھی دہشتگرد لاڑکانہ میں بے بس ہندوں کے گھروں کو آگ لگا رہے ہیں تو کبھی کراچی سمیت ملک کے دیگر شہروں کو نشانہ بنائے ہوئے ہیں،پینتیس ہزار پاکستانیوں کو بحرین بھیجا گیا ہے تاکہ پوہ وہاں پر پرامن جمہوری جدوجہدکو کچل کر آل خلیفہ کی مدد کرسکیں، اسی طرح اب دو بریگیڈسعودی عرب بھجوانے کی باتیں کی جارہی ہیں، جس کی ہم ہر فورم پر مذمت کرینگے اور آواز بلند کریں گے۔ اگر عرب حکمران اپنے عوام میں پسندیدہ اور قابل قبول ہوتے توا نہیں کبھی بھی بیرون ملک سے فوجیں منگوانے کی ضرورت نہ پڑتی، پاکستان کو سعودی کے جمہوری حق کو ختم کرنے کیلئے اپنے بازوں نہیں بننا چاہیے، عرب حکمران عوام میں اپنی وقعت کھو چکے ہیں،ان کا کہنا تھا کہ عرب ممالک نے کبھی بھی کشمیر اور فلسطین کے ایشوز امت مسلمہ کا ساتھ نہیں دیا، حتیٰ پاکستان کو کشمیر کے ایشو پر معاونت نہیں دی گئی، ان خیالات کا اظہار مجلس وحدت مسلمین کے سربراہ علامہ ناصر عباس جعفری نے اسلام آباد میں مجلس وحدت مسلمین پاکستان کے سالانہ تین روزہ ناصران ولایت کنونشن میں فکر امام خمینی سیمینار سے خطاب کرتے ہوئے کیا۔

علامہ ناصر عباس کا کہنا تھا کہ سعودی عرب میں دو فوجی بریگیڈ بھجوانے کی باتیں کی جارہی ہیں ، کیا ہمارے سیکیورٹی ادارے اپنے ملک میں امن قائم کرچکے ہیں؟، کیا دہشتگردی کا قلع قمع ہوچکا ہے، اگر نہیں توپھر کیوں پاکستانیوں کی اسلامی ممالک کے عوام کے خلاف استعمال ہونے کی باتیں کی جارہی ہیں، انہوں نے کہا کہ ملک میں حکمران حق حکمرانی کھوچکے ہیں، کہیں سندھ فیسٹول کے نام پر کروڑوں روپے خرچ کررہے ہیں تو کہیں پر دہشتگردوں کو سپورٹ کیا جارہا ہے۔ پنجاب حکومت دہشتگردوں کی سرپرستی کررہی ہے ، رانا ثناء اللہ اور وزیراعلی پنجاب شہباز شریف پورے صوبے میں دہشتگردوں کوکھلے چھوڑے ہوئے ہیں، ضیاء الحق کی باقیات کو ایک بار پھر زندہ کیا جارہا ہے، مذاکرات کے نام پر پوری قوم کو بے وقوف بنایا جارہا ہے، علامہ ناصر عباس نے کہا کہ پنجاب میں سیکڑوں شیعہ نوجوانوں پر توہین رسالت( ص) کے مقدمات درج کرائے جارہے ہیں، جو قوم نواسہ رسول ص سے بے انتہا محبت اور عشق کرتی ہو، یہ کیسے ممکن ہے کہ وہ امام حسین ؑ کے نواسہ کے بارے میں کوئی ایسی بات کرے جو توہین کے ذمرے میں آئے، ایک سازش کے تحت ملک کو فرقہ واریت کی آگ میں جھونکا جارہا ہے، مجلس وحدت مسلمین نے سنی اتحاد کونسل کے ساتھ ملکر ملک بھر میں مشترکہ جلسے کرائے اور قوم کو پیغام دیا کہ ملک میں کوئی شیعہ سنی مسئلہ نہیں ہے ۔ علامہ ناصر عباس جعفری نے مجلس وحدت مسلمین خیبرپختونخوا کے ڈپٹی سیکرٹری جنرل وحیدکاظمی کی بلاجواز گرفتاری کی مذمت کی اور کہا کہ کیا یہ تحریک انصاف کا انصاف ہے کہ ملک کے پر امن شہریوں کو گرفتار کرکے جیل میں ڈالا جارہا ہے، گجرات ، لاہور، راولپنڈی سمیت درجنوں واقعات میں ملوث کسی ایک دہشتگرد کو بھی گرفتار نہیں کیا گیا لیکن پرامن شہریوں کی گرفتاریاں جارہی ہیں۔ ان کا کہنا تھا کہ گلگت بلتستان کے عوام نے ڈوگراراج سے آزادی حاصل کرکے پاکستان پر احسان کیا اور ضم ہوگئے لیکن آج انہیں کوئی آئینی شناخت نہیں دی گئی ، انہیں کوئی حیثیت نہیں دی جارہی ہے۔