وحدت نیوز (کراچی) مجلس وحدت مسلمین پاکستان کراچی ڈویڑن کے سیکریٹری سیاسیات علی حسین نقوی نے کہا ہے کہ لاؤڈ اسپیکر ایکٹ کی آڑ میں عزاداری سید الشہداء امام حسین ؑ پر لگائی جانے والی تمام پابندیوں کو مسترد کرتے ہیں،عزاداری مظلوم کربلا ہماری شہ رگ حیات ہے، اپنی شہ رگ کی حفاظت کریں گے، سندھ حکومت کالعدم جماعتوں کی ایماء پر عزاداری کو محدود کرنے کے درپے ہے۔ ان خیالات کا اظہار انہوں نے عزاداری سیل کے اجلاس سے خطاب کے دوران کیا۔ اس موقع پر علامہ مبشر حسن، میثم عابدی، رضا نقوی، سبط اصغر، احسن عباس سمیت دیگر رہنما بھی موجود تھے۔اجلاس سے خطاب میں علی حسین نقوی کا کہنا تھا کہ ہر دور کے ظالم نے عزائے حسین کو دبانے کی کوشش کی لیکن حسینی پیروکاروں نے ظالموں کی تمام سازشوں کو خاک میں ملایا ہے۔ ان کا مزید کہنا تھا کہ پیپلز پارٹی کی حکومت سن لے، لاوڈ اسپیکر ایکٹ کا احترام کرتے ہیں مگر یزیدی ضابطہ اخلاق کو مسترد کرتے ہوئے یہ اعلان کرتے ہیں کہ سندھ بھر میں مجالس کے دوران لاؤڈ اسپیکر کا استعمال عزادران سید الشہدا کی سماعتوں تک خطاب پہنچانے کا اہتمام جاری رہے گا، سندھ حکومت فی الفور لاؤڈ اسپیکر ایکٹ ریلکسیشن کا نوٹیفکیشن جاری کرے وگرنہ عاشقان حسین (ع) ایسے کسی بھی قانون کو تسلیم نہیں کریں گے جو کہ عزائے حسین کی راہ میں رکاوٹ بنے۔ علی حسین نقوی کا کہنا تھا کہ دو روز قبل چیف منسٹر ہاؤس سندھ میں وزیراعلیٰ سندھ نے شیعہ عمائدین سے دوران ملاقات اس بات کی یقین دہانی کرائی تھی کہ مجالس اور جلوس کے دوران لاؤڈ اسپیکر کے استعمال کے بارے میں وہ ریلکسیشن کا نوٹیفکیشن جاری کریں گے مگر تاحال ایسا نہ ہوسکا ، اگر سندھ حکومت نے نوٹیفیکیشن جاری نہ کیا تو پھر ہم سندھ بھر میں احتجاج شروع کریں گے۔

وحدت نیوز (لاہور) مجلس وحدت مسلمین پنجاب کے سیکرٹری جنرل علامہ عبدالخالق اسدی کا صوبائی سیکرٹریٹ پنجاب میں پریس کانفرنس سے خطاب کرتے ہوئے کہنا تھا کہ نواسہ رسول ۖ کی اس بے مثال قربانی کو ہرمسلمان اپنی جگہ خراج عقیدت پیش کرتے ہیں،نواسہ رسول سے عقیدت صرف فقہ جعفریہ کا  صرف عقیدہ نہیں بلکہ ہر بنی نوع انسان کا ایمان ہے،محرم الحرام کے اس مقدس ایام میں پنجاب حکومت کی جانب سے عزاداروں،علماء ،خطباء اور ذاکرین کو بلا جواز ہراساں کرنے کا سلسلہ جاری ہے،پنجاب پولیس کی جانب سے چاردیواری کے اندر خواتین کی مجالس  روکنے کے لئے چادر و چاردیواری کے تقدس کو پامال کیا جارہا ہے،ہم یہ سمجھنے سے قاصر ہیں کہ پنجاب حکومت آخر چاہتی کیا ہے اور کس کی خوشنودی کے لئے ہماری مذہبی آزادی کو سلب کرنے پر بضد ہے،انہوں نے کہا کہ رانا ثنااللہ اور شہباز شریف صاحب سن لین ہم نواسہ رسول ۖ کی حرمت اور عزاداری امام مظلوم کے لئے کٹ تو سکتے ہیں لیکن کسی قسم کا سمجھوتاکرنے کو تیار نہیں،دنیا کی تاریخ گواہ ہے  عاشقان محمد وآل محمدکسی بھی ظالم جابر کے سامنے سر جھکانے کو گردن کٹوانے پر ترجیح دیتے ہیں۔

پنجاب کے مختلف اضلاع میں علماء و ذاکرین کی ضلع بندیاں لوگوں سے ان کی مذہبی آزادی چھیننے کے مترادف ہے،ملت جعفریہ پاکستان  دہشت گردی کی سب سے زیادہ متاثرہ فریق ہے،ہمارے ساتھ جہاں جہاں بھی ن لیگ کی حکومت ہے وہاں پر منظم طریقے سے انتقامی کاروائیاں جاری ہیں جس کی ہم شدید مذمت کرتے ہیں،ہم فرقہ پرستی اور انتہا پسندی کو پاکستان کے خلاف سازش سمجھتے ہیں،جنوبی پنجاب میں حکومت دہشت گرد گر و ہوں کے ہاتھوں یرغمال ہے،ہمارے خلاف کاروائیوں کا ایک مقصد انہی دہشت گردوں کو خوش کرنا بھی ہے،علامہ عبد الخالق اسدی کا مزید کہنا تھا کہ پنجاب حکومت پر ہم واضح کر دینا چاہتے ہیں کہ عزاداری اور میلاد مصطفیٰۖ کے خلاف کوئی بھی عمل ہمارے لئے قابل قبول نہیں، ہم ذکر محمد و آل محمد کے لئے کسی سے اجازت نہیں لیں گے ،یہ ہمارا آئینی و قانونی حق ہے ہم اس سے ایک انچ بھی پیچھے نہیں ہٹیں گے،پریس کانفرنس میں صوبائی رہنماوُں علامہ محمد اقبال کامرانی،علامہ اصغر عسکری،سید اسدعباس نقوی،علامہ مظہر حسین شریک تھے۔

وحدت نیوز (قم )مجلس وحدت مسلمین پاکستان کے ڈپٹی سیکرٹری جنرل و سیکرٹری امور خارجہ ڈاکٹر علامہ سید شفقت حسین شیرازی نے ڈاکٹر علامہ غلام محمد فخرالدین کی شہادت پر گہرے دکھ کا اظہار کرتے ہوئے کہا کہ یزیدان عصر نے ملت کو ایک عظیم مجاہد سے محروم کر دیا ہے۔ اس سال کربلائے منی میں یزیدان عصر کے ہاتھوں شہید ضیوف الرحمن کی شہادت پر پوری قوم کو ہدیہ تعزیت عرض ہے۔ آج ہمارے عزیز بھائی خطیب ممبر حسینی ، ولایت و کربلا کا مخلص ترجمان اور علوم قرآن و اہل البیت کی اعلی درجہ پر فائز عالم باعمل سے ہماری قوم محروم ہو چکی ہے ۔ ضعیف ماں اور کمسن بچوں کا سہارا ٹوٹا ہے اور عالم غربت میں ہزاروں شہداء کے ساتھ دفن ہوا لیکن " لا یوم کیومک یا اباعبداللہ " یابن الزہرا ہماری لاکھوں جانیں آپ پر قربان ہوں۔ خداوند متعال خانوادہ شہید اور ان کے احباء و اصدقاء اور ملت مظلوم کو صبر جمیل عطا فرمائے۔ ایک قومی سرمایہ اور فخر ملت کی شہادت پر ولی امرمسلمین ، مراجع عظام اور علماء پاکستان بالخصوص ناصر ملت کو تعزیت و تسلیت عرض ہے۔ خداوند بحق محمد و آل محمد شہید سعید اور تمام شہداء کے درجات بلند فرمائے اور شہید کو کربلا کے شہداء کے ساتھ محشور فرمائے۔

وحدت نیوز (شکارپور) شہداء کمیٹی شکارپور کے چیئرمین علامہ مقصود علی ڈومکی نے ایک وفد کے ہمراہ رکن صوبائی اسمبلی اور مسلم لیگ ف کے رہنماء امتیاز احمد شیخ سے ملاقات کی۔اس موقع پر گفتگو کرتے ہوئے علامہ مقصود علی ڈومکی نے کہا کہ سانحہ شکارپور کو نو ماہ کا طویل عرصہ گذر چکا ہے ،مگر سندہ حکومت کے وعدے وفا نہیں ہوئے۔ وزیر اعلیٰ کی اعلان کردہ کمیٹی کا گذشتہ کئی ماہ سے کوئی اجلاس منعقد نہیں ہوا، جس سے سندہ حکومت کے غیر سنجیدہ روئیے کا اظہار ہوتا ہے۔ شہداء کے ورثاء اور ایسے زخمی جو کام کے قابل نہیں رہے، کے لئے ملازمتوں کا اعلان کیا گیا تھا، مگر ابھی تک کسی کو بھی ملازمت نہیں دی گئی۔ سندہ میں داعش جیسی دھشت گرد تنظیم کی موجودگی اداروں کی کارکردگی پر سوالیہ نشان ہے جبکہ سندہ کے مختلف اضلاع خصوصا خیرپور ، قمبر شہداد کوٹ، شکارپور، جیکب آباد میں آج بھی دھشت گردوں کے ٹریننگ کیمپس موجود ہیں، جو کسی بھی سانحے کا سبب بن سکتے ہیں۔ ان کے خلاف بھرپور آپریشن کی ضرورت ہے۔ خانپور میں شہید شفقت عباس مطہری کے قاتل آج بھی پھر رہے ہیں جنہیں گرفتارنہیں کیا جارہا۔ جس کے باعث ہم یہ کہنے پر مجبور ہیں کہ سندہ حکومت عہد شکنی کررہی ہے۔ شکارپور ضلع کے وہ مراکزجودھشت گردی کے ٹریننگ کیمپس میں تبدیل ہوچکے ہیں ان کے خلاف بھی رینجرز اور فوج کی نگرانی میں فی الفور کارروائی کی جائے۔ انہوں نے امتیاز شیخ صاحب سے کہا کہ شکارپور سے عوام کے منتخب نمائندے کی حیثیت سے آپ ان مسائل کے سلسلے میں اپنا کردار ادا کریں۔

اس موقع پر ایم پی اے امتیاز احمدشیخ نے کہا کہ وہ اسمبلی سمیت ہر فورم پر اس سلسلے میں آواز بلند کریں گے۔ شکارپور کے عوام ان شہداء اور ان کے ورثاء کو اپنا سمجھتے ہیں۔ پیپلز پارٹی کی صوبائی حکومت نے عہد شکنی کی نئی تاریخ رقم کی ہے۔

وحدت نیوز (جیکب آباد) مجلس وحدت مسلمین پاکستان کے مرکزی معاون سیکریٹری سیاسیات علامہ مقصود علی ڈومکی نے گلاب ماچھی، حوالدار بروہی میں ،ایم ڈبلیو ایم کے نامزد امیدوار برائے جنرل کونسلر آغا سیف علی ڈومکی کی الیکشن مہم کے سلسلے میں مختلف علاقوں کا دورہ کیا۔ اس موقع پر رفیق احمد بگٹی، منور حسین و دیگر ان کے ہمراہ تھے۔

گوٹھ گلاب ماچھی میں آزاد امیدوار نظام سولنگی ،ایم ڈبلیو ایم کے امیدوار آغا سیف علی ڈومکی کے حق میں دستبردار ہوگئے۔ اس موقع پر علامہ مقصود علی ڈومکی نے ایم ڈبلیو ایم کی حمایت کرنے پر برادر نظام سولنگی اور ان کے سپوٹرز کا شکریہ ادا کیا۔انہوں نے گھر گھر مہم کے سلسلے میں گوٹھ بھٹی میں عوام سے ملاقاتیں کیں ،اس موقع پرگفتگوکرتے ہوئے علامہ مقصود علی ڈومکی نے کہا کہ عوام ووٹ کو امانت سمجھ کر اہل اور باکردار افراد کی حمایت کریں،جو کرپشن کے خلاف ہوں اور عوام کی خدمت کو اپنا شعار بنائیں۔انہوں نے کہا کہ ایم ڈبلیو ایم کے امیدوار کامیاب ہوکر عوام کی بے لوث خدمت کریں گے۔ انہوں نے کہا کہ مجلس وحدت مسلمین موجودہ فاسد کرپٹ نظام کی اصلاح چاہتی ہے چہروں کی بجائے نظام کی تبدیلی ہمارا ہدف ہے۔

اس موقع پر حلقے کے عوام نے ٹوٹی ہوئی سڑکوں، بجلی کے کھمبوں ، گیس پائیپ لائین، میٹھے پانی کے کنکشن اور بے روزگاری جیسے مسائل پیش کئے۔ آغا سیف علی ڈومکی نے یقین دلایا کہ وہ دستیاب وسائل کو دیانتداری کے ساتھ عوامی فلاحی منصوبوں پر خرچ کریں گے۔

وحدت نیوز (پشاور) مجلس وحدت مسلمین خیبر پختونخوا کے صوبائی سیکرٹری جنرل علامہ سید محمد سبطین حسینی نے پشاور میں گذشتہ دنوں ٹارگٹ کلنگ کا شکار ہونے والے ملک جرار علی حیدر شہید کے اہل خانہ سے اظہار تعزیت کیا ہے۔ اس موقع پر انہوں نے ملک جرار حیدر کی شہادت کو قاتلوں کی سفاکیت، درندگی اور بزدلی کی انتہا قرار دیا۔ شہید کے خانوادہ سے اظہار تعزیت کرتے ہوئے رہنما ایم ڈبلیو ایم نے شہید کی زخمی بچیوں کی صحت یابی کے لئے دعا کی۔ انہوں نے کہا کہ محرم و صفر کے احترام کو ملحوظ خاطر رکھتے ہوئے ربیع الاول کے مہینے میں شہید کا چہلم بھرپور انداز میں منائیں گے، جس میں مرکزی قائدین بھی شریک ہوں گے اور بھرپور انداز میں شہید ملک جرار حسین کا چہلم اور دیگر شہداء کی یاد منائی جائے گی۔