وحدت نیوز(لاہور) مجلس وحدت مسلمین پنجاب کے زیر اہتمام صوبائی آفس لاہورمیں شام کی موجودہ صورتحال پر خصوصی سیمینار منعقد ہوا۔جس میں مرکزی ڈپٹی سیکریٹری جنرل علامہ سید شفقت حسین شیرازی صاحب نے خصوصی خطاب کیا۔سیمینار سے خطاب کرتے ہوئے حجتہ السلام والمسلمین علامہ سید شفقت شیرازی نے کہا کہ شام میں خراب حالات کا ذمہ دار سعودی عرب ہے۔اس وقت امریکہ بھی شام کے موضوع پر سعودیہ کا ساتھ چھوڑ چکا ہے جبکہ اس سارے کارِشیطانی میں قطر ،ترکی،سعودیہ ، اسرائیل اور امریکہ نے اپنا اپنا حصہ ڈالااس ساری جنگ کا مقصد اسرائیل کو فائدہ پہنچانا اور دنیا بھر میں شیعہ سنی وحدت کو تارتار کرنا تھا ۔آج شام میں اصحابؓ رسول اور بزرگان دین کے مزارات کی بے حرمتی کرکے شیعہ سنی فسادات کا بیج بویا جا رہا ہے اور پاکستان کے علاوہ دنیابھر سے سادہ لوح اہل سنت کو جھوٹ بول کر شام کیخلاف تیار کیا گیا جبکہ شام میں 80 فیصد حکومت میں ہمارے اہل سنت برادران شامل ہیں ۔ شام میں خراب حالات میں ملوث خائن ہیں جو کہ امریکہ ،اسرائیل اورسعودیہ سے ہیں۔ پاکستان پرمزید گفتگو کرتے ہوئے انہوں نے کہا کہ پاکستان میں شیعہ سنی کا قتل عام کیا جا رہا ہے جبکہ دنیا بھر میں شیعہ سنی متحد ہیں اور ایک دوسرے کی ہر لحاظ سے مدد بھی کرتے ہیں سیمینار میں صوبائی سیکرٹری جنرل پنجاب علامہ عبدالخالق اسدی ، کوارڈینیٹر وزیراعلیٰ پنجاب الحاج حیدر علی مرزا اور صوبائی سیکریٹری مالیات رائے ناصر علی نے شرکت کی ۔

وحدت نیوز(اسلام آباد)اسمائیلی برادری کی جانب سے میریٹ ہوٹل اسلام آباد میں سیرت پیغمبر اکرم صل اللہ و علیہ و آلہ وسلم کانفرنس کا انعقاد کیا گیا جس میں خصوصی خطاب مجلس وحدت مسلمین پاکستان کے مرکزی ڈپٹی سیکریٹری جنرل علامہ امین شہیدی نے کیا جب کہ مجلس وحدت مسلمین پاکستان کے مرکزی سیکریٹری امور خارجہ نے خصوصی شرکت کی اس موقع پر جے یو آئی کے سینیٹر طلحٰہ محمود سمیت بڑی تعداد میں معززین شہر اور طلباءو طالبات موجود تھے۔

سیرت کانفرنس سے خطاب کر تے ہو ئے علامہ امین شہیدی کا کہنا تھا کہ سیرت ختمی مرتبت (ص)تمام عالمین کے لیئے مشعل راہ ہے، اسی سیرت طیبہ کی سعی کر تے ہوئے ہم اپنے معاشرے کی تمام نا ہمواریوں اور بے ضابطگیوں کا علاج کر سکتے ہیں، اسلامی معاشرے میں موجود تمام تبقات کے مساوی حقوق کے حصول کے لئے ہمیں سیرت پیغمبر اکرم (ص)کی پیروی کر نا ہو گی،جب تم ہم اپنی زندگیوں کو تعلیمات محمدی (ص)کے سانچے میں نہیں ڈھالیں گے ہماری معاشرتی مشکلات کا ازالہ ممکن نہیں ۔

وحدت نیوز(بلتستان) مجلس وحدت مسلمین پاکستان کے سیکرٹری جنرل علامہ ناصرعباس جعفری نے اپنے دورہ  بلتستان کے موقع پر ضلع گنگچھے خپلو میں مرکزی امامیہ جامع مسجد میں  جمعہ کے اجتماع سے خطاب کرتے ہوئے کہا ہے کہ جو قوم کمزور ہوتی ہے وہ اپنی منزل تک نہیں  پہنچ سکتی۔ ان کے حقوق کو پاوں  تلے روندا جاتا ہے، ہماری ذمہ داری ہے کہ ہم اپنے امور میں  نظم پیدا کریں  اور طاقتور بنیں،  جب تک ہم طاقتور نہیں  بنیں  گے، نہ ہم ظالموں  سے اپنے حقوق حاصل کرسکتے ہیں  اور نہ ہی مظلوموں  کی معاونت کرسکتے ہیں۔ ہم گلگت  بلتستان کے پہاڑوں  سے کراچی کے سمندر تک قوم کو وحدت کی لڑی میں  پرو دیں  گے۔ ملک کے مظلوم اور محکوم طبقے ظلم سے ٹکرانے کے لیے گھروں  سے نکل پڑیں  تو ظالم ان کے سامنے کھڑا نہیں  ہوسکتا اور کوئی بھی مرحب و عنتر ہمارا مقابلہ نہیں  کرسکتا۔ انہوں  نے کہا کہ شہید قائد کے فرمان کے مطابق ہم ہر ظالم کے مخالف ہیں  چاہے شیعہ ہی کیوں  نہ ہو اور ہر مظلوم کے حامی ہیں،  چاہے کافر ہی کیوں  نہ ہو۔ آج ہماری مادر وطن خون آشام دہشت گردوں  کے چنگل میں  جکڑا ہوا ہے جو نفرتیں، قتل و غارت، فرقہ واریت پھیلا رہا ہیں، تاکہ اس وطن کے بیٹے نفرت کی آگ میں  جل کر راکھ ہو جائیں۔ ملک دشمن طاقتوں  نے ہمیں  شیعہ، سنی، نوربخشیہ، اسماعیلی اور دیگر تعصبات میں  تقسیم کرکے اس ملک کو کمزور کر دیا ہے، دہشت گردی اور فرقہ واریت کے ذریعے ملک کو عدم استحکام کی طرف دھکیل دیا ہے، جسے اس ملک کے غیور بیٹے کامیاب ہونے نہیں  دیں  گے۔

ایم ڈبلیو ایم کے سربراہ کا کہنا تھا کہ جس ملک میں ہم رہتے ہیں، اس میں حکمران غریب عوام پر مظالم کے پہاڑ ڈھا رہے ہیں۔ گلگت بلتستان کے عوام سب سے زیادہ اس ملک میں مظلومیت کا شکار ہیں۔ اس خطے کے غیور عوام پر 67 سالوں سے ظلم کا سلسلہ جاری ہے۔ مادر وطن کو زور بازو سے اس خطے کے فرزندوں نے آزاد کرایا۔ گلگت بلتستان کے عوام مادر وطن کے محسن ہیں۔ حکمران اس خطے کو محروم رکھنے کے لیے یہاں کے لوگوں کو آپس میں لڑا رہے ہیں۔ یہاں پر ہسپتالوں اور تعلیمی اداروں کو تباہ و برباد کیا گیا۔ تعلیم جیسے مقدس پیشے کو رشوت اور سفارش کے ذریعے بدنام کیا گیا اور نئی نسل کے مستقبل سے کھیلا گیا۔ یہ جنت نظیر علاقہ پاکستان کا سب سے ترقی یافتہ خطہ بن سکتا ہے۔ اس خطے کے وسائل سے پاکستان کی معیشت کو بہتر بنایا جاسکتا ہے۔ لیکن اس خطے کے حکمرانوں نے اس خطے کے وسائل کو دونوں ہاتھوں سے لوٹنے کے علاوہ عوام کو کچھ بھی نہیں دیا۔ یہاں تک کہ عوام سے جینے کا حق بھی چھیننے کے لیے غریبوں کے منہ سے نوالا چھینا جا رہا ہے۔ اب گلگت بلتستان کے غیور عوام منظم اور متحد ہو کر اپنے حقوق کی جنگ لڑنے کے لیے 10 دنوں کے لیے اپنے گھروں سے باہر نکلیں تو ہم وعدہ کرتے ہیں کہ پورے ملک میں لاکھوں عوام گلگت بلتستان کے آئینی حق کے لیے سڑکوں پر نکل آئیں گے اور دنیا بھر میں آواز بلند کریں گے۔ صرف دس روز کے لیے اپنے حقوق کی خاطر گلگت بلتستان کے غیور فرزندان متحد ہو کر سڑکوں پر نکل آئیں تو حکمرانوں کی جرائت نہیں کہ جی بی کو حقوق سے محروم رکھیں۔

وحدت نیوز(حیدرآباد)ایک بار پھر شام میں دہشتگردوں نے رسول خدا (ص)کے پیارے صحابیوں حضرت اویس قرنی ، حضرت سلمان فارسی، حضرت عمار یاسر کی قبروں کی بے حرمتی کی ہے آخر کب تک یہ دہشتگرد ہمارے مقدسات کی بے حرمتی کرتے رہیں گے اس دنیا میں آخر اتنے مسلمان ہیں کیوں نہیں متحد ہوکر ان دہشتگردوں تکفیریوں کے خلاف آواز اٹھاتے ان خیالات کا اظہار مجلس وحدت مسلمین ضلع حیدرآبادکے سیکریٹری جنرل علامہ امداد علی نسیمی اور علامہ گل حسن مرتضوی نے ناصر ملت علامہ راجہ ناصر عباس جعفری کی اپیل پر قدم گاہ مولاعلی(ع) کے باہر بعد نماز جمعہ یوم عظمت ناموس صحابہ (رض)کے موقع پر احتجاجی مظاہرے سے خطاب کر تے ہو ئے کیا۔

مقررین کا کہنا تھا کہ اٹھو مسلمانوں اتنی بے حرمتی ہورہی ہے رسول خدا(ص)کے صحابیوں کے مزاروں کی کیوں نہیں اٹھتے کیوں نہیں متحد ہوتے ایسا نہ ہوکہ دہشتگرد دوسرے مقامات کی بے حرمتی کریں خدارا ان تکفیریوں کے خلاف آواز اٹھائیں ورنہ یہ دہشتگرد ہمارے مقدسات کو اسی طرح بے حرمت کرتے رہیں گے میں آپ کو بتانا چاہتا ہوں کہ ہمارے ملک بھی دہشتگردی کا شکار ہے ہمارے حکمران مذاکرات کے لولی پاپ کے مزے سے باہر نکلنا نہیں چاہتے کیوں کہ پوری قوم کو مذاکرات کی طرف متوجہ کیا ہوا ہے میرے پیارے شیعہ سنی بھائیوں آپ جانتے ہیں کہ ہمیشہ کی طرح یہ دہشتگرد اپنی کارروائیوں میں کبھی مسجد ، امام بارگاہ ،چرچ ، اسکول ، کورٹ اور ہمارے جوانوں پر حملہ کرتے ہیں پر حکمرانوں کو کوئی فرق نہیں پڑتا افسوس کی بات ہے کہ کبھی بھی حکمرانوں نے یہ نہیں سوچا کہ مٹھی بھر دہشتگرد پاکستان کا کچھ نہیں بگاڑ سکتے تو پھر یہ مذاکرات آخر کیوں ؟ کیا مذاکرات کا ڈرامہ عوام کو دکھا کر شام میں تکفیریوں کی مدد کیلئے دہشتگردوں کو شام بھیجا جارہا ہے اور عوام کو پتہ نہیں حکومت یہ نہ سمجھے کہ عوام کو کچھ پتہ نہیں یہ مذاکرات صرف اور صرف ڈرامہ ہے اس ڈرامہ کا آخری ڈراپ سین حکمرانوں کیلئے بہت ہی بھیانک ہوگا ۔ آخر میں ہم ہالاناکہ میں غلام نبی مومن کے قاتلوں کی گرفتاری کا مطالبہ کرتے ہیں اور خیرپور میں دہشتگردوں نے بے گناہ میر منظور ٹالپور کو دہشتگردی کا نشانہ بنایا اور مطالبہ کرتے ہیں ان قاتلوں کو بھی فوراً گرفتار کیا جائے اور کچھ دیر پہلے فتح چوک پر کچھ دہشتگردوں نے حیدرآباد کی فضا خراب کرنے کے لئے ہندو برادری کے مندر کو نظر آتش کیا اور ان کے لوگوں کو زدوکوب کیا ہم اس واقعہ کی پرزور مذمت کرتے ہیں۔