وحدت نیوز(کوئٹہ)  مجلس وحدت مسلمین پاکستان کے رکن شوری عالی و امام جمعہ کوئٹہ علامہ سید ہاشم موسوی اورمرکزی رہنماجناب آغا رضانے اپنے مشترکہ بیان میں سانحہ قندھاری بازارمیںبے گناہ ہزارہ جوان کی شہادت پر گہرے غم و غصے کا اظہار کرتے ہوئے کہا کہ قندھار ی با زار جیسے اہم اور رش والی جگہ پر دہشت گردوں کے ایف سی اور پولیس کی موجودگی میں آئے روزدہشتگردانہ کاروائی کر کے غائب ہو جانا ایک سولیہ نشان ہے۔

ایم ڈبلیو ایم کے مرکزی رہنما علامہ ہاشم موسوی نے سانحے کی مذمت کرتے ہوئے کہاکہ اسپنی روڈ پر مسلسل واقعات آپریشن ردالفساد کی کامیابی پر ایک بہت بڑا سوالیہ نشان ہے.  صوبائی دارالحکومت کوئٹہ شہر میں دہشت گردی کے واقعات تسلسل کے ساتھ رونما ہو رہے ہیں اور دہشت گرد شہر بھر میں آزادانہ طور پر دندناتے پھیر رہے ہیں.  ایسی صورت حال میں آپریشن ردالفساد کی کامیابی کے دعوے بے بنیاد ہے ۔

ایم پی اے آغا رضا نے کہا کہ حکومت جب صوبائی دارالحکومت میں امن قائم نہیں کر سکتی تو پورے صوبے میں کس طرح امن قائم کر سکتی ہے لگتا ہے دہشت گردی انسان نہیں جنات کر رہے ہیں جو واقعے کے دوران اور بعد نظروں سے اوجھل ہو جاتے ہیں۔

انھوں نے مزید کہا کہ شیعہ ہزارہ قوم دہشت گردی کی زد میں ہے وقفہ وقفہ سے شیعہ ہزارہ قوم پر کوئی نہ کوئی سانحہ ضرور رونما ہو جاتا ہے ،سمجھ میں نہیں آتا کہ حکومت اور ادارے مذہب کے نام پر دہشتگردی کرنے والے دہشتگردوں کے خلاف کارروائی کیوں نہیں کرتی. حکومت اور ادارے شیعہ ہزارہ قوم کو تحفظ فراہم کریں اور کوئٹہ شہر کو مذہب کے نام پر دہشتگردی کرنے والوں کے ناپاک وجود سے پاک کریں۔

وحدت نیوز(لاڑکانہ) مرکزی ڈپٹی سیکرٹری جنرل مجلس وحدت مسلین پاکستان برادر ناصر عباس شیرازی کاتین روزہ دورہ سندھ پر رتو ڈیرو پہنچنے پر شاندار استقبال،جشن ولایت علی علیہ السلام سے خطاب، بڑی تعداد میں عوام شریک ،برادر ناصر عباس شیرازی نے کیک کاٹا ۔اس موقع پر انکو سندھی ٹوپی اور اجرک کا تحفہ پیش کیا گیا ۔ ناصرعباس شیرازی نے اپنے خطاب میں استحکام پاکستان کے لیے مجلس وحدت اور اس کی قیادت کے کردار پر روشنی ڈالی ،انہوں نے کہا کہ دہشت گردی کا سب سے زیادہ شکار ملت ہونے کے باوجود کبھی آئین شکنی نہیں ہونے دی،پرامن احتجاج اور سیاسی جدوجہد کا راستہ اختیار کیا،انہوں نے کہا کہ ملک بھر میں اپنے شہداء لئے انصاف کے طلبگار ہیں اور اس کے لیے تمام آئینی راستے اختیار کریں گے ،آخر میں ملکی سلامتی اور امن کے لیے دعا کی گئی ۔

 وحدت نیوز (ملتان) مجلس وحدت مسلمین پاکستان کے سیکرٹری جنرل علامہ راجہ ناصر عباس جعفری نے کہا ہے کہ کوئی بھی معاشرہ بغیر قانون کے آگے نہیں بڑھ سکتا، معاشرے میں نظم و ضبط کے لئے قانون پر عملدرآمد ضروری ہے، سابق وزیراعظم قانون کی عملداری کے خلاف نیا کلچر بنا رہے ہیں، اس طرح عدالتی نظام آگے نہیں بڑھ سکتا، اعلٰی عدلیہ کے فیصلوں کو دل و جان سے قبول کرنا چاہیے، جو تین دفعہ وزیراعظم بنا ہو، اُسے زیب نہیں دیتا کہ وہ عدلیہ کے خلاف چڑھ دوڑے، غلط کلچر کو پروان چڑھایا جا رہا ہے، گنے کا کاشتکار رُل رہا ہے، شوگر مل کا مالک تیزی سے ترقی کر رہا ہے، مزدور کا استحصال ہو رہا ہے، پاکستان کی زراعت کو کمزور کرنا پاکستان کو کمزور کرنے کے مترادف ہے، زراعت پر توجہ دینی ہوگی، حکمران کسانوں کو تکلیف دے کر پتہ نہیں کس کے ایجنڈے پر عمل کر رہے ہیں؟ جنوبی پنجاب میں ہسپتال اور صحت کی سہولیات ناپید ہیں، لوگ پریشان حال ہیں، جنوبی پنجاب کی محرومی ختم کرنے کے لئے الگ صوبے کا قیام ضروری ہے، اس سے لوگوں کی مشکلات دور ہوں گی، اس وقت پاکستان کے استحکام کے لئے الگ صوبہ ضروری ہے، جنوبی پنجاب کے علاقے چوٹی زیریں میں سکول، ہسپتال اور پینے کا پانی نہیں ہے، ہسپتالوں کی حالت بہت خراب ہے، الگ صوبہ بننے سے حالات بہتر ہوں گے۔ ان خیالات کا اظہار اُنہوں نے ملتان میں پریس کانفرنس سے خطاب کرتے ہوئے کیا۔ اس موقع پر مجلس وحدت مسلمین جنوبی پنجاب کے سیکرٹری علامہ اقتدار حسین نقوی، ڈپٹی سیکرٹری جنرل سلیم عباس صدیقی، مولانا ہادی حسین ہادی، ضلعی سیکرٹری جنرل سید دلاور عباس زیدی، مہر سخاوت علی اور دیگر رہنما موجود تھے۔

علامہ ناصر عباس کا مزید کہنا تھا کہ عزاداری سیدالشہداء ہمارا بنیادی حق ہے، جنوبی پنجاب کی پولیس نے شہریوں کا جینا دو بھر کر دیا ہے، رحیم یار خان میں ایک اے ایس آئی جوتوں سمیت امام بارگاہ میں داخل ہوتا ہے اور تمام لوگوں پر ایف آئی آر درج کرتا ہے، اس سے بڑا کوئی المیہ نہیں ہوسکتا، پنجاب حکومت نے ہمارے ساتھ بے بنیاد مقدمات خارج کرنے کا وعدہ کیا تھا، لیکن ایسا نہیں ہوا، پاکستان ایک ایسا اسلامی ملک ہے، جہاں چرچ اور مندر میں پروگرام کرنے کے لئے کسی قسم کی کوئی اجازت کی ضرورت نہیں، لیکن مسجد اور امام بارگاہوں میں نواسہ رسول کا ذکر کرنا جُرم بن گیا ہے، مقامی ایس ایچ او سے لے کر آئی جی پولیس تک سب شہباز شریف کے نوکر ہیں، پاکستان کا قانون اور آئین مقدس ہے، لیکن یہ حکمران اس کی دھجیاں اُڑا رہے ہیں، تین بار وزیراعظم بننے والے کے بیٹے مفرور ہیں، اس طرح ملک نہیں چل سکتا، بھارت آئے روز ہمارے بارڈر پر حملہ آور ہے، امریکہ اور بھارت دونوں ملک کو کمزور کرنا چاہتے ہیں، اگر آئندہ الیکشن فری اینڈ فیئر ہوئے تو عوام اچھےلوگوں کو منتخب کریں گے۔

اُنہوں نے کہا کہ چور، شرابی، کرپٹ اور ڈاکو حکمرانی کے حق دار نہیں ہیں، ایم ایم اے کے حوالے سے کئے گئے سوال کے جواب میں علامہ ناصر عباس نے کہا کہ میں مذہب میں انتخابی نشان قرآن مجید کے نام پر ووٹ مانگنے کو دُرست نہیں سمجھتا، مذہب اس کی بالکل اجازت نہیں دیتا، اگر ہم بھی دوسروں کی طرح چالاکیاں شروع کر دیں تو ہمارے بھی دوسرے لوگوں کی طرح نئے نئے نام ہوں گے، ہم الیکشن میں بھرپور حصہ لیں گے، ہماری حکومتیں کشمیریوں کے ساتھ مخلص نہیں ہیں، کشمیر کمیٹی کی چیئرمین شپ رشوت کے طور پر دی جاتی ہے، حکمرانوں کے ایجنڈے میں اس کا کوئی حل نہیں ہے، عوام سے اپیل ہے کہ آئندہ الیکشن میں اچھے لوگوں کو منتخب کریں، اگر دونوں بُرے ہوں تو کم بُرے کا انتخاب کریں، ایسی حکومت ہو جو امریکہ اور بھارت کو اپنے قابو میں رکھ سکے، پاکستان کی خارجہ پالیسی مکمل طور پر ناکام ہوچکی ہے، پاکستان اُس وقت مشکل حالات سے نکلے گا جب خود مختار ہوگا، روس، ترکی، چائنا، ایران کے ساتھ بلاک تشکیل دے، ملک میں آر اوز کے الیکشن کی بجائے قوانین کے مطابق الیکشن ہو، اگر اس بار دھاندلی زدہ الیکشن ہوئے تو ملکی سلامتی کے لئے خطرہ ہوگا۔

وحدت نیوز (اسلام آباد) مجلس وحدت مسلمین پاکستان کے مرکزی ترجمان علامہ مختار امامی نے فلسطین میں یوم الارض کے موقع پر اسرائیلی جارحیت کی شدید مذمت کرتے ہوئے کہا ہے کہ مظلوم فلسطینیوں کا خون اعلان کررہا ہے کہ غاصب صیہونی ریاست عنقریب نابود ہوجائے گی، فلسطینی عوام کی استقامت نے یہ بات ثابت کردی ہے کہ فتح ہمیشہ قدس کے وارثوں کا مقدر ہے۔ میڈیا کو جاری کردہ اپنے بیان میں علامہ مختار امامی کا کہنا تھا کہ امام خمینی نے قدس کی آزادی کی جس تحریک کا آغاز 1979ء میں کیا تھا آج وہ اپنے منطقی انجام کی جانب تیزی سے بڑھ رہی ہے، رہبر معظم سید علی خامنہ ای نے بھی فرما دیا ہے کہ اسرائیل انشاء اللہ پچیس سال بھی نہیں دیکھ پائے گا، ہم اس یقین کے ساتھ فلسطینی مزاحمت کی حمایت جاری رکھیں گے کہ امام خمینی اور امام خامنہ ای کا فرمان ہی حق ہے، انشاء اللہ غاصب صیہونی ریاست بہت جلد نابود ہوجائے گی۔

ان کا کہنا تھا کہ پاکستان کی عوام نے یمیشہ فلسطی مظلوم بھائیوں کے حق کیلئے اپنی آواز کو بلند کیا ہے اور بیت المقدس کی آزادی تک اس تحریک کی حمایت جاری رکھیں گے۔ علامہ مختار امامی نے عالمی انسانی حقوق کے اداروں پر تنقید کرتے ہوئے کہا کہ فلسطین میں عوام پر ہونیوالی اسرائیلی جارحیت پر یہ ادارے خاموش تماشائی ہیں، شام کے جعلی مظالم پر تو یہ ادارے بھرپور طریقے سے فعال تھے، لیکن فلسطین میں ہونیوالے مطالم پر ان کی زبانیں بند ہیں۔ ایم ڈبلیو ایم کے مرکزی ترجمان نے پاکستان کی عوام اور سیاسی و مذہبی جماعتوں سے اپیل کی کہ وہ مظلوم فلسطینیوں پر ہونیوالی تازہ اسرائیلی جارحیت پر اپنی آواز بلند کریں۔

وحدت نیوز (شکارپور)  مرکزی ڈپٹی سیکرٹری جنرل مجلس وحدت مسلین ناصر عباس شیرازی کی 3 روزہ مختصر دورہ پر اندرون سندھ آمد ، مدیجی ضلع شکارپور میں جشن مولود کعبہ علی ابن ابی طالب علیہ السلام کی مناسبت سے تقریب سے خطاب کیا۔انہوں نے کہاکہ ولایت علی شیعہ سنی وحدت کا مرکزی نقطہ ہے۔تمام مسالک کے لوگوں کو ہاتھوں میں ہاتھ ڈال کر تکفیری گروہوں کو ناکام بنانا ہو گا۔ہر ظالم کے ظلم کے خلاف کھڑے ہونا اور ہر مظلوم کی نصرت کے لیے میدان عمل میں نکلنا ولایت علی علیہ السلام کا بنیادی تقاضا ہے اور یہی مجلس وحدت مسلمین کی سیاست کا بنیادی منشور ہے ۔ظلم اور استحصال کی ہر قسم کے خلاف عوام کو شعور کے ساتھ اجتماعی میدان میں جدوجہد کے لیے آمادہ کرنا ہمارا سیاسی اسلوب ہے ۔مجلس کی قیادت اس جدوجہد میں صف اول پر کھڑی ہے اور عالمی استعمار اور وطن عزیز میں ان کے آلہ کاروں کے مقابل سیاسی جدوجہد میں پیش پیش ہے ۔ اس موقع پر شیعہ سنی عوام کی بڑی تعداد پروگرام میں شریک تھی ۔ ناصر عباس شیرازی اور مرکزی کوآرڈینیٹر شعبہ سیاسیات آصف رضااایڈووکیٹ کا استقبال پھولوں کے ہار پہنا کر اور گل پاشی کے ذریعہ کیا گیا ۔ان کو سندھی اجرک کا تحفہ چیرمین نجف شاہ نے پیش کیا ۔تقریب کے آخر میں نبی اکرم صلی اللہ علیہ و آلہ وسلم کی شان میں سلام پیش کیا گیا ۔مداح خوانوں نے اپنے مخصوص انداز میں ثنا خوانی کی ،دعا مولانا عبداللہ مطہری نے کرائی ۔

وحدت نیوز (ٹھل)  مجلس وحدت مسلمین سندہ کے سیکریٹری جنرل علامہ مقصودعلی ڈومکی نے ضلع نوابشاہ، نو شہروفیروز، مٹیاری، حیدر آباداور شہداد کوٹ کا تنظیمی دورہ کیا۔اس موقعہ پر مختلف مقامات پر خطاب کرتے ہوئے مجلس وحدت مسلمین سندہ کے سیکریٹری جنرل علامہ مقصودعلی ڈومکی نے کہا کہ امام علی ؑ کی حیات طیبہ میں ہمیں تمام انسانی کمالات یکجا نظر آتے ہیں، آپ ؑ ایک انسان کامل ہونے کے ناطے ہم سب کے لئے اسوہ ہیں ، آپ ؑ کی سیرت پر عمل پیرا ہوکر ہم دین و دنیا کی بھلائی اور کامیابی حاصل کر سکتے ہیں۔ انہوں نے کہا کہ نہج البلاغہ شخصیت علی ؑ کی بہترین عکاس ہے جو علم و عرفان کا سمندر ہے۔ ہم سیرت علوی سے دوری کے باعث آج زوال کا شکار ہیں، علوی سیرت و کردار اپنا کر ،  علم و عمل کے ذریعے ہم حقیقی شیعہ بن سکتے ہیں۔
              
انہوں نے کہا کہ فلسطینی مظاہرین پر اسرائیلی فائرنگ کے نتیجہ میں پندرہ افراد کی شہادت اور پندرہ سو فلسطینیوں کے زخمی ہونے پر انتہائی افسوس ہے، مسلم حکمرانوں کی بے حسی نے اسرائیل کو جری کردیا ہے۔ اسرائیلی مظالم پر عالمی ادارے اور عرب حکمران خاموش تماشائی ہیں جبکہ اسرائیل سے دوستی کرکے اورانڈیا سے اسرائیل تک فضائی سروس کو راستہ دے کر آل سعود نے اسلام دشمنی کا ثبوت دیا ہے۔ انہوں نے کہا کہ دنیا بھر کے مسلمان جدوجہد آزادی کے سفر میں فلسطین اور کشمیر کے مظلوم عوام کا ساتھ دیں،  اسرائیل اور انڈیا کے بڑہتے ہوئے تعلقات پر ہمیں تشویش ہے۔ اسرائیل غاصب ریاست ہے جس کا عبرتناک انجام ابھی نزدیک ہے۔