The Latest
وحدت نیوز(اسلام آباد) مجلس وحدت مسلمین پاکستان کے مرکزی سیکر ٹری فلاح وبہبود نثارعلی فیضی نے کہا کہ تھر حکمرانوں کے لیے ایک آئینہ ہے جس میں وہ اپنی امارت اور عوام کی غربت کے تضاد کو دیکھ سکتے ہیں سندھ میں موجود وڈیرہ ازم اور جاگیر دارانہ نظام آج بھی حکمرانوں کو عوامی مسائل سے نا بلد رکھے ہوئے ہے اور اس کا نتیجہ ہے کہ لوگ بھوکھے پیاسے مر رہے ہیں حکمرانوں کو اپنی کرسی،وزار تیں اور اقتدار سے بڑھ کر کچھ بھی عزیز نہیں پاکستان پیپلز پارٹی جسکا نعرہ ہی روٹی ،کپڑا اور مکان ہے اسی کے گڑھ سندھ میں لوگ بھوک اور غربت سے مر رہے ہیں انکا کوئی پرسان حال نہیں ہے جو اسکی کار کردگی پر سوالیہ نشان ہے اور آج کھوکھلے نعروں اور نا پختہ لیڈر شپ کی غیر سنجیدہ تقریروں تک محدود ہو کر رہ گئی ہے کوئی عملی اقدامات نظر نہیں آرہے ہیں ان خیالات کا اظہار انہوں نے اپنے ایک جاری کردہ بیان میں کیا ۔نثار علی فیضی نے کہا کہ ہر بار نمائشی دورے کیے جاتے ہیں اور عوام کی مفلسی کا پوری دنیا کے سامنے مذاق اڑایا جاتا ہے وزیر اعلی سٹیج پر سو کر اپنی بے فکری ولاپرواہی کا ثبوت دیتے ہیں تھر میں لاکھوں عوام ایسی ہی کسمپرسی کی زندگی گزار رہی ہے اور آئے دن بھوک وافلاس سے جانیں ضائع ہو رہی ہیں انہوں نے کہا کہ حکومت سند ھ کو بلخصوص اور وفاقی حکومت کو بالعموم اس سلسلے میں نہ فقط فوری طور پر بلکہ دورس نتائج کے حامل منصوبوں کا آغاز کرنا چاہیے۔مجلس وحدت مسلمین کے صوبائی اور ضلعی عہدیداران بھی عوام کی مشکلات کے حل کے لیے اپنا کردار ادا کرنے میں کوئی کمی نہیں لا رہے۔
وحدت نیوز(کراچی) مجلس وحدت مسلمین صوبہ سندھ کے ڈپٹی سیکرٹری جنرل عالم کربلائی نے کراچی سمیت اندرون سندھ کا ہنگامی دورہ کیا اس موقع پر ان کے ہمراہ اراکین صوبائی کابینہ حیدر زیدی ،آصف صفوی ،علامہ عبداللہ مطہری اور مولانا نشان حیدر ساجدی بھی موجود تھے اس موقع پر انہوں نے امام بارگاہوں کی انتظامیہ سے ملاقات کی اور ان کے مسائل سننے ، منتظمین مجالس و جلوس نے دوران مجالس بجلی کی لوڈشیڈنگ پر شدید تشویش کا اظہار کیا، ڈپٹی سیکرٹری جنرل عالم کربلائی نے اس موقع پر گفتگو کرتے ہوئے کے الیکٹرک، ہیسکو ،واپڈا کو متنبہ کرتے ہوئے کہا ہے کہ وہ سندھ بھر میں محرام الحرام میں مجالس کے وقت لوڈشیڈنگ سے گریز کریں،رات کے وقت لوڈشیڈنگ دہشتگردوں کو دہشتگردی کا مواقع فراہم کرتی ہے اگر سندھ بھر میں کسی جگہ بھی دوران مجالس و جلوس عزا لوڈشیڈنگ کی وجہ سے کوئی ناخوشگوار واقعہ پیش آیا تو اس کی ذمہ دار کے الیکٹرک، ہیسکو اور واپڈا کے اعلیٰ حکام ہونگے۔ مرکزی عزاداری سیل سے جاری اپنے بیان میں عالم کربلائی نے کہا کہ دوران مجالس عزا لوڈشیڈنگ کرنے کی شدید الفاظ میں مذمت کرتے ہیں،حکومت سندھ لوڈشیڈنگ کا سنجیدگی سے نوٹس لے ۔انہوں نے مزید کہا کہ شاید حکومت سندھ کے اعلیٰ عہدیداران عزاداروں کو تحفظ اور سہولیات فراہم کرنے میں سنجیدہ نہیں ہیں، اس ہی لئے سندھ بھر میں مختلف شہروں میں مرکزی مجالس عزا کے دوران سڑکوں پر نکاسی آب کا کوئی انتظام نہیں ہے، جبکہ جعفرطیار سمیت کراچی کے مختلف علاقوں میں سیوریج کے پانی کی نکاسی کا کوئی انتظام نہیں ہے۔ عالم کربلائی نے حکومت سندھ سے مطالبہ کیا کہ ہنگامی سطح پر امام بارگاہوں اور اس کے اعتراف میں سڑک کا مرمتی کام انجام دیا جائے اور سیوریج کے پانی کی نکاس کیلئے فوری اقدامات کئے جائیں۔
وحدت نیوز (بیروت) حزب اللہ لبنان کے سیکرٹری جنرل سید حسن نصراللہ نے جنوب بیروت میں سیدالشھداء سینٹر میں محرم الحرام کی مناسبت سے تقریر کرتے ہوئے کہا ہے کہ تکفیری سوچ کی ترویج کو روکنے سے ہی عالمی سطح پر جاری دہشت گردی کا خاتمہ کیا جاسکتا ہے اور اس مقصد کے حصول کیلئے ایسے دینی مدارس کو بند کرنا ضروری ہے جو تکفیری سوچ کو پرورش دینے میں مصروف ہیں۔ انہوں نے کہا کہ تکفیری سوچ کی ترویج کو روکنے میں سب سے پہلی ذمہ داری سعودی عرب پر عائد ہوتی ہے۔ سید حسن نصراللہ نے کہا: "تکفیری سوچ کو روکنا انتہائی ضروری ہے اور اس سلسلے میں سب سے پہلی ذمہ داری سعودی عرب کی ہے کہ وہ تکفیری سوچ کی ترویج کو روکے۔ سب کو جان لینا چاہئے کہ داعش مخالف اتحاد کے جنگی طیارے تکفیری دہشت گردی کو ختم کرنے کی صلاحیت نہیں رکھتے۔ اس دہشت گردی کے خاتمے کیلئے ضروری ہے کہ اسلام کا حقیقی چہرہ اجاگر کیا جائے اور دنیا والوں کو بتایا جائے کہ دین مبین اسلام میں کسی کو ناحق قتل نہیں کیا جاتا اور یہ دین کسی کی چوری کرنے یا کسی کی عزت لوٹنے کی ہرگز اجازت نہیں دیتا۔ اسلام دوسروں کو برداشت کرنے کا دین ہے۔ اسلام گفتگو کا دین ہے۔
"
حزب اللہ لبنان کے سیکرٹری جنرل نے کہا کہ تکفیری ٹولہ اسلام کے خوبصورت چہرے کو بگاڑ کر پیش کر رہا ہے، لہذا آج ہر مسلمان کا فرض بنتا ہے کہ وہ ایک معاشرے کا فرد یا رکن ہونے یا ایک معاشرے کا اقلیتی رکن ہونے کے ناطے اپنے کردار سے اسلام کے حقیقی چہرے کو اجاگر کرے۔ ہماری آواز مضبوط ہونی چاہئے کیونکہ جو کچھ وہ اسلام کے نام پر انجام دے رہے ہیں، اس کا اسلام سے دور دور تک کوئی تعلق نہیں۔ لہذا ہمیں اپنی مضبوط آواز سے اسلام کے حقیقی چہرے کو اجاگر کرتے ہوئے اس کی واضح تصویر لوگوں تک پہنچانی چاہئے۔ سید حسن نصراللہ نے کہا کہ دین اسلام قتل و غارت کے درپے نہیں بلکہ دنیا اور آخرت میں انسانوں کی نجات چاہتا ہے۔ حزب اللہ لبنان کے سیکرٹری جنرل نے کہا: "تکفیری عناصر کے مجرمانہ اور غیر انسانی اقدامات نے دین اسلام کو شدید دھچکہ پہنچایا ہے۔ ان کے یہ شدت پسندانہ رویے غیر مسلم افراد کو اسلام سے دور کر رہے ہیں۔ تکفیری دہشت گرد جعلی احادیث اور قرآنی آیات کو اپنے اقدامات کی دلیل کے طور پر پیش کرتے ہیں جبکہ ان کے شدت پسندانہ اقدامات کا قرآن و سنت سے کوئی تعلق نہیں۔ وہ عام انسانوں کو قتل کرتے ہیں اور ان کے سر تن سے جدا کرتے ہیں۔
"
حزب اللہ لبنان کے سیکرٹری جنرل سید حسن نصراللہ نے کہا کہ تکفیری گروہ اپنے دہشت گردانہ اقدامات کے سبب یہ تاثر دے رہے ہیں کہ مسلمان وحشی اور خونخوار ہیں۔ وقت گزرنے کے ساتھ ساتھ اسلام کے بارے میں بدبینی بڑھتی جا رہی ہے۔ انہوں نے کہا کہ تکفیری عناصر کی جانب سے بعض اسلامی ممالک کے بڑے حصے پر قبضے کی وجہ سے اس خطرے کو سنجیدگی سے لینے کی ضرورت ہے۔ خطے میں آج جو کچھ بھی ہو رہا ہے وہ اسلام اور اسلامی معاشروں کیلئے ایک عظیم خطرہ ہے۔ انہوں نے کہا کہ تکفیری عناصر اپنے علاوہ ہر شخص کو کافر سمجھتے ہیں اور اس کے خون، مال اور عزت کو حلال قرار دیتے ہیں۔
سید حسن نصراللہ نے کہا: "گذشتہ ایک صدی سے عرب ممالک میں ایک نیا گروہ معرض وجود میں آیا، جو بعض ممالک میں برسراقتدار آنے میں کامیاب ہوگیا۔ اس نے اپنی طاقت کی بنیادوں کو مضبوط بنانے کے بعد ایک مخصوص سوچ کو پوری دنیا میں پھیلانا شروع کر دیا اور دنیا بھر میں وسیع پیمانے پر دینی مدارس، یونیورسٹیز، تحقیقاتی مراکز، اخبار، پبلیکیشنز اور میڈیا کی بنیاد رکھی۔ اس گروہ نے پوری دنیا میں اپنی سوچ پھیلانے کیلئے اب تک اربوں ڈالر خرچ کئے ہیں۔"
حزب اللہ لبنان کے سیکرٹری جنرل نے کہا کہ ہمیں صرف موجودہ مشکلات کے حل تک محدود نہیں ہوجانا چاہئے بلکہ عالم اسلام میں موجود تکفیری سوچ اور گروہوں کی جڑوں کو نابود کر دینا چاہئے۔ انہوں نے تمام مسلمانان عالم سے اسلام کا دفاع کرنے کیلئے میدان میں آنے کی درخواست کرتے ہوئے کہا کہ شیعہ اور سنی علماء اسلام کے حقائق کو متعارف کروانے کیلئے ایڑی چوٹی کا زور لگا دیں۔ سید حسن نصراللہ نے کہا کہ تکفیری سوچ کا مقابلہ کرنے کیلئے ثقافتی، فکری اور علمی ذرائع اپنانے کی ضرورت ہے۔ تکفیری سوچ غیر اسلامی ہے، جس کی ترویج کو روکنا انتہائی ضروری ہے۔
وحدت نیوز (بھکر) پاکستان عوامی تحریک کے رہنما بشارت جسپال اور راجہ زاہد نے بھکر کے حلقہ پی پی 48 میں ہونے والے ضمنی انتخاب کے حوالے سے پولیٹکل سیکرٹریٹ لاہور میں مجلس وحدت مسلمین پاکستان کے مرکزی سیکرٹری سیاسیات سید ناصر عباس شیرازی سے ملاقات کی۔ اتحادی جماعتوں کے رہنماوں کی ملاقات میں ایم ڈبلیوایم پنجاب کے ڈپٹی سیکرٹری جنرل اسد عباس نقوی بھی موجود تھے۔ایم ڈبلیوایم کے پولیٹیکل سیکریٹریٹ سے جاری اعلامیے کے مطابق ملاقات میں میں طے پایا کہ بھکر کے حلقہ پی پی 48 کے ضمنی انتخاب میں نذر کہاوڑ، پاکستان عوامی تحریک کے ٹکٹ ہولڈر ہوں گے اور مجلس وحدت مسلمین پاکستان کے احسان اللہ خان بلوچ انکے کورنگ امیدوار ہوں گے، نذر کہاوڑ کل جلوس کی صورت میں احسان اللہ خان کے گھر آئیں گے اور احسان اللہ خان کو ساتھ لے کر مشترکہ فارم جمع کرائے جائیں گے۔ اعلامیے کے مطابق بلدیاتی انتخابات میں پاکستان عوامی تحریک تحصیل ناظم کیلئے مجلس وحدت مسلمین کے امیدوار کی حمایت کرے گی۔ یہ بھی طے پایا ہے کہ الیکشن کے متعلق تمام تشہیر دونوں جماعتوں کے مشترکہ نام پر ہوگی، ٹکٹ دینے کی تقریب میں دونوں جماعتوں کے قائدین موجود ہوں گے، وہاں پر مشترکہ میٹنگ میں ٹکٹ اور تحصیل ناظم کے امیدوار کا میڈیا کے سامنے اعلان کیا جائے گا۔ مجلس وحدت مسلمین کی جانب سے پاکستان عوامی تحریک کے امیدوار کی حمایت کی یقین دہانی پر ڈاکٹر طاہر القادری نے مجلس وحدت مسلمین کے مرکزی سیکرٹری جنرل ناصر عباس جعفری کیساتھ ٹیلی فون پر بات کی اور انکا شکریہ ادا کیا۔
وحدت نیوز (کوئٹہ) مجلس وحدت مسلمین کوئٹہ ڈویژن کیجانب سے کالعدم تنظیموں کے خلاف کاروائی کے حوالے سے گورنر بلوچستان محمد خان اچکزئی کے بیان کو خوش آئند قرار دیتے ہوئےایم ڈبلیوایم کوئٹہ ڈویژن کے ڈپٹی سیکریٹری جنرل علامہ ولایت جعفری نے کہا ہے کہ جس طرح شہر میں بےگناہ اور معصوم انسانوں کا خون بہایا جا رہا ہے اور ظلم اور بربریت کی بدترین مثالیں قائم کی جا رہی ہے۔ جہاں ذریعہ معاش اور اپنے بچوں کا پیٹ پالنے کیلئے اپنے گھروں سے نکلنے والے مزدوروں کو بدترین دہشتگردی کا نشانہ بنایا جاتا ہے اور معصوم انسانوں کو قتل کرنے کے بعد اُسکی ذمہ داری قبول کی جاتی ہے۔ اُس کی چھوٹی سی مثال بھی کسی مہذب معاشرے میں نہیں ملتی اور یہ سلسلہ کئی سالوں سے جاری ہے۔ جہاں ایک ہی مقام پر درجنوں واقعات رونما ہو چکے ہیں۔ اسی لئے صوبے اور بالخصوص کوئٹہ شہر میں دہشتگردی پھیلانے والے انتہاء پسند عناصر کے خلاف کاروائی کا مطالبہ ایم ڈبلیوایم کئی عرصے سے کر رہی ہے۔ انہوں نے گورنر بلوچستان کے بیان پر تبصرہ کرتے ہوئے مزید کہا کہ یہ بیان اُس وقت عوام کیلئے باعث اطمینان ہوگا، جب وہ اُن دہشتگردوں کے خلاف عملی طور پر کاروائی ہوتا ہوا دیکھیں گے۔
انہوں نے مذید کہا ہے کہ دہشتگردوں نے اُن سے اُنکے پیارے چھین لئے ہیں اور دہشتگردی کو کنٹرول کرنے کا واحد راستہ بھی صرف اور صرف آپریشن ہے کیونکہ ہر واقعے کے بعد جس دلیری سے دہشتگرد گروہ ان واقعات کی ذمہ داری قبول کرتے ہیں۔ اس سے معلوم ہوتا ہے کہ وہ کسی ریاستی عمل داری کو قبول نہیں کرتے۔ کھلے عام اسے چیلنج کرتے ہیں جبکہ ریاست کی پہلی ذمہ داری ہے کہ وہ اپنے عوام کے جان و مال کی حفاظت کرے اور ایسے عناصر کی بیخ کنی جو سینکڑوں انسانوں کے قتل میں ملوث ہیں۔ ریاست کا فرض ہے اور اگر ریاست اپنے عوام کو تحفظ فراہم نہیں کر سکتی تو اس کا اعلان کیا جائے کہ ہر شخص اپنی حفاظت کا خود ذمہ داری ہے تو پھر عوام ان دہشتگردوں کو بتائے گی کہ کس طرح وہ اُن کو قتل کرکے آرام سے فرار ہوتے ہیں۔
وحدت نیوز(پشاور) مجلس وحدت مسلمین صوبہ خیبر پختونخوا کے سیکرٹری جنرل علامہ سبطین حسینی نے کہا ہے کہ انسانیت کے سب سے بڑے مجرم اور اسلام و مسلمانوں کے دشمن ملک اسرائیل کے ثقافتی پروگرامات کا اسلامی یونیورسٹی میں انعقاد عالم اسلام کے لئے باعث تشویش اور مظلوم فلسطینیوں کے خون پر نمک چھڑکنے کے مترادف ہے، جس کی بھرپور مذمت کرتے ہیں۔ ان خیالات کا اظہار انہوں نے اسلامی یونیورسٹی میں لگنے والے صہیونی اسٹال پر اپنے ردعمل میں کیا۔ ان کا کہنا تھا کہ یہ امر عالم اسلام میں پاکستان کی بدنامی و خفت کا باعث بنے گا، قبلہ اول، لاکھوں مسلمان فلسطینیوں کے خون کو بھول جانا نہایت افسوسناک ہے۔ ایک ایسی ناجائز ریاست جہاں جانے کی ہمارے پاسپورٹ میں بھی اجازت نہیں ہے، اس کی ثقافت کو ایک اسلامی یونیورسٹی میں پروان چڑھانا باعث ننگ و عار ہے۔
وحدت نیوز (کراچی) نواسہ رسول امام حسین علیہ السلام کا ظلم و ظالم کے خلاف قیام آفاقی پیغام ہے، آپ بلا رنگ و نسل تمام بنی نو انسانوں کیلئے مشعل راہ ہے ،محرم ظلم کے خلاف احتجاج کا نام ہے ۔محرم الحرام نواسہ رسول امام حسین علیہ السلام اور بہتر شہداء کربلا کی یاد میں عزاداری کی جاتی ہے ۔ عزاداری کسی کی محتاج نہیں عزاداری کا سلسلہ دنیا بھر میں صدیوں سے جاری ہے، ایام عزاء کے دوران شہر میں موجود تمام سیاسی و مذہبی جماعتوں سے اپیل کرتے ہیں کہ محرم الحرام میں اپنے احتجاج ملتوی کردیں ۔ حکومت اور سکیورٹی ادارے محرم الحرام میں مساجد و امام بارگاہوں کی سکیور ٹی کیلئے سنجیدہ نظر نہیں آتے ڈسٹرکٹ ملیر اور ایسٹ میں سکیورٹی کے انتظامات انتہائی ناقص ہیں جبکہ ڈسٹرک ملیر میں موجود کئی مساجد و امام بارگاہوں کی سڑکیں سیوریج کے پانی سے ڈوبی ہوئی ہیں جس کی صفائی نہ کرانا در اصل سیاسی انتقام لینا ہے ،سندھ حکومت فوری مساجد و امام بارگاہوں کی سکیورٹی کیلئے نفری لگائے اور صفائی سترائی کے کاموں کو جلد از جلد مکمل کرائے۔ ان خیالات کا اظہار مجلس و حدت مسلمین کے صوبائی سیکر ٹری جنرل علامہ مختار امامی نے و حدت ہاؤس کراچی میں منعقدہ اجلاس سے خطاب میں کیا، اجلاس میں حسن ہاشمی، علامہ علی انور جعفری، علامہ مبشر حسن ،علی حسین نقوی،اصغر عباس زیدی،حیدر زیدی، احسن عباس رضوی ،انجینئر رضا نقوی، ڈاکٹر مدثر سمت دیگر رہنماء موجود تھے۔
علامہ مختار امامی کا کہنا تھا کہ امام حسین علیہ السلام کی عزاداری کسی کی محتاج نہیں صدیوں سے مجالس و جلوس عزاء کا سلسلہ جاری ہے جو در اصل خود ظلم اور ظالم کے خلاف احتجاج ہے،احتجاج سیاسی جماعتوں کا حق ہے مگر عشرہ محرم الحرام کے احترام میں تمام سیاسی جھگڑوں سے بالا تر ہو کر سو چنا ہوگا،نواسہ رسول کا نام لینے والوں کو ان کے ماہ محرم الحرام کے احترام میں اپنی سیاسی رنجشوں کو بالا طاق رکھتے ہوئے ایسے اقدامات سے گریز کرنا چاہیے جس سے شہر میں کشیدگی پیدا ہو اور عزاداران کو مجالس وجلوس عزاء میں شریک ہونے میں پر یشانی ہو۔اجلاس میں ایم ڈبلیوایم مرکزی عزاداری سیل کے زیر نگرانی ڈسٹر ک کے تمام عزاداری سیل میں موجود ذمہ داران کی کار کردگی کا جا ئزہ لیا گیا اور شہر بھر میں جاری مرکزی مجالس عزاء کی موجودسکیورٹی کا بھی جائزہ لیا گیا۔
وحدت نیوز(پشاور) مجلس وحدت مسلمین خیبر پختونخوا کے رہنما ارشاد حسین بنگش نے کہا ہے کہ صوبائی حکومت عشرہ محرم کے حوالے سے حساس قرار دیئے گئے اضلاع میں سیکورٹی کے فول پروف انتظامات کرے، وحدت سکاوٹس کے رضاکار سیکورٹی اہلکاروں کے شانہ بشانہ مجالس اور جلوس ہائے عزا کی سیکورٹی پر مامور ہوں گے۔ وحدت ہاوس پشاور سے جاری ایک بیان میں ان کا کہنا تھا کہ حکام کی جانب سے پشاور، ڈیرہ اسماعیل خان، ہنگو اور کوہاٹ کو حساس ترین اضلاع قرار دیا گیا ہے، اب حکومت کی ذمہ داری ہے کہ ملک کے موجودہ حالات کے تناظر میں مزکورہ اضلاع میں سیکورٹی کے فول پروف انتظامات کرے، جبکہ دیگر اضلاع میں بھی عزاداری امام حسین کے تحفظ کو یقینی بنانے کیلئے اقدامات کئے جائیں، انہوں نے عوام سے اپیل کی کہ وہ عشرہ محرم الحرام کے دوران شرپسند عناصر پر کڑی نظر رکھیں، اور سیکورٹی اداروں سے مکمل تعاون کریں، اور فرقہ پرست عناصر کی حوصلہ شکنی کی جائے۔انہوں نے مزید کہا کہ شیعہ ،سنی عوام اپنے اتحاد کی طاقت سے دہشتگردوں کے تمام مزموم عزائم خاک میں ملا سکتے ہیں، انتہائی حساس قرار دیئے گئے اضلاع میں ضرورت پڑنے پر پاک فوج کے دستوں کو بھی سٹینڈ بائی رکھا جائے۔
وحدت نیوز( کراچی) مجلس وحدت مسلمین کراچی ڈویژن کے پولیٹیکل سیکریٹری اور انچارج عزاداری سیل سید علی حسین نقوی نے وحدت ہاؤس میں عزاداری سیل کے اراکین سے خطاب کرتے ہوئے کہا کہ ماہ محرم الحرام میں عزاداری اور عزاداروں کی خدمت ہمارا فرض اولین ہو نا چاہئے،کراچی میٹروپولیٹن کارپوریشن اور کراچی واٹر اینڈ سیوریج بورڈ کے حکام محض زبانی جمع خرچ سے کام لے رہے ہیں، اس موقع پر عزاداری سیل کراچی کے اراکین علامہ مبشر حسن،عباس تقوی ،اصغر زیدی، زین رضا،سہیل عسکری،سبط اصغر، احسن عباس، حسن عباس ، ناصر حسین اورشبیر حسینی بھی موجود تھے۔
ان کا کہنا تھا کہ لانڈھی ، کورنگی، ملیر ، شاہ فیصل کالونی ،ایوب گوٹھ، بھٹائی آباد، پہلوان گوٹھ، بن قاسم ٹاؤن ، نارتھ کراچی اور دیگر علاقوں میں سڑکوں کی استر کاری، اسٹریٹ لائٹس کی تنصیب، بیریئرز کی تنصیب اور سیوریج لائنوں کی صفائی کے کاموں میں انتظامیہ مکمل طور پر ناکام ہو چکی ہے، واٹر بورڈانتظامیہ اور میونسپل ایڈمنسٹریشن مسائل کے حل میں سنجیدگی کا مظاہرہ نہیں کررہی ، حکام بالا نیچے مسائل کے فوری حل کے احکامات جاری کر رہے ہیں لیکن نچلا عملہ وسائل کی قلت کو بنیاد بنا کر کاموں میں سستی و کاہلی کا مظاہرہ کررہے ہیں ،انہوں نے سکیورٹی اقدامات پر بھی عدم تحفظ کا اظہار کرتے ہوئے کہا کہ مختلف اجلاسوں میں پولیس اور رینجرز کے اعلیٰ حکام کو حساس آبادیوں اور اما م بارگاہوں کی نشاندہی کے باوجود سکیورٹی کے کوئی مناسب اقدامات نہیں کیئے ہیں ۔علی حسین نقوی نے وزیر اعلیٰ سندھ،کمشنر کراچی ، تمام ڈپٹی کمشنر ز، ایڈیشنل آئی جی پولیس، ڈی جی رینجرز سندھ سے مطالبہ کیا ہے کہ جلد ازجلد محرم الحرام اور عزاداری سے متعلق امور کی انجام دہی کے لئے سنجیدہ اور بر وقت اقدامات کیئے جائیں ، تاکہ ماہ مقدس محرم الحرام میں کسی نا خوشگوار واقعے سے بچا جا سکے۔
وحدت نیوز (اسلام آباد) علامہ نسیم عباس رضوی خطابت کے شہسوار تھے،ان کی رحلت ایک آفتاب خطابت کا غروب ہے،ان خیالات کا اظہار قائد وحدت علامہ راجہ ناصرعباس جعفری نے معروف شیعہ خطیب علامہ نسیم عباس رضوی کے انتقال پر تعزیتی پیغام میں کیا،انہوں نے اس موقع پر کہا کہ علامہ نسیم عباس رضوی خطابت میں اپنی مثال آپ تھے،انہوں نے مجالس امام حسین ؑ کے ذریعے کربلا کے پیغام کو عام کیااور اسلام کی آفاقی تعلیمات کو اگلی نسلوں تک پہنچانے کیلئے ساری زندگی خدمات سرانجام دیتے رہے،وہ کبھی بھی فرقہ و مکتب کی بنیاد پر خطابت نہیں کرتے تھے بلکہ انہوں نے اسلام کی تعلیمات کو اس شکل میں لوگوں تک پہنچایا کہ سنی و شیعہ اس کے معترف رہیں گے،علامہ نسیم عباس رضوی مرحوم کی دینی و ملی خدمات کو بھلایا نا جائے گا،علامہ راجہ ناصر عباس جعفری نے ان کے درجات کی بلندی کیلئے خصوصی دعا فرمائی اور مرحوم کے ورثاء سے اظہار تعزیت کیا۔
