The Latest
وحدت نیوز(ٹھری میر واہ) مجلس وحدت مسلمین پاکستان صوبہ سندھ کے سیکریٹری جنرل علامہ مختار احمد امامی نے ٹھری میر واہ میں شہید راہ وحدت علامہ دیدارعلی جلبانی کےمرقد پر حاضری دی اور خانوادہ شہید سے ان کے آبائی گھر جاکر تعزیت کا اظہار کیا ، اس موقع پر شہید علامہ دیدار جلبانی کے فرزند اور دیگر علمائے کرام بھی ان کے ہمراہ تھے۔ علامہ مختار امامی نے شہید علامہ دیدار جلبانی کے مرقد پر فاتحہ خوانی کی ۔ اس موقع علامہ مختار امامی کا شہید کے اہل خانہ سے گفتگو کر تے ہو ئے کہنا تھا کہ شہید ایک بے باک ، نڈر ، حق گو اور مجاہد عالم دین تھے ، مجلس وحدت مسلمین ایک سچے کارکن اور قوم ایک مخلص لیڈر سے محروم ہو گئی ہے ، شہید جلبانی نے انتہائی مختصر عرصے میں اپنا منفردمقام حاصل کیاتھا ، شہید کی شہادت سے پیدا ہو نے والا خلاء مشکل سے پر ہو گا۔
وحدت نیوز(اورکزئی ایجنسی) مجلس وحدت مسلمین اورکزئی ایجنسی کے ایک وفد نے مختلف علاقوں کے دورہ جات اور شیعہ عمائدین سے ملاقاتیں کیں۔ ایم ڈبلیو ایم اورکزئی ایجنسی کے سیکرٹری جنرل علامہ مصطفیٰ بہشتی نے ’’وحدت نیوز‘‘ کو بتایا کہ انہوں نے ایک وفد کے ہمراہ اورکزئی کے علاقہ کوریز اور حسین آباد کے دورہ جات کئے، اس موقع پر ڈپٹی سیکرٹری جنرل گلشن علی، علامہ معاذ، جنان استاد، عظیم خان، میجر (ر) سراج اور نقاب علی شامل تھے۔ مجلس وحدت مسلمین کے وفد نے اپنے اس دورہ کے دوران خیال دین، ملک شباب حسین، ملک نور اکبر، حاجی سردار خان سے ملاقات کی۔ ان عمائدین نے مجلس وحدت مسلمین کی بھرپور حمایت کا اعلان کرتے ہوئے ہر قسم کے تعاون کی یقین دہانی کرائی۔ ان کا کہنا تھا کہ ہمیں جو ذمہ داری سونپی جائے ہم نبھانے کیلئے تیار ہیں۔ ایم ڈبلیو ایم کے وفد نے حسین آباد کا بھی دورہ کیا، اور علامہ رفیق اور دیگر سے ملاقاتین کیں، اس موقع پر علامہ مصطفیٰ بہشتی نے مجلس وحدت مسلمین کے قیام کے اغراض و مقاصد اور اہداف سے آگاہ کیا۔
وحدت نیوز(کرائم رپورٹ) مجلس وحدت مسلمین نے یکم نومبر سے تین دسمبر تک ہونے والی شیعہ مسلمانوں کی ٹارگٹ کلنگ کی رپورٹ جاری کردی، جس کے مطابق، یکم نومبر سے لیکر تین دسمبر تک 40 سے زائد شیعہ افراد کو ملک کے مختلف شہروں میں ٹارگٹ کرکے شہید کردیا گیا۔ رپورٹ کے مطابق، یکم نومبر کو بلوچستان میں ہزارہ شیعہ برادری پر فائرنگ کی گئی جس میں 6 افراد شہید ہوئے، تین نومبر کو کراچی میں سپارکو آفس کے سامنے فائرنگ سے ماہر فلکیات حسن نامی شخص شدید زخمی ہوگیا۔ 4 نومبر کو کراچی ہی میں ڈاکٹر شیر علی پر فائرنگ کی گئی جس سے وہ جاں بحق ہوگئے۔ اسی روز ہی طارق روڈ پر فائرنگ سے ملتان سے تعلق رکھنے والے ڈاکٹر نسیم عباس اپنے دوست شہباز علی کے ہمراہ جاں بحق ہو گئے۔ فائرنگ کے ایک اور واقعہ میں گلشن اقبال میں عباس ٹان کے رہائشی شان محمد بخش ذوالجناح سمیت دم توڑ گئے۔
7 نومبر کو شہداد کوٹ میں کالعدم اہل سنت والجماعت کی ریلی سے ہسپتال چوک میں شیعہ دکانوں پر فائرنگ کی گئی جس میں 12 شیعہ افراد زخمی ہوگئے۔ اسی روز ہی کراچی کے علاقے ملیر کھوکھر اپار امام بارگاہ حیدری مشن کے قریب فائرنگ کا واقعہ پیش آیا جس میں سیدمختار حسین زندگی کی بازی ہار گیا۔ 9 نومبر کو ٹھٹھہ کے علاقے سٹی دڑومیں مجلس امام حسین پر فائرنگ کی گئی جس میں 6 عزادار زخمی ہوگئے۔ اسی روز ہی گوجرانوالہ کے علاقے شاہ رخ کالونی میں نماز صبح کے وقت نامعلوم افراد مسجد و امام بارگاہ زینبیہ میں گھس کر فائرنگ کی اور تین نمازیوں کو شہید کردیا۔ 11 نومبر کو شہرقائد کراچی کے علاقے خدا کی بستی میں جلوس عزا پر حملہ کیا گیا جس میں 7افراد زخمی ہوگئے۔
12 نومبرکو علی پور کے علاقے خان پور ڈومہ میں فائرنگ سے 4 اور خیرپور گمبٹ میں جلوس پر فائرنگ سے 5 افراد زخمی ہوگئے جن میں سے ایک زخمی دم توڑ گیا۔ اسی روز ہی لاہور کے علاقے دھوپ سڑی میں7 محرم کے جلوس پر فائرنگ سے ایک عزادار شہید اور پانچ زخمی ہوگئے۔ 14 نومبرکو نارتھ کراچی میں مسجد و امام بارگاہ مصطفوی کے باہر بم حملہ میں 2 افراد زخمی ہو گئے۔ اس سے قبل پہاڑ گنج میں امام بارگاہ ابو فضل عباس کے قریب دھماکے میں 2 زخمی ہوئے۔ ایک دن میں تین امام بارگاہوں کو نشانہ بنایا گیا۔ 14 نومبرکو ہی خوشاب محلہ اسلام پورہ میں مجلس کیلئے جانے والے عزاداران پر حملہ کیا گیا جس میں 3 افراد زخمی ہوگئے۔ 15 نومبرکو کراچی کے علاقے ناگن چورنگی کے نزدیک امام بارگاہ زین العابدین کے قریب کریکر دھماکے کیا گیا جس میں دو عزادار زخمی ہوگئے۔
16 نومبرکو ہنگو میں جلوس عاشورا پر دہشتگردوں نے مارٹر حملے گولے پھینکے تاہم کوئی جانی و مالی نقصان نہیں ہوا۔ 16 نومبر کو ہی مظفرآباد آزاد کشمیر میں جلوس پر پتھرا ہوا جس سے 20 عزادار زخمی ہوگئے۔ میڈیاری کوٹلی میں بھی جلوس پر پتھراو اور فائرنگ سے 5 عزادار زخمی ہوئے۔ 18 نومبرکو چشتیاں میں دہشتگرد ایوب نے سینکڑوں لوگوں کے ساتھ امام بارگاہ پر حملہ کیا، دہشتگردوں نے امام بارگاہ کو مکمل طور پر نذر آتش کردیا جبکہ وہاں پر موجود پانچ افراد کو زخمی کردیا گیا۔ 18 نومبر کو ہی کوہاٹ میں دہشتگردوں نے امام بارگاہ سید حبیب پر حملہ کیا جس میں ایک پولیس اہلکار سمیت تین افراد شہید ہوگئے۔ تیراہ بازار میں شیعہ دکانوں کو نذر آتش کر دیا گیا، فوج طلب کرلی گئی اور کرفیو نافذ کردیا گیا۔
19 نومبر کو جامشورو میں تکفیری دہشتگردوں نے حسینی امام بارگاہ پر نصب علم مبارک شہید کر دیا۔ اسی روز ہی گجرات یونیورسٹی کے ڈائریکٹر شبیر حسین شاہ اپنے ڈرائیور خادم حسین سمیت جلال پور روڈ پر یونیورسٹی جاتے ہوئے دہشت گردوں کی فائرنگ سے شہید ہو گئے۔ 20 نومبر کو کراچی میں قصبہ کالونی جعفریہ امام بارگاہ کے پاس دہشتگردوں کی فائرنگ سے دانش رضوی شہید ہو گیا اس واقعہ میں تین افراد زخمی ہوئے۔ 22 نومبر کو کراچی کے علاقے انچولی میں بلاک 17 اور 20 کو ملانے والی روڈ پر دو پلانٹڈ بم دھماکے کیے گئے جس کے نتیجے میں چھ افراد شہید اور کئی دکانیں اور گھر تباہ ہوئے۔ اس واقعہ میں دو اہل سنت برادران بھی شہید ہوگئے۔ 24 نومبر کو شبلان پارا چنار میں دو دھماکے ہوئے، جس کے نتیجے میں 2 افراد محمد حسین اور سرفراز علی شہید ہو گئے۔ جبکہ خاتون سمیت چار افراد زخمی ہوئے۔
24 نومبر کو کوئٹہ کے علاقے کیرانی روڈ پر ایک شیعہ عزادار محمد عارف کو فائرنگ کرکے شہید کر دیا گیا۔ 25 نومبر کو کراچی کے علاقے سرجانی میں منیر حسین کو اہلیہ کے ہمراہ شہید کر دیا گیا۔ 26 نومبرکو حیدرآباد کے علاقے لطیف آباد نمبر2 میں مجلس وحدت مسلمین کے علاقائی رہنما سید اختر زیدی کو فائرنگ کرکے شہید کر دیا گیا۔ 27 نومبرکو ضلع دادو کے علاقے جوہی بچل خان رند میں احمد شاہ بخاری کے مزار کو مسمار کر دیا گیا اور علم پاک کی بیحرمتی کی گئی۔ 29 نومبر کو کراچی کے علاقے گلشن مسکن چورنگی کے پاس دہشتگردوں کی فائرنگ سے کراچی یونیورسٹی کے طالب علم شباب حیدر اپنے اہلسنت دوست حمزہ کے ساتھ شہید ہو گئے۔ یکم دسمبر سے لیکر تین دسمبر تک علامہ دیدار حسین جلبانی سمیت پانچ افرد کو شہید کردیا گیا۔ پولیس ان واقعات میں ملوث کسی ایک بھی ملزم کو گرفتار نہیں کرسکی۔
وحدت نیوز(بلتستان) مجلس وحدت مسلمین پاکستان بلتستان ڈویژن کے ڈپٹی سیکرٹری جنرل و ترجمان فدا حسین نے اپنے ایک بیان میں کہا ہے کہ شہادت ہماری کمزوری نہیں بلکہ طاقت ہے، جانوں کو جسموں سے جدا تو کیا جاسکتا ہے، لیکن ہمیں دنیا کی کوئی طاقت اہداف سے نہیں ہٹا سکے گی۔ انہوں نے علامہ دیدار علی جلبانی اور انکے محافظ کی المناک شہادت پر گہرے دکھ اور غم کا اظہار کرتے ہوئے کہا کہ علامہ دیدار علی جلبانی کی شہادت سکیورٹی اداروں بالخصوص سندھ حکومت کے منہ پر طمانچہ ہے۔ انہوں نے کہا کہ سانحہ عاشورا کے بعد دشمن نے بزدلانہ حملوں کا سلسلہ تیز کر دیا ہے، یہ حملے ہمیں کمزور کرنے اور خوف میں مبتلا کرنے کی کوشش ہیں، لیکن دشمن کو معلوم نہیں کہ شہادت ہماری توانائیوں کا مرکز اور باعث افتخار ہے۔
وحدت نیوز(ملتان) وحدت یوتھ ونگ کے مرکزی چیئرمین سید فضل عباس نقوی نے گذشتہ روز کراچی میں ایم ڈبلیو ایم کراچی کے ڈپٹی سیکرٹری جنرل علامہ دیدار حسین جلبانی اور اُن کے محافظ کے قتل کی شدید مذمت کرتے ہوئے کہا کہ علامہ دیدار جلبانی کا قتل اسلام اور ملک دشمن عناصر کی کارروائی ہے۔ دشمن ملک میں فرقہ واریت کو ہوا دے کر پاکستان کو غیر مستحکم اور اسلام کو بدنام کرنے کی کوشش کر رہا ہے۔ ان خیالات کا اظہار اُنہوں نے وحدت یوتھ کے مرکزی سیکرٹریٹ میں جنوبی پنجاب کے کوارڈینیٹرز کے اجلاس سے خطاب کرتے ہوئے کیا۔ سید فضل عباس نقوی کا کہنا تھا کہ علامہ دیدار جلبانی نے اپنی زندگی مظلومین پاکستان و جہاں کے لیے وقف کر رکھی تھی اور مرتے دم تک یہ ثابت کر دیا کہ ہم ظالم کے مخالف اور مظلوم کے حامی ہیں۔ فضل عباس نقوی نے حکومت سے مطالبہ کیا کہ ملک بھر میں ہونے والی دہشت گردی اور ٹارگٹ کلنگ کا سختی سے نوٹس لیا جائے اور قاتلوں کو نہ صرف گرفتار بلکہ کیفر کرادر تک پہنچایا جائے۔ اگر شروع سے ہی قاتلوں کو سزائیں دی جاتیں تو اُنہیں ملک میں پنپنے کا موقع ہی نہ ملتا۔ اجلاس کے آخر میں کراچی میں شہید ہونے والے علامہ دیدار حسین جلبانی اور اُن کے محافظ کے لیے فاتحہ خوانی کی گئی۔
وحدت نیوز(کراچی) مجلس وحدت مسلمین صوبہ سندھ کے سیکرٹری جنرل علامہ مختار امامی نے وحدت ہاؤس کراچی میں تعزیتی اجتماع سے خطاب کرتے ہوا کہاکہ شہید مولانا دیدار علی جلبانی اور ان کے محافظ شہید سرفرازبنگش کے قاتل 48گھنٹے گزرنے کے بعدا بھی تک آزاد گھوم رہے ہیں حکومت سندھ اور قانون نافذ کرنے والے ادارے دہشتگردوں کو گرفتار کرنے میں ناکام نظر آرہے ہیں ۔ان کا کہنا تھا کہ مجلس وحدت مسلمین جمعہ کو سندھ بھر مین یوم احتجاج منائے گی،اس حوالے سے کراچی سمیت سندھ کے تمام چھوٹے بڑے شہروں میں قاتلوں کی عدم گرفتاری کے خلاف احتجاجی مظاہرے کیئے جائیں گے اور ریلیاں نکالی جائیں گی۔
علامہ مختار امامی کا کہنا تھا کہ علامہ دیدار جلبانی کے قاتل کسی سے پوشیدہ نہیں ، صوبائی حکومت اور سکیورٹی ایجنسیاں بخوبی جانتے ہیں کہ علامہ دیدار جلبانی سمیت دیگر بے گناہ شہریوں کے قاتل کہاں پناہ گزین ہیں ، ہم نے صوبائی حکومت کو متنبہ کیا تھا کہ علامہ دیدار جلبانی کے قاتلوں کو اگر فلفور گرفتار نہیں کیا گیا توپہلے مرحلے میں پورے سندھ میں بھر پور احتجاج کیا جائے گااگر تب بھی قاتل گرفتار نہ کیئے گئے تو اگلے لائحہ عمل کا اعلان کیا جائے گا۔
وحدت نیوز(لاہور) سانحہ عاشورہ راولپنڈی میں امام بارگاہ و مساجد کو نذر آتش کرنے والے دہشتگرد وں کی عدم گرفتار,بے گناہ شیعہ افراد کی گرفتاری، ملک میں جاری شیعہ نسل کشی، علامہ دیدار حسین جلبانی کے قاتلوں کی عدم گرفتاری کیخلاف مجلس وحدت مسلمین پاکستان نے تمام شیعہ تنظیموں، علماء ، ذاکرین، عزاداری،بانیان مجالس کی آل شیعہ پارٹیز کانفرنس 6دسمبر بروز جمعہ لاہور میں طلب کرلی۔ جس میں چاروں صوبوں سمیت آزاد کشمیر اور گلگت بلتستان سے نمائندہ وفود شریک ہوں گے۔
آل شیعہ پارٹیز کانفرنس میں ملتِ جعفریہ کے خلاف ہونے والی سازشوں پر آئندہ کے لائحہ عمل کا اعلان ہوگا۔ کانفرنس کی سربراہی مجلس وحدت مسلمین پاکستان کے سربراہ علامہ راجہ ناصر عباس جعفری کریں گے۔ کانفرنس کیاختتام پر اعلامیہ جاری کیا جائے گا۔ مجلس وحدت مسلمین پاکستان کے مرکزی سیکریٹری سیاسیات ناصر شیرازی ایڈووکیٹ کے مطابق اس آل شیعہ پارٹیز کانفرنس کے انعقاد کا مقصد ملک میں فقہ جعفریہ کے حقوق کا تحفظ ہے۔ ملتِ جعفریہ کو جس طرح سے دیوار سے لگانے کی سازش ہو رہی ہیں ان کیخلاف متفقہ لائحہ عمل کا اعلان بھی اسی کانفرنس میں کیا جائیگا۔
وحدت نیوز(کوئٹہ ) مجلس وحدت مسلمین کوئٹہ ڈویژن کے میڈیا سیل سے جاری کردہ بیان میں کہا گیا ہے کہ پارٹی کے تمام نامزد اُمیدوار کربلائی علی یاور حلقہ 14 ، سید رضا حلقہ 15 ، کربلائی رجب علی حلقہ12 ، حسنین نبی حلقہ 9 اور حمایت یافتہ اُمیدواران عباس علی حلقہ10 ، علی جان چیئر مین حلقہ16 اور جبران اعظم حلقہ11 بلدیاتی انتخابات میں اپنے اپنے حلقوں سے انتخابات ضرور لڑیں گے اور کسی کے حق میں دستبردار نہیں ہوں گے۔ کسی بھی حلقے میں دستبرداری کی خبریں صرف اور صرف مخالفین کی طرف سے پھلائی گئی جھوٹی افواہ ہیں۔ عوام جھوٹی افواہوں پر کان نہ دھریں اور 7 دسمبر کو اپنا قیمتی ووٹ مجلس وحدت کے نامزد اور حمایت یافتہ اُمیدواروں کے حق میں استعمال کر کے اُنہیں بھاری اکثریت سے کامیاب بنائیں۔ اس سے قبل بروز بدھ اور جمعرات مجلس وحدت کے مرکزی دفتر الحجت ہاؤس میں مختلف حلقوں کے اُمیدواروں اور پارٹیوں کے وفود نے پارٹی کے عہدیداروں سے ملاقاتیں کیں جسمیں حلقہ11 سے آزاد اُمیدوار جبران اعظم جنکا انتخابی نشان بطخ ہے کے وفد سے ملاقات کے بعد پارٹی عہدیداروں نے ان کی بھرپور حمایت کا اعلان کیا۔ حلقہ9 سے ایک آزاد اُمیدوار کے وفد سے ملاقات میں عہدیداروں نے حلقے کی صورتحال کو مد نظر رکھ کر انتخابات سے پہلے ریفرنڈم کرانے کی تجویز پیش کی تا کہ ایک ہی متفقہ امیدوار کو سامنے لایا جاسکے لیکن آزاد اُمیدوار اور اُن کے وفد نے سختی سے ریفرنڈم کو مسترد کر دیا بعد ازاں سیاسی کمیٹی کے ممبران نے حلقہ9 سے حسنین نبی کو انتخابات کے لئے بھر پور تیاری کی ہدایت کی۔ اجلاس میں کوئٹہ ڈویژن کے ڈپٹی جنرل سکریٹری مولانا ولایت حسین جعفری نے کہا کہ وہ اپنے پارٹی مفادات کو ہر چیز پر مقدم رکھتے ہیں اور انہوں نے پارٹی کے تمام فیصلوں پر مکمل اعتماد کا اظہار کرتے ہوئے ایک خاص تنظیم کی طرف سے شائع ہونے والے اخبار جس میں میٹینگ کا حوالہ دے کر ابہام پھیلانے کی کوشش کی گئی کی شدید مذمت کی۔
وحدت نیوز(اندرون سندھ) مجلس وحدت مسلمین کراچی ڈویژن کے ڈپٹی سیکریٹری جنرل علامہ دیدار علی جلبانی کی شہادت پر اندرون سندھ مختلف شہروں میں احتجاج کرتے ہوئے دھرنے دیئے گئے ریلیاں نکالی گئیں جبکہ ٹنڈو محمد خان میں شٹر ڈاؤن ہڑتال کی گئی تفصیلات کے مطابق سکھر میں شہید علامہ دیدار جلبانی اور ان کے محافظ شہید سرفراز بنگش کی شہادت کے خلاف مجلس وحدت مسلمین کی جانب سے سکھر میں احتجاجی مظاہرہ کیا گیا، مرکزی امام بارگاہ سکھر سے چوہدری اظہر حسین اور علامہ علی بخش سجادی کی قیادت میں نکالی جانے والی ریلی مختلف راستوں سے ہوتی ہوئی گھنٹہ گھر چوک پہنچی، ریلی کے شرکاء کراچی میں اہل تشیع برادری کے علماء کرام اور لوگوں کی شہادت کے خلاف سخت نعرے بازی کررہے تھے، ریلی کے شرکاء نے مختلف بازاروں اور چوراہوں پر احتجاج کرتے ہوئے گھنٹہ گھر پر دھرنا دیا۔ اس موقع پر مقررین نے اپنے خطاب میں کہا کہ سندھ حکومت کراچی میں آپریشن کی باتیں کرتی ہے لیکن دہشت گردوں اور قاتلوں کے خلاف کوئی آپریشن نہیں کیا گیا ہے، یہی وجہ ہے کہ آج دہشت گرد کھلے عام بے گناہ لوگوں کا قتل عام کر رہے ہیں اور حکومت، سیکیورٹی ادارے سب کچھ ٹھیک ہے کا نعرے لگانے میں مصروف ہیں۔ احتجاجی مظاہرین نے مطالبہ کیا کہ شہید علامہ دیدار حسین جلبانی کے قاتلوں کو فی الفور گرفتار کیا جائے۔
ہالا میں بھی کراچی میں جاری خونریزی کے دوران معروف شیعہ عالم علامہ دیدار جلبانی کی شہادت کے خلاف ہالا، نیو سعید آباد، مٹیاری، بھٹ شاہ، اڈیرولال میں شیعہ تنظیموں کی جانب سے احتجاج کیا گیا مولانا دوست علی سعیدی، زوار ولی محمد میمن، شیعہ علماء کونسل کے نائب صدر سید غلام علی شاہ اور دیگر نے مولانا دیدار علی جلبانی اور دیگر شہریوں کے قتل عام کی سخت مذمت کرتے ہوئے کہا ہے کہ اسلام اور پاکستان دشمن قوتیں عالمی دہشت گرد امریکہ کی قیادت میں براہ راست مسلم نسل کشی کے ساتھ فرقہ واریت کے ذریعہ مسلمانوں کو آپس میں لڑانے کی سازشوں میں مصروف ہیں انہوں نے کراچی سمیت ملک بھر میں پاکستانیوں کے قتال کو ختم کرانے کے لیے دہشت گرد ملزمان کی گرفتاری کا مطالبہ کیا۔ ماتلی میں شیعہ علماء کونسل کی اپیل پر ماتلی میں مکمل ہڑتال ہوئی، تمام دکانیں اور کاروباری مراکز بند رہے جبکہ ٹریفک معمول سے کم چلا، شہر میں نامعلوم افراد نے ٹائر جلائے جبکہ شیعہ تنظیموں کی جانب سے ریلی بھی نکالی گئی، ریلی کے شرکاء سے خطاب کرتے ہوئے مختلف مقررین نے علامہ دیدار جلبانی کی ٹارگٹ کلنگ کی سخت مذمت کی۔
ٹنڈو محمد خان میں علامہ دیدار علی جلبانی اور ان کے محافظ کی ٹارگٹ کلنگ میں ہلاکت کے خلاف مجلس وحدت مسلمین کی کال پر ٹنڈو محمد خان شہر میں مکمل شٹر ڈاؤن ہڑتال کی گئی جس کے باعث تمام کاروباری مراکز بھی بند رہے سڑکوں سے گاڑیاں معمول سے بہت کم رہی۔ دوسری جانب ایم ڈبلیو ایم کی جانب سے محب علی بھٹو کی قیادت میں مسجد علی سے احتجاجی جلوس برآمد کیا گیا جو شہر کے مختلف راستوں سے ہوتا ہوا پریس کلب کے سامنے پہنچا، اس موقع پر مظاہرین سے محب علی بھٹو، محمود الحسین لغاری، مولانا محمد بخش عزیزی اور محمد اشرف خاصخیلی نے خطاب کرتے ہوئے کہا کہ موجودہ حکومت ملک میں امن و امان کی صورتحال بہتر کرنے میں مکمل طور پر ناکام ہوچکی ہے اور دہشت گردی کی کارروائی میں علامہ دیدار جلبانی کی شہادت کی سخت مذمت کی اور حکومت سے مطالبہ کیا ہے کہ کراچی میں دہشت گرد عناصر کے خلاف فوری کارروائی کی جائے۔
ڈگری میں مجلس وحدت مسلمین کے ضلعی سکریٹری جنرل سید بشیر احمد شاہ نقوی اور دیگر رہنماؤں نے کراچی میں مجلس وحدت مسلمین کے رہنما مولانا دیدار جلبانی کی ٹارگٹ کلنگ میں دہشت گردی کی واردات میں ہلاکت پر شدید احتجاج کرتے ہوئے کہا ہے کہ اہل تشیع کے رہنماؤں کو گھناؤنی سازش کے تحت دہشت گردی کا نشانہ بناکر ملک و صوبے میں فرقہ وارانہ فسادات کرانے کی مذموم سازش کی جارہی ہے۔ وقت کا تقاضا ہے کہ مذہبی جماعتیں متحد ہوکر مذہبی منافرت اور دہشت گردی کے خاتمے کے لیے اپنا کردار ادا کریں۔
سیٹھارجہ میں علامہ دیدار علی جلبانی کی شہادت کے واقعے خلاف بدھ کے روز بھی سیٹھارجہ میں وحدت مسلمین کے رہنمائوں آغا طالب حسین بلوچ، زوار نثار احمد، سید احسان علی شاہ کی قیادت میں سیکڑوں کارکنوں نے احتجاجی ریلی نکالی اور حسینی چوک پر احتجاجی دھرنا دیا۔ دھرنے سے خطاب کرتے ہوئے رہنماؤں نے کہا کہ شیعہ علماء کو ٹارگٹ کرکے قتل کرنا اور مجرموں کو کیفر کردار تک نہ پہنچانا یہ عمل ملت جعفریہ کی برداشت سے باہر ہورہا ہے حکومت اپنے مفاہمتی عمل پر نظرثانی کرے اور شیعہ علماء کے قاتلوں کو فوری گرفتار کرکے ملت شیعہ کی بے چینی دور کی جائے۔ ٹھری میر واہ میں مجلس وحدت مسلمین کے رہنما مولانا دیدار جلبانی کے قتل کے سوگ میں ٹھری میر واہ شہر بند رہا اور مجلس وحدت مسلمین کی جانب سے ریلی نکال کر ناکہ نمبر 1 چوک پر دھرنا دیا گیا۔
بدین، لاڑکانہ اور ٹھٹھہ میں بھی ایم ڈبلیو ایم کے کارکنان نے علامہ دیدار جلبانی کی شہادت کیخلاف احتجاجی ریلیاں نکالیں، اس موقع پر شہر بھر میں شٹر ڈاؤن ہڑتال رہی، ریلی کی قیادت کرتے ہوئے طارق بدوی، بہادر میمن اور مختار دایو اور دیگر رہنماؤں نے کہا کہ علامہ دیدار جلبانی کی شہادت سانحہ راولپنڈی کا تسلسل ہے، ہم حکومت سے مطالبہ کرتے ہیں کہ جلد از جلد شہید اور ان کے محافظ کے قاتل گرفتار کئے جائیں ورنہ سندھ بھر میں ایسا احتجاج ہوگا جس سے حکومتی ایوانوں کے در و بام ہل جائیں۔ ان کا کہنا تھا کہ ہم ہمیشہ علامہ جلبانی شہید کا مشن جاری رکھیں گے اور ان کے قاتلوں کو رسوا کرتے رہیں گے۔
وحدت نیوز(فیصل آباد) مجلس وحدت مسلمین کراچی کےرہنما شہید علامہ دیدار جلبانی کی ٹارگٹ کلنگ کے خلاف فیصل آباد میں بھی پر زور احتجاج کیا گیا ، احتجاجی ریلی کی قیادت ایم ڈبلیو ایم فیصل آباد کے ضلعی سیکریٹری جنرل ڈاکٹر افتخار حسین نقوی نے کی، شرکائے احتجاج سے خطاب کر تے ہو ئے ڈاکٹر افتخار نقوی نے کہا کہ شہید علامہ دیدار جلبانی ایک ہمہ جہت شخصیت تھے ، ہر میدان میں ہر لمحہ حاضر نظر آتے تھے ، الیکشن میں بھر پور حصہ لیا اور مخالفین کی تمام تر سازشوں کا مردانہ وار مقابلہ کیا ، علامہ دیدار جلبانی کا قتل نہ صرف اہلیان کراچی کا بلکہ ملک بھر کے محب وطن عوام کا نقصان ہے، صوبائی حکومت جلد ازا جلد شہید علامہ دیدار جلبانی کے قاتلوں کو گرفتار کر کے کیفر کردار تک پہنچایا جائے ۔
