وحدت نیوز(لاہور) مرکزی ڈپٹی سیکرٹری جنرل ناصر عباس شیرازی کی سربراہی میں مجلس وحدت مسلمین پاکستان کے اعلی سطحی وفد کی تحریک منہاج القران اور پاکستان عوامی تحریک کے مرکزی سیکرٹریٹ آمد ۔سیکرٹری جنرل پاکستان عوامی تحریک خرم نواز گنڈاپور سے ملاقات ، وفد میں مرکزی سیکرٹری سیاسیات اسد عباس نقوی اور صوبائی سیکرٹری سیاسیات حسن کاظمی سمیت پاکستان عوامی تحریک کے راہنما راجہ زاہد اور میڈیا ٹیم کے اراکین بھی موجود تھے ۔اس موقع پردونوں جماعتوں کے رہنمائوں کے درمیان موجود ملکی سیاسی اور اجتماعی صورتحال اور دو طرفہ دلچسپی کے امور پر تبادلہ خیال کیا گیا ۔شیعہ سنی وحدت کیلئےاور تکفیریت کے خلاف علمی فکری اور سیاسی اور اجتماعی میدان میں مل کر کام کرنے پر اتفاق کیاگیا۔

وحدت نیوز (رحیم یارخان) مجلس وحدت مسلمین پاکستان کے مرکزی سیکرٹری جنرل علامہ راجہ ناصر عباس جعفری نے رحیم یار خان میں ڈسٹرکٹ بارکونسل سے خطاب کرتے ہوئے کہا ہے کہ عالم استکبارکی تمام تر توجہ پاک چین اکنامک کوریڈور کی راہ میں رکاوٹیں کھڑی کرنے پر مرکوز ہے۔ سی پیک منصوبہ پاکستان کیخوشحالی و استحکام اور دنیا بھر میں چین کی اقتصادی برتری کا سبب بنے گا۔اس گیم چینجر کو امریکہ اپنے مفادات کے لیے شدید ترین نقصان دہ سمجھتا ہے۔ سی پیک منصوبے میں رکاوٹیں پیدا کرنے کے لیے امریکہ پاکستان کو غیر مستحکم کرنا چاہتا ہے۔جس کی تکمیل کے لیے کالعدم مذہبی جماعتوں علیحدگی پسند گروہوں اور دیگرملک دشمن عناصر کو استعمال کیا جا رہا ہے۔ ارض پاک کو اندرونی خلفشار کا شکار کرنے کے لیے داخلی و خارجی محاذ کھولے جاچکے ہیں ۔ایک طرف بھارت اور افغانستان کی سرزمین سے پاکستان کے خلاف سازشیں کی جا رہی ہیں تو دوسری جانب ملک کے عوام میں مذہبی، مسلکی، لسانی اور صوبائی تعصبات سمیت مختلف طریقوں سے نفرتوں کا پرچار کیا جا رہا ہے۔پاکستان میں لاقانونیت ،عدم تحفظ کے احساس کے فروغ کا بنیادی مقصد معاشرتی اقدار کی پامالی ہے ۔پاکستان کے عوام کو مختلف بنیادوں پر گروہوں میں تقسیم کرکے ’’ قوم ‘‘بننے سے روکا جا رہا ہے۔ہمارے دشمنوں کو اس بات کا ڈر ہے کہ پاکستان کی عوام اگر ایک قوم بن گئی تو پھرکوئی بھی طاقت اس قوم کے طرف میلی آنکھ سے دیکھنے کی جرات نہیں کر سکے گی۔

انہوں نے کہا پاکستان میں عدم استحکام اور غیر یقینی صورتحال کے فروغ میں حکمرانوں نے بھی کوئی کسر نہیں چھوڑی۔ملک و قوم کی ترقی کی بجائے ذاتی اثاثوں میں اضافے کے لیے مختلف ذرائع استعمال کئے جاتے رہے۔اختیارات کا ناجائز استعمال کر کے پنجاب سمیت ملک بھر میں سیاسی مخالفین کو انتقام کا نشانہ بناگیا جس نے معاشی بحران کو جنم دیا ۔حکمرانوں کی ناقص حکمت عملی کے باعث صاف پانی ،معیاری تعلیم ، صحت و صفائی اور روزگار جیسی بنیادی ضروریات زندگی سے پاکستان کی بیشتر آبادی محروم ہے۔جو عوام کے ساتھ بدترین زیادتی ہے۔انہوں نے کہا کہ عالمی قوتیں ایشیا کو تباہی کی طرف لے جانا چاہتی ہیں۔ ایشیا کا معاشی واقتصادی استحکام ہی وہ واحد حل ہے جو اس خطے کو مغربی استعمار کے نرغے سے چھڑا سکتا ہے۔عالمی طاغوت اپنے مفادات کے تحفظ کے لیے اس پورے خطے کو روبہ زوال رکھنا چاہتا ہے۔عالمی دہشت گرد تنظیم داعش کی تشکیل بھی اسی مقصد کے لیے کی گئی۔ان تمام سازشوں سے نبرد آزما ہونے کے لیے ضروری ہے کہ ایشیائی عوام کی آگہی کے سلسلے میں مختلف سطح پر فورم تشکیل دیے جائیں تاکہ مغربی عزائم کو ناکام بنایا جا سکتا ہے۔عالمی طاقتوں کے نشانے پر نہ صرف ایشیا ہے بلکہ امت مسلمہ کی تباہی بھی ان عالمی طاقتوں کا اولین ہدف ہے۔عالم اسلام کے دانشمندانہ ،بابصیرت اور جرات مندانہ اقدامات اور اخوت کے ہتھیار سے مغرب کے ناپاک ارادوں کو ناکام بنایا جا سکتا ہے۔

وحدت نیوز (لاہور) مجلس وحدت مسلمین پاکستان ضلع لاہور کی شوری کا اجلاس صوبائی سیکرٹریٹ لاہور میں ہوا جس کی صدارت ضلعی سیکرٹری جنرل علامہ سید حسن رضا ہمدانی نے کی اجلاس میں اراکین ضلعی شوری یونٹس کے سیکرٹری جنرل نمائندگان، ضلعی کابینہ کے اراکین اور  صوبائی سیکرٹری جنرل علامہ سید مبارک علی موسوی صوبائی کابینہ کے اراکین سید حسین زیدی آفس سیکرٹری سید عملدار زیدی سیکرٹری شماریات نے خصوصی شرکت کی اجلاس میں ضلع کی کارکردگی رپورٹ پیش کی گئی اور ضلع لاہور میں تنظیم سازی اور مختلف ٹاونز میں فعالیت اور کار کردگی کو بہتر بنانے کی تجاویز پر مختلف فیصلہ جات کئے گئے اجلاس سےصوبائی سیکرٹری جنرل علامہ سید مبارک علی موسوی نے خطاب کرتے ہوئے کہا کہ مجلس وحدت مسلمین ملت جعفریہ کی امیدوں کی ترجمان نمائندہ شیعہ سیاسی و مذہبی جماعت ہے جو ملت جعفریہ کے حقوق کے حصول کے لیئے کوشاں ہے اجلاس سے سید حسن رضا ہمدانی ، شیخ علی عمران ، نجم عباس خان ، سید سجاد نقوی،سید ماجد کاظمی ایڈووکیٹ نے خطاب کیا۔

وحدت نیوز(اسلام آباد) مجلس وحدت مسلمین پاکستان کے مرکزی سیکرٹری جنرل علامہ راجہ ناصر عباس جعفری نے اپنے دورہ ڈیرہ غازی خان کے موقع پر  بستی شاہانی درخواست جمال خان میں عوامی اجتماع سے خطاب کرتے ہوئےکہا ہے کہ ملک دشمن قوتیں ارض پاک کو نظریاتی و فکری بنیاد پر تقسیم کر کے اسے غیر مستحکم کرنا چاہتی ہیں۔اس مقصد کے حصول کے لیے اربوں ڈالر لٹائے جا چکے ہیں اور یہ سلسلہ رکنے کا نام نہیں لے رہا۔شیعہ سنی افراد کو شکوک و شبہات میں مبتلا کر کے ان کے عقائد سے ورغلانے کی کوشش کی جا رہی ہے۔ دشمن طاقتوں کا اولین ہدف امت مسلمہ کو گروہ در گروہ تقسیم کرنا ہے۔ایشیا کو انتشار کا شکار کرنے کے لیے تکفیریت اور تفرقہ بازی کو فروغ دیا جا رہا ہے۔شیعہ سنی افراد کو ایک دوسرے کے خلاف صف آرا کرنے کے منصوبے پر عالمی سطح پر کام شروع کر دیا گیا ہے۔ہمیں ہشیار رہنے کی ضرورت ہے۔ اہل سنت اور اہل تشیع اس ملک کا مضبوط دفاع ہیں۔قیام پاکستان سے قبل قائد اعظم کے خلاف نعرے لگا کر پاکستان کی نظریاتی اساس پر حملے کیے گئے آج بھی صورتحال مختلف نہیں۔محب وطن قوتیں الزامات کی ذد میں ہیں۔

انہوں نے مزید کہاکہ پاکستان کی نظریاتی و جغرافیائی سرحدوں پر سنگین خطرات منڈلا رہے ہیں۔ایشیا کو بالعموم اور پاکستان کوبالخصوص ایسی جنگ میں الجھایا جا رہا ہے جس کا مقصد خطے کو عدم استحکام کا شکار کر کے اقتصادی لحاظ سے تباہ کرنا ہے۔سی پیک کے خلاف بے جا پروپیگنڈہ اور بلوچستان میں دہشت گردی کے واقعات ان مذموم عزائم کی کڑی ہیں۔چائناکی بڑھتی ہوئی آبادی اس سے مغربی حصے کو آباد کرنے کا تقاضہ کر رہی ہے۔ مغربی راستے سے گوادر تک کا رابطہ چین کی اقتصادی طاقت کو امریکہ سے کئی گنا زیادہ بڑھا دے گا۔ایشیا کو ڈسٹرب کرنے کے لیے تکفریت ،تفرقہ بازی اور تعصبات کو فروغ دیا جا رہا ہے۔اس مقصد کے لیے اربوں ڈالر خرچ کیے جا چکے ہیں۔ہمارے ملک میں دہشت گرد اور قاتل بھیجے گئے مسلکی بنیادوں پر شناخت کر کے بے دردی سے قتل کیے جانے کے سفاکانہ واقعات ہماری بدقسمت تاریخ کا حصہ ہیں۔ضیا الحق ،امریکہ ،آل سعود اور پاکستان کے اندر انتہا پسندی جیسے منحوس الائنس نے ارض پاک کی بنیادوں کو ہلا کر رکھ دیا ہے۔ ملک کی مقتدر اور بااختیار شخصیات نے اپنے غیر دانشمندانہ فیصلوں سے اس ملک کے امن و سکون کو تباہ کیا ہے۔شیعہ سنی برادران نے مل کر اس ملک کی حفاطت کرنی ہے۔ہمیں اپنی بابصیرت فیصلوں سےان نادیدہ قوتوں کو شکست دینا ہو گی جو ہمیں ایک دوسرے کے مقابلے میں لانا چاہتی ہیں۔

وحدت نیوز(کراچی) مجلس وحدت مسلمین کراچی ڈویژن کی جانب سے ایم ڈبلیوایم کے رہنما اور وزیر قانون وپارلیمانی امور حکومت بلوچستان آغا سید محمد رضاکے اعزازمیں صوبائی سیکریٹریٹ سولجر بازارکراچی میں تقریب عشائیہ کا اہتمام کیاگیا، اس موقع پر ایم ڈبلیوایم کے مرکزی ڈپٹی سیکریٹری جنرل علامہ سید احمد اقبال رضوی، سنی اتحاد کونسل کے مرکزی رہنما اور صاحبزادہ حامد رضا کے چھوٹے بھائی صاحبزادہ حسین رضا ، ایم ڈبلیوایم کراچی ڈویژن کے سیکریٹری جنرل علامہ صادق جعفری، علامہ مبشرحسن، صوبائی رہنماناصرحسینی ، علامہ اظہر حسین نقوی، علامہ نشان حیدر،علامہ احسان دانش ، میر تقی ظفر، احسن عباس رضوی ، تمام اضلاع کے سیکریٹری جنرل صاحبان اور دیگر رہنما موجود تھے، اس موقع پر آغارضا کی گزشتہ ماہ انتقال کرجانے والی مرحومہ ہمشیرہ محترمہ اور شہدائے ملت جعفریہ کے ایصال ثواب کیلئے فاتحہ خوانی بھی کی گئی۔

وحدت نیوز (لاہور) مجلس وحدت مسلمین پنجاب کے سیکرٹری جنرل علامہ مبارک موسوی پر قاتلانہ حملہ ناکام بنا دیا گیا۔ علامہ مبارک موسوی کے سکیورٹی گارڈ نے ملزم کو دبوچ لیا۔ ملزم رحمان عزیز ون ٹو فائیو موٹر سائیکل پر سوار تھا۔ واقعہ تھانہ اسلام پورہ کی حدود میں پیش آیا۔ ملزم سےبیریٹا 9mm پستول بھی برآمد کر لیاگیا۔ علامہ مبارک موسوی کے محافظوں نے مبینہ دہشت گرد کو اسلام پورہ پولیس کے حوالے کر دیا۔ پولیس نے رات گئے ملزم کو رہا کر دیا تھالیکن میڈیا پر خبر نشرہونے کے بعد پولیس نے مبینہ حملہ آورکو دوبارہ گرفتار کرلیاہے جس سے تفتیش جاری ہے ۔