وحدت نیوز(اسلام آباد) جشن ولادت باسعادت رسول اکرم، خاتم النبیین، تاجدار ختم نبوت حضرت محمد مصطفیٰ ﷺ کے بابرکت موقع پر مجلس وحدت مسلمین کی طرف سے ملک بھر میں پانچ سو سے زائد مقامات پر استقبالیہ کیمپ لگائے گے اور جشن میلاد کے سلسلے میں نکالے جانے والے جلوسوں کے راستے میں مختلف مشروبات کی سبیلوں کی اہتمام کیا گیا،ایم ڈبلیو ایم کی طرف سے جاری بیان کے مطابق،جشن عید میلادالنبی ﷺکے موقعہ پر شیعہ سنی وحدت کا بھرپور عملی مظاہرہ دیکھنے میں آیا،ایم ڈبلیو ایم کے اراکین نے اپنے علاقے سے نکلنے والے جلوسوں میں شرکت کی اور نعت خوانی کے مقابلوں میں حصہ لیا، ایم ڈبلیو ایم کے مختلف صوبائی اور ضلعی دفاتر میں بھی تقریبات کا انعقاد کیا گیا اور سرور کائنات حضرت محمد ﷺ کی شان میں نعت خوانی کی گئی،واضح رہے کہ مجلس وحدت مسلمین کے مرکزی سیکرٹری جنرل علامہ راجہ ناصر عباس جعفری نے 12ربیع الاول تا 17ربیع الاول ملک بھر میں بفرمان امام خمینی ؒ ہفتہ وحدت و اخوت منانے کا اعلان کر رکھا ہے۔ اس سلسلے میں مختلف شہروں میں نعتیہ تقریبات اور رحمت اللعالمین حضرت محمد ﷺ کانفرنسز منعقد کی جائیں گی۔

وحدت نیوز(اسلام آباد) امام بارگاہ باب العلم اسلام آبادمیں نمازیوں پر فائرنگ کے نتیجے میں شہید ہونے والے ممتاز قانون دان سید سیدین زیدی ایڈووکیٹ کی نمازہ جنازہ مسجد باب العلم آئی ایٹ مرکز میں ادا کر دی گئی۔ نماز جنازہ میں نامور علما، وکلاء اور صحافیوں سمیت مختلف مکاتب فکر سے تعلق رکھنے والے ہزاروں افراد نے شرکت کی۔ایم ڈبلیو ایم کے مرکزی رہنما سیدعلی شاہ نے نماز جنازہ پڑھائی۔اس موقعہ پر شرکاء سے خطاب کرتے ہوئے مجلس وحدت مسلمین پاکستان کے مرکزی سیکرٹری جنرل علامہ راجہ ناصر عباس جعفری نے سیدین زیدی کی قومی خدمات کو خراج تحسین پیش کیا۔انہوں نے کہا کہ سیدین زیدی کے اندر قوم کا بے پناہ درد موجود تھا۔ان کی مذہبی خدمات کو کبھی فراموش نہیں کیا جا سکتا۔دہشت گردوں نے اس قوم کو اپنے ایک قیمتی اثاثے سے محروم کر دیا ہے۔انہوں نے کہا کہ اسلام آبادجیسے حساس علاقے میں دہشت گردوں کی یہ کاروائی قانون نافذ کرنے والے اداروں کے منہ پر طمانچہ ہے۔اربوں روپے کی لاگت سے تیار کیے جانے والے سیف سٹی منصوبے کی اہمیت و افادیت کھل کر سامنے آگئی ہے۔نیشنل ایکشن پلان پر حکومتی گرفت ڈھیلی پڑ گئی ہے۔جو دہشت گرد عناصر کے حوصلوں میں تقویت کا باعث ہے۔ملک میں دہشت گردی کی نئی لہرتشویش ناک ہے۔نا اہل حکمران عوام کی جان و مال کے تحفظ کی بجائے اپنے اثاثوں کو بچانے کی فکر میں بے قرار ہیں۔دہشت گردی کے واقعات پاکستان کی سالمیت و استحکام کے لیے سنگین خطرہ ہیں۔دہشت گردی کے خاتمے میں حکومت کا غیر سنجیدہ طرز عمل ارض پاک کو شدیدترین خطرات کی طرف لے جائے گا۔انہوں نے کہا کہ وفاقی دارالحکومت میں دہشت گردوں کی یہ کاروائی کوئی معمولی واقعہ نہیں بلکہ عالمی سطح پر پاکستان کی بدنامی کا باعث ہے۔اس واقعہ میں ملوث افراد کو فوری طور پر بے نقاب کر کے سولی پر چڑھایا جائے۔انہوں نے کہا کہ ہم ایک بیدار قوم ہیں اور اپنے حق کے لیے آواز بلند کرنا زندہ و بیدار قوموں کا خاصا ہے۔ ہم اپنے شہدا کے خون کاانصاف چاہتے ہیں۔ حکومت دہشت گردوں کے ساتھ مفاہمتی رویہ ترک کرے اور قانون وانصاف کے تقاضوں کے مطابق انہیں کیفر کردار تک پہنچایا جائے

وحدت نیوز(لاہور) مجلس وحدت مسلمین پاکستان کے مرکزی ڈپٹی سیکریٹری جنرل سید ناصرعباس شیرازی ایڈووکیٹ ایک ماہ کی جبری گمشدگی کے بعد بخیروعافیت فیصل آباد سے بازیاب ہو گئے ہیں،ناصرشیرازی کے چھوٹے بھائی  اور ان کی گمشدگی کیس کے مدعی علی عباس شیرازی کے مطابق اب سے کچھ دیر قبل وہ اپنے گھر باحفاظت پہنچ چکے ہیں، تفصیلات کے مطابق ایم ڈبلیوایم کے مرکزی ڈپٹی سیکریٹری جنرل اور سابق مرکزی صدر آئی ایس او پاکستان سید ناصرعباس شیرازی ایڈووکیٹ جنہیں ٹھیک ایک ماہ قبل یعنٰی یکم  نومبربروزبدھ  کو واپڈا ٹاون لاہور سے سرکاری اہلکاروں کی جانب سے جبری طور پر اغواکیا گیا تھا آج یکم دسمبر پورے ایک ماہ کی اسیری کاٹ کرسربراہ مجلس وحدت مسلمین پاکستان علامہ راجہ ناصرعباس جعفری کی شب وروز کوششوں اور رابطوں،   ایم ڈبلیوایم کے کارکنان اور ذمہ داران کی ملک گیر جہد مسلسل اورہائی کورٹ میں ان کا مقدمہ جانفشانی سے لڑنے والے وکلاء کی ٹیم بلخصوص فدا حسین رانا ایڈووکیٹ کی قانونی جنگ کی بدولت باحفاظت اپنے گھر پہنچ گئے ہیں،اغواءکاروں نے ناصر عباس شیرازی کے بھائی فخر شیرازی کو  ناصر شیرازی سے فون کروایا کہ اس جگہ سے انہیں آ کر لے جائیں، فخر شیرازی بتائی گئی جگہ پر پہنچے تو ناصر شیرازی وہاں موجود تھے،ناصرشیرازی کی بازیابی کے لئے جہاں ایم ڈبلیوایم کے کارکنان نے ملک بھر میں پرزور احتجاج اور جدوجہد کی وہیں آئی ایس او کے مرکزی صدر انصرمہدی اور تمام برادران امامیہ کا کردار بھی لائق تحسین ہے، خدا وند متعال کی بارگاہ میں دعا ہے کہ ملت جعفریہ کے دیگر لاپتہ جوان بھی جلد اپنے اہل خانہ کے ہمراہ ہوں ۔

وحدت نیوز (بھکر) مجلس وحدت مسلمین ضلع بھکر کے زیراہتمام جلوس ہائے میلاد کے مرکزی راستے میں ایم ڈبلیو ایم کے سربراہ علامہ راجہ ناصر عبا س جعفری کی کال پر میلادالنبی کے جلوسوں کو خوش آمدید کہنے کے لیے ''استقبالیہ کیمپ''اور دودھ کی سبیل کا اہتمام کیا گیا، اس موقع پر مجلس وحدت مسلمین کے ضلعی سیکرٹری جنرل سفیر حسین شہانی ایڈووکیٹ، سید ظہیر عباس نقوی، مزمل عباس اور دیگر رہنما موجود تھے۔ ایم ڈبلیو ایم کے ضلعی سیکرٹری جنرل سفیر حسین شہانی نے کہا کہ بھکر میں اتحاد بین المسلمین کے حوالے سے مجلس وحدت مسلمین اپنا کردار ادا کرتی رہے گی، ملت تشیع ربیع الاول کے دوران جلوس ہائے میلاد کا استقبال کرکے اپنا حق ادا کر رہی ہے، اُنہوں نے کہا کہ ہم اس موقع پر مرکزی ڈپٹی سیکرٹری جنرل سید ناصر عباس شیرازی کی بازیابی کا مطالبہ کرتے ہیں، پنجاب انتظامیہ اپنے لیے مسائل کھڑے کر رہی ہے، اگر سید ناصر عباس شیرازی کو فوری بازیاب نہ کیا گیا تو 10 دسمبر کو لاہور میں دھرنا دیں گے۔ اس موقع پر بھکر شہر میں نکالے جانے والے جلوسوں کو خوش آمدید کہنے کے ساتھ ساتھ دودھ کی سبیل کا بھی اہتمام کیا گیا تھا۔

وحدت نیوز (جیکب آباد) مجلس وحدت مسلمین پاکستان ضلع جیکب آباد کے زیراہتمام عید میلاد النبی ﷺ اور ھفتہ وحدت کے سلسلے میں مدرسہ خاتم النبیین ﷺ جیکب آباد میں تقریب جشن منعقد ہوئی۔ جشن کی تقریب سے مجلس وحدت مسلمین صوبہ سندہ کے سیکریٹری جنرل علامہ مقصود علی ڈومکی، ضلعی سیکریٹری جنرل علامہ سیف علی ڈومکی، ضلعی رہنما مولانا حسن رضا غدیری، برادر منور علی سولنگی، سید سراج شاہ و دیگر نے خطاب کیا۔ تقریب میں برادران اہل سنت انجینئر عید محمد ڈومکی، وڈیرہ کریم بخش ودیگر نے خصوصی طور پر شرکت کی۔ اس موقع پر خطاب کرتے ہوئے علامہ مقصودعلی ڈومکی نے کہا کہ ھفتہ وحدت اور عید میلاد النبی ﷺ کے مبارک موقعے پر ہمیں شیعہ ،سنی وحدت و اتحاد کا عزم بالجزم کرنا ہوگا۔ اسلام دشمن سامراجی قوتین امریکہ اور اسرائیل مسلمانوں کے درمیان نفرتوں کو ہوا دینا چاہتی ہیں۔ مسلمانوں کے درمیان نفرتوں کو ہوا دینے والے عالمی سامراج اور شیطان بزرگ امریکہ کی خدمت کررہے ہیں۔ پیغمبر رحمت ﷺ نے ہمیں محبت اور اخوت کادرس دیا ہے۔ تقریب میں مجلس وحدت مسلمین کے رہنماء سجاول علی شیخ، سید علی شاہ، مولانا عبدالخالق منگی و دیگر شریک ہوئے۔ دریں اثناء عید میلاد النبی ﷺ اور ھفتہ وحدت کی مناسبت سے مجلس وحدت مسلمین کی جانب سے علامہ مقصودعلی ڈومکی، آغا سیف علی، حسن رضا غدیری اور اہل سنت رہنماء انجینئیر عید محمد کی قیادت جلوس نکالا گیا جو جیکب آباد شہر کے مرکزی راستوں سے ہوتا ہوا مرکزی امام بارگاہ پر اختتام پذیر ہوا۔

وحدت نیوز(ملتان) مجلس وحدت مسلمین جنوبی پنجاب کے سیکرٹری جنرل علامہ اقتدار حسین نقوی نے کہا ہے کہ 12ربیع الاول تا17ربیع الاول ہفتہ وحدت و اخوت منائیں گے، مجلس وحدت مسلمین کے تمام صوبائی و ضلعی دفاتر میں تقریبات منعقد کی جائیں گی اور میلاد کے جلوس میں شریک ہوں گے۔ملت تشیع کی طرف سے میلاد کے جلوسوں کے راستوں میں سبیلوں کا بھی اہتمام کیا جائے گا۔ علامہ اقتدار حسین نقوی نقوی نے کہا کہ آج بارہ ربیع الاول کو امام بارگاہ حسین آباد دولت گیٹ کے سامنے استقبالیہ کیمپ، شربت اور چائے کی سبیل لگائی جائے گی، استقبالیہ کیمپ میں تمام مذہبی رہنما اور سیاسی شخصیات شرکت کریں گے، قبل ازیں اسلام آباد میں مجلس وحدت مسلمین کے سربراہ علامہ راجہ ناصر عباس جعفری نے پریس کانفرنس سے خطاب کرتے ہوئے کہا کہ جشن عید میلاد النبی(ص)میں تمام مسلمانوں خصوصا تمام مومنین اور تنظیمی عہدیداران سے اپیل کرتا ہوں کہ پورے پاکستان میں جشن عید میلاد النبی ص کو شایان شان طریقے سے منائیں جلوس کے رستوں میں سبیلیں اور نیاز کا اہتمام کریں ساری دنیا دیکھ لے کہ نبی ص کے عاشق متحد اور خوش ہیں۔انہوں نے کہا کہ اس وقت ملک میں حکومت نام کی کوئی چیز نہیں۔آئین پاکستان کو ہر طریقے سے پامال کیا جا رہا ہے۔مجلس وحدت مسلمین کے مرکزی ڈپٹی سیکرٹری جنرل سید ناصر شیرازی کولاہور واپڈا ٹان سے پولیس کی وردی پہنے افراد نے یکم نومبر کی شب اغوا کیا۔ اس واقعہ کو ایک ماہ گزر چکا ہے اور ان کا تاحال سراغ نہیں لگایا جا سکے۔حکومت الزام لگاتی ہے کہ انہیں ہمارے مخالف اداروں نے اغوا کیا ہے ہمارا اس واقعہ سے کوئی تعلق نہیں جبکہ اداروں کی طرف سے بھی مسلسل لاعلمی کا اظہار کیا جا رہا ہے۔ناصر شیرازی کے معاملے میں ہم حکومت کا تعاقب کرنا نہیں چھوڑیں گے۔ 10دسمبر کو لاہور میں بھرپوردھرنا دیا جائے گا۔