The Latest
وحدت نیوز (گلگت) گلگت بلتستان میں نگران سیٹ اپ اور چیف الیکشن کمشنرکی تعیناتی کے سلسلے میں وفاقی حکومت کی مداخلت برداشت نہیں کی جائیگی۔جعلی مینڈیٹ سے برسراقتدار آنے والی حکومت کو حق نہیں پہنچتا کہ وہ گلگت بلتستان کے معاملات میں مداخلت کرے۔ نگران وزیر اعلیٰ اور اس کی کابینہ کے چناؤ میں دیانت دار،سیاسی وابستگی سے بالاتر اور اہل افراد کا چناؤ کیا جائے۔ انتخابات کو شفاف بنانے کیلئے غیر جانبدار ریٹائرڈ جج یا بیورکریٹ کی تعیناتی عمل میں لائی جائے۔مرکز کی طرح مک مکا کی پالیسی کو جاری رکھ کر انتخابات میں اثر انداز ہونے کی کوشش کی گئی تواس کے سنگین نتائج برآمد ہونگے۔
ان خیالات کا اظہار مجلس وحدت مسلمین گلگت بلتستان کے سیکرٹری جنرل علامہ نیئرعباس مصطفوی نے اپنے ایک بیان میں کیا ہے۔ انہوں نے کہا ہے کہ پاکستان پیپلز پارٹی اور مسلم لیگ ن مرکز میں مک مکا کی پالیسی پر گامزن ہیں اور گلگت بلتستان میں بھی باریاں لینے کے خواب دیکھ رہی ہیں جسے شرمندہ تعبیر ہونے نہیں دیا جائیگا۔ہماری جماعت گلگت بلتستان میں شفاف انتخابات کے انعقاد کو یقینی بنانے کیلئے بھرپور کردار ادا کرے گی اور عوام کے حقیقی مینڈیٹ کو چرانے کی کسی سازش کو کامیاب ہونے نہیں دے گی۔شفاف انتخابات کے راستے میں خلل ڈالنے اور من پسند انتخابی نتائج کے ذریعے اقتدار تک پہنچے کے خواب دیکھنے وا لے موجودہ ملکی صورت حال سے عبرت حاصل کریں۔ گلگت بلتستان کے عوام بیدار ہیں اورکئی دہائیوں سے باریاں لیکر حقوق پر ڈاکہ ڈالنے والوں سے ماضی کے تمام مظالم کے حسابات چکادینے کو تیار ہیں۔انہوں نے مزید کہا وفاقی حکومت کے دن گنے جاچکے ہیں اورزرداری کی بیساکھیوں پر چلنے والی مسلم لیگ ن کی حکومت زیادہ دیر نہیں چلے گی۔
وحدت نیوز ( گلگت) علی مسجد جوٹیال بم سازش کیس ملوث مجرموں کی عدم گرفتاری پرعوام میں بے چینی پائی جاتی ہے۔ ایک ہفتہ گزرنے کے باوجود کوئی گرفتاری عمل میں نہیں لائی گئی اور سیکورٹی ادارو ں کی عدم لچسپی سے ثابت یہ ہورہا ہے کسی وہ دباؤ کا شکار ہیں اور واقعے میں ملوث کرداروں کو محفوظ راستہ دینا چاہتے ہیں۔چار کلومیٹر کے رقبے والے شہر میں درجنوں سیکورٹی ایجنسیاں کام کررہی ہیں اور دہشت پھیلانے والوں کے سراغ لگانے میں ناکامی نے ان اداروں کی کارکردگی پر سوالیہ نشان چھوڑے ہیں۔
ان خیالات کا اظہار مجلس وحدت مسلمین گلگت ڈویژن کے سیکرٹری جنرل محمد بلال سمائری نے اپنے ایک بیان میں کیا ہے۔ انہوں نے کہا کہ دہشت گردوں کا کوئی مذہب نہیں ہوتا آج ا نہوں نے اہل تشیع کی مسجد میں بم رکھا ہے تو کل کہیں اور بھی رکھ سکتے ہیں۔سیکورٹی اداروں نے ایسے واقعات پر پردہ ڈالنے کی کوشش کی اورمحض خانہ پرُی کی گرفتاری عمل میں لاکر فائل بند کردی گئی تو اس کے بہت برے اثرات مرتب ہونگے۔ انہوں نے مزید کہا کہ معاملے میں سنجیدگی کا مظاہر ہ کرتے ہوئے دہشت گردی کی روک تھام کیلئے موثر اور جامع حکمت عملی ترتیب دی جائے اور کسی دباؤ میں آئے بغیر دہشت گردوں کا سراغ لگاکر انہیں قانون کے کٹہرے میں کھڑا کیا جائے۔انہوں نے کہا کہ پولیس اور سیکورٹی اداروں خبر دار کیا کہ اگر انہوں نے ماضی کی روش کو ترک نہ کی اور دہشت گردوں پر ہاتھ نہ ڈالا تو ہم احتجاج پر مجبور ہوجائیں گے۔
وحدت نیوز (اسلام آباد) مجلس وحدت مسلمین پاکستان کی لیگل ایڈ کمیٹی کی کاوشوں سے اسلام آباد سے گرفتار ایم ڈبلیوایم کے تمام کارکنان اورعہدیداران کی ضمانت منظور ہوگئی ہے، انسداد دہشت گردی عدالت اسلام آباد میں پیشی کے موقع پر ایم ڈبلیوایم لیگل ایڈ کمیٹی کے رکن فضل عباس ایڈووکیٹ اور اجمل حسین زیدی ایڈووکیٹ نے فاضل جج کے روبرودرخواست ضمانت پیش کی جسے عدالت نے منظور کرتے ہوئے ایم ڈبلیوایم کے تمام کارکنان کو رہا کرنے کا حکم جاری کردیا، واضح رہے کہ ایم ڈبلیوایم آزاد کشمیر کے رہنما تصور موسوی، ذیشان حیدر، تہور عباس اور دیگر ساتھیوں کو 11ستمبر کی صبح اسلام آباد پولیس نے مرکزی سیکریٹریٹ پر چھاپہ مار کر گرفتار کر لیا تھا، تمام گرفتار کارکنان پر انسداد دہشت گردی ، کار سرکار میں مداخلت اور دیگر دفعات لگا کر بلا جواز حراست میں رکھا گیا، جو کہ سیلاب متاثرین کی بحالی کے آپریشن میں حصہ لینے اسلام آباد آئے تھے۔
وحدت نیوز(کراچی) کراچی واٹر اینڈ سیوریج بورڈ کے چیف انجینئر امداد حسین مگسی نے مجلس وحدت مسلمین کی دعو ت پر جعفرطیار سوسائٹی کا دورہ کیا، اس موقع پر ان کے ہمراہ اسسٹنٹ چیف انجینئر اختر باجوہ، ایکس سی این ملیر اشرف صدیقی اور دیگر مطالقہ حکام بھی موجود تھے، واٹر بورڈکے حکام نے ایم ڈبلیوایم کے ضلعی سیکریٹری جنرل احسن عباس رضوی سے وحدت ہاوس میں ملاقات کی اور بعد ازاں جعفر طیار سوسائٹی میں مکینوں کو درپیش نکاسی آب کے مسائل اور سیوریج کے گندے پانی کے ڈھیر کا جائزہ لیا،اس موقع پر گفتگو کرتے ہوئے احسن عباس رضوی کا کہنا تھا کہ بار بار توجہ مبذول کروانے کے باوجود سرکاری حکام جعفر طیار کے عوام کو درپیش صفائی ستھرائی کے مسائل حل کرنے میں یکسر تعاون نہیں کر رہے ، مسلسل متعصبانہ رویہ اہلیان جعفر طیا ر کے اندر غم و غصے کے جذبات کو پروان چڑھنے کا سبب بن رہا ہے، اہل محلہ سیوریج کے پانی کی ناقص نکاسی کے باعث ذہنی اذیت اور اضطراب میں مبتلا ہوچکے ہیں ، کئی مرتبہ علاقہ مکینوں نے اپنی مدد آپ کے تحت صفائی ستھرائی کے کام انجام دلوائے لیکن اس کے باوجود مسائل جوں کے توں ہیں ، انہوں نے واٹر بورڈ کے حکام سے مذید کہا کہ آپ کا ڈپارٹمنٹ پوری سوسائٹی کاایک گرینڈ سروے کرے اور جہاں جہاں لائن کی تبدیلی کا عمل ضروری ہے اسے جلد مکمل کیا جائے، واٹر بورڈ کے چیف انجینئر امداد مگسی نے مطالقہ ذمہ داران کو ہدایات جاری کیں کے سیوریج کے پانی کی مکمل نکاسی تک آپریشن جاری رکھا جائے، واٹر بورڈ حکام نے شمائل ہومز میں سیوریج کے گندے پانی سے متاثرہ مکینوں سے ملاقات بھی کی اور ان کے مسائل کے جلد حل کی یقین دہانی بھی کروائی ، اس موقع پر ایم ڈبلیوایم کے رہنماحسن عباس، اسد علی ، مختار امام ، نقی زیدی ، عارف رضااور دیگر بھی موجود تھے۔
وحدت نیوز(کوہاٹ) مدبرانہ قیادت و مخلصانہ پالیسیوں کے نتیجہ میں ملت کی سرخروئی کا سفر جاری ہے، کل تک ہمارے مطالبات بھی محدود تھے لیکن آج ہم نظام کی تبدیلی کا مطالبہ کر رہے ہیں، تنظیم کی ہمہ گیریت اور منظم ہونے کے لئے محلہ کی سطح پر اسکا منظم ہونا بہت ضروری ہے، ان خیالات کا اظہار مجلس وحدت مسلمین صوبہ خیبر پی کے کے سیکرٹری جنرل علامہ سبطین حسینی نے کوہاٹ کے علاقوں کم سم، مومن آباد، تورہ وڑے، لنڈی کچئی، موسی خیل، عیسیٰ خیل، حسن خیل، میر اصغر میلہ میں یونٹ سازی کی مہم کے دوران مختلف عمائدین و معززین سے تبادلہ خیال کے دوران کیا۔ ان کا کہنا تھا کہ منظم قومیں ہی اپنے حقوق کا دفاع کر سکتی ہیں، ہر گاوں و محلہ و شہر میں ایم ڈبلیو ایم کے شیدائی موجود اور ملت کے لئے اس الہی تنظیم کی خدمات سے واقف ہیں۔ عوام کے تاثرات اس بات کی عکاسی کرتے ہیں کہ وہ ایم ڈبلیو ایم کے دینی و قومی اقدامات و پالیسیوں سے خوش ہیں۔
وحدت نیوز(پشاور) مجلس وحدت مسلمین خیبر پختونخوا کے رہنماء ارشاد حسین بنگش نے امامیہ اسٹوڈنٹس آرگنائزیشن پاکستان کے نئے میرکاررواں منتخب ہونے پر تہور حیدری کو مبارکباد دیتے ہوئے نیک خواہشات کا اظہار کیا ہے، اپنے ایک تہنیتی بیان میں ان کا کہنا تھا کہ آئی ایس او ایک فکری اور الہیٰ کاررواں ہے، جو ملت میں ریڑھ کی ہڈی کی حیثیت رکھتی ہے، ہم آئی ایس او کے نئے صدر تہور حیدری کو ایم ڈبلیو ایم کی تمام صوبائی کابینہ کی جانب سے دل کی گہریوں سے مبارکباد پیش کرتے ہیں، اور امید کرتے ہیں کہ تہور حیدری بھی آئی ایس او کے دیگر مرکزی صدور کی طرح اس الہیٰ کاررواں کو بہترین انداز میں آگے لیکر بڑھیں گے، اور نوجوانوں کی فکری اور نظریاتی تربیت کا سلسلہ جاری رکھیں گے۔
وحدت نیوز(لاہور) مجلس وحدت مسلمین کے رہنما علامہ مصطفی مہدی اور سیکریٹری وحدت یوتھ لاہور ڈویژن نقی مہدی کے والداور معروف عالم دین حافظ کفایت حسین صاحب قبلہ مرحوم کے فرزند آغا حسن مہدی مرحوم کی نماز جنازہ مومن پورہ قبرستان کے سامنے میکلوڈ پر ادا کر دی گئی نماز جنازہ میں مجلس وحدت مسلمین پاکستان کے سربراہ علامہ راجہ ناصر عباس جعفری ،مرکزی رہنماوں علامہ احمد اقبال رضوی،علامہ ابوذر مہدوی،علامہ امتیاز کاظمی،سید اسد عباس نقوی سمیت دیگر عہدیداراں ،کارکنان اور عمائدین شہر نے شرکت کی مرحوم کو مومن پورہ قبرستان میں سپرد خاک کر دیا گیا ، مجلس سوئم آج (بروزمنگل ) 3بجے گلستان زہرا ایبٹ روڈ پرادا کی جائے گی،مرحوم کی ایصال ثواب کے لئے مجلس عزاء سے علامہ امتیاز کاظمی سیکرٹری جنرل مجلس وحدت مسلمین لاہور بھی خطاب کریں گے۔
وحدت نیوز(کوئٹہ) مجلس وحدت مسلمین کے رہنماء علامہ مقصود علی ڈومکی نے کہا ہے کہ انقلاب اور آزادی کی جدوجہد ملکی تقدیر بدل دے گی۔ بلوچستان کے عوام اس انقلابی جدوجہد میں اپنا کردار ادا کریں گے۔ ذوالحج کا مہینہ حضرت ابراہیم خلیل (ع) سے تجدید عہد کا مہینہ ہے۔ ابراہیم بت شکن (ع) نے تن تنہا نمرودی سلطنت کے خلاف قیام کیا۔ باطل طاغوتی نظام کے خلاف جدوجہد کرنے والوں کے لئے خلیل اللہ (ع) کی حیات طیبہ مشعل راہ ہے۔ اجلاس سے خطاب کرتے ہوئے صوبائی سیکرٹری روابط مولانا عبدالحق بلوچ نے مرکزی سیکرٹری تنظیم برادر یعقوب حسینی کے دورہ بلوچستان کی تفصیلات سے آگاہ کیا۔ اس موقعہ پر اجلاس سے خطاب کرتے ہوئے صوبائی سیکرٹری فلاح و بہبود آغا سہیل نے کہا کہ مجلس وحدت مسلمین بلوچستان شعبہ فلاح کے زیراہتمام دس اکتوبر کو ایک روزہ فری میڈیکل کیمپ منعقد کیا جا رہا ہے جبکہ اس سال پانچ مقامات پر تعمیر مساجد کا منصوبہ زیرغور ہے۔ اجلاس میں فیصلہ کیا گیا کہ اس سال دوسری سالانہ لبیک یا رسول اللہ (ص) کانفرنس انتہائی عقیدت و احترام سے منائی جائے گی۔ کانفرنس میں شیعہ سنی علماء اور اکابرین شریک ہوں گے۔ کانفرنس کا مقصد اتحاد بین المسلمین کا فروغ اور امن و اتحاد کا پیغام عام کرنا ہے۔ اجلاس سے مولانا محمد علی جمالی، مولانا تجمل عباس جعفری اور غلام حسین شیخ نے بھی خطاب کیا۔
وحدت نیوز(لاہور) امامیہ اسٹوڈنٹس آرگنائزیشن پاکستان کے سالانہ کنونشن میں نئے میر کارواں کا انتخاب کر لیا گیا۔ آئی ایس او کے ملک بھر سے آئے ہوئے سینکڑوں عہدیداروں نے مرکزی کنونشن کی آخری نشست میں ووٹنگ کے ذریعے نئے میر کارواں کا انتخاب کیا۔ نئے میر کارواں کے لئے دو نام دیئے گئے۔ جن میں ابوذر مہدی اور تہور حیدری کے نام شامل تھے۔ خفیہ رائے شماری کے بعد آئی ایس او نے تہور حیدری کو اپنا میر کارواں چن لیا۔ تہور حیدری کا تعلق پنجاب کے ضلع جھنگ سے ہے جبکہ وہ ایم بی اے ایگزیکٹو کے فائنل ایئر کے طالب علم ہیں۔ اس سے قبل تہور حیدری آئی ایس او کے مرکزی سیکرٹری جنرل تھے۔ تہور حیدری بہاؤالدین زکریا یونیورسٹی ملتان کے طالب علم ہیں۔ تہور حیدری ملتان ڈویژن کے صدر رہ چکے ہیں۔
آئی ایس او کے نئے میر کاررواں کے نام کا اعلان سندھ کے معروف عالم دین اور ایم ڈبلیوایم کی شوریٰ عالی کے رکن علامہ حیدر علی جوادی نے کیا جبکہ مجلس وحدت مسلمین پاکستان کے مرکزی رہنما علامہ ہاشم علی موسوی نے ان سے حلف لیا۔ اپنے انتخاب کے بعد آئی ایس او کے نئے میر کاررواں کا شرکائے کنونشن سے خطاب میں کہنا تھا کہ یہ ذمہ داری اللہ کا مجھ پر انعام اور امتحان ہے، میں آپ دوستوں کے تعاون سے ہی اس امتحان میں سرخرو ہونے کی کوشش کروں گا۔ انہوں نے کہا کہ حقیقی اہداف کے حصول کیلئے ہم آہنگی، اتحاد اور وحدت کو فروغ دینا ہو گا۔ انہوں نے کہا کہ آئی ایس او ایک الٰہی تنظیم ہے جس کا مقصد نوجوان نسل کو تعلیمات محمد وآل محمد کی جانب راغب کرنا ہے۔
وحدت نیوز(لاہور) امامیہ اسٹوڈنٹس آرگنائزیشن پاکستان کا سالانہ مرکزی کنونشن سفیران ولایت گذشتہ روز سے جاری ہے، کنونشن کے دوسرے روز تعلیمی سیمینار منعقد ہوا، جس میں پاکستان بھر سے اسکالرز نے شرکت کی، جن میں ڈاکٹر زاہد علی زاہدی، ڈاکٹر ثقلین نقوی اور ڈاکٹر باقر شمیم نقوی نے خطاب کیا۔ کنونشن میں ایجوکیشنل ایکسپو کا بھی انتظام کیا گیا تھا، جس میں ملک بھر کے اہم تعلیمی اداروں کے اسٹالز طلبہ کی توجہ کا مرکز بنے رہے۔ کانفرنس سے خطاب میں مقررین کا کہنا تھا کہ پاکستان میں اعلٰی تعلیم کے حصول کی رغبت کی طلبہ میں کمی پائی جاتی ہے جبکہ نوجوانان پاکستان کی پہلی ترجیح تعلیم ہونی چاہئے۔ مرکزی صدر اطہر عمران کا کہنا تھا کہ آئی ایس او پاکستان ہمیشہ سے تعلیم و تربیت پر فوکس کرتی رہی ہے اور یہی وجہ ہے کہ موجوہ سال کو آئی ایس او نے تعلیم و تربیت کے عنوان سے منایا۔
کنونشن کے دوسرے دن کی دوسری نشست میں عالمی مہدویت کانفرنس منعقد کی گئی، جس علامہ نقی ہاشمی، علامہ امین شہیدی اور ایران سے خصوصی طور پر آئے ہوئے ڈاکٹر محمد رضا بہروزی نے خطاب کیا۔ایرانی اسکالر ڈاکٹر محمد رضا بہروزی نے کہا دنیا عالمی حکومت کی متلاشی ہے اور مہدویت تمام انسانیت کو مسائل سے نکالنے کے لئے ایک امید سمجھتے ہیں۔ دنیا اس وقت عالمی گلوبلائزیشن کی طرف بڑھ رہی ہے۔ انہوں نے کہا کہ امام مہدی ؑ کے انقلاب کے بعد دنیا میں مظلومین کی حکومت ہوگی، یہ تب ہی ممکن ہے جب پوری دنیا میں امام مہدی علیہ السلام کا نام ہوگا، امام مہدیؑ کا زمانہ علم و دانش کا زمانہ ہوگا، جہاں معاشرہ میں صالح افراد موجود ہوں گے اور وہ صالح افراد دنیا پر حکومت کریں گے۔ کنونشن میں ملک بھر سے ہزاروں امامیہ طلبا، دانشور، مذہبی اسکالرز اور آئی ایس او پاکستان کے سابقین شریک ہیں۔ کنونشن کے آخری روز آئی ایس او پاکستان کے نئے میر کارواں کا انتخاب عمل میں لایا جائے گا اور مال روڈ پر ناصر باغ سے پنجاب اسمبلی تک حمایت فلسطین ریلی نکالی جائے گی، جس میں آئی ایس او کے کارکنوں کے ساتھ ساتھ شہریوں کی بڑی تعداد بھی شریک ہوگی۔
