The Latest
وحدت نیوز(اسلام آباد)مجلس وحدت مسلمین پاکستان کے مرکزی جنرل سیکرٹری علامہ سید حسن ظفر نقوی نے اپنے بیان میں کہا ہے کہ فتح و شکست واضح ہے کہ جنہوں نے جارحیت کی ہے وہ بنکروں اور بلوں میں چھپے ہوئے ہیں اور جن پر حملہ ہوا ہے وہ سڑکوں پر اللہ اکبر کی صدائیں بلند کر رہے ہیں،
حکومت پاکستان کا برادر اسلامی ملک ایران کے موقف کے ساتھ کھڑا ہونا لائق تحسین اور جراتمندانہ اقدام ھے، پاکستان اور سعودی عرب کی طرح دیگر اسلامی ممالک کو بھی اسرائیلی جارحیت کی کھل کر مذمت کرنی چاہئے، ایران اور پاکستان اسرائیل کیلئے بڑا خطرہ ہیں، ایران جنگ نہیں چاہتا اور ایرانی قیادت نے جنگ سے بچنے کی حتی الامکان کوشش کی ہے لیکن جب اس پر تمام تر عالمی قوانین کو خاطر میں نہ لاتے ہوئے بزدل اسرائیل نے جنگ مسلط کر دی ہے تو اب اختتام بھی ایران کرے گا،
امریکہ واسرائیل موت سے ڈرتے ہیں جبکہ ایرانی راہ حق میں موت کو فخر سمجھتے ہیں۔انہوں نے کہا کہ اگر ایران کے اندر سے منافقین گروہ دشمن کا ساتھ نہ دیتے تو اسرائیلی حملے مکمل ناکام رہتے، جونہی ایرانی حملوں نے زور پکڑنا ہے اسرائیلی چیخیں سب سنیں گے، امریکہ اور اس کے حواری ممالک بھی اسرائیلی دفاع کے لیے سلامتی کونسل کا رخ کرتے نظر آئیں گے، پھر دنیا دیکھے گی کہ سلامتی کونسل کس بھونڈے انداز سے صہیونی ریاست کو تحفظ فراہم کرنے کی کوشش کرتی نظر آئے گی۔
وحدت نیوز(اسلام آباد) مجلس وحدت مسلمین پاکستان کے مرکزی رہنماء علامہ مقصود علی ڈومکی نے کہا ہے کہ نصاب تعلیم سے کروڑوں نوجوانوں کا مستقبل وابستہ ہے۔ متنازع نکات کی اصلاح ناگزیر ہے۔ ان خیالات کا اظہار انہوں نے اسلامی نظریاتی کونسل کے رکن بزرگ عالم دین علامہ سید افتخار حسین نقوی اور شیعہ علماء کونسل کے مرکزی نائب صدر علامہ عارف حسین واحدی سے ملاقات کے موقع پر کیا۔
انہوں نے اسلام آباد میں امام خمینی ٹرسٹ کے چیئرمین، بزرگ عالم دین اور اسلامی نظریاتی کونسل کے رکن علامہ سید افتخار حسین نقوی سے ملاقات کی۔ بعد ازاں شیعہ علماء کونسل پاکستان کے مرکزی نائب صدر علامہ عارف حسین واحدی سے بھی خصوصی ملاقات کی۔
ان ملاقاتوں میں علامہ مقصود علی ڈومکی نے انہیں 18 جون 2025 کو مجلس وحدت مسلمین پاکستان کے زیر اہتمام منعقد ہونے والی صوبائی نصاب تعلیم کانفرنس میں شرکت کی باضابطہ دعوت دی۔ اس موقع پر گفتگو کرتے ہوئے علامہ مقصود علی ڈومکی نے کہا کہ نصاب تعلیم سے کروڑوں نوجوانوں کا مستقبل جڑا ہوا ہے۔ یکساں قومی نصاب تعلیم میں موجود متنازع نکات کی فوری اصلاح کی ضرورت ہے تاکہ ملت جعفریہ کے تحفظات کو دور کیا جا سکے۔
انہوں نے افسوس کا اظہار کرتے ہوئے کہا کہ محرم الحرام کے دوران پنجاب بھر میں مجالس اور جلوس ہائے عزاداری کے خلاف عزاداران امام حسین علیہ السلام پر بلاجواز سینکڑوں مقدمات قائم کئے جاتے ہیں، جو نہ صرف آئین پاکستان میں دی گئی مذہبی آزادی کی خلاف ورزی ہے، بلکہ بنیادی شہری حقوق کی بھی سنگین پامالی ہے۔ اس موقع پر علامہ سید افتخار حسین نقوی نے کہا کہ نصاب تعلیم کے موضوع پر تسلسل کے ساتھ مستقل، منظم اور تحقیقی بنیادوں پر کام کرنے کی ضرورت ہے۔ اس ضمن میں باہمی مشاورت اور عملی اقدامات وقت کی اہم ترین ضرورت ہیں۔ جبکہ علامہ عارف حسین واحدی نے نصاب تعلیم کانفرنس کے انعقاد کو خوش آئند قرار دیتے ہوئے کہا کہ یہ نہایت اہم اور بروقت اقدام ہے۔ ایام عزاء اور محرم کے دوران عزاداروں کے خلاف بلاجواز مقدمات کا اندراج افسوسناک ہے۔ عزاداریٔ امام حسین علیہ السلام کے تحفظ کے لئے ہم سب کو مل کر مشترکہ اور متفقہ کوششیں کرنی ہوں گی۔
برادر اسلامی ملک ایران پر اسرائیل کی بدترین جارحیت کے خلاف ایم ڈبلیوایم کی پاراچنار میں احتجاجی ریلی
وحدت نیوز(پاراچنار)مجلس وحدت مسلمین پاکستان ضلع پاراچنار کے زیرِ اہتمام اسرائیل کی حالیہ جارحیت کے خلاف ایک عظیم الشان احتجاجی ریلی کا انعقاد کیا گیا، جس کی قیادت ضلعی صدر مجلس وحدت مسلمین علامہ سید معین الحسینی، مجلس علمائے مکتبِ اہلبیت کے صوبائی صدر علامہ سید احمد علی روحانی، اور ایم ڈبلیو ایم کے نائب صدر علامہ سید سرفراز علی شاہ حسینی نے مشترکہ طور پر کی۔یہ احتجاجی ریلی وحدت چوک سے آغاز لے کر کشمیر چوک تک نکالی گئی، جہاں یہ ایک پرجوش جلسے میں تبدیل ہو گئی۔
اس اجتماع میں تحریک حسینی پاراچنار، انجمن حسینیہ پاراچنار، اور علماء اہلبیت کے جید رہنما بھی شریک تھے، جنہوں نے شرکائے جلسہ سے خطاب کرتے ہوئے امت مسلمہ کے اتحاد و یکجہتی کی ضرورت پر زور دیا۔جلسے سے خطاب کرتے ہوئے علامہ سید معین الحسینی نے کہا:"اسرائیل نے ایران پر بزدلانہ حملہ کرکے اپنے ناپاک وجود پر آخری ضرب خود ہی لگا دی ہے۔ یہ حملہ محض ایران پر نہیں بلکہ پورے عالمِ اسلام پر حملہ ہے۔ ہم پاراچنار کے باشعور عوام، اسلامی جمہوریہ ایران سے مکمل اظہارِ یکجہتی کرتے ہیں، اور ان مسلم ریاستوں کی شدید مذمت کرتے ہیں جو اس نازک موقع پر مجرمانہ خاموشی اختیار کیے ہوئے ہیں۔
۔"انہوں نے اس امر پر بھی فخر کا اظہار کیا کہ پاراچنار کے نمائندہ ایم این اے حمید حسین کی جانب سے قومی اسمبلی میں پیش کی گئی قرارداد نہ صرف اسمبلی بلکہ سینیٹ سے بھی منظور کی گئی، جو ملتِ تشیع کے جذبہ وفا اور حمیت اسلامی کا مظہر ہے۔انجمن حسینیہ کے ڈپٹی سیکرٹری، علامہ تجمل حسین فخری نے اپنے خطاب میں کہا:"اسرائیل کا حملہ تمام اسلامی ممالک کے منہ پر طمانچہ ہے۔ ہم حکومتِ پاکستان کو خراجِ تحسین پیش کرتے ہیں کہ اس نے اسرائیل کے خلاف قومی سطح پر آواز بلند کی۔" تحریک حسینی پاراچنار اور سپریم لیڈر سید عابد حسین حسینی کے فرزند علامہ صادق حسینی نے فرمایا:"ایران وہ واحد قوت ہے جو اسرائیل کو شکست فاش دینے کی صلاحیت رکھتی ہے، کیونکہ ایرانی قوم شہادت سے خوفزدہ نہیں بلکہ اسے اپنے لیے باعثِ افتخار سمجھتی ہے۔"علماء اہلبیت کے نائب صدر علامہ باقر حیدری اور برادر سید نبی حسینی نے بھی اس موقع پر خطاب کرتے ہوئے امت مسلمہ کو بیداری، اتحاد اور مقاومت کا پیغام دیا۔
وحدت نیوز(ملتان)مجلس وحدت مسلمین کے سربراہ سینیٹر علامہ راجہ ناصر عباس جعفری کی کال پر ایران پر اسرائیلی جارحیت کے خلاف مجلس وحدت مسلمین جنوبی پنجاب کی جانب سے بعد نماز جمعہ احتجاجی مظاہرے و ریلیاں نکالی گئیں۔ مرکزی احتجاجی مظاہرہ جامع امام بارگاہ ابو الفضل العباس کے باہر کیا گیا جس میں مظاہریں نے امریکہ واسرائیل کے خلاف شدید نعرے بازی کی۔ احتجاجی مظاہرے کی قیادت مرکزی رہنما ایم ڈبلیو ایم علامہ مقصود علی ڈومکی، علامہ قاضی نادر حسین علوی، سلیم عباس صدیقی، انجینئر سخاوت علی سیال اور دیگر نے کی۔ احتجاجی مظاہرے سے خطاب میں علامہ مقصود علی ڈومکی کا کہنا تھا کہ اسرائیل کا وجود خطہ میں ناسور بنتا جارہا ہے۔خطہ میں امریکی و صہیونی عزائم کبھی کامیاب نہیں ہوں گے۔ انہوں نے کہا کہ غاصب اسرائیل و امریکہ کو خطہ میں شکست کا سامنا ہے صہیونی جارحیت نے پورے خطہ کے امن کو تباہ کر دیا ہے۔ امت مسلمہ کو داخلی و خارجی سازشوں کا شکار کر کے کمزور کیا جارہا ہے۔انہوں نے کہا کہ اسلامی ممالک آج اگر ایران کا ساتھ نہیں دیں گے تو کل ان کی بھی بقاء کا مسئلہ بن جائے گا ایران پر اسرائیل حملہ کھلی جارحیت عالمی قوانین کی خلاف ورزی ہے۔
انہوں نے کہا کہ اسرائیل خطہ میں مظلوم فلسطینیوں کی نسل کشی کر رہا ہے اسرائیلی جارحیت کے نتیجہ میں لاکھوں فلسطینی شہید ہوچکے ہیں اسرائیل امریکہ و یورپی ممالک کی سرپرستی میں پورے خطہ میں دہشتگردی کر رہا ہے۔علامہ قاضی نادر علوی نے کہا کہ فلسطین، لبنان، یمن، شام،عراق اور ایران پر صہیونی جارحیت تاحال جاری ہے صہیونی جارحیت کے خلاف ایران کا دفاع امت مسلمہ کا دفاع ہے۔ رہنمائوں نے کہا کہ ایران پر اسرائیلی جارجیت کی مذمت کرتے ہیں اسرائیلی حملہ ایرانی سالمیت وخودمختاری کے خلاف اور عالمی جنگی جرائم ہے امت مسلمہ اسرائیلی جارجیت کی مذمت اور ایران کا ساتھ دے۔پاکستانی عوام اپنے ایرانی بھائیوں کے ساتھ کھڑے ہیں اسرائیلی حملے میں شہید ہونے والی بے گناہ ایرانی عسکری قیادت و عوام سمیت حکومت ایران سے اظہار ہمدردی کرتے ہے اور دعاگو ہیں کے خداوند ان کے درجات بلند فرمائے، احتجاجی مظاہرے میں مولانا مجاہد عباس جعفری، مولانا غلام جعفر انصاری، جواد رضا جعفری، سید غدیر شیرازی، علی رضا حسینی، علی سبطین، ملک عمران سمیت علماو کارکنان کی بڑی تعداد موجود تھی۔سلیم عباس صدیقی نے کہا کہ اب وقت آ گیا ہے کہ عالم اسلام متحد ہو کر ظالم صہیونی ریاست اور اس کے حواریوں کو واضح پیغام دے کہ مسلم ممالک کی خودمختاری، آزادی اور سلامتی پر حملہ پوری امت پر حملہ تصور کیا جائے گا، اور اس کا ہر محاذ پر بھرپور جواب دیا جائے گا۔
وحدت نیوز(لاہور)ایم ڈبلیو ایم وومن ونگ کی صدر محترمہ معصومہ نقوی نے اپنے بیان میں کہا کہ غاصب صیہونی رجیم کی جانب سے ایران پر حملہ کی شدید مذمت کرتی ہوں یہ حملہ اسرائیل کے بزدلانہ اور وحشیانہ پن کی عکاسی کرتا ہے ، اسرائیل اور اسکے پشت پناہ امریکہ نے دنیا کا امن داؤ پر لگا رکھا ہے ایران پر حملہ کھلی جارحیت اور بین الاقوامی قوانین کی خلاف ورزی ہے جس پر عالمی اداروں کو رد عمل دینا چاہیے ۔
انہوں نے کہا کہ اسلامی ممالک ہوش کے ناخن لیں اور اس وقت ایران کے دفاع کے لیے متحد ہوجائیں کیونکہ تنہا ایران ہی وہ ملک ہے جو ان عالمی دہشتگردوں اور ظالموں کے سامنے ڈٹ کر کھڑا ہے اور ایران کو پورا حق حاصل ہے کہ وہ اپنے ملک کی خود مختاری اور سالمیت پر کیے گئے حملے اور اسکے نتیجے میں ہونی والی قیمیتی شہادتوں کا بھرپور بدلہ لے۔ تمام مسلم امہ کو اپنے برادر اسلامی ملک ایران کے ساتھ کھڑا ہونا چاہئیے
انہوں نے مزید کہا کہ ایران کی غیور اور بہادر ملت کو ان شہادتوں پر تسلیت عرض کرتے ہیں ۔ اسرائیل یہ جان لے کہ کہ اسکے ظلم و بربریت کے دن اب گنے جا چکے ہیں ان شاء اللہ بہت جلد یہ دنیا اسرائیل کے ناپاک وجود سے پاک ہو جائے گی کیونکہ یہ وعدہِ الہی ہے کہ حق آئے گا اور باطل مٹ کر رہے گا۔
وحدت نیوز(قم المقدسہ) قم المقدسہ حرم حضرت معصومہ قم سلام اللہ علیہا شبستان الزہراؑ میں مجلس وحدت مسلمین شعبہ خواتین قم کی جانب سے محفل میلادِ امام ہادی علیہ السلام کا انعقاد کیا گیا جس میں مرکزی صدر ایم ڈبلیو ایم وومن ونگ محترمہ معصومہ نقوی نے خطاب کیا۔
انہوں نے اپنے خطاب میں امام ہادی النقی علیہ السلام کی سیرت و فضائل کے ساتھ ان کی سیاسی زندگی اور حالات حاضرہ پر بھی گفتگو کی۔ ایم ڈبلیو ایم وومن ونگ قم المقدس کی صدر محترمہ نگہت زہرا ، اور ان کی نائبین محترمہ ذکیہ بتول اور محترمہ تبسم شجر نے میلاد میں شریک پاکستانی مومنات کو خوش آمدید کہا ۔
وحدت نیوز(سرگودھا) مجلس وحدت مسلمین صوبہ شمالی پنجاب کی ورکنگ کمیٹی کا پہلا اجلاس جامعہ زینبیہ سرگودھا میں منعقد ہوا۔
مجلس وحدت مسلمین پاکستان صوبہ شمالی پنجاب کی آرگنائزنگ کمیٹی کا پہلا باضابطہ اجلاس زیر صدارت جناب حجت الاسلام والمسلمین علامہ سید احمد اقبال رضوی وائس چیئرمین مجلس وحدت مسلمین پاکستان منعقد ہوا۔
اجلاس میں مرکزی سیکرٹری سیاسیات مجلس وحدت مسلمین پاکستان جناب سید اسد عباس نقوی اور صوبائی نگران ورکنگ کمیٹی وسطی و شمالی پنجاب جناب حجت الاسلام والمسلمین علامہ علی اکبر کاظمی نے خصوصی شرکت کی۔
اجلاس کے دوران تنظیمی امور کے حوالے سے کئی اہم فیصلے کیے گئے۔ جناب حجت الاسلام والمسلمین علامہ سید ملازم حسین نقوی کو صوبہ شمالی پنجاب کا نائب نگران ورکنگ کمیٹی نامزد کیا گیا، جبکہ مولانا ظہیر کربلائی کو صوبہ شمالی پنجاب کا آفس سیکرٹری مقرر کیا گیا۔
اجلاس میں ورکنگ کمیٹی کے تمام معزز اراکین نے بھرپور شرکت کی، جن میں شامل تھے:
حجت الاسلام والمسلمین علامہ عبدالخالق اسدی
حجت الاسلام والمسلمین علامہ اصغر عسکری
حجت الاسلام والمسلمین ڈاکٹر ناظم حسین اکبر
حجت الاسلام والمسلمین علامہ صدا حسین ورک
برادر سید منتظر مہدی
حجت الاسلام والمسلمین علامہ استاد ذوالفقار حسین اسدی
حجت الاسلام والمسلمین علامہ ظہیر کربلائی
اجلاس کے شرکاء نے اس عزم کا اظہار کیا کہ مجلس وحدت مسلمین صوبہ شمالی پنجاب میں اپنے تنظیمی ڈھانچے کو مضبوط اور فعال بنانے کے لیے بھرپور جدوجہد کرے گی، تاکہ ملت تشیع کے حقوق کے تحفظ اور قومی وحدت کے فروغ کے لیے مؤثر کردار ادا کیا جا سکے۔
وحدت نیوز(اسلام آباد)طمجلس وحدت مسلمین پاکستان کے تحت ایران کے خلاف اسرائیلی جارحیت کے خلاف ملک گیر احتجاجات چاروں صوبوں سمیت آزادکشمیر و گلگت بلتستان میں بھی احتجاجی مظاہرے کئے گئے وفاقی دارالحکومت میں امامبارگاہ اثناعشری جی سکس ٹو کے باہر احتجاجی مظاہرہ کیا گیا احتجاجی مظاہرے میں علما اور بچوں سمیت شہریوں کی کثیر تعداد میں شرکت شرکا نے ایران پر اسرائیلی جارحیت کے خلاف امریکہ اور اسرائیل کے خلاف شدید نعرے بازی صدر مجلس علما مکتب اہلبیت علامہ سید حسنین عباس گردیزی احتجاجی مظاہر ے سے خطاب کرتے ہوئے کہا کہ اسرائیل ایک دہشتگرد رجیم ہے اور عالمی امن کے لئے خطرہ ہے اسرائیل نے پورے خطے کو جنگ میں جھونک دیا ہے اسرائیلی جارحیت میں مکمل طور پر امریکی مدد شامل ہے .عالم اسلام کو متحد ہو کر اسرائیل اور امریکی دہشتگردانہ کاروئیوں کا مقابلہ کرنا ہو گا.امریکہ نے اسرائیل کو خطے میں باولے کتے کی طرح چھوڑ دیا ہے .اسرائیل ہر ایک کو کاٹتا پھر رہا ہے ۔اسرائیل کا پٹہ امریکہ کے ہاتھ میں ہے ۔
مظاہرے سے خطاب کرتے ہوئے سید ظہیر عباس نقوی نے کہا کہ "امریکی سرپرستی میں ایران پر اسرائیلی حملہ بین الاقوامی قوانین، اقوام متحدہ کے منشور اور ریاستی خودمختاری کے اصولوں کی صریح خلاف ورزی ہے۔ اس جارحیت پر اسلامی دنیا کی خاموشی لمحۂ فکریہ ہے۔ وقت کا تقاضا ہے کہ تمام اسلامی ممالک اسرا ئ یل کے جارحانہ عزائم کے خلاف آواز بلند کریں اور برادر اسلامی و ہمسایہ ملک ایران کی سفارتی، اخلاقی اور ممکنہ حد تک عملی امداد کریں۔احتجاجی مظاہرے سے مولانا مصطفی حیدر نے خطاب کرتے ہوئے کہا کہ عالمی دہشت گرد اسرائیل اور اس کا سرپرست امریکہ نے مشرق وسطیٰ کو بدامنی، تباہی اور جنگ کی آگ میں دھکیل دی اہے ۔ یہ ناپاک سازش صرف ایران نہیں، بلکہ ہر آزاد اور غیرت مند مسلم ملک کے خلاف ہےہم مطالبہ کرتے ہیں کہ اقوام متحدہ، OIC اور مسلم دنیا اسرائیل کی اس بزدلانہ جارحیت کا نوٹس لے اور فوری کارروائی کرے۔
وحدت نیوز (جیکب آباد) مجلس وحدت مسلمین پاکستان کے مرکزی رہنماء علامہ مقصود علی ڈومکی نے ایک اعلیٰ سطحی وفد کے ہمراہ ڈپٹی کمشنر جیکب آباد نواب سمیر حسین لغاری سے ان کے دفتر میں ملاقات کی۔ ملاقات میں ضلع میں امن و امان کی صورتحال، محرم الحرام کی آمد اور عزاداری کے اجتماعات کے سکیورٹی انتظامات پر تبادلہ خیال کیا گیا۔ وفد میں مجلس وحدت مسلمین ضلع جیکب آباد کے صدر نذیر حسین جعفری، صدر یوتھ ونگ سید کامران علی شاہ، مجلس علمائے مکتب اہل بیت کے ضلعی صدر علامہ سیف علی ڈومکی، آل ڈومکی اتحاد کے وائس چیئرمین حاجی شاہ مراد ڈومکی، مظفر علی ٹالانی، زوار غلام مصطفی، جعفریہ الائنس کے ڈویژن جنرل سیکرٹری شاہنواز جعفری اور دیگر ذمہ داران شامل تھے۔
اس موقع پر گفتگو کرتے ہوئے علامہ مقصود علی ڈومکی نے کہا کہ ضلع جیکب آباد میں امن و امان کی بگڑتی ہوئی صورتحال تشویشناک ہے۔ نوجوانوں سے موٹر سائیکل اور موبائل فون چھینے جا رہے ہیں۔ ماہ محرم سے قبل مؤثر سکیورٹی اقدامات ناگزیر ہیں تاکہ عوام خصوصاً عزادار خود کو محفوظ محسوس کریں۔ انہوں نے مزید کہا کہ رضاکار اور اسکاؤٹس حسب روایت پولیس و رینجرز کے ساتھ عزاداری کے پروگراموں میں مکمل تعاون کریں گے۔ پولیس ہیڈکوارٹر میں حسب روایت اسکاؤٹس کے لئے پروگرام ہر سال کی طرح اس سال بھی پولیس کی زیرنگرانی رکھا جائے۔ خواتین کی مجالس عزاء میں سکیورٹی کے لئے لیڈیز پولیس کی تعیناتی کو یقینی بنایا جائے۔ محکمہ پولیس مزید لیڈی کانسٹیبلز بھرتی کرے تاکہ خواتین کے اجتماعات میں مؤثر سکیورٹی فراہم کی جا سکے۔
انہوں نے کہا کہ ضریح پاک امام حسین علیہ السلام کے حوالے سے سابق ڈپٹی کمشنر کا تحریری وعدہ تھا، اس پر عمل درآمد کیا جائے۔ انہوں نے اس بات کا اعادہ کیا کہ مجلس وحدت مسلمین ضلعی انتظامیہ اور پولیس کے ساتھ مکمل تعاون پر یقین رکھتی ہے۔ قیام امن ہم سب کی مشترکہ ذمہ داری ہے۔ اس موقع پر ڈپٹی کمشنر نواب سمیر حسین لغاری نے وفد سے گفتگو کرتے ہوئے کہا کہ ضلعی انتظامیہ اور عوام کا باہمی تعاون ہی ضلع میں امن و امان کی ضمانت ہے۔ تحصیل اور سب ڈویژن کی سطح پر تمام ذمہ داران کو ہدایت دی گئی ہے کہ وہ بانیان مجالس، عزاداروں اور دینی تنظیموں کے ساتھ مسلسل رابطہ رکھیں۔ انتظامیہ عزاداری کے اجتماعات کی سکیورٹی اور دیگر انتظامات کو یقینی بنانے کے لئے عزاداروں کے ساتھ بھرپور تعاون کرے گی۔
وحدت نیوز(کراچی) مجلس وحدت مسلمین پاکستان کراچی ڈویژن کے صدر علامہ شیخ محمد صادق جعفری نے ضلع غربی کی جانب سے ایران پر اسرائیلی دہشتگردانہ حملوں اور قیمتی جانوں کے ضیاع کے خلاف جامع مسجد حیدری، اورنگی ٹاؤن نمبر 10 کے باہر منعقدہ احتجاجی مظاہرے سے خطاب کیا۔ مظاہرے میں بڑی تعداد میں کارکنان، اور تنظیمی ذمہ داران شریک ہوئے۔ مظاہرین نے "مردہ باد اسرائیل" اور "مردہ باد امریکہ" کے فلک شگاف نعرے لگا کر غاصب صیہونی ریاست اور اس کے سرپرست امریکہ کے خلاف اپنے شدید غم و غصے کا اظہار کیا۔
علامہ شیخ صادق جعفری نے مظاہرین سے خطاب کرتے ہوئے کہا کہ اسرائیل کا ایران پر حملہ کھلی دہشتگردی اور عالمی قوانین کی بدترین خلاف ورزی ہے، امریکہ اور اسرائیل کا اتحاد عالم اسلام کے لیے مسلسل خطرہ بنا ہوا ہے۔ انہوں نے کہا کہ ایران کی اعلیٰ قیادت اور عوام نے ہمیشہ امتِ مسلمہ کے مفادات کا دفاع کیا ہے اور ان پر حملہ دراصل پوری امت پر حملے کے مترادف ہے۔ انہوں نے عالمی برادری سے مطالبہ کیا کہ وہ اسرائیل کے دہشتگردانہ اقدامات کا نوٹس لے اور مشرق وسطیٰ میں امن کے قیام کے لیے فوری کردار ادا کرے۔
