وحدت نیوز(کوئٹہ) بلوچستان کے وزیر داخلہ میر سرفراز بگٹی نے گذشتہ روزمجلس وحدت مسلمین کے رکن بلوچستان اسمبلی سید محمد رضارضوی سے ملاقات کی۔علمدار روڈ کوئٹہ میں آغا رضا کی رہائش گا ہ پر ہو نے والی اس ملاقات میں صوبائی وزیر داخلہ میر سرفراز بگٹی نے آغا سید محمد رضا کی مرحومہ خالہ کی وفات پر تعزیت کا اظہار کرتے ہوئے ان کی مغفرت کیلئے دعاکی۔ رکن بلوچستان اسمبلی سید محمد رضا نے صوبائی وزیر داخلہ کا فاتحہ خوانی کیلئے آنے پر شکریہ ادا کیا۔ ملاقات کے دوران کوئٹہ سمیت صوبے کی مجموعی صورتحال کے بارے میں بھی مختصر گفتگو کی گئی۔

وحدت نیوز(اسلام آباد) مجلس وحدت مسلمین کے سربراہ علامہ ناصرعباس جعفری نے وفد کے ہمراہ بنی گالہ میں تحریک انصاف کے سربراہ عمران خان سے ملاقات کی جس میں سانحہ راولپنڈی کے بعد پیدا ہونے والی صورتحال پر تبادلہ خیال کیا۔وفد میں مجلس وحدت مسلمین کے سیکرٹری سیاسیات ناصر عباس شیرازی، علامہ شفقت شیرازی، مرکزی رہنماء فضل عباس نقوی اور نثار فیضی بھی شریک تھے۔اس موقع پر تحریک انصاف کے وائس چیئرمین شاہ محمود قریشی ، صوبائی صدر اعجازچودھری اور شہزاد سلیم بھی موجود تھے۔ ایم ڈبلیو ایم کے سیکرٹریٹ سے جاری بیان کے مطابق، دونوں جماعتوں کے سربراہان  نے سانحہ راولپنڈی کو بیرونی قوتوں کی سازشوں کا نتیجہ قرار دیا۔ بیان کے مطابق، راولپنڈی کا سانحہ راولپنڈی انتظامیہ کی مجرمانہ غفلت کا نتیجہ ہے، پنجاب حکومت زمہ داران کو فوری برطرف کرے،جمعہ کے روز ہونے والے احتجاجات کو پرامن ہونا چاہیے۔ دونوں جماعتوں نے ہر قسم کی دہشتگردی کی مذمت کی ہے اور قومی سلامتی کی بقاء کو دہشت گردی کے خلاف مشترکہ جدوجہد کا عزم کیا۔

وحدت نیوز (کراچی) سانحہ راولپنڈی کے حوالے سے پنجاب حکومت کی جانب سے قائم کمیشن کو مسترد کرتے ہیں، چیف جسٹس آف پاکستان کی سربراہی میں تین رکنی اعلیٰ سطحی کمیشن قائم کیا جائے۔سانحہ راولپنڈی سمیت ملک کے دیگر علاقوں میں مساجد اور امام بارگاہوں کو نذر آتش کئے جانے کے واقعات کا نوٹس لیا جائے اور سپریم کورٹ کی سربراہی میں کام کرنے والے اعلیٰ سطحی کمیشن کی تحقیقات کا دائرہ کار وسیع کیا جائے اور ان تمام واقعات کی تحقیقات منظر عام پر لائی جائے۔جمعہ بائیس نومبر کو ملک بھر کی طرح کراچی میں بھی ’’یوم دفاع عظمت نواسہ رسول (ص)‘‘ منایا جائے گا، احتجاجی مظاہرے اور ریلیاں نکالی جائیں گی۔میڈیا مالکان حکومت کی جانب سے کالعدم قرار دئیے جانے والی دہشت گرد تنظیموں کے مسلمہ دہشت گردوں کو ٹی وی چینلز پر دعوت دینا بند کریں ۔ ان خیالات کا اظہار شیعہ تنظیموں بشمول مجلس وحدت مسلمین پاکستان ، جعفریہ الائنس پاکستان ، شیعہ علماء کونسل پاکستان ، شیعہ ایکشن کمیٹی ، مرکزی تنظیم عزاء اور امامیہ اسٹوڈنٹس آرگنائزیشن پاکستان کے رہنماؤں مولانا حسن ظفر نقوی، علامہ عباس کمیلی، علامہ ناظر عباس تقوی، علامہ مرزا یوسف حسین، سلمان مجتبیٰ ، غیور حسین سمیت مولانا شبیر میثمی مولانا دیدار علی جلبانی، مولانا جعفر سبحانی ، علی حسین نقوی اور دیگر نے شیعہ تنظیموں کی جانب سے کی گئی ایک مشترکہ پریس کانفرنس سے خطاب کرتے ہوئے کیا۔

پریس کانفرنس سے خطاب کرتے ہوئے جعفریہ الائنس پاکستان کے سربراہ علامہ عباس کمیلی کاکہنا تھا کہ سانحہ راولپنڈ ی کے بعد کالعدم دہشت گرد تکفیری گروہ نے پورے ملک کو عدم استحکام کا شکار کرنے کی گھناؤنی کوشش کی ہے جس سے واضح ہوتا ہے کہ یہ تکفیری ٹولہ غیر ملکی ایماء پر پاکستان کی بنیادو ں کو کھوکھلا کرنے کے در پے ہے،سانحہ پنڈی کے فوراً بعد ملتان، چشتیاں سمیت کوہاٹ میں مساجد و امام بارگاہوں پر حملے اور دہشت گردانہ کاروائیاں در اصل اس بات کا ثبو ت ہیں کہ تکفیری دہشت گرد ٹولے نے پہلے سے طے منصوبہ بندی کے تحت عاشورا کے جلوس عزاء کے دوران ہنگامہ آرائی کی، خود اپنی مسجد کو نذر آتش کیا، بعد میں دیگر مساجد اور امام بارگاہوں کو نذر آتش کیا گیا اور پھر اس سلسلے کو ملک کے دیگر علاقوں میں پھیلانے کی کوشش کی تا کہ ملک کو غیر مستحکم کیا جائے اور فرقہ واریت کی آگ کو پھیلایا جائے تاہم پاکستان کے غیور اور بہادر شیعہ اور سنی مسلمانو ں نے اپنے اتحاد اوریکجہتی سے ان دہشت گردوں کے ناپاک عزائم کو خاک میں ملا دیا ہے۔ان کاکہنا تھا کہ سانحہ راولپنڈی کی آڑ میں دہشت گرد تکفیری گروہ چاہتا تھا کہ عید میلاد النبی(ص) اور عزاداری کے جلوسوں پر پابندی عائد کی جائے جبکہ انہی ملک دشمن اور اسلام دشمن دہشت گردوں کے شر سے پاکستان میں نہ تو اسکول کے بچے محفوظ ہیں، نہ ہی پولیس ، افواج پاکستان، سیکورٹی ادارے، مزارات مقدسہ،سیاسی و مذہبی جماعتوں کے رہنما محفو ظ ہیں اور نہ ہی ملک کا کوئی ادارہ ان کی دہشت گردانہ کاروائیوں سے محفوظ ہے، تاہم ضرور ی امر یہ ہے کہ کالعدم دہشت گرد تکفیری گروہ اور طالبان دہشت گردوں کے خلاف کریک ڈاؤن ہی ملک میں امن و امان کو بحال کر سکتا ہے ۔اسی طرح پاکستان میں بسنے والے مسیحی اور ہندو عوام کی عبادت گاہوں پر بھی حملے کئے گئے ہیں تو کیا ان کے جلوس نکالے گئے تھے جن پر حملے ہوئے ؟ دہشت گرد ی سے نمٹنے کا حل دہشت گردوں کا ملک سے خاتمہ ہے نہ کہ پاکستا ن کے شہریوں کے بنیادی حقوق سے ہی انہیں محروم کر دیا جائے۔

کانفرنس سے خطاب کرتے ہوئے مجلس وحدت مسلمین پاکستان کے مرکزی ترجمان علامہ حسن ظفر نقوی کاکہنا تھا کہ حکومت پنجاب کے وزیر رانا ثنا ء اللہ انتہائی متعصب اور تکفیری دہشت گرد ٹولے کے سربراہ کا کردار ادا کر رہے ہیں جو کہ قابل مذمت اور شرمناک فعل ہے، پاکستان کو بنانے کے لئے بانیان پاکستان کی اولادوں نے ماضی میں بھی قربانیاں دیں تھی اور آج تک مملکت پاکستان کے تحفظ کی خاطر اپنی جانوں کا نذرانہ پیش کر رہے ہیں، گذشتہ روز بھی گجرات میں ایک پروفیسر جو کہ ایک تعلیمی ادارے میں ڈائرکٹر کی حیثیت سے فرائض انجام دے رہے تھے دن دیہاڑے قتل کر دیا گیا لیکن پنجاب کے وزیر قانون رانا ثناء اللہ صاحب کے کان پر جوں تک نہیں رینگی لیکن دوسری جانب انہوں نے ایک تکفیری دہشت گرد ٹولے کی حمایت میں ایک ایسا کمیشن قائم کر نے میں ذرا برابر دیر نہیں لگائی کہ جس کا مفاد صرف اور صرف کالعدم دہشت گرد تکفیری ٹولے کو ملنا ہے، را نا ثناء اللہ ایک انتہائی درجے کے متعصب اور تکفیری دہشت گردوں کے قریبی ساتھی ہیں کہ جنہوں نے ماضی میں بھی تکفیری دہشت گردوں کو اپنی حمایت کی یقین دہانی کروائی اور آج تک اسی راستے پر عمل کر رہے ہیں، محر م الحرام سے قبل رانا ثناء اللہ نے علماء و ذاکرین سے مطالبہ کیا کہ ان سے لائسنس لے کر پنجاب میں مجالس عزاء سے خطاب کیا جائے تاہم ان کی بات رد ہونے کی صورت میں رانا ثناء اللہ نے اپنے تعصب کو دکھاتے ہوئے علماء و خطباء پر پنجا ب داخلے میں پابندی عائد کر دی جو کہ ان کی ہٹ دھرمی اور ملت جعفریہ سے تعصب کی واضح مثال ہے۔انہوں نے مطالبہ کیا کہ JITکی رپورٹ کے پس منظر کے تحت ا س مسجد کو فی الفور سیل کیا جائے جہاں سے منافرت اور شرانگیزی پھیلانے کا واضح ثبوت مل چکا ہے جبکہ شہروں میں موجود مدارس کو شہروں سے باہر ایجوکیشن سٹی بنا کر دئیے جائیں اور جس صوبے کا طالب علم ہو اسے اسی صوبے میں تعلیم حاصل کرنے کی اجازت دی جائے۔

مولانا حسن ظفر نقوی کاکہنا تھا کہ ہم شہباز شریف حکومت اور رانا ثناء اللہ کی جانب سے ایک تکفیری گروہ کے مفادات کے تحفظ کے لئے بنائے جانیو الے تحقیقاتی کمیشن کو مسترد کرتے ہیں اور مطالبہ کرتے ہیں کہ سپریم کورٹ کے چیف جسٹس کی سربراہی میں سپریم کورٹ کے اعلیٰ اور معتدل ججز کی نگرانی میں کمیشن قائم کیا جائے اور تحقیقات کا دائرہ کار وسیع کرتے ہوئے ملک کے دیگر علاقو ں میں بھی امام بارگاہو ں کو نذر آتش کئے جانے کے واقعات کا نوٹس لیا جائے اور تمام واقعات کی تحقیقات کی جائیں اور اعلیٰ سطحی کمیشن بغیر کسی تعصب کے تحقیقات کرے، ہم یہ سمجھتے ہیں کہ سانحہ راولپنڈی در اصل نواز حکومت ،پنجاب حکومت اور طالبان دہشت گردوں سمیت کالعدم دہشت گرد تکفیری ٹولہ ملوث ہے جس کا مقصد غیر ملکی ایماء پر پاکستان میں فرقہ واریت کی آگ کو پھیلانا اور دہشت گردوں کی حمایت کرنا ہے۔

مشترکہ پریس کانفرنس سے خطاب کرتے ہوئے شیعہ علماء کونسل پاکستان سندھ کے صدر علامہ ناظر عباس تقوی نے کہا کہ ہم وفاقی حکومت اور پنجاب حکومت کو متنبہ کرتے ہیں کہ اگر ملت جعفریہ کے خلاف سازشوں کا سلسلہ نہ روکا گیا تو سنگین حالات کی ذمہ داری وفاقی حکومت اور پنجاب حکومت پر عائد ہوگی اور مرکزی حکومت جان لے کہ پاکستان میں فرقہ واریت کی آگ کو نہیں پھیلنے دیں گے، اسلامی مقدسات کی حفاظت اور اتحاد اسلامی کی خاطر کسی قسم کی قربانی سے دریغ نہیں کیا جائے گا۔انہوں نے کہا کہ ہم سانحہ پنڈی کے حوالے سے میڈیا میں موجود متعصب اینکر شخصیات کی شدید مذمت کرتے ہیں جو زر خرید غلام بنے ہوئے ہیں اور حقائق پر پردہ ڈال کر بیان کیا جا رہا ہے ، ہم میڈیا مالکان کو متنبہ کرتے ہیں اور مطالبہ کرتے ہیں کہ ایسے افراد جو مسلمہ دہشت گرد ہیں اور دہشت گرد گروہوں کے سرپرست بھی ہیں جن کی درجنوں ایسی فوٹیجز موجود ہیں جس میں مسلمانوں کو کافر قرار دیا جا رہا ہے ، ایسے خطر ناک اور ملک دشمن افراد کو اپنے ٹی وی چینلز میں نہ بلایا جائے جو کہ پاکستانیوں کی دل آزاری کا باعث بنتا ہے۔میڈیا کو چاہئیے کہ وہ شام اور دیگر ممالک میں قتل ہونیو الے قتل عام کی تصاویر کو سانحہ پنڈی کے ساتھ منسلک نہ کرے اور پاکستان کے غیور عوام کو بتائے کہ اگر سانحہ پنڈی میں بہت بڑا قتل عام ہوا ہے تو پھر وہ دہشت گردو ں کی لاشیں کہا ں چلی گئیں؟اور ان کا تعلق کن علاقوں سے تھا اور وہ اس روز وہاں پر کیوں آئے تھے؟انہوں نے اعلان کیا کہ جمعہ بائیس نومبر کو ملک بھر میں ’’یوم عظمت نواسہ رسول (ص)‘‘ منایا جائے گا اور اس دن کی مناسبت سے شہر بھر میں وفاقی اور پنجاب حکومت کے خلااحتجاجی مظاہرے کئے جائیں گے، جبکہ اتوار چوبیس نومبر کو نمائش چورنگی پر عظیم الشان احتجاجی مظاہرہ کیا جائے گا۔

کانفرنس سے خطاب کرتے ہوئے شیعہ ایکشن کمیٹی کے سربراہ علامہ مرزا یوسف حسین، مرکزی تنظیم عزاء کے جنرل سیکرٹری سلمان مجتبیٰ ، آئی ایس او کے رہنما غیور حسین نے کہا کہ چونکہ ملک میں وسیع پیمانے پر قتل و غارت گری ، خود کش دھماکے اور دہشت گردی کا سلسلہ جاری تھا جس میں جی ایچ کیو پر حملے اور مہران بیس سمیت دیگر حساس مقامات اور پولیس کے جوانوں پر حملے ہو رہے تھے اور اس کے انسداد کے لئے حکومت نے وسیع تر مفاہمت کے لئے اے پی سی بلائی تھی تا کہ اتفاق رائے سے دہشت گردی کا مکمل انسداد ہو سکے اور مذاکرات اور مذاکرات کے بعد دہشت گردوں کے خلاف ایکشن لیا جانا طے پا چکا تھا،مذاکرات کی ناکامی کے بعد آپریشن شروع ہونے جا رہا تھا اسے روکنے کے لئے اور حکومت کی توجہ ایکشن سے ہٹانے کے لئے ملک بھر میں فرقہ وارانہ فسادات کا منصوبہ بنایا گیا اور اسی سلسلہ کی ایک کڑی راولپنڈی کا سانحہ ہے اگر چہ حکومت نے اس سلسلے میں ملک بھر میں یکم محرم سے خاطر خواہ اقدامات کئے جس کے نتیجے میں محرم میں کوئی نا خوشگوار واقعہ پیش نہیں آیا لیکن دہشت گردوں نے اپنا مشن جاری رکھا اور کراچی میں پولیس مقابلے میں دہشت گردوں کی ہلاکت کے بعد راولپنڈی میں جلوس عزاء کو نشانہ بنایا گیا۔اسی طرح دہشت گرد تکفیری گروہ جو شام میں شکست سے دو چار ہو رہے ہیں انہوں نے پاکستان اور عراق کو اپنی سازشوں کا نشانہ بنانے کی گھناؤنی سازشیں شروع کر دی ہیں اور پاکستان میں بے گناہ انسانوں کو قتل کیا جا رہا ہے۔ان کاکہنا تھا کہ آج مملکت خداد اد پاکستان میں بسنے والی بانیان پاکستان کی اولادوں (شیعہ اور سنی مسلمانوں ) نے ثابت کر دیا ہے کہ وہ آپس میں باہم متحد ہیں جبکہ کانگریسی ایجنٹ اور پاکستان و اسلام کے دشمن مملکت خداداد پاکستانکی بنیادوں کو کھوکھلا کرنے کے لئے گھناؤنی سازشوں میں مصروف عمل ہیں ،ہم یہ سمجھتے ہیں کہ پاکستان میں ڈرون حملوں سے بڑے ڈرون حملے تکفیری دہشت گردوں کے وہ فتوے ہیں جن میں مسلمانوں کو کافر قرار دیا جاتا ہے جس کی بنیاد پر ملک بھر میں بے گناہ انسانوں کا قتل عام کیا جاتا ہے، تاہم ایسے دہشت گردوں اور ان کے سرپرستوں کے خلاف فی الفور کاروائی ہونی چاہئیے ، ہم مطالبہ کرتے ہیں کہ ملک بھر میں کالعدم دہشت گرد تکفیری ٹولے کے خلاف فوری کریک ڈاؤن کیا جائے۔

وحدت نیوز(لاہور) مجلس وحدت مسلمین پنجاب سیکریٹریٹ میں منعقدہ اجلاس کے بعد لاہور کے تمام متولیان ، عزادان ، سالاران دستہ اور لائسنسدارن نے مشترکہ پریس کانفرنس کرتے ہو ئے کہا کہ مذکورہ سانحہ کی وجہ سے ملک کے اندر نفرت، بدامنی، فرقہ واریت کوتقویت ملی ہے۔ ہم اس وا قعہ پر گہرے رنج و غم کا اظہار کرتے ہیں اجلاس میں علامہ عبدالخالق اسدی،علامہ ابوذر مہدوی،علامہ وقارالحسنین نقوی،علامہ احمد اقبال رضوی،علامہ حسنین عارف ،علامہ مظہر نقوی، الحاج حیدر علی مرزا،خواجہ بشارت حسین کربلائی،آغا شاہ حسین قزلباش،سردار حر بخاری،سید امیر علی شاہ،سید نو بہار شاہ،سید سجاد حیدر بخاری،سیٹھ بشارت حسین،سمیت لاہور بھر سے عزادارن نے شرکت کی۔

اجلاس کے بعد پریس کانفرنس سے خطاب کر تے ہوئے سید اسد عباس نقوی ڈپٹی سیکرٹری جنرل مجلس وحدت مسلمین پنجاب نے کہا کہ یوم عاشورا کو راولپنڈی میں پیش آنے والے سانحہ کے بعد سے ملک بھر میں ملک دشمن اور اسلام دشمن تکفیری گروہ نے یہ کوشش کی ہے کہ مملکت خداداد پاکستان کو دہشتگردی اور فرقہ واریت کی آگ میں جھونک دیا جائے اور افسوس ناک بات تو یہ ہے کہ وفاقی اور پنجاب حکومت سمیت میڈیا میں موجود چند زر خرید غلاموں نے بھی ظالموں کو مظلوم بنا کر پیش کرنے کی کوشش کی ہے اور ملک دشمن عناصر کے ناپاک عزائم کی تکمیل میں کسی قسم کی کسر نہیں رکھی ہے جو کہ قابل مذمت ہے، راولپنڈی میں یوم عاشورا کے روز برآمد ہونے والے عزاداری سید الشہداء حضرت امام حسین علیہ السلام کے جلوس عزاء کی تاریخ ڈھائی سو سالہ پرانی ہے جو کہ قیام پاکستان سے قبل اپنے مقررہ راستوں سے گزرتا ہے جس میں نہ صرف شیعہ مسلمان بلکہ شہر کے اہلسنت مسلمان بھی شریک ہوتے ہیں، گذشتہ دنوں یوم عاشورا پر عزاداری کے جلوس عزاء کے دوران مسجد کے خطیب کی جانب سے لاؤڈ اسپیکر پر ایسی شر انگیز اور شرم ناک گفتگو کی گئی جو کہ نا قابل بیان ہے، مسجد کے خطیب نواسہ رسول اکرم (ص) حضرت امام حسین (ع) کے بارے میں گستاخی کرتے ہوئے کہا کہ امام حسین (ع) کا یزید کے خلاف قیام درست نہیں تھا اور امام حسین علیہ السلام کو یزید کی بیعت کرنی چاہئیے تھی اور ساتھ ساتھ مسجد کے خطیب نے عید میلاد النبی (ص) اور عزاداری کے جلوسوں کو خرافات کہتے ہوئے تنقید کا نشانہ بنایا گیا جس کے بعد جلوس عزاء میں موجود عزاداران امام حسین علیہ السلام نے انتظامیہ سے مطالبہ کیا کہ وہ اس مسجد کے لاؤڈ اسپیکر کو بند کروائے کہ جہاں سے نواسہ پیغمبر اکرم(ص) کے خلاف نازیبا کلمات بیان کئے جا رہے ہیں لیکن انتظامیہ مسجد کے خطیب کے سامنے بے بس رہی۔ہم یہ سمجھتے ہیں کہ سانحہ راولپنڈی کی سازش پہلے سے تیار کی گئی تھی اور مکمل منصوبہ بندی کے تحت پہلے مسجد کے لاؤڈ اسپیکر سے نواسہ رسول اکرم(ص) کی شان میں گستاخی کی گئی پھر شیعہ اور سنی مسلمانوں کے جلوسوں کو تنقید کا نشانہ بنایا گیا اور پھر مسجد کی چھت سے پتھروں کی بارش شروع کر دی گئی جبکہ پیچھے کی جانب سے مسجد اور ، مارکیٹ کو بھی اسی ناپاک منصوبہ بندی کے تحت نذر آتش کیا گیا، آخر یہ کون سے عناصر تھے جنہوں نے مسجد اور مارکیٹ کو پیچھے کی جانب سے دہشت گردی کا نشانہ بنایا ؟ یقیناًیہ وہی دہشت گرد ٹولہ تھا جسے ایک منصوبہ بندی کے تحت شہر میں ایک ٹوئٹر پیغام کے ذریعے بلایا گیا تھا ، جیسا کہ پاکستان عوامی مسلم لیگ کے رہنما شیخ رشید بھی اس بات کا تذکرہ کر چکے ہیں کہ مسجد اور مارکیٹ کو پیچھے کی سمت سے نذر آتش کرنے والے راولپنڈی کے شہری نہیں بلکہ شہر کے باہر سے آئے ہوئے مخصوص قسم کے دہشت گرد تھے۔دوسری اہم بات یہ ہے کہ مسجد اور مارکیٹ کو نذر آتش کرنے کے بعد اسی دہشت گرد ٹولے نے علاقے میں موجود مختلف مقامات پر چھ مساجد و امام بارگاہوں کو نذرآتش کیا گیا جہاں قرآن مجید کو بھی نذر آتش کر دیا گیا۔اس پوری تخریب کاری کی سازش در اصل دو روز پہلے تکمیل پا چکی تھی جو کہ ایک سوشل میڈیا پر چلائے جانے والے پیغام کے ذریعے کی گئی تھی جو کہ تکفیری دہشت گرد ٹولے کی ٹوئٹر سروس پر پیغام بھیجا گیاتھا اور کہا گیا تھاکہ تمام لوگ پندرہ نومبر کو مسجد پہنچیں تا کہ جلوس عزاء کو روکا جا سکے ہم پاکستان میں بیرونی ایجنڈے پر جلوس امام حسین (ع) اور جلوس عید میلاد النبی (ص) کے خلاف ہو نے والی سازشوں کی بھر پور پور مذمت کر تے ہیں ور اپنی تجاویزات اور اس اعلامیہ کے اہم نکات وفاقی حکومت اور صوبائی حکومت اور پاکستان کے شیعہ اور سنی غیرت مند اور محب وطن عوام کی خدمت میں پیش کرتے ہیں۔

اعلامیہ کے نکات درج ذیل ہیں۔

1۔مجلس عزاء، جشن عید میلاد النبیؐ، اور ان کے جلوسوں اور دیگر مذہبی پروگراموں پر پابندی کو قبول نہیں کریں گے کیونکہ آئین پاکستان نے ہر پاکستانی کو مکمل مذہبی آزادی فراہم کی ہے۔
2۔روز عاشورا حادثہ جامعہ تعلیم القرآن اور راولپنڈی اور دیگر شہروں سمیت سات امام بارگاہوں کی آتش سو زی، جس میں ہزاروں قرآن کریم کے نسخے ، شبیہ علم مبارک حضرت عباس ؑ علمدار اور دیگر تبرکات جل کر راکھ ہوئے، تمام واقعات کی پور زور مذمت کرتے ہیں اور اسکی غیر جانبدارانہ تحقیقات اور حقائق کو سامنے لانے کا مطالبہ کرتے ہیں۔
3۔جناب وزیر اعلیٰ پنجاب نے سب مجرموں کو کیفر کردار تک پہنچانے کا اعلان کیا ہے۔ ہم اس اعلان کی تائید کرتے ہیں اور مطالبہ کرتے ہیں کہ عدل و انصاف کا تقاضا یہ ہے کہ جناب وزیر اعلیٰ کے گزشتہ 6سالہ حکومت کے دوران دہشتگردی کے متعدد واقعات ہوئے ہیں جیسے سالِ گذشتہ سانحہ راولپنڈی، چند سال پہلے سانحہ یوم علی ؑ لاہور سمیت پنجاب بھر کے جملہ واقعات کے مجرموں کو سامنے لایا جائے اور کیفر کردار تک پہنچایا جائے کیونکہ یہ سب پنجاب کے شہری اور سب کے خون کی قیمت برابر ہے۔
4۔مذکورہ سانحہ کے بعد گرفتاریوں کے دوران گلگت، بلتستان اور پاراچنار کے نوجوانوں کو نشانہ بنایا گیا ہے اس سلسلے میں عدل و انصاف کے تقاضوں کو پورا کیا جائے اور بیلنس پالیسی سے صرف نظر کیا جائے۔
5۔بلا تفریق مذہب و مکتب تمام شر پسند عناصر کو سامنے لایا جائے اور سب کے خلاف قانونی کاروائی کی جائے۔
6۔محرم اور صفر میں عزاداری کا سلسلہ جاری رہے گا اس کیلئے تسلی بخش انتظامات کئے جائیں ہر جگہ عزاداروں سے بھر پور تعاون کیا جائے اور رکاوٹیں نہ ڈالی جائیں۔
7۔ہم اعلان کرتے ہیں کہ پاکستان میں کسی قسم کا کوئی شیعہ سنی مسئلہ نہیں ہے اور تمام مسالک آپس میں محبت اور اخوت سے رہتے ہیں۔ لہٰذا شرپسند عناصر اور دہشتگردوں سے سختی سے نیپٹا جائے۔
8۔ہم میڈیا، ٹی وی چینلز کا شکریہ اداکرتے ہیں کہ ا نہوں نے حقائق کو پہنچانے میں اور ماحول کو معتدل بنانے میں بھر پور کردار ادا کیا۔
9۔ہم مختلف مسالک کے اسلام دوست اور محب وطن علمائے کرام کا تہہ دل سے شکریہ ادا کرتے ہیں کہ انہوں نے سازش کو بروقت سمجھا اور اس کو بے نقاب کرنے میں ہر سطح پر بھر پور کردار ادا کیا۔
10۔ہم مرکزی اور صوبائی حکومت سے مطالبہ کرتے ہیں کہ ہر سطح پر مختلف کمیٹیوں میں تحقیقات اور فیصلہ جات میں شیعہ تنظیموں سمیت مجلس وحدت مسلمین کی شخصیات کو شامل کیا جائے تاکہ ہر سطح پر فیصلہ جات میں حقیقت پسندی اور اعتماد کی فضا قائم ہو سکے۔11۔ہم اس ملک کی تمام سیاسی پارٹیوں سے سوال کرتے ہیں کہ اس حساس موڑ پر ان کا کردار کیا ہے۔ کیا ان کی کوئی ذمہ داری نہیں ہے؟

اہم اعلان

علامہ راجہ ناصر عباس جعفری سربراہ مجلس وحدت مسلمین پاکستان کی اپیل پر لبیک کہتے ہوئے انشاء اللہ بعد از نماز جمعہ ان واقعات کی مذمت اور اپنے مطالبات کو آگے بڑھانے کیلئے بیرونِ کربلا گامے شاہ بھاٹی گیٹ پر بھر پور احتجاج کیا جائے گا جس میں تمام عزاداروں سے شرکت کی بھر پور اپیل ہے۔