وحدت نیوز(اسکردو) سانحہ راولپنڈی کی آڑ میں بےگناہ عزاداروں، گلگت بلتستان کے طلباء اور مسافرین کی رہائش گاہوں اور گھروں پر چھاپے، بےجا گرفتاریاں اور تشدّد کے خلاف اسکردو میں جاری دھرنے آج حکومت کی یقین دہانی پر ختم کر دیئے گئے۔ اسکردو میں سانحہ راولپنڈی کی آڑ میں پنجاب حکومت کی جانبدارانہ کاروائیوں اور شیعہ دشمنی کے خلاف آج اسکردو میں دو مقامات پر دھرنے دیئے گئے۔ اس سلسلے میں حسین آباد اسکردو میں جامع مسجد چوک پر دھرنا دوسرے روز میں داخل ہو گیا جبکہ مجلس وحدت مسلمین پاکستان بلتستان ڈویژن تحصیل گمبہ اسکردو کی جانب سے بھی مالک اشتر چوک پر بھی دھرنا دیا گیا۔ مجلس وحدت مسلمین بلتستان ڈویژن کے سیکرٹری جنرل علامہ سید علی رضوی نے دھرنے سے خطاب کرتے ہوئے واضح کیا کہ پنجاب حکومت گلگت بلتستان کے گرفتار شدہ طلباء کو اگر شام تک رہا نہ کیا تو بلتستان بھر میں دھرنوں کا سلسلہ شروع کیا جائے گا جو بلتستان میں مسلم لیگ نون کے بلتستان میں خاتمے پر منتج ہو گا۔ دو روز سے جاری دھرنے آج گلگت بلتستان کے گرفتار طلباء کی رہائی کی یقین دہانی کے بعد پر امن طور پر ختم کر دیئے گئے۔

وحدت نیوز(ڈیرہ اسماعیل خان) مجلس وحدت مسلمین صوبہ خیبر پختونخوا کے وفد نے ضلع ٹانک کا دورہ کیا۔ وفد میں ایم ڈبلیوایم کے صوبائی سیکرٹری تنظیم سازی علامہ وحید عباس کاظمی، صوبائی سیکرٹری اطلاعات عدیل عباس، ضلعی سیکرٹری جنرل ڈی آئی خان علامہ زاہد علی جعفری شامل تھے۔ اس موقع پر وفد نے گرہ بلوچ اور ٹانک سٹی میں شیعہ عمائدین اور جوانوں سے ملاقات کیں۔ اس موقع پر علامہ وحید عباس کاظمی نے کہا کہ مجلس وحدت مسلمین انشااللہ جلد صوبہ بھر میں ایک منظم تنظیم کے طور پر ابھرے گی اور آئندہ بلدیاتی الیکشن میں اپنے بھرپور سیاسی وجود کے ساتھ وارد ہوگی۔ ان کا کہنا تھا کہ ٹانک شہدا کی سرزمین ہے، شہدائے کے خون سے وفا کرتے ہوئے ہمیں متحرک ہونا ہوگا۔

وحدت نیوز(ٹانک) مجلس وحدت مسلمین ٹانک کا اجلاس گرہم بلوچ میں منعقد ہوا۔ جس میں صوبائی سیکرٹری تنظیم سازی مولانا وحید عباس کاظمی صوبائی سیکرٹری اطلاعات عدیل عباس زیدی اور ضلع ڈیرہ اسماعیل خان کےسیکرٹری جنرل علامہ زاہد جعفری نے بھی شرکت کی۔ اس موقع پر کثرت رائے سے سید عبدالحسنین شاہ کو ایم ڈبلیو ایم ضلع ٹانک کا سیکرٹری جنرل منتخب کیا گیا۔ اس موقع پر صوبائی سیکرٹری تنظیم سازی علامہ وحید عباس کاظمی نے کہا کہ سرزمین شہداء ٹانک پر عظیم شہداءکا گرنے والا خون ہر گز رائیگاں نہیں جائے گا۔ مجلس وحدت مسلمین پاکستان نے تشیع پاکستان میں موجود مایوسی کو توڑا اور اسی طرح ٹانک کی سرزمین پر بھی تشیع اپنی آب و تاب کے ساتھ اپنے وجود کا اظہار کر ے گی، انہوں نے امید ظاہر کی کہ مجلس وحدت مسلمین پاکستان ٹانک میں جلد منظم اور متحرک تنظیم کے طور پر منظر عام پر آئے گی۔

وحدت نیوز(مظفرآباد) علامہ دیدارعلی جلبانی اتحاد و وحدت امت مسلمہ کے لیئے کوشاں سرگرم عمل کارکن اور صاحب علم و عمل انسان تھے، ان کی شہادت سے اتحادبین المسلمین کی کوششوں میں سرگرم کارکن اور صاحب علم و عمل انسان تھے، ان کی شہادت سے اتحاد بین المسلمین کی کوششوں کو بہت بڑا دھچکا لگا ہے ، ریاست بھر میں تین روزہ سوگ کا اعلان کرتے ہیں ۔ کراچی میں ٹارگٹ کلنگ کی مسلسل وارداتوں کے بعد وفاقی وزیر داخلہ اور سندھ حکومت کے قیام امن کے لیئے تمام دعوے دھرے کے دھرے رہ گئے، معلوم نہیں نام نہاد ٹارگٹ آپریشن کا فائدہ دہشتگردوں کو کیوں ہو رہا ہے؟ ان خیالات کا اظہار مجلس وحدت مسلمین آزاد جموں وکشمیر کے سیکرٹری جنرل علامہ سید تصور حسین نقوی الجوادی وحدت ہاؤس مظفر آباد سے جاری اپنے مذمتی بیان میں کیا ۔

انہوں نے کہا کہ وطن عزیز میں مساجد ، مدارس ، امام بارگاہ، ٹی وی چینلز، بازار و کاروبار سب غیر محفوظ ہو چکے ہیں۔قومی اداروں سے لوگوں کا اعتماد اُٹھتا جا رہا ہے، اب وقت آ گیا ہے کہ نئی عسکری قیادت دہشتگردی کے خاتمہ کے لیئے تطہیری عمل شروع کرے، جب تک فوج کے ذریعے آپریشن نہیں ہو گا پورے ملک بالخصوص کراچی کے حالات سدھرتے نظر نہیں آتے، کراچی میں منظم انداز سے شیعہ کشی کا سلسلہ جاری ہے، لوگوں کے گھروں میں گھس کر سر کاٹ لیئے جاتے ہیں ، یونیورسٹی کے طلباء کا قتل ہوتا ہے، ڈاکٹرز اور علماء کو شہید کردیا جاتا ہے، نجی ٹی و چینل کو نشانہ بنایا جاتا ہے، اس کے باوجود ملک کے حکمران دہشتگردوں سے مذاکرات کا راگ الاپ رہے ہیں، بعض قوتیں دہشتگردوں سے توجہ ہٹانے کے لیئے نان ایشوز کو ایشو بنا کر سیاست چمکا رہی ہیں۔ جبکہ ملک میں انسانی خون سے ہولی کھیلی جا رہی ہے۔

ریاستی سیکرٹری جنرل علامہ تصور جوادی نے کہا کہ قربانیاں اور شہادتیں ہمارے مؤقف میں تقویت کا باعث ہیں، حسین ؑ اور حسینیت کے راستے میں ہم ہر طرح کی قربانی کے لیئے تیار ہیں۔ انہوں نے کہا کہ کراچی میں علامہ دیدار جلبانی نے اتحاد بین المسلمین کے قیام کے لیئے اگر گرانقدر خدمات سر انجام دیں اور اسی پاداش میں انہیں قتل کر دیا گیا تا کہ شیعہ سنی اتحاد پارہ پارہ ہو جائے لیکن طاغوتی و استعماری ایجینٹ اس بات سے بے خبر ہیں کہ اتحاد امت وقت کی ضرورت بن چکا ہے،اور مسلمانوں کے اتحاد سے ہی فرقہ پرست دہشتگردوں کو شکست دی جا سکتی ہے۔ علامہ تصور نقوی الجوادی نے کراچی میں دیگرواقعات کے ساتھ ساتھ تبلیغی جماعت کے عہدیداران کے قتل کی بھی شدید مذمت کرتے ہوئے کہا کہ ایسے تمام واقعات کے پیچھے ایک ہی ہاتھ ہے ، وہ کہیں شیعہ کو کہیں سنی کو قتل کر کے مسلمانوں کو باہم دست و گریباں کرنا چاہتا ہے۔