The Latest
وحدت نیوز(ملتان) مجلس وحدت مسلمین پاکستان کے مرکزی سیکرٹری جنرل علامہ راجہ ناصرعباس جعفری کے حکم پر 23 مارچ یوم پاکستان کے موقع مجلس وحدت مسلمین پاکستان کے تمام ہیڈکوارٹرز میں ''تقریب پرچم کشائی''منعقد ہوئی۔ ملتان میں مجلس وحدت مسلمین پاکستان کے مرکزی یوتھ سیکرٹریٹ میں ''تقریب پرچم کشائی '' منعقد ہوئی، تقریب کی صدارت مجلس وحدت مسلمین ملتان کے ڈپٹی سیکرٹری جنرل محمد عباس صدیقی نے کی۔ اس موقع پر مجلس وحدت مسلمین جنوبی پنجاب کے میڈیاکوارڈینیٹر محمد ثقلین، مولانا عمران ظفر، غلام قاسم خان، مہر سخاوت علی، سید دلاور عباس زیدی، مرزا وجاہت علی سمیت وحدت اسکائوٹس کی رہنمائوں نے بڑی تعداد میں شرکت کی۔ تقریب سے خطاب کرتے ہوئے محمد عباس صدیقی نے کہا کہ مجلس وحدت مسلمین پاکستان کی محب وطن مذہبی و سیاسی جماعت ہے، مجلس وحدت مسلمین نے پاکستان کے استحکام کے لیے بے شمار قربانیاں دی ہیں، اُنہوں نے کہا کہ آج ہم یوم پاکستان منا رہے ہیں لیکن دوسری طرف لاشیں اُٹھا رہے ہیں، آج شہداء کے ورثاء اس دھرتی سے تقاضا کررہے ہیں کہ پاکستان اسی مقصد کے لیے بنایا گیا تھا۔ آخر میں ملکی سلامتی، استحکام اور ترقی کی دعا کی گئی۔
وحدت نیوز(بلتستان) مجلس وحدت مسلمین پاکستان بلتستان ڈویژن کے سیکرٹری جنرل علامہ آغا علی رضوی نے اپنے ایک بیان میں کہا ہے کہ یوم پاکستان یوم تجدید عہد ہے اور یوم ایفائے عہد ہے۔ یوم پاکستان ہمیں وطن کی سربلندی اور استحکام کی خاطر سرگرم عمل رہنے اور اقبال و قائد کے خواب کو شرمندہ تعبیر کرنے کا حوصلہ بخشتا ہے۔ پاکستان میں بسنے والے غیور اہل سنت اور اہل تشیع نے اپنا سب کچھ لٹا کر اس مملکت کو حاصل کیا ہے اب ہماری ذمہ داری ہے کہ ہم اس کی نظریاتی و جغرافیائی سرحدوں کی حفاظت کے لیے اپنی جانوں کا نذرانہ پیش کریں۔ پاکستان اس وقت نرغہ اعداء میں ہے۔ ہنود، یہود اور سعود کی مداخلت سے دہشت گردوں نے ریاستی اداروں کو مفلوج کر کے رکھ دیا ہے اور پاکستان کے محب اور حقیقی فرزندوں کے لیے جینا دوبھر کر دیا ہے۔ اب پاکستان کے غیور اور محب وطن شیعہ و سنی جماعتوں کو 1940ء کے جذبے کے تحت متحد ہو کر دہشت گرد اور تمام ملک دشمن عناصر کا گھیرا تنگ کرنے کی ضرورت ہے۔ جب تک دہشت گردی کی عفریت سے ملک کو نجات نہیں ملتی مقصد حصول فراہم ہونا محال ہے۔
انہوں نے کہا کہ ملک کے انتظامی اداروں میں موجود دہشت گردوں اور ملک دشمنوں کے لیے نرم گوشہ رکھنے والے افراد کو واضح کر دینا چاہتے ہیں کہ وہ اپنا قبلہ درست کریں اور ریاستی دشمنوں کا گھیرا تنگ کریں اور حقیقی محب وطن شہریوں کو تعصبات کی بنیاد پہ الجھانے کا سلسلہ ختم کیا جائے۔ ہمارا ماضی گواہ ہے کہ ہم اس وطن کے باوفا بیٹے، حقیقی فرزند اور اس کی نظریاتی و جغرافیائی سرحدوں محافظ ہیں۔ ہماری حب الوطنی کو مشکوک نگاہ سے دیکھا جانا وطن عزیز سے خیانت کے مترادف ہے۔ انہوں نے کہا کہ خطے کی بہتری، شہریوں کی فلاح، وحدت کے فروغ اور ملک کے استحکام کے لیے ہم جانوں کا نذارانہ پیش کرنے کے لیے آمادہ ہیں۔
وحدت نیوز(خوشاب) مجلس وحدت مسلمین پاکستان صوبہ پنجاب کے سیکرٹری جنرل حجۃ الاسلام علامہ عبدالخالق اسدی نےضلع خوشاب کا دورہ کیا، علامہ عبدالخالق اسدی نے خوشاب کے نواحی علاقے نیتری میں دریائے جہلم کی جانب سے ملحقہ آبادی کے کطرے کے حوالے سے وزٹ کیا اور حالات کا جائزہ لیا علاوہ ازیں صوبائی سیکرٹری جنرل نے ضلع خوشاب کی ضلعی کابینہ کے وفد سے بھی ملاقات کی اور اجلاس میں پاکستان کے حالات کے حوالے سے خطاب کرتے ہوئے کہا کہ مذاکرات برابری کی بنیاد پر ہونے چاہیئے مگر طالبان سے مذاکرات شہدا ء کے خون کے ساتھ دھوکا ہےاور اس وقت پاکستان کے جو اہم اداروں کی نجکاری کی بات چل رہی ہے یہ پاکستانی معیشت کے اٹھتے ہوئے تابوت میں آخری کیل گاڑنے کے مترادف ہو گا اجلاس میں صوبہ پنجاب کے سیکرٹری شعبہ جوانان علامہ حسن رضا ہمدانی نے بھی شرکت کی۔
وحدت نیوز(چکوال) مجلس وحدت مسلمین ضلع چکوال نے یوم پاکستان کے دن دہشت گردی کے خلاف جنگ کے سویلین اور فوجی شہداء پاکستان کی قبروں پر حاضری دی اور شہداء کو مملکت خداداد کی حفاظت پر سلام پیش کیا-اس سلسلے میں ایم ڈبلیو ایم ضلع چکوال کے سیکریٹری جنرل حجتہ الاسلام مولانا اعجاز نقوی کی قیادت میں ایک وفد نے چکوال کے نواحی قصبہ بھون میں شہداء پاکستان کی قبروں پر پھولوں کی چادر چڑھا کر فاتحہ خوانی کی اس موقع پرایم ڈبلیو ایم چکوال کی ضلعی کابینہ اور مقامی انجمنوں کے ذمہ دران بھی موجود تھے-اس موقع پر مولانا اعجاز نقوی کا کہنا تھا کہ یوم پاکستا ن تجدید عہد کا دن ہے۔انہوں نے کہا کہ بد قسمتی سے پاکستان آج ان کے ہاتھو ں یرغمال ہیں جنہوں نے قیام پاکستان کے وقت کہا تھا کہ شکر ہے کہ ہم پاکستان بنانے کے گناہ میں شامل نہیں ہیں۔ ان کا کہنا تھا کہ وارثان پاکستان کا گلی گلی کوچہ کوچہ قتل عام کیا جا رہا ہے۔ پاکستان دشمن قوتیں اس ملک کے سالمیت کے درپے ہیں ایسے میں وطن عزیز کے باوفا بیٹوں کا فرض بنتا ہے کہ وہ اس مملکت خداداد کی حفاظت کیلئے میدان میں نکلیں اور اپنے آباو اجداد کے اس ورثے کی حفاظت کریں۔
وحدت نیوز(اسلام آباد) مجلس وحدت مسلمین کے سربراہ علامہ راجہ ناصرعباس جعفری نے یوم پاکستان کی مناسبت سے اپنے پیغام میں کہا کہ پاکستان کو دورِ حاضر میں جن مشکلات کا سامنا ہے ۔اُس میں اس غیور قوم کو پھر سے وہی تاریخ دہرانے کی ضرورت ہے۔جو قیام پاکستان کے وقت برصغیر کے مسلمانوں نے بے سروسامان کے عالم میں حب اوطنی اور شہادت کے جذبے سے سرشار ہو کر حصول پاکستان کیلئے پختہ عزم کیساتھ باطل قوتوں کے مد مقابل سینہ سپرہو کر مادرِوطن کی تحریک کو کامیابی سے ہمکنار کروایا۔آج پاکستان کو پھر سے وہی جذبوں اور قربانیوں کی ضرورت ہے۔آج ملک دشمن گروہ پاکستانیت کا روپ دھار کر قومی وحدت اور ملکی سلامتی کو نقصان پہنچا نے کے در پے ہیں۔قائد اعظم اور علامہ اقبال کے پاکستان میں مسلمانوں کے گلے نعرہ تکبیر لگاکر کاٹ رہے ہیں۔حکمران چند ڈالروں کے عوض ملکی سلامتی کے سودے کر رہے ہیں۔حواء کی بیٹیاں آج بھی چیخ چیخ کر حکمرانوں اور عدل کے رکھوالوں کو آ واز دے رہی ہیں کہ کیا انصاف پر صرف مقتدر قوتوں کا ہی حق ہے؟پاکستانیوں کے خون پسینے کی کمائی سے نااہل حکمران اپنی تجوریاں بھرنے میں مصروف ہیں ا س وقت نہ عوام کی جان محفوظ ہے نہ مال۔تھر اور چولستان میں لوگ بھوک سے مررہے ہیں ۔ دہشت گردوں کے ہاتھوں پورا ملک یرغما ل ہے۔پاکستانی عوام اور پاکستان کے محافظوںکے قاتلوں کو عام معا فی اور محب وطن عوام کو ہراساں کیا جا رہا ہے۔ایسے میں پاکستانی باہمت اور شجاع قوم کو یوم پاکستان پر عہد کرنا ہوگا کہ جس طرح ہمارے آباوُاجداد نے پاکستان کو حاصل کرنے کیلئے قربانیاں دی تھیں ۔آج پاکستان کو بچانے کیلئے ہم میدان عمل میں نکلیں اور وطن عزیز کو اندرونی اور بیرونی دشمنوں سے آزاد کرواکر حقیقی پاکستان کے وارثوں کو اس ملک کا حاکم بنائیں تاکہ خودمختار،پرامن اورخوشحال پاکستان کا خواب پورا ہو اور دنیا کیلئے وطن عزیز ایک مثال بن سکے ۔
وحدت نیوز(نجف اشرف) مجلس وحدت مسلمین نجف اشرف کے دفتر میں دعاء ندبہ کےبعد الشیخ ابوعلی بہبہانی مسئول دفترمقام معظم رہبری آیت اللہ خامنہ ای نے طلاب اور علماء کرام سے خطاب کرتے ہوئے کہا کہ آج پاکستان میں سنی اور شیعہ کو متحد دیکھ کر دشمن پریشان ہے ، ان کا مزیدکہنا تھا کے مجلس وحدت مسلمین آج پاکستان میں جو کام کر رہی ہے وہ کام امام زمانہ عجل اللہ تعالی کی تائید سے خالی نہیں ہے، آپ لوگ معاشرے کی خدمت میں الہٰی اقدار کی پابندی کو اپنا شعار بنائیں رکھیں ، انہوں نے حوزہ علمیہ نجف اشرف میں زیر تعلیم طلاب دینیہ کے مسائل پر بھی تفصیلی گفتگو کی ، آخر میں سیکریٹری جنرل مجلس وحدت مسلمین شعبہ نجف اشرف علامہ سید مہدی نجفی نے الشیخ ابوعلی بہبیانی کا دفتر مجلس وحدت مسلمین نجف اشرف میں آنے پر ان کا شکریہ ادا کیا۔
وحدت نیوز( کراچی) یوم پاکستان کے موقع پر وحدت ہاؤس میں منعقدہ اجلاس سے خطاب کر تے ہو ئے مجلس وحدت مسلمین صوبہ سندھ کے سیکریٹری جنرل علامہ مختار احمد امامی نے کہا کہ پاکستان کو آج انہیں قوتوں سے خطرات لاحق ہیں جنہوں نے قیام پاکستان کی مخالفت کی تھی ، پاکستان بچانے کے لئے قائد اعظم محمد علی جناح اورعلامہ محمد اقبال کے افکار ونظریات پر عمل کر نا ہو گا، ملک تاریخ کے نازک ترین دور سے گزر رہا ہے،موجودہ سیاسی و مذہبی لیڈرشپ نے تحریک پاکستان کے بزرگ اکابرین کی سیرت و کردار کو ترک کر دیا، پاکستان کی بقاء اور سلامتی کے لئے ہمیں حق کا ساتھ دینا اور باطل سے برائت کر نی ہو گی، انہوں نے کہاکہ حکمران وطن دشمن گروہوں کے ہاتھوں یرغمال ہو چکے ہیں، بھارت کے ساتھ تجارت کے خواہاں حکمران معصوم کشمیری ماؤں ، بہنوں، بچوں ، جوانوں اور بزرگوں کو خون فراماش کر چکے ہیں ، آج ہمارے حکمرانوں کو پر امن پاکستان سے زیادہ پر امن افغانستان کے خواہاں ہیں ، پاکستانیت ہمارے حکمرانوں کے روح سے نکل چکی ہے،کرپشن ذدہ ، خون آلود، لڑکھڑاتاپاکستان قائد اعظم محمد علی جناح اور مفکر پاکستان علامہ محمد اقبال کی ارواح کو تڑپاتا ہے۔ عوام کو خود آگے بڑھ کر پاکستان کی بقاء اور سالمیت کے لئے اپنا کردار ادا کرنا ہو گا، باہمی اتحاد و وحدت ہی ملک کو مسائل کی دلدل سے نکال سکتی ہے۔ یوم قرارداد پاکستان کے عظیم دن پر ہمیں وطن عزیز کے تحفظ کا عزم دھرانا ہو گا۔
وحدت نیوز(سکھر) سندھ کالعدم جماعتوں کی آماجگاہ بن چکا ہے، 3 شیعہ افراد کے قتل کی مذمت کرتے ہیں، خیرپور میں میر منظور تالپور کے قتل کی ذمہ داری وزیر اعلیٰ سندھ قائم علی شاہ پر عائد ہوتی ہے، اپنی ناکامی پر وہ فوری مستعفی ہوجائیں۔ ان خیالات کا اظہار مجلس وحدت مسلمین کے صوبائی سیکرٹری سیاسیات عبداللہ مطہری نے کراچی وحدت ہاؤس میں علامہ علی انور، علامہ مبشر حسن، حسن ہاشمی، حیدر زیدی، رضا نقوی، ناصر حسینی، ذیشان حیدر سمیت دیگر رہنماؤں کے ہمراہ جاری اجلاس سے خطاب میں کیا۔ اُن کا کہنا تھا کہ کراچی سمیت خیرپور میں گزشتہ 24 گھنٹوں میں 3 شیعہ افراد کی ٹارگٹ کلنگ حکومتی نااہلی کی واضح دلیل ہے۔
علامہ عبداللہ مطہری کا کہنا تھا کہ کراچی میں شیعہ پولیس اہلکار انوار جعفری، حیدرآباد میں شیعہ نوجوان غلام نبی اور خیرپور میں میر منظور تالپور کو حکومتی سرپرستی میں کالعدم جماعتوں کے دہشتگردوں نے نشانہ بنایا جانا اور واقعہ کی ایف آئی آر درج نہ ہونا جبکہ اس سے قبل مجلس و حدت مسلمین کی لبیک یا رسول اللہ کانفرنس کی حکومت کی جانب سے پرمیشن دینے کے بعد واپس لینا، جلسہ کی تشہیری مہم میں کام کرنے والے کارکنان کو قانون نافذ کرنے والے اداروں کی سر پرستی میں کالعدم گروہوں کے دہشتگردوں کی جانب سے نشانہ بنانا، واقعہ کی تاحال ایف آئی آر نہ کٹنا اس بات کی واضح دلیل ہے کہ واقع میں صوبائی حکومت ملوث ہے۔
علامہ عبد اللہ مطہری نے وفاقی حکومت اور چیف جسٹس آف پاکستان سے مطالبہ کیا کہ وہ صوبہ میں جاری شیعہ افراد کی نسل کشی میں ملوث دہشتگردوں کو فوری گرفتار کریں۔ علامہ عبد اللہ مطہری نے پاکستان پیپلز پارٹی کے چیئرمین بلاول بھٹو زرداری سے مطالبہ کیا کہ وہ سندھ حکومت میں موجود کالعدم دہشتگرد جماعتوں کے حمایت یافتہ خورشید شاہ اور قائم علی شاہ سمیت دیگر کالی بھیڑوں کو علیحدہ کریں تاکہ سندھ کو کالعدم جماعتوں کے تکفیری دہشتگردوں کی آماجگاہ بننے سے روکا جائے۔
وحدت نیوز(اسلام آباد) امامیہ رابطہ کونسل پشاور کے وفد نے مجلس وحدت مسلمین پاکستان کے مرکزی ڈپٹی سیکرٹری جنرل علامہ امین شہیدی سے اسلام آباد میں ان کی رہائش گاہ پر ملاقات کی۔ ملاقات میں پشاور میں ملت جعفریہ کو درپیش مسائل پر تفصیلی بات چیت کی گئی۔ وفد نے علامہ امین شہیدی کو پشاور میں ٹارگٹ کلنگ، شیعہ مخالف اقدامات اور دیگر مسائل سے آگاہ کیا۔ اس موقع پر علامہ امین شہیدی نے کہا کہ اگر مسائل کا حل نکالنا ہے تو سب سے پہلے ہمیں اپنا محاسبہ کرنا ضروری ہے، کہ ہم جو کام کر رہے ہیں وہ اپنی ذات یا شہرت کے لئے ہے، یا رضائے الٰہی کے لئے۔
انہوں نے کہا کہ اگر پشاور میں ہماری طرف کسی قسم کا تعاون درکار ہوا تو انشاءاللہ ہم ضرور کرینگے۔ ہماری دیرینہ خواہش ہے کہ پشاور کے اہل تشیع کسی بھی طرح اُٹھ کر اپنے حقوق کا دفاع کریں اور ہم بھی اس میں اپنا بھرپور حصہ ڈالنے کو تیار ہیں۔ علامہ امین شہیدی کیساتھ ملاقات کرنے والے وفد میں سید اظہر علی شاہ، سید ابرار حسین شاہ، بختیار راضی اور مجلس وحدت مسلمین خیبر پختونخوا کے آفس سیکرٹری ارشاد حسین بنگش شامل تھے۔ ملاقات میں اس بات پر اتفاق کیا گیا کہ پشاور کی سطح پر آئندہ مختلف قسم کے ملی پروگرام مشترکہ طور پر تشکیل دیئے جائیں گے۔
وحدت نیوز(مظفرآباد) مجلس وحدت مسلمین آزاد جموں و کشمیر سیکرٹری سیاسیات سید تصورعباس موسوی نے پاکستان سمیت دنیا بھر میں مقیم پاکستانیوں کو ’’ یوم قرار داد پاکستان‘‘ کی مبارکباد پیش کرتے ہوئے کہاکہ آزادی ایک ایسی نعمت ہے جس کاجتناشکرادا کیا جائے کم ہے جوقومیں اپنی آزادی کی قدر نہیں کرتیں ان قوموں اپنی قدرومنزلت وقت کے ساتھ کھودیتی ہے اورانکا نام صفحہ ہستی سے مٹ جا تا ہے ۔ یوم پاکستا ن کے مو قع پرایک بیان میں سیدتصور موسوی نے23؍ مارچ 1940ء کو بانیان پاکستان نے ایک قرارداد منظور کرکے برصغیر کے مسلمانوں کے لئے علیحدہ وطن پاکستان کی بنیاد رکھی لیکن آزادی کے باوجود پاکستان کے عوام کو دہشتگردوں اور ظالم حکمرانوں کے چنگل سے آزاد نہیں کرایا جاسکا ، کرپٹ سیاسی کلچر اور وسائل کی غیر منصفانہ تقسیم کے باعث پاکستان دولخت ہوگیا اور آج باقی ماندہ پاکستان کی سلامتی و بقاء خطرے میں دکھائی دے رہی ہے انہوں نے کہاکہ ملک میں فرقہ واریت اور انتہاء پسندی کی بڑھتی ہوئی کارروائیاں اورملک میں بسنے والے مختلف عقائد ،مسالک اور مذاہب کے ماننے والوں کوآ]س میں لڑانے کی سازشیں کی جاری ہیں لہٰذا ہمیں اپنی صفوں میں اتحاد و یکجہتی کی فضا ء کو پروان چڑھانا ہوگا۔ سید تصور موسوی نے کہا کہ مجلس وحدت مسلمین پاکستان میں ایسے معاشرے کی تشکیل چاہتی ہے جسکا خواب قائد اعظم محمد علی جناحؒ اور علامہ اقبالؒ نے دیکھا تھا تاکہ پاکستان سے ہشتگردی ،موروثی سیاست کا خاتمہ ہو اور ملک میں غریب و مظلوم عوام کی اسلامی طریق کارکے مطابق حکمرانی قائم کی جاسکے ۔
