مجلس وحدت مسلمین پاکستان کی جانب سے ڈاکٹر طاہر القادری کے لانگ مارچ کی حمایت کے حوالے سے پاکستان کے مختلف حلقوں میں سوالات اٹھائے جا رہے ہیں ، اسی تناظر میں ہفت روزہ وحدت نے ایم ڈنلیو ایم ایم کے مرکزی سیکرٹری سیاسیات سید ناصر عباس شیرازی سے خصوصی انٹرویو کیا جو قارئین کیا نذر کیا جا رہا ہے
سوال : مجلس وحدت مسلمین پاکستان نے ڈاکٹر طاہر القادری کے لانگ مارچ کی حمایت کا اعلان کن بنیادوں پر کیا ؟
سید ناصر شیرازی : ڈاکٹر طاہر القادری کے لانگ مارچ کی حمایت دراصل اس حق کی حمایت ہے جو تمام پاکستانیوں کو حاصل ہے ،یہ وہ حق ہے جو آزادی اظہار رائے کی بنیاد پر جمہوریت کا امتیاز ہے ، یہی وہ حق ہے جس کی بنیاد پر نواز شریف نے لانگ مارچ کیا ، پیپلز پارٹی نے لانگ مارچ کیا ، جماعت اسلامی نے دھرنے دیئے اور بعض پارٹیوں نے روڈ مارچ بھی کیے، ۔ اختلاف رائے کا یہ حق اور اس کے استعمال کا یہ طریقہ ڈاکٹر طاہر القادری کا اپنا فیصلہ ہے ، ہم ان کے اس فیصلے کی نہیں ان کے اس حق کی حمائت کی ہے ۔ دوسری بات یہ ہے کہ یہ کہا گیا ہے کہ مجلس وحدت مسلمین پاکستان نے لانگ مارچ میں باقاعدہ شرکت کی، یہ میڈیا کی پھیلائی ہوئی غلط فہمی ہے ، چونکہ لانگ مارچ میں باقاعدہ شرکت کچھ امور کی متقاضی تھی ، جن میں ہمارے تنظیمی اداروں کے فیصلہ جات اور دونوں تنظیموں میں مشترکہ فیصلہ سازی کے کسی نظام کا وضع ہونا تھا ، ان دونوں چیزوں کی عدم موجودگی کی وجہ سے مجلس وحدت مسلمین نے لانگ مارچ میں باقاعدہ شرکت کا اعلان نہیں کیا ، یہی وجہ ہے کہ ایم ڈبلیو ایم نے اپنے کسی ایک یونٹ کو بھی اس سلسلے میں کوئی ہدائت جاری نہیں کی، البتہ ایم ڈبلیو ایم نے ملک بھر میں لانگ مارچ کے شرکاء کو سہولیات فراہم کیں، ان کی اخلاقی مدد کی، ان کے لیے مثبت ماحول فراہم کیا اور انفرادی شرکت بھی ہوئی، حتیٰ کہ ان کے لانگ مارچ کو گزرنے کے لیے ایم ڈبلیو ایم نے اپنے دھرنوں میں راستہ دیا جس پر اہل سنت عوام ایم ڈبلیو ایم کے ممنون بھی ہیں ۔

ایم ڈبلیو ایم پاکستان کے مرکزی سیکریٹری سیاسیات برادر ناصر عباس شیرازی نے ایک وفد کے ہمراہ سندھ یونائیٹڈ پارٹی کے سربراہ جلال محمود شاہ سے ان کی رہائش گاہ حیدر منزل پر ملاقات کی۔ اس موقع پر صوبائی سیکریٹری سیاسیات سندھ برادر عبداللہ مطہری، کراچی ڈویژن کی سیکریٹری جنرل مولانا صادق رضا تقوی اور ڈویژن سیکریٹری سیاسیات برادر اصغر عباس زیدی بھی موجود تھے۔ ملاقات میں بلوچستان میں گورنر راج کے نفاذ پر تفصیلی تبادلہ خیال کیا گیا۔ جلال محمود شاہ نے مجلس وحدت مسلمین کے وفد کی آمد پر شکریہ ادا کیا اور بلوچستان میں اسلم رئیسانی کی حکومت کے خاتمے اور گورنر راج کے نفاذ کی حمایت کا اعلان کیا۔

جیسا کہ آپ کے علم میں ہے کہ پاکستان اس وقت شدید دہشتگردی کی لپیٹ میں ہے، اور بے گناہ افراد کا آئے روزخون بہایا جا رہا ہے۔ اس دہشتگردی اور بریریت کی ایک مثال آپ دوستوں نے 10جنوری کو کوئٹہ کے علاقہ علمدار روڈ پر دیکھی۔ جہاں سو سے زائد افراد شہید اور سینکڑوں زخمی ہو گئے۔ جیسا کہ آپ حضرات بہتر جانتے ہیں کہ اس سے قبل بھی کوئٹہ سے تعلق رکھنے والے اہل تشیع کو کئی سال سے ظلم کا نشانہ بنایا جا رہا ہے اور محض گزشتہ سال 700سے زائد بے گناہ اہل تشیع شہاد ت کے رتبے پر فائز ہوئے۔ حالیہ سانحہ کوئٹہ نے پاکستان کے ہر شہری کو جھنجوڑ کر رکھ دیا ہے اور ہر باضمیر شخص اس ظلم عظیم پر غمزدہ نظر آیا۔ اس سانحہ کے بعد عوام کی جانب سے احتجاج کا سلسلہ شروع ہوا اورکوئٹہ سمیت پاکستان بھر میں پرامن احتجاجی دھرنے دیئے گئے، جو نظم و نسق اور امن پسندی کی جیتی جاگتی مثال آپ تھے، جس کا ذکر آپ صحافی حضرات نے انتہائی تحسینی انداز میں کیا۔ اس تاریخی اور پرامن احتجاج میں صرف اہل تشیع ہی شامل نہیں تھے بلکہ درد دل رکھنے والے مختلف مکاتب فکر کے علما اور عوام سمیت سیاسی جماعتوں کے رہنماوں نے بھی مظلومین کوئٹہ کے دکھ و درد کو بانٹتے ہوئے ان دھرنوں میں شرکت کی۔ اس کے علاوہ صحافی برادری نے بھی اپنی قومی ذمہ داریاں ادا کرتے ہوئے اس احتجاج کی مناسب کوریج کی۔ جس پر ہم آپ صحافی حضرات کے تہہ دل سے مشکور ہیں۔ 
محترم صحافی حضرات۔ جیسا کہ آپ کو معلوم ہے کہ اس پرامن احتجاج کے نتیجے میں وفاقی حکومت نے کوئٹہ کے مظلومین کے مطالبات تسلیم کرتے ہوئے بلوچستانمیں گورنر راج نافذ کیا اور اس نااہل، کرپٹ اور مسخرے وزیر اعلی کو برطرف کیا جس کے بارے میں آپ بہتر جانتے ہیں۔ حکومت کے اس اقدام کو ہر سیاسی و مذہبی جماعت حتی کہ حکومت میں شامل جماعتوں نے بھی خوش آئند اور بلوچستان مسئلہ کی راہ حل قرار دیا۔ تاہم ایک سیاسی و مذہبی جماعت (جو کہ بلوچستان حکومت کا حصہ تھی)نے اس گورنر راج کی نہ صرف مخالفت شروع کردی بلکہ اس اقدام کیخلاف باقاعدہ تحریک چلانے کا بھی اعلان کردیا۔ اس مذہبی و سیاسی جماعت کے اکابرین کا یہ فیصلہ تمام پاکستانیوں اور باالخصوص ان مظلومین کیلئے انتہائی تکلیف دہ تھا جو چار روز تک شدید سردی اور بارش میں اپنے شہدا کے جنازوں کو سینے سے لگائے بیٹھے رہے۔آپ صحافی حضرات کے توسط سے میں ان شخصیات سے یہ سوال کرتا ہوں کہ اگر یہ لوگ مظلوموں کے زخموں پر مرہم نہیں رکھ سکتے تو ان کے مطالبات کی مخالفت کیوں کر رہے ہیں۔ کیا دنیاوی اقتدار کسی انسانی جان سے زیادہ اہمیت کا حامل ہے؟کیاان عوامی نمائندوں کو جمہوری انداز میں اقتدار سے الگ کرنا جرم ہے جو اپنی ذمہ داریاں یکسر بھلا کر عیاشیوں میں مصروف ہوں؟ کیا پاکستان میں ظلم کے شکار ہونے والے افراد پر اپنا حق مانگنے پر کوئی پابندی ہے۔؟ 

ہم اس پریس کانفرنس کے ذریعے ان نادان دوستوں سے اپیل کرتے ہیں کہ وہ یہ غیر جمہوری مطالبہ اور تحریک ترک کرکے مظلوم عوام کے دکھوں کا مداوا کریں اور تعصب کی عینک اتار کر عوام کے حقیقی نمائندے بنیں۔ بصورت دیگر آئندہ الیکشن میں ایسے افراد اور جماعتوں کو ہماری ملت تشیع یکسر مسترد کردیں گے ۔
قابل احترام صحافی حضرات! میں اس موقع پر ایک دوسری پہلو پر بھی آپ کی توجہ مبذول کرنا چاہوں گا۔ جیسا کہ آپ کے علم میں ہے کہ گزشتہ دو ماہ سے صوبائی دارالحکومت پشاور میں امن و امان کی صورتحال انتہائی ابتر ہو گئی ہے۔ اور گزشتہ دنوں یہاں اہم اہل تشیع شخصیات کو نشانہ بنایا گیا۔ جس کے نتیجے میں ابرار حسین، سید ریاض حسین شاہ اور احتشام علی صاحب پر قاتلانہ حملے ہوئے۔ جس کے نتیجے میں ابرار حسین اور ریاض حسین شاہ صاحب شہادت رتبہ پر فائز ہو گئے۔ ہم ان حملوں کی پرزور الفاظ میں مذمت کرتے ہیں اور صوبائی حکومت سے مطالبہ کرتے ہیں کہ وہ فوری طور پر اس سازش کو بے نقاب کرے۔ اور اعلی سطحی جوڈیشل کمیشن تشکیل دے کر سابقہ واقعات کی تحقیقات کرتے ہوئے مستقبل میں ایسے واقعات کو روکنے کیلئے اقدامات کئے جائیں۔ اگر حکومت نے فوری طور پر اس معاملہ کی جانب توجہ نہ دی تو ہم دیگر جماعتوں کیساتھ ملکر احتجاج کا راستہ پر مجبور ہوجائیں گے
۔ آپ حضرات کی تشریف آوری کو بہت بہت شکریہ !
والسلام

علامہ سبیل حسن مظاہری۔ (سیکرٹری جنرل مجلس وحدت مسلمین خیبر پختونخوا)
علامہ سید مجتبیٰ حسینی (سیکرٹری شعبہ جوان مجلس وحدت مسلمین خیبر پختونخوا )
عابد علی ایڈوکیٹ ( سیکرٹری اطلاعاتمجلس وحدت مسلمین خیبر پختونخوا)
سید قاسم رضا ( سیکرٹری تنظیم سازی مجلس وحدت مسلمین خیبر پختونخوا)
اعتبار علی ( سیکرٹری رابط مجلس وحدت مسلمین خیبر پختونخوا)
توقیر یوسف ( جنرل سیکرٹری آئی ایس اُو پشاور ڈویژن)