The Latest
وحدت نیوز(بلتستان) مجلس وحدت مسلمین پاکستان بلتستان ڈویژن کے سیکرٹری جنرل علامہ آغا علی رضوی نے اپنے ایک بیان میں کہا ہے کہ ختمی المرتبت، باعث تخلیق دو جہاں، ختم المرسلین، حبیب دو جہاں، حضرت محمد مصطفٰی (ص) کی ماہ ولادت دنیا بھر میں حقیقی مسلمانوں کے باعث مسرت جبکہ تکفیری اور اسلام امریکائی کے پیروکاروں کی حوصلہ شکنی اور مایوسی کا مہینہ ثابت ہوگا۔ انہوں نے کہا کہ پاکستان میں میلاد مخالف گروہ اور تکفیری گروہ عظیم فرزندان توحید، غیور شیعہ و سنی عوام کے ہاتھوں تنہا ہوجائیگا اور وحدت و اتحاد کا عظیم سفر اسلام کی سربلندی، پاکستان کی سلامتی اور دہشتگردوں کی سرنگونی پر منتج ہوگا۔ انہوں نے کہا کہ ملک بھر کی طرح بلتستان بھر میں بارہ سے سترہ ربیع الاول کو ہفتہ وحدت انتہائی عقیدت و احترام کے ساتھ منایا جائیگا۔
وحدت نیوز(بلتستان) مجلس وحدت مسلمین پاکستان بلتستان ڈویژن نے ہفتے کے روز بلتستان میں موجود تمام مکاتب فکر کا ایک اہم اجلاس طلب کیا ہے۔ ذرائع کے مطابق اجلاس میں مکتبِ اہلسنت والجماعت کے علماء و عمائدین، مکتبِ اہلحدیث کے علماء و عمائدین، مکتبِ صوفیہ نوربخشیہ کے علماء وعمائدین، مکتب امامیہ نوربخشیہ کے علماء و عمائدین، مکتبِ شیعہ شش امامیہ اسماعیلیہ کے علماء و عمائدین کے علاوہ شیعہ علماء کونسل بلتستان کے صدر، امامیہ اسٹوڈنٹس آرگنائزیشن پاکستان بلتستان ڈویژن کے صدر، تحریک بیداری امت مصطفٰی کے مسئولین اور امامیہ آرگنائزیشن کے چئیرمین شرکت کریں گے۔ مجلس وحدت کی جانب سے بلائی جانے والی اس اہم نشست میں تمام مکاتبِ فکر باہمی گفت و شنید اور مشاورت سے ہفتہ وحدت کے حوالے سے پروگرام تشکیل دیں گے۔ تمام مکاتب فکر کا اس طرح کا پروگرام دین مبین اسلام کی سربلندی اور مملکت خداداد اسلامی جمہوریہ پاکستان کے استحکام اور بلتستان میں امن و امان، مذہبی رواداری اور بھائی چارگی کے لیے سنگ میل ثابت ہوگا۔
وحدت نیوز(کراچی) سنی اتحاد کونسل اور اے این آئی کراچی سٹی نے گلشن معمار گبول گوٹھ میں واقع پیر ایوب شاہؒ کے مزار پر متولی سمیت بے گناہ افراد کے قتل عام کے خلاف کراچی پریس کلب پر احتجاجی مظاہرہ کیا۔ احتجاجی مظاہرہ میں مجلس وحدت مسلمین پاکستان کراچی ڈویژن کے سیکرٹری تربیت علامہ مبشر حسن نے خصوصی شرکت کی۔ احتجاجی مظاہرے سے خطاب کرتے ہوئے سنی اتحاد کونسل کے ڈپٹی جنرل سیکرٹری اور انجمن نوجوانان اسلام پاکستان کے سرپرست اعلٰی طارق محبوب نے کہا کہ گلشن معمار گبول گوٹھ پر واقع پیر ایوب شاہ بخاریؒ کے مزار پر انتہا پسند دہشت گردوں کے حملے میں خدام، متولی اور زائرین کا وحشیانہ قتل انسانیت سوز المناک سانحہ ہے۔
انہوں نے کہا کہ مزارات مقدسہ کی عظمت و حرمت پر حملہ ہمارے ایمان اور عقیدے پر حملہ اور جشن عید میلاد النبیؐ کے تقدس کو پامال کرنے کی سازش ہے۔ انہوں نے کہا کہ حکمران انسانیت کے قاتل انتہا پسند دہشت گردوں، قانون شکنوں اور ملک دشمنوں کے خلاف آئینی و قانونی ہاتھ استعمال کرے۔ احتجاجی مظاہرے سے علامہ فیصل عزیزی، مفتی اقبال نقشبندی، مولانا سید بلال شاہ، سنی علماء کونسل گلستان جوہر کے صدر مولانا اشرف گورمانی، مولانا امین نقشبندی، اے این آئی پاکستان کے آرگنائزر مسعود عالم نے بھی خطاب کیا۔
وحدت نیوز(اسلام آباد) مجلس وحدت مسلمین کے سربراہ علامہ ناصر عباس جعفری نے کراچی میں سی آئی ڈی آفیسر چودھری اسلم اور پولیس اہکاروں کے بم دھماکے میں جاں بحق ہونے پر اپنے مذمتی بیان میں کہا ہے کہ چودھری اسلم پر بم دھماکے سے ایک بار پھر ثابت ہو گیا ہے طالبان کا ناسور ملک کیلئے انتہائی خطرناک شکل اختیار چکا ہے جس کا خاتمہ بیحد ضروری ہے۔ انہوں نے کہا کہ طالبان سے مذاکرات کے حامی قوم کو بتائیں کہ وہ ریاست کے ساتھ ہیں یا ان نام نہاد طالبان کے، جو مساجد، امام بارگاہیں، بازار، گرجہ گھر، جی ایچ کیو، مہران ائیر بیس، کامرہ ائیر بیس اور قومی املاک تک کو نہیں بخشتے، یہ ظالمان کسی رعایت کے مستحق نہیں ہیں۔ علامہ ناصر عباس جعفری کا کہنا تھا کہ اب وقت آ گیا ہے کہ حکومت فیصلہ کرے کہ وہ کس کے ساتھ ہے، آیا ریاست بچانی ہے یا طالبان؟، ہمارا پہلے دن سے یہی مؤقف رہا ہے کہ ریاست کے باغیوں سے کسی صورت مذاکرات نہ کیے جائیں، ہم آج بھی یہی مطالبہ کرتے ہیں جو پاکستان کے آئین، پرچم اور قومی اداروں کو تسلیم نہیں کرتا اس کیخلاف فی الفور بے رحمانہ آپریشن کیا جائے۔
وحدت نیوز(کراچی ) ایس ایس پی چوہدری اسلم پر حملہ قابل مذمت ہے، حکومت دہشت گردوں کے سامنے بے بس نظر آتی ہے،جب تک دہشت گرد گروہوں کے خلاف فیصلہ کن کاروائی نہیں ہو گی ، کسی کی جان مال محفوظ نہیں ہو گی،طالبان اور کالعدم جماعتیں اپنے مخصوص ایجنڈے کے تکمیل کے لئے ٹارگٹ کلنگ اور خودکش حملوں کا سہارا لے رہے ہیں ،چوہدری اسلم کے قتل میں طالبان کے ساتھ ان کی ہمدرد سیاسی جماعتیں بھی برابرملوث ہیں ۔ ان خیالات کا اظہار مجلس وحدت مسلمین پاکستان صوبہ سندھ کے سیکریٹری جنرل علامہ مختار احمد امامی نے وحدت ہاؤس کراچی سے جاری اپنے مذمتی بیان کیا ۔
ان کا کہنا تھا کہ کراچی سمیت ملک بھر میں ظالمان مائنڈ سیٹ اپنے مذموم عزائم کی تکمیل کے لئے ظلم و بربریت کا سہارا لے رہا ہے، ان دہشت گردوں سے نہ ہی عام شہری محفوظ ہے نہ ہی کوئی اعلیٰ افسر ، نہ ہی مسجد محفوظ ہے نہ ہی امام بارگاہ، افسوس ناک بات یہ ہے کہ ہمارے خفیہ ادارے بھی ان دہشت گردوں کے خلاف کوئی ٹھوس شواہد جمع کر نے میں کامیاب نظرنہیں آتے ہیں ،پاکستان کو عالمی سطح پر خطرناک ملک قرار دلوانا ان عناصر کا بنیادی ہدف ہے ،ملک کی اہم شخصیات ، اعلیٰ فوجی و سول سوسائٹی سے تعلق رکھنے والی شخصیات کو چن چن کر نشانہ بنایا جا رہا ہے، ایس ایس پی سی آئی ڈی چوہدری اسلم ایک فرض شناس اور نڈر پولیس آفیسر تھے ، جنہوں نے طالبان دہشت گردوں کے خلاف متعدد کامیاب کاروائیاں مکمل کیں ، لیکن عوام کی جان و مال کے تحفظ کا یہ ذمہ دار آج خود دہشت گردی کی بھینٹ چڑھ گیا، صوبائی حکومت سے مطالبہ کر تے ہیں کہ اس فرض شناس اور بہادر پولیس آفیسر کے خون کو ضائع ہو نے سے بچایا جائے ، چوہدری اسلم کے ادھورے مشن کی تکمیل کے لئے اپنی تمام تر ذمہ داریوں کا بروئے کار لائیں ۔
وحدت نیوز(کوئٹہ) شہدائے یوم القدس کوئٹہ کے اہل خانہ میں امداری رقوم کے چیک تقسیم کر دیئے گئے ، بلوچستان حکومت کی جانب سے امدادی رقوم کے چیک ایم ڈبلیوایم کے صوبائی سیکریٹریٹ میں خانوادہ شہداء میں تقسیم کیئے گئے ، کل ۳۱شہداءکے لواحقین میں چیک تقسیم کیئے گئے ، باقی لواحقین میں چیک دستاویزات مکمل ہو نے پر تقسیم کیئے جائیں گے،معزز مہمانان چیف آف ہزارہ قبائل جناب سردار سعادت علی ، جناب حاجی قیوم علی چنگیزی ، جناب مظفر علی چنگیزی، جناب پروفیسر تاج، رکن بلوچستان اسمبلی آغا رضا رضوی، ایم ڈبلیو ایم کے مرکزی رہنما سید ہاشم علی موسوی ، ڈویژنل سیکریڑی جنرل جناب سید عباس علی، کونسلر کربلائی رجب علی نے شہداء کے لواحقین میں چیک تقسیم کیے۔ دیگر مہمانوں میں کونسلر کربلائی عباس علی، کونسلر سید مہدی ، ایم ڈبلیو ایم کابینہ کے کامران علی ، غلام مہدی اور دیگر دوستوں نے شرکت کیں۔
وحدت نیوز(بھکر) مجلس وحدت مسلمین پنجاب ضلع بکھر تعلقہ دریا خان کے سیکریٹری جنرل احسان اللہ خان پانچ ماہ سے اسیر رہنے کے بعد آج رہا ہوگئے۔ تفصیلات کے مطابق احسان اللہ خان کو پانچ ماہ قبل پولیس نے بلاجواز گرفتار کیا اور ان پر الزام عائد کیا کہ مفتی خطیب کے قتل میں ملوث ہیں، تاہم انسداد دہشت گردی کی عدالت نے پولیس کی جانب سے اس الزام کو غلط قرار دیتے ہوئے احسان اللہ خان کی رہائی کو حکم دیدیا ، جس کے بعد ان کو رہا کردیا گیا ہے۔ واضح رہے کہ گزشتہ انتخابات میں مجلس وحدت مسلمین کی جانب سے ضلع بکھر میں ن لیگ کے مدمقابل امیدوار کھڑے کرنے پر صوبائی وزیر داخلہ رانا ثناء اللہ کی ایماء پراحسان اللہ خان کے خلاف انتقامی کرنے کی کوشش کی گئی تھی، تاہم دریا خان کے مومنین نے احسان اللہ خان کیخلاف اس سازش کو ناکام بناتے ہوئے نواز شریف کی سعودی حلیف جماعت مسلم لیگ ن کی شیعہ دشمنی کو بے نقاب کردیا ہے۔
وحدت نیوز(جھنگ) چینوٹ میں گذشتہ روز متعصب ڈی پی او نے مسلم لیگ ن کے مقامی تکفیری ممبر پنجاب اسمبلی الیاس چینوٹی کی سازش پر مجلس وحدت مسلمین ضلع چینوٹ کے سیکرٹری سیاسیات سید عاشق حسین بخاری اور تحصیل چینوٹ کے ڈپٹی سیکرٹری جنرل مشرف حسین کو بلا جواز چادر چاردیواری کے تقدس کو پامال کرتے ہوئے گرفتار کر کے جھوٹے مقدمات بنا کر جھنگ جیل بھجوا دیا گیا ہے مجلس وحدت مسلمین چینوٹ کے ترجمان کےمطابق مقامی انتظامیہ شیعہ دشمنی کی حدوں کو پار کر رہی ہے چادر چاردیواری کی تقدس کو پامال کر کے مومنین کے گھروں میں داخل ہو کر لوگوں کو ہراساں کر رہی ہے اس تمام شیعہ دشمنی کے پیچھے صوبائی وزیر قانون رانا ثنااللہ اور ن لیگ کا تکفیری ایم پی اے الیاس چینوٹی ملوث ہیں گزشتہ دنوں تکفیری ٹولے کی طرف سے شاہ دی ملنگ کے علاقے میں جلوس عزا ء پر حملہ کیا گیا تھا جس کے نتیجے میں متعدد مومینن زخمی ہوئے تھے اس واقعے میں ملوث تکفیری دہشت گردوں کو گرفتار کرنے کے بجائے الٹا ملت جعفریہ کو ہراساں کرنے کا سلسلہ جاری ہے۔
وحدت نیوز(مظفرآباد) مجلس وحدتِ مسلمین آزادکشمیر کے وفد نے وزیراعظم آزادکشمیر چوہدری عبدالمجید سے ملاقات کی، اتحاد بین المسلمین کے سلسلہ میں کئے گئے اقدامات سے وزیراعظم کو آگاہ کیا گیا۔وفد کی سربراہی مجلس وحدتِ مسلمین آزادکشمیر کےسیکریٹری جنرل علامہ سید تصور حسین نقوی الجوادی نے کی، وزیر اعظم آزادکشمیر نے پاکستان اور آزادکشمیر میں بین المذاہب ہم آہنگی اور بین المسالک وحدت کیلئے مجلس وحدتِ مسلمین کے کردار کو سراہا،مجلس وحدتِ مسلمین کے وفد نے ماہ ربیع الاول میں جشن ولادت با سعادت آقائے نامدار حضرت محمد مصطفی ؐکے عنوان سے آزادکشمیر بھر میں منعقد ہونے والی تقاریب کے حوالے سے آگاہ کیا۔مجلس وحدت مسلمین کے زیر اہتمام دربار سہلی سرکار پر عظیم الشان محفل میلاد میں شرکت کی دعوت دی ۔وفد میں سیکریڑی سیاسیات سید تصور عباس موسوی،سید ذیشان حیدر، مولانا طالب حسین ہمدانی، خالد محمود عباسی، محسن رضا سبزواری ایڈووکیٹ، عابد حسین قریشی اور دیگر شامل تھے۔
وزیراعظم چوہدری عبدالمجید نے مجلس وحدتِ مسلمین کے وفد سے گفتگو کرتے ہوئے کہا کہ آزادکشمیر لسانی اورمذہبی فسادات سے پاک پرامن خطہ ہے۔تمام مسالک کے درمیان رواداری اور اتحاد قابل تعریف ہے۔ حکومت اورعلماء کرام وحدت برقرار رکھنے کیلئے اپنا کردار ادا کررہے ہیں۔ ماہ محرم الحرام آزادخطہ کے علماء و عوام نے بھرپور ملی وحدت، احترامِ اہل بیت کیساتھ پرامن طریقے سے منایا گیا۔ماہ ربیع الاول بھی تما م مسالک کے علماء و عوام رسول خداؐ سے عشق و محبت کا اظہار کرتے ہوئے مکمل اتحاد و یگانگت کیساتھ منایا جائے۔
علامہ سید تصورنقوی الجوادی نے وزیراعظم چوہدری عبدالمجید سے گفتگو کرتے ہوئے کہاکہ مجلس وحدتِ مسلمین نے پاکستان اور آزادکشمیر میں اتحاد بین المسلمین کیلئے بھرپورجدوجہد کررہی ہے اس جدودجہد کے دوران قیمتی جانوں کا نذرانہ پیش کیا۔ ملکی سلامتی اور امن کیلئے ہر قربانی کیلئے تیارہیں انہوں نے کہا کہ مجلس وحدت مسلمین ملک میں امن کا قیام انسانی بنیادوں پر کے فارمولے پر یقین رکھتی ہے اس سلسلہ میں 5 جنوری کو اسلام آباد میں قومی امن کنونشن منعقد کیا گیاجس میں شیعہ سنی ، ہندو ،سکھ،عیسائی اور دیگر مسالک ومذاہب کے عوام ملکی سلامتی کیلئے جانیں قربان کرنے والے شہداء کے لواحقین نے بھرپورشرکت کی اور باہمی اتحاد و اخوت کے عہد کی تجدیدکی۔مجلس وحدتِ مسلمین آزادکشمیرکے وفد نے وزیراعظم آزادکشمیرسے مطالبہ کرتے ہوئے کہاکہ آزادکشمیر میں کالعدم دہشتگرد جماعتوں کی سرگرمیوں کو مانیٹر کیا جائے۔جو لوگ ذاتی مفاد کیلئے فتویٰ ساز فیکٹریاں چلارہے حکومت انِ سے آہنی ہاتھوں سے نپٹے،آزادکشمیر کے پرامن خطہ کو کسی صورت دہشتگردی کی آگ میں نہ جھونکا جائے۔وفد نے مطالبہ کیاکہ آزادکشمیر میں ملت تشیع کے حقوق کی رعائت کی جائے۔ اسلامی نظریاتی کونسل ،علماء و مشائخ کونسل اور عوامی نمائندگی کے دیگر اداروں میں اہل تشیع کو بالحاظ آبادی متناسب نمائندگی دی جائے، وزیراعظم نے یقین دلایا کہ وہ ملت تشیع کے تمام جائز مطالبات کو پورا کرنے کی بھرپور کوشش کریں گے۔
وحدت نیوز(لاہور) مجلس وحدت مسلمین پاکستان نے فیصل آباد میں حکومت کی جانب سے عید میلادالنبی کے بینرز اور سائن بورڈ اتارے جانے کے عمل کی شدید مذمت کرتے ہوئے اپنے کارکنوں کا ہدایت کی ہے کہ وہ حکومت کے اس متعصبانہ رویہ کے خلاف سنی اتحاد کونسل کے احتجاجی دھرنوں میں جوق در جوق شریک ہوں۔ ایم ڈبلیو ایم کے مرکزی سیکرٹری سیاسیات سید ناصر عباس شیرازی نے اپنے بیان میں کہا ہے کہ فیصل آباد میں سنی اتحاد کونسل کے احتجاجی دھرنوں کی بھرپور حمایت کا اعلان کرتے ہیں، ایم ڈبلیو ایم کے کارکن فوری طور پر ان دھرنوں میں شریک ہوں۔
انہوں نے کہا کہ حرمت پیامبر (ص) اور میلادالنبی (ص) کے جلوسوں پر کوئی آنچ نہیں آنے دینگے، ملت جعفریہ اپنے اہلسنت بھائیوں کے شانہ بشانہ میلاد کے جلوسوں میں شریک ہوگی۔ سید ناصر شیرازی نے کہا کہ فیصل آباد کی متعصب انتظامیہ کو فوری برطرف کیا جائے، جس نے عید میلادالنبی (ص) کے بینرز اور سائن بورڈ اتارے دیئے ہیں۔ ناصر عباس شیرازی نے کہا کہ فیصل آباد انتظامیہ یہ سب کچھ وزیر قانون پنجاب رانا ثناء اللہ کے ایما پر کر رہی ہے جو دہشت گردوں کے سرپرست ہیں اور ملک میں طالبانی نظام کی راہ ہموار کر رہے ہیں۔
