وحدت نیوز (کوئٹہ) مجلس وحدت مسلمین کوئٹہ ڈویژن کے میڈیا سیل سے جاری شدہ بیان میں کہا گیا ہے کہ محرم الحرام کے دوران مجالس عزا منعقد ہو رہے ہیں،جس کے تحفظ کو یقینی بناناہم سب کی ذمہ داری ہے. مجلس وحدت مسلمین کوئٹہ ڈویژن کے ہر شعبہ اپنی ذمہ داریاں احسن طریقے سے نبھا رہے ہیں۔ کونسلر ز صاحبان مجالس عزاء کے روٹ پر خراب اسٹریٹ لائٹس کی مرمت میں شب و روز مصروف ہیں۔ تنظیمی رضا کار علمدار روڈ کے داخلی راستوں میں انتظامیہ کے ساتھ اپنے فرائض انجام دے رہے ہیں اور ایم پی اے آغا رضا و کونسلرز صاحبان بھی علمدار روڈ کے مختلف گلیوں اور کوچوں کا جائرہ لے رہے ہیں اورساتھ ساتھ ڈیوٹیز پر مامور رضا کاروں کی حوصلہ بھی کر رہے ہیں۔بیان میں مزید کہا گیا کہ اس کام میں مختلف ادارے نافذ کئے گئے ہیں جو احسن طریقے سے اپنی ذمہ داریاں نبھا رہے ہیں اور ہمارے تنظیمی رضاکار بھی محرم الحرام کے دوران مجالس کے سیکورٹی کو یقینی بنانے میں انتظامیہ سے تعاون کر رہے ہیں. بیان میں کہا گیا کہ ہمارے مقامی ا سکاؤٹس کے اراکین بھی نظم و ضبط بر قرار رکھنے کیلئے میدان میں اترے ہیں اور وہ مختلف معاملات میں سیکورٹی پر معمور افراد کی مدد کررہے ہیں.شعبہ اسکاؤٹس سے تعلق رکھنے والے اپنی ذمہ داریاں ادا کرتے ہوئے شہر کے نظم و ضبط کو برقرار رکھے ہوئے ہیں . بیان میں مزید کہا گیا کہ عام شخص بھی سیکورٹی اہلکاروں کے ساتھ تعاون کر رہے ہیں اور بعض افراد انہیں روزمرہ کے سامان کے فراہمی کی صورت میں انکی خدمت بھی کر رہے ہیں. اور یہ بات یقینی ہے کہ عوام اسی روش کو برقرار رکھتے ہوئے عوام کی بھر پور خدمت کریں گے۔ . بیان کے آخر میں کہا گیا کہ جس طرح عوام پولیس و دیگر اہلکاروں کے ساتھ تعاون کر رہی ہے اسی طرح انتظامیہ کی بھی ذمہ داری بنتی ہے کہ وہ بھی انکے ساتھ تعاون کریں ۔

وحدت نیوز (راولپنڈی) ملک کے دیگر شہروں کی طرح راولپنڈی میں بھی مجلس وحدت مسلمین کے زیراہتمام عزاداری کو محدود کرنے اور مقررین کو حراساں کرنے کیخلاف احتجاجی مظاہرہ کیا گیا۔ راولپنڈی پریس کلب کے سامنے ہونے والے مظاہرے میں لوگوں کی بڑی تعداد نے شرکت کی۔ مظاہرین نے ہاتھوں میں بینرز اور پلے کارڈز اٹھا رکھے جن پر پنجاب حکومت کے اقدامات کی مذمت کی گئی تھی۔ مظاہرین سے خطاب میں ایم ڈبلیو ایم کے رہنماوں مولانا سید ساجد شیرازی، مولانا ظہیر سبزواری اور مولانا طاہر نقوی کا کہنا تھا کہ ہم کسی صورت عزداری کیخلاف کوئی سازش قبول نہیں کریں گے، عزاداری ہماری شہ رگ حیات ہے جس پر کوئی کمپرومائز نہیں کیا جاسکتا، نیشنل ایکشن پلان کی آڑ میں پرامن لوگوں کو تنگ کیا جارہا ہے جس کا آرمی چیف جنرل راحیل شریف نوٹس لیں۔ دنیا جانتی ہے کہ ہم نے ہزاروں افراد اس مادر وطن کی خاطر قربان کیے ہیں لیکن چند مٹھی بھر دہشتگردوں کو خوش کرنے کیلئے پنجاب حکومت پرامن لوگوں کو تنگ کررہی ہے۔ رہنماوں کا کہنا تھا کہ ہم حکومت کو مہلت دیتے ہیں کہ وہ اپنے اوچھے ہتھکنڈوں سے باز آئے اور گرفتار مقررین کو فی الفور رہا کیا جائے، اگر حکومت کی جانب سے کارروائیاں جاری رہیں تو آئندہ کا لائحہ عمل بنانے میں آزاد ہوں گے، اُس وقت حکومت سے کوئی تعاون نہیں ہوگا۔ اس موقع پر پنجاب حکومت کیخلاف شدید نعرہ بازی بھی کی گئی۔

وحدت نیوز (قم) عزاداری سید الشہداؑ کو محدود کرنے کی کوشش کرنے کی کوئی سازش کامیاب نہیں ہونے دینگے۔عزاداری سید الشہدا ؑ  منانا ملت پاکستان کا آئینی و جمہوری حق ہے۔حکومت اپنی سعودی و امریکی آقاوں کو خوش کرنے کے لئے ملت ِ پاکستان کے آئینی حقوق کو سبوتاژ کرنے سے باز رہے۔ان خیالات کا اظہار مجلس وحدت مسلمین قم کے سیکرٹری اطلاعات آگا نذرحافی نے ایم ڈبلیو ایم قم کے عزاداری کے حوالے سے  ایک اجلاس میں کیا،انہوں نے کہا کہ اگر حکومت سے اپنی اسلام اور پاکستان دشمن پالیسیوں کو ترک نہ کیا اورعزاداری سید الشہداؑ کی مخالفت سے باز نہ آئی تو وہ بین الاقوامی سطح پر آواز اٹھائیں گے۔

وحدت نیوز (لاہور) مجلس وحدت مسلمین کے سربراہ علامہ راجہ ناصرعباس جعفری کی اپیل پر چاروں صوبوں سمیت آزادکشمیر اور گلگت بلتستان میں حکمرانوں کی جانب سے محرم الحرام اور عزاداری نواسہ رسولۖ سید شہداء کیخلاف متعصبانہ کارروائیوں کیخلاف ملک گیر احتجاجی مظاہرے کئے گئے۔ لاہور میں لاہور پریس کلب کے باہر ہونیوالے مظاہرے میں چاروں صوبوں بالخصوص پنجاب میں ملت جعفریہ کیخلاف متعصبانہ کارروائیوں کیخلاف عزداران نے شدید غم و غصے کا اظہار کیا۔ مظاہرین سے خطاب کرتے ہوئے علماء، ذاکرین اور بانیان مجالس کا کہنا تھا کہ نیشنل ایکشن پلان دہشتگردی اور انتہاپسندی کی عفریت کے خاتمے کیلئے بنایا گیا تھا، بدقسمتی سے ہمارے عاقبت نااندیش حکمران اسے محرم الحرام میں نواسہ رسولۖ کے نہتے اور پرامن عزاداروں کیخلاف استعمال کر کے ان سے مذہبی آزادی جو پاکستان کے آئین و قانون نے ان کو دی ہے، سلب کر رہے ہیں، جو ہمارے لئے کسی طور بھی قابل قبول نہیں۔ انہوں نے کہا کہ ہم عزاداری سید شہداء کے بغیر زندگی کو موت پر ترجیح دیتے ہیں، پنجاب کے حکمران ملت جعفریہ کیخلاف متعصبانہ کارروائیوں سے باز رہیں، ذاکرین اور علما کی ضلع بندیاں قابل مذمت ہیں، انہیں ہم ذکر محمد و آل محمد کیساتھ دشمنی قرار دیتے ہیں۔

ایم ڈبلیو ایم پنجاب کے سربراہ علامہ عبدالخالق اسدی کا کہنا تھا کہ روایتی جلوس ہائے عزاء اور چار دیواری کے اندر خواتین کی مجالس پر ہمیں کسے سے اجازت لینے کی ضرورت نہیں، ایمپلی فائر ایکٹ سے عزاداری سید شہداء کو مثتثنیٰ قرار دیا جائے، ہم لاکھوں کے اجتماعات کو لاوڈ سپیکر کے بغیر کنٹرول نہیں کر سکتے، ہم مطالبہ کرتے ہیں کہ اس علامتی احتجاج کے بعد حکمران ہمیں اپنے آئینی و قانونی حق روکنے کی کوشش نہ کریں بصورت دیگر ملک بھر میں عزاداری کی مجالس و جلوس ہائے عزاء سڑکوں اور شاہراہوں پر ہونگے۔ انہوں نے کہا کہ ن لیگ کس کے ایجنڈے پر عمل کر رہی ہے، دہشتگردوں کے سرپرستوں اور داعش، النصرہ، بوکو حرام جیسے درندہ صفت گروہوں کے سرپرست بادشاہوں کے نظام کو ہم قائداعظم کے پاکستان میں نافذ نہیں ہونے دینگے۔ انہوں نے کہا کہ عزاداری سید شہداء کیلئے ہم اپنی جانیں دینے کو تیار ہیں لیکن اس کیخلاف کسی بھی قدغن کو برادشت نہیں کریں گے، تاریخ گواہ ہے دنیا کا کوئی بھی ظالم و جابر آج تک نہ اس عزاداری کو روک سکا ہے نہ عزاداران امام مظلوم اسے رُکنے دینگے۔

علامہ عبدالخالق اسدی نے کہا کہ پنجاب کے طول و عرض میں عزاداران امام مظلوم کیخلاف ایک منظم منصوبی بندی کے تحت کارروائیاں جاری ہیں، علماء، ذاکرین، بانیان مجالس کو ہراساں کیا جا رہا ہے، چادر اور چار دیواری کے تقدس کو پامال کیا جا رہا ہے، ہم ان کارروائیوں کو ن لیگ کی جانب سے انتقامی کارروائیوں تصور کرتے ہیں، اگر یہ سلسلہ جاری رہا تو ملک بھر میں نہ ختم ہونیوالے احتجاجی مظاہرے شروع ہونگے، جو ہمارا آئینی و قانونی حق ہے۔ انہوں نے کہا کہ ہم اس ملک کے پرامن شہری ہیں، خدا کا شکر ہے کہ اس ملت سے تعلق رکھنے والوں نے کبھی بھی پاکستان کی سلامتی کیخلاف کوئی قدم نہیں اُٹھایا، ہم نے پاکستان کی سلامتی و بقا کیلئے 24 ہراز سے زائد جانوں کے نذرانے پیش کئے، لیکن ملکی سلامتی پر آنچ تک نہیں آنے دی، پنجاب کے حکمران ہمارے قاتلوں کی سرپرستی کرتے رہے، آج بھی یہ انتقامی کارروائیاں دہشتگردوں کی خوشنودی کیلئے کی جا رہی ہیں۔

انہوں نے اپنے خطاب میں کہا کہ عزاداری سید شہداء ہمارا آئینی و قانونی حق ہے، ہم اس سے ایک ایچ بھی پیچھے ہٹنے کو تیار نہیں، پنجاب میں علماء و ذاکرین پر ضلع بندیاں ناقابل قبول ہے۔ انہوں نے کہا کہ عزاداری کو محدود کرنے کے سازشی ایجنڈے کو ہم کامیاب نہیں ہونے دینگے، ظالم اور مظلوم کو ایک لاٹھی سے ہانکنے کا عمل ختم ہونا چاہئے، ایمپلی فائر ایکٹ سے مجالس عزاء کو مستثیٰ قرار دیا جائے، ذکر محمد آل محمد میں کسی کی دل آزاری نہیں بلکہ وحدت، اخوت اور محبت کا پیغام دیا جاتا ہے، آج کے اس علامتی مظاہرے کے بعد بھی حکمرانوں کا رویہ یہی رہا تو ہم ملک گیر احتجاج پر مجبور ہونگے۔ مظاہرین سے آئی ایس او پاکستان کے مرکزی رہنما توقیر عباس، علامہ وقارالحسنین نقوی، شیخ عمران علی، افسر حسین خان سمیت دیگر رہنماوُں نے بھی خطاب کیا۔ مظاہرے میں عزاداران و خواتین اور بچوں کی بڑی تعداد نے شرکت کی اور حکومتی غنڈہ گردی کیخلاف نعرہ بازی کرتے رہے۔

وحدت نیوز (کوئٹہ) مجلس وحدت مسلمین کے مرکزی رہنما علامہ سید ہاشم موسوی نے احتجاجی ریلی سے خطاب کرتے ہوئے کہا کہ عزاداری سید الشہداء ہمارا آئینی جمہوری اور قانونی حق ہے جس سے ہم کسی صورت دستبردار نہیں ہوں گے۔ وفاقی ، پنجاب اور سندھ حکومت کی جانب سے عزارداری کو محدود کرنے کی شدید مذمت کرتے ہیں۔ ہم کسی صورت اس بات کی اجازت نہیں دیں گے کہ وہ عزاداری سید الشہداء پر کوئی قدغن لگائیں ، حکومت پنجاب اور حکومت سندھ دہشت گردوں کو کیفر کردار تک پہنچانے کے بجائے عزاداری اور پُر امن جلوس کو محدود کرنے کی کوشش کر رہے ہیں جو کسی صورت قبول نہیں۔آج اسی سلسلے میں پاکستان کے مختلف شہروں میں عزاداری سید الشہداء کو محدود کرنے کی حکومتی سازش کے خلاف ملک گیر مظاہرہ کیا گیا۔وطن عزیز میں سالوں سے جو کام دہشت گرد نہیں کرسکے وہ کام وفاقی حکومت ، سندھ اور پنجاب حکومت نیشل ایکشن پلان کی آڑ میں عزاداری کے خلاف کر رہی ہے۔ حکمرانوں کی بے حسی اور ظلم عروج پر ہیں۔ دہشت گرد گروہوں کو خوش کرنے کے لیے محرم الحرام کے جلوسوں اور مجالس پر پابندیاں عائد کی جاری ہے جو ہمیں کسی صورت قبول نہیں۔

انہوں نے مزید کہا کہ پنجاب ، سندھ اور وفاقی حکومت کو خبردار کرتے ہیں کہ عزادارن سید الشہداء کو آزادی کے ساتھ مجالس اور جلوس عزاء کرنے کی مکمل آزادی دیں۔ بصورت دیگر ملک گیر پیمانے پہ احتجاجی مظاہروں کو مزید وسعت دیں گے ۔ جس کی وجہ سے حکومت کے لیے مشکلات پیدا ہوں گی۔ یہ احتجاجی ریلی تمام عزاداروں کے ساتھ مکمل یکجہتی کا اظہار کرتی ہے۔ عزاداری سید الشہداء ظالم سے نفرت اور مظلوم کی حمایت میں کی جاتی ہے۔ جو تمام مظلوم انسانوں کے ساتھ اظہار یکجہتی کو ظاہر کرتی ہے اور رہتی دنیا تک یہ عزاداری قائم و دائم رہے گی۔

وحدت نیوز (ملتان) مجلس وحدت مسلمین اور امام بارگاہ یونین ملتان کے زیراہتمام نکالی جانے والی ریلی سے خطاب کرتے ہوئے ایم ڈبلیو ایم کے مرکزی رہنما علامہ ابوذر حسین مہدوی نے کہا کہ عزاداری ہماری شہ رگ حیات ہے، پنجاب حکومت ہمارے آئینی اور قانونی حق کو غصب کرکے یزیدیت کو فروغ دے رہی ہے، جسے ہم کسی صورت قبول نہیں کرتے۔ امام بارگاہ یونین ملتان کے صدر اسد عباس بخاری نے اس موقع پر ملتان کے لائسنسداروں کی نمائندگی کرتے ہوئے کہا کہ امام حسین علیہ السلام کا ذکر کرنے والوں پر پابندیاں لگانا دراصل ذکر حسین کو محدود کرنا ہے، جو کام دہشت گردی 35سالوں میں نہیں کرسکی، اب وہ کام یہ حکومت کرنا چاہتی ہے، ہم حکومت کو متنبہ کرتے ہیں کہ اگر عزاداری کو روکا گیا یا ہمارے بے گناہ نوجوانوں کو گرفتار کیا گیا تو پھر اس یزیدی حکومت کی بساط اسی محرم لپیٹ دی جائے گی۔ علامہ قاضی نادر حسین علوی نے کہا کہ آج ملک بھر میں قائد وحدت کے حکم پر علامتی مظاہرے اور ریلیاں نکالی جا رہی ہیں، جو کہ وفاقی اور صوبائی حکومتوں کے لیے ایک الٹی میٹم ہے، اگر ہمارے مطالبات نہ مانے گئے اور عزاداری کی راہ میں رکاوٹیں کھڑی کی گئیں تو ہم ملک کے ہر چوک میں دھرنا دیں گے اور عزاداری امام حسین کریں گے۔ سید اقبال مہدی زیدی نے کہا کہ ہر دور کے یزید نے حسینیت کو روکنے کی ناکام کوشش کی، لیکن وہ اپنے عزائم میں ناکام و نامراد ہوا اور انشاءاللہ اس دور کا یزید بھی ناکام ہوگا۔