وحدت نیوز(منڈی بہاولدین) مجلس وحدت مسلمین شعبہ خواتین کی مرکزی سیکرٹری تربیت سیدہ نرگس سجاد کا کہنا ہے کہ مجلس وحدت مسلمین ملت تشیع کی نمائندہ جماعت بن کر ابھری ہے مجلس قائد شھید علامہ عارف حسین کے افکار اور نظریات پر عمل کرتے ہوئے ملکی سیاست میں اپنا بھرپور کردار ادا کرے گی یہ بات انھوں نے منڈی بہاولدین میں شعبہ خواتین کے تاسیسی اجلاس میں گفتگو کرتےہوئے کہی۔

 ان کا کہنا تھا کہ مجلس کے قیام کا مقصد ملت تشیع کو حقوق سے آگاہی دینا اور حقوق کے حصول کی پر امن منظم جدو جہد ہے اجلاس میں محترمہ نازیہ نقوی صاحبہ کو عبوری ضلعی سیکرٹری جنرل نامزد کیا گیا اور تین ماہ میں تنظیم سازی مکمل کرکے کنوینشن منعقد کرنے کی ہدایت دی گئی . ایک روزہ دورے میں خانم نرگس سجاد جعفری نے ضلع منڈی بہاولدین کے سیکرٹری جنرل مولانا مظہر نقوی، برادر اسد نقوی اوردیگر تنظیمی برادران سے بھی ملاقات کی اس موقع پر ضلع کی تنظیمی صو رتحال اور شعبہ خواتین کی تشکیل میں در پیش مشکلات پر تبادلہ خیال کیا گیا،ملاقات میں محترمہ تغزل شاداب، نو منتخب سیکرٹری جنرل خواہر نازیہ نقوی اور دیگر خواتین بھی شریک تھیں ۔

وحدت نیوز(اسلام آباد)  مجلس وحدت مسلمین شعبہ خواتین کے مرکزی سیکرٹری جنرل محترمہ سیدہ زہرانقوی کی زیرصدارت ضلع اسلام آباد کی کابینہ کا اجلاس مرکزی آفس اسلام آباد میں منعقد ہوا جس میں آئندہ کی فعالیت کے حوالے سے لائحہ عمل طے پایا،اس موقع پر ضلع اسلام آباد کے 5 رکنی آرگنائزنگ کمیٹی کا اعلان کیاگیا،جسمیں محترمہ اظہر ریاض ،محترمہ صابرہ سجاد،محترمہ روبینہ بی بی ،محترمہ عقیلہ بی بی اور محترمہ صباء بی بی شامل ہیں ۔ کمیٹی 3 ماہ میں ضلع بھر میں یونٹ سازی کرے گی اور پھر ایم ڈبلیوایم شعبہ خواتین ضلع اسلام آباد کی نئی سیکریٹری جنرل کا انتخاب عمل میں لایا جائے گا، اس موقع پر ایم ڈبلیوایم شعبہ خواتین کی مرکزی رہنما محترمہ نرگس سجاد جعفری بھی موجود تھیں ۔

وحدت نیوز(لیہ) مجلس وحدت مسلمین پاکستان کے مرکزی سیکرٹری جنرل علامہ راجہ ناصر عباس جعفری نے کہا ہے کہ امریکہ نے پاکستان کی سلامتی جیسے حساس امور میں براہ راست مداخلت کر کے اس ملک کے امن و سکون اور معاشی ڈھانچے کو ناقابل تلافی نقصان پہنچایا۔پاکستان کے تعلقات اس کے سرحدی ممالک سے خراب کرنے کے لیے ہر روز نئی سازش تیار کی جاتی ہے۔پاکستان پرغیر حقیقی الزامات لگا کر اسے دنیا میں تنہا کرنے کی کوشش کی جارہی ہے۔جغرافیائی اعتبار سے ہمیں کمزور کرنے کے لیے پڑوسی مسلم برادر ممالک ایران اور افغانستان سے تعلقات میں ڈراریں ڈالی جا رہی ہیں۔ ان خیالات کااظہار اُنہوں نے کروڑ لعل عیسن میں عوامی اجتماع سے خطاب کرتے ہوئے کیا ۔ دہشت گردی کے خلاف جنگ میں پاکستان کو الجھا کر ہماری سرزمین کو تختہ مشق بنا دیا گیا جس کے نتیجے میں ہمیں ستر ہزار سے زائد لاشیں اٹھانا پڑیں۔ پاکستان پر مسلط کی گئی اس جنگ میں جتنا نقصان ہم نے اٹھایا ہے اتنا اور کسی کو نہیں اٹھانا پڑا۔پاکستان سے حساب مانگنے والوں کو پہلے ان نقصانات کا حساب دینا ہو گا جو اس ریاست کو پہنچائے گے۔انہوں نے کہا کہ اس ملک کے حصول میں ہمیں بے پناہ قربانیاں دینا پڑی ہیں۔

انہوں نے کہا کہ پاکستان کو امریکی امداد کی ضرورت نہیں بلکہ امریکہ عالمی سلامتی کے نام پر اپنے مفادات کے تحفظ کے لئے ہمیشہ پاکستان کے ترلے کرتا آیا ہے۔انہوں نے کہا کہ ہم عالمی قوتوں سے برابری اور احترام پر مبنی تعلقات کے خواہاں ہیں۔ایسے کسی بھی تعلق کی اس ملک کو قطعی ضرورت نہیں جس سے قومی وقار کو ٹھیس پہنچے۔اُنہوں نے کہا کہ معیشت کے عادلانہ نظام کے بغیر انصاف کرنا ناممکن ہے،ملک میں میرٹ کو پائوں تلے روندا جاتا ہے،کفر سے حکومت باقی رہ سکتی ظلم سے باقی نہیں رہ سکتی،قانوں کی حکمرانی کا نام عدل ہے ہمارے ملک میں رول آف لاء نام کی کوئی چیز ہے؟کیا ادارے قانون کو فالو کرتے ہیں؟ سیاسی انتقام لیا جاتا ہے؟ہمارے سکول اورہسپتال سب متاثر ہیں، قانون کو کمزوروں کے خلاف استعمال کیا جاتا ہے، ماڈل ٹاون میں دن دھاڑے لوگوں کو قتل کیا جاتا ہے، قانون تماشا دیکھ رہا ہوتاہے،ہمارے حکمران پڑھتے وہاں ہیں جہاں قانون کی حکمرانی ہوتی ہے لیکن یہاں آ کر سب کچھ بھول جاتے ہیں، اس موقع پر ایم ڈبلیو ایم کے مرکزی رہنما ڈاکٹر یونس حیدری، جنوبی پنجاب کے سیکرٹری جنرل علامہ اقتدار حسین نقوی، مولانا ہادی حسین ہادی، ضلعی سیکرٹری جنرل محسن خان سواگ، جمیل حسین خان اور دیگر رہنما بھی موجود تھے۔

وحدت نیوز(قم) 23 مارچ کو یومِ پاکستان کی مناسبت سے مجلس وحدت مسلمین قم کے زیر اہتمام ایک علمی تقریب کا اہتمام کیا گیا۔ تقریب کا آغاز تلاوت قرآن مجید سے ہوا اور تقریب میں تاریخ پاکستان کے مختلف پہلووں نیز سر سید احمد خان، چودھری رحمت علی، علامہ محمد اقبال اور قائد اعظم محمد علی جناح کے سیاسی سفر اور قومی خدمات پر مختلف زاویوں سے روشنی ڈالی گئی۔ تقریب کے انتظامات کو حجۃ الاسلام جان علی حیدری نے عملی شکل میں ڈھالا اور آقائے نذر حافی نے تاریخ پاکستان کے پسِ منظر کے حوالے سے ایک جامع گفتگو کی، جس کے بعد تقریب سے خصوصی خطاب سیکرٹری مجلس وحدت مسلمین قم حجۃ الاسلام موسٰی حسینی نے کیا۔ انہوں نے اپنے خطاب میں کہا کہ پاکستان اسلام کا قلعہ ہے اور یہ پاکستان سے محبت کا تقاضا ہے کہ اس کی بہتری اور بھلائی کے لئے محبت، ہم آہنگی اور اخوت کو فروغ دیا جائے۔ انہوں نے کہا کہ اس ملک کو علامہ اقبال اور قائداعظم کا ملک بنانا ہی ہمارا مشن ہے۔ تقریب کے آخر میں حجۃ الاسلام عادل علوی نے تمام معزز مہمانوں کی آمد کا شکریہ ادا کیا اور بعدازاں یوم پاکستان کی مناسبت سے کیک بھی کاٹا گیا۔

وحدت نیوز (کراچی)  مجلس وحدت مسلمین ضلع وسطی کراچی کی جانب سے 23 مارچ یوم پاکستان کی مناسبت سے شہدائے پاکستان کو خراج تحسین پیش کرنے کے لئے آل شہدا ئے پاکستان ٹیپ بال کرکٹ ٹورنامنٹ کا انعقاد کیا گیا جس کے راؤنڈ میچز 23 مارچ کو اختتام پزیر ہوئے۔ جس میں شہر بھر سے آٹھ ٹیموں نے حصّہ لیااور نے کاروان کربلا اور ریحان اکیڈمی , دستہ امامیہ اور صدائے کربلا ٹیمیں سیمی فائنل تک رسائی حاصل کرنے میں کامیاب ہوئیں،معروف نوحہ خواں برادر علی دیپ رضوی،پولیٹیکل سیکرٹری کراچی ڈویژن  میر تقی ظفر ،سیکرٹری خیر العمل ویلفئیر ٹرسٹ کراچی ڈویژن زین رضوی،سیکرٹری سوشل میڈیا کراچی ڈویژن رضوان پنجوانی، انجمن جانثاران قاسم ویلفیئر ٹرسٹ کے صدر شجاعت حسین کراچی ڈویژن کے رہنما جعفر حسین اور کراچی ڈویژن کے یوتھ سیکریٹری کاظم عباس نے مہمان خصوصی کے طور پر شرکت کی اور فاتح ٹیمز میں میڈل تقسیم کئے اور ایک کامیاب تفریحی پروگرام کے انعقاد پر سیکریٹری جنرل ضلع وسطی ثمر زیدی اور ٹورنامنٹ آرگنائزنگ کمیٹی کے ممبران کی کاوشوں کو سراہا ۔سیمی فائنل اور فائنل میچز کی تاریخ کا اعلان جلد کیا جائے گا جس میں شہر کی معروف سماجی ، فلاحی اور تنظیمی شخصیات شریک کریں گی۔

وحدت نیوز (سکردو)  یوم پاکستان کی مناسبت سے مجلس وحدت مسلمین پاکستان گلگت بلتستان کی جانب سے عظیم الشان یوم پاکستان کانفرنس پی ٹی ڈی سی کے ٹو موٹل اسکردو میں ہوئی۔ یوم پاکستان کانفرنس میں مختلف سیاسی و مذہبی جماعتوں کے رہنماوں کے علاوہ علماء، زعماء اور عمائدین کی بڑی تعداد نے شرکت کی۔ یوم پاکستان کانفرنس سے اسماعیلی مکتب فکر لوکل کونسل کے صدر رحمت علی، پاکستان تحریک انصاف کی رہنماء آمنہ انصاری، عوامی ایکشن کمیٹی کے محمد علی دلشاد، پاکستان پیپلز پارٹی کے رہنماء عبداللہ حیدری، ایم ڈبلیو ایم کے رہنما علامہ شیخ احمد نوری، فدا حسین، صحافی برادری سے عالم نور، انجمن تاجران بلتستان کے صدر غلام حسین اطہر اور مجلس وحدت کے صوبائی سربراہ آغا علی رضوی نے خطاب کیا۔ مقررین نے اپنے خطاب میں کہا کہ یوم پاکستان کے منانے کا مقصد شہداء سے تجدید عہد کرنا اور ملکی سلامتی و استحکام کے لئے جدوجہد کرنے کا عزم کرنا ہے۔ جی بی کے عوام نے یہاں پر موجود ڈوگرہ راج کو اسلامی نظریہ حیات کی وجہ سے مار بھگایا اور سبز ہلالی پرچم کے نیچے زندگی گزارنے اور آزادی کی فضاء میں سانس لینے کو فخر جانا۔ پاکستان میں سب سے سے زیادہ محب وطن یہاں کے عوام ہیں اور کبھی یہاں کے عوام نے ریاست کو نقصان پہنچانے کی کوشش نہیں کی، بلکہ وطن عزیز کے دفاع میں یہاں سے سپوت سینہ سپر ہیں چاہے وہ معرکہ کرگل ہو یا دہشتگردوں کے خلاف آپریشن۔ جی بی کا بچہ بچہ محب وطن ہے اور پاکستان کی سلامتی کا ضامن ہے۔

مقررین نے کہا کہ صوبائی حکومت اور انتظامیہ یہاں کے حساس ایشوز کو چھیڑ کر خطے میں بے چینی پھیلانے کی کوشش کر رہی ہے، جس سے ملک دشمنوں کے ایجنڈے کو تقویت ملتی ہے۔ انہوں نے کہا کہ جب سے سی پیک یہاں سے گزارنے کا فیصلہ ہوا ہے کبھی گندم سبسڈی کو چھیڑ کر عوام اور خطے میں بے چینی پھیلانے کی کوشش کی جاتی ہے، کبھی یہاں غیر قانونی ٹیکس عائد کیا جاتا ہے، کبھی فورتھ شیڈول کے ذریعے یہاں کے محب وطن عوام کے جذبہ حب الوطنی کو مشکوک کرنے کی کوشش کی جاتی ہے اور اب خالصہ سرکار کے نام پر عوامی اراضی پر قبضہ کرنے کی کوششیں ہو رہی ہیں۔ مقررین نے کہا کہ سیاسی جماعتوں اور وفاقی حکومتوں سے یہاں کے عوام یکسر مایوس ہو چکے ہیں پاک افواج کے سربراہ، سپریم کورٹ کے سربراہ اور ریاستی ادارے گلگت بلتستان کی محرومیوں اور عوام پر جاری مظالم کا نوٹس لیں۔ مقررین نے مطالبہ کیا کہ سی پیک میں گلگت بلتستان کو بھرپور حصہ دیا جائے سی پیک جیسے اہم پروجیکٹ میں جی بی کو محروم رکھنا لمحہ فکریہ ہے۔ جی بی کی ترقی و خوشحالی پاکستان کی خوشحالی کا باعث بن سکتی ہے۔

یوم پاکستان کانفرنس سے خطاب کرتے ہوئے مقررین نے کہا کہ جی بی کی ایک ایک انچ اراضی عوام ہے اور کسی صورت عوامی اراضی پر قبضہ کرنے نہیں دیں گے۔ انتظامیہ حساس خطے میں بے چینی پھیلانے سے باز رہے۔ تمام مکاتب فکر مل کر گلگت بلتستان اور پاکستان کی تعمیر و ترقی میں حصہ لیتے رہیں اور پاکستان کی نظریاتی و جغرافیائی سرحدوں کی حفاظت کے لیے صف اول کا کردار ادا کرتے رہیں گے۔ اس موقع پر خطاب کرتے ہوئے ایم ڈبلیو ایم جی بی کے سربراہ آغا علی رضوی نے کہا ہے کہ پاکستان کی حفاظت و سلامتی کے لیے صف اول کردار ادا کرتے رہیں گے اور عوامی حقوق کی جدوجہد ہر صورت جاری رکھیں گے۔ انہوں نے کہا کہ اگر ہم آج آزادی کی فضاو ں میں سانس لے رہے ہیں تو یہ پاکستان کی وجہ سے ہے اور پاکستان خدا کی طرف سے ایک عظم نعمت ہے۔ اس ملک میں مودی کے یاروں کو کوئی جگہ نہیں۔ جی بی کے عوام کی حب الوطنی مشکوک قرار دینے والے اصل میں ملک کے غدار ہیں۔ ہم پاکستان سے محبت کسی خوف یا لالچ میں نہیں کرتے بلکہ اسے اپنی ماں دھرتی سمجھتے ہیں، جس پر سب کچھ قربان کرنے کے لیے تیار ہیں۔ ملک اس وقت جن مشکلات کا شکار ہیں، اسکی وجہ نااہل حکمرانوں کی وجہ سے ہے ورنہ یہ خطہ قدرتی اور انسانی وسائل سے مالا مال ہے۔ پاکستان کو ایٹمی طاقت نہیں بلکہ یہاں کے عوام اور خدائی طاقت محفوظ رکھ سکتی ہے۔ انہوں نے کہا کہ جی بی کے عوام حصول حقوق کے لیے اپنی صفوں میں اتحاد برقرار کریں اور حقوق کے حصول کے لیے جدوجہد جاری رکھیں گے۔