وحدت نیوز(گلگت)پاکستان مسلم لیگ نون کی حکومت نے گلگت بلتستان میں انتقامی کارروائیوں کا آغاز کر دیا ہے، مجلس وحدت مسلمین پاکستان جی بی کے شعبہ سیاسیات کے سربراہ غلامہ عباس کی گرفتاری اسی سلسلے کی کڑی ہے۔ تفصیلات کے مطابق غلام عباس کو آج گلگت پولیس نے گرفتار کر لیا ہے اور انکے خلاف چار ماہ پہلے گلگت میں یمن کے مظلومین کی حمایت میں ریلی نکالنے پر مقدمہ درج کیا گیا تھا۔ صوبائی حکومت نے کالعدم جماعتوں کی ایماء پر یمن پر سعودی عرب کی جانب سے جارحیت کے خلاف احتجاجی مظاہرہ کرنے پر ایم ڈبلیو ایم گلگت کے سات رہنماوں کے خلاف انسداد دہشتگردی کی دفعات کے تحت مقدمات درج کئے تھے اور اس سلسلے میں ایم ڈبلیو ایم گلگت کے رہنماء عارف حسین قنبری کو کم و بیش دو ماہ تک پابند سلاسل رکھنے کے بعد گذشتہ مہینے میں رہا کر دیا گیا تھا۔

سعودی نواز حکومت کی گلگت بلتستان میں بھی حکومت بننے کے بعد ان مقدمات کی دوبارہ پیروی شروع کر دی گئی ہے اور دوبارہ سے گرفتاریوں کا عمل بھی شروع ہوگیا ہے۔ غلام عباس کے علاوہ گلگت بلتستان کے صوبائی سیکرٹری جنرل شیخ نیئر عباس مصطفوی پر بھی انسداد دہشتگردی کے تحت مقدمات درج ہیں۔ ان پر ہاتھ ڈالنے کی صورت میں پورے گلگت بلتستان میں شدید ردعمل آسکتا ہے بالخصوص نواز لیگ کی حکومت کے ابتداء میں ہی فرقہ وارانہ کشیدگیوں کا آغاز ہوسکتا ہے۔ ذرائع کے مطابق صوبائی حکومت ان تمام رہنماوں کے خلاف سخت اقدامات اٹھانے کا ارادہ رکھتی ہے، جن پر یمن کی حمایت میں ریلی نکالنے پر انسداد دہشتگردی کے مقدمات درج ہیں۔

وحدت نیوز(کوئٹہ) مجلس وحدت مسلمین کے رکن بلوچستان اسمبلی آغا محمد رضا وفد کے ہمراہ ہزارہ ٹاون کوئٹہ کے شیعہ مکینوں کی جانوں کو خودکش حملہ آور کی تباہی سے بچاتے ہوئے اپنی قیمتی جان کا نذرانہ پیش کرنے والے شہید طالب حسین کے لواحقین سے اظہار تعزیت کرنے جامع مسجد مصطفیٰ بروری پہنچ گئے اور شہید کے بیٹے سے اظہار تعزیت اور ہمدردی کرتے ہوئے شہید کی درجات بلندی کے لیے دعا کی اور حقیر سی رقم شہید کے بیٹے کو دینے کا وعدہ کیا.

آغا رضا نے شہید کے بیٹے سے گفتگو کرتے ہوئے کہا کہ شہید طالب حسین حقیقی معنوں میں مجاہد تھے جنہوں نے اپنی جان کی پروا کیے بغیر بے گناہ انسانوں کی جان بچا کر نئی تاریخ اپنے نام رقم کی. پس ہمیں سوچ لینا چاہیے کہ ہمارا دشمن ایک ہے جو شیعہ سنی کو آپس میں لڑانے کی کوشش کر رہا ہے اور وطن عزیز پاکستان کو اندر سے کھوکھلا کرنے میں لگا ہوا ہے . انشاءاللہ ہم دشمن کو ان کے تکفیری مقاصد میں کامیاب نہیں ہونے دیں گے اور شیعہ سنی یکجہتی  سے ان کا مقابلہ کریں گے۔

وحدت نیوز(کراچی) مجلس وحدت مسلمین کے صوبائی رہنماء ناصر حسین الحسینی نے کہا ایم ڈبلیو ایم کی جانب سے بلا تفریق سندھ بھرکے مستحقین افراد میں 5ہزار سے زائد افراد میں رمضان فوڈ پیکیج تقسیم کئے گئے ۔ایم ڈبلیو ایم کے ضلعی عہدیداران کی کاوشیں لائق تحسین ہیں رمضان المبار ک میں مجلس وحدت مسلمین کی جانب سے شہر میں بسنے والے مساکین ،یتیموں،غربا اور اس شہر میں موجود بلا تفریق مستحقین کو ماہانہ اجناس کی فراہمی کا سلسلہ بھی جاری ہے۔جس میں ایم ڈبلیو ایم کے ضلعی عہدیداران کی مستحقین تک رمضان پیکیج کی فراہمی سمیت دیگر ضروریات زندگی کی مشکلات میں کمی و مسائل کے حل کیلئے ان کی فی سبیل اللہ مدد کرنا شامل ہے،ان خیالات کا اظہار مجلس وحدت مسلمین کے صوبائی رہنما ناصر حسین الحسینی نے وحدت ہاؤس صوبائی سیکرٹریٹ میں جاری ڈسٹرک سیکرٹریز کو دی جانے والی دعوت افطار سے خطاب میں کیا دعوت افطار میں ایم ڈبلیو ایم کی کراچی و صوبائی کابینہ سمیت ڈسٹرکٹ عہدیداران اورکارکنان کی بڑی تعداد نے شرکت کی جبکہ رہنماؤں میں سیکرٹری سیاسیات علی حسین نقوی،مولانا محمد علی نقوی ،آصف صفوی ،مولانا احسان دانش ،مولانا صادق جعفری ،علامہ مبشر حسن ،علامہ علی انور،حسن ہاشمی،رضا نقوی،حیدر زیدی،ڈ اکٹر مدثر حسین ،رضوان پنجوانی ،کاظم علی ،روح اللہ حسینی سمیت دیگر شعبہ جات کے ذمہ داران موجود تھے،ناصر الحسینی کا کہنا تھا کہ ماہ صیام تزکیہ نفس کا مہینہ ہے اس مقدس مہینہ میں اللہ تعالیٰ ہمیں صوم و صلوۃ کے ذریعے اپنی اندرونی کثافتیں صاف کرنے کا موقع عطا کرتا ہے۔انہوں نے کہا اس ماہ مبارک میں ہمیں ایثار و قربانی کے جذبات کا عملی مظاہرہ کرنا چاہیے۔سحری و افطاری کے اوقات میں عزیز و اقربا کی ضروریات کو بھی پیش نظر رکھا جائے۔ جو لوگ رمضان کے دنوں میں چوربازاری اور خود ساختہ مہنگائی کرتے ہیں ۔وہ روزداروں کی مشکلات میں اضافہ کا باعث بنتے ہیں ۔اس طرح کے اعمال روزہ کی قبولیت میں مانع ہیں۔ایسے لوگوں روزہ کے روحانی فوائد سے محروم رہ جاتے ہیں۔روزہ محض بھوکا رہنے کا نام نہیں بلکہ اپنے تمام اعضا کو غیر شرعی امور سے دور رکھنے کا نام ہے صبر، برداشت اور رواداری اس مقدس مہینے کے خصوصی انعام ہیں روزے کا حقیقی لطف ان انعامات کے حصول میں ہے اور یہ تبھی حاصل ہوتے ہیں جب نفس کے ساتھ جہاد میں ثابت قدمی اور استقامت اختیار کی جائے۔مجلس وحد ت مسلمین ضلعی سطح ذمہ داران و کارکنان کی جانب سے شہر کے مستحقین عوام میں بلا تفریق پانچ ہزار سے زائد خاندانوں میں رمضان فوڈ پیکیج تقسیم کرنا لائق تحسین ہیں ۔

وحدت نیوز (لاہور) مجلس وحدت مسلمین پاکستان کے سربراہ علامہ راجہ ناصر عباس جعفری اور مرکزی ڈپٹی سیکرٹری جنرل علامہ امین شہیدی اسلام آباد میں عید منائیں گے،جبکہ سیکرٹری جنرل پنجاب علامہ عبدالخالق اسدی اور مرکزی سیکرٹری سیاسیات سید ناصر شیرازی سرگودہامیں عید منائیں گے۔سربراہ مجلس وحدت مسلمین علامہ راجہ ناصر عباس جعفری نے مرکزی رہنماوں کو ہدایات کی ہے کہ وہ نماز عید کے بعد شہداء کے خانوادہ گان کے ساتھ عید کا دن گذاریں،آپریشن ضرب عضب میں شہید ہونے والے افواج پاکستان کے شہدا کے گھروں میں جا کر ان کے بچوں کی دلجوئی کریں،علامہ راجہ ناصر عباس جعفری نے مجلس وحدت مسلمین پنجاب کے سیکرٹری جنرل علامہ عبدالخالق اسدی کو سیالکوٹ میں بھارتی غنڈہ گردی کے نتیجے میں شہیدہونے والوں کی لواحقین سے تعزیت اور ان کی حوصلہ افزائی کرنے کے ہدایت کر تے ہوئے کہا کہ بھارت کی اشتعال انگیزی اور دہشت گردی کے خلاف قوم متحد ہیں اور ہم دشمن کو عبرتناک جواب دینے کی بھر پور صلاحیت رکھتے ہیں،افواج پاکستان کے شیر دل جوانوں کے پشت پر اٹھارہ کڑوڑو عوام سر پر کفن باندھے وطن عزیز کی دفاع کے لئے تیار ہیں،انشااللہ دشمن کے ارادوں کو ہم اپنی وحدت اور استقامت سے خاک میں ملا کر ہی دم لیںگے۔

وحدت نیوز(کراچی) مجلس وحدت مسلمین پاکستان کے مرکزی جنرل سیکریٹری علامہ راجہ ناصر عباس جعفری نے عید الفطر کے پُرمسرت موقعہ پرمرکزی سیکریٹریٹ سے جاری اپنے ایک پیغام میں دنیا بھر کے مسلمانوں کو عید کی مبارکباد دیتے ہوئے کہا ہے کہ عید کادن اللہ تعالیٰ کی طرف سے ماہ صیام کی برکتوں پر امت مسلمہ کے لیے خصوصی انعام ہے ۔رمضان المبارک کے مہینہ میں دنیا کے مسلمان وحدت و اخوت کا فقید المثال مظاہرہ کرتے ہیں اور رب کائنات کے ہر حکم کی بجا آوری کی جاتی ہے۔ آج کے دن بھی ہمیں یہ عہد کرنا ہو گا کہ ہم اپنے اس عمل میں استقامت کا مظاہرہ کریں گے اور اپنے شب و روز کو اطاعت خداوندی،رواداری اور اتحاد و یگانگت میں بسر کریں گے۔انہوں نے کہا کہ خوشیوں کے اس موقعہ پرمادر وطن کے شہدا ء اور قوم کے لیے جانوں کا نذرانہ پیش کرنے والے افراد کو ہم خراج تحسین پیش کرتے ہوئے ان کی بلندی درجات کے لیے دعاگو ہیں۔عید کے موقع پر خاندانوں ،ہمسایوں اور نادار گھرانوں کو بھی اپنے ساتھ شامل رکھتے ہوئے ان کی ضروریات کو بھی پورا کرنے کی حتی الوسع کو شش کی جانی چاہیے۔

علامہ ناصر عباس نے بھارت کی طرف سے گولہ باری کے نتیجہ میں پانچ افراد کی شہادت پر غم و غصے کا اظہار کرتے ہوئے اس کھلی جارحیت اور دخل اندازی قراد دیا ۔انہوں نے کہا کہ کوتلیہ چانکیہ کے پیروکارکی طرف دوستی کا ہاتھ بڑھنا خود کو دھوکہ دینے کے مترادف ہے۔انڈیاکسی غلط فہمی کا شکار نہ رہے افواج پاک داخلی معاملات سے نبر د آزما ہونے کے ساتھ ساتھ ملکی دفاع کے لیے بھی پوری طرح سے چوکس اور تیار کھڑی ہے اور پاکستان کی اٹھارہ کروڑ عوام پاک فوج کے شانہ بشانہ ہیں۔جسم کے کسی بھی حصے کو نقصان پہنچے تکلیٖف سارے بدن کو ہوتی ہے۔ ہمیں اسی تکلیف کا ادراک کرنا ہے۔ پوری دنیا میں اس وقت امت مسلمہ کو سب سے زیادہ مسائل کا سامنا ہے۔ برما، یمن، عراق، شام ،فلسطین،مقبوضہ کشمیر، سمیت دنیا کے بیشتر ممالک میں رسول کریم ﷺ کے پیروکاروں کو وحشیانہ مظالم کا سامنا ہے۔ خوشی کے اس موقع پر ان افراد کی تکالیف کو فراموش نہ کیا جائے۔ عالم اسلام اپنی وحدت و اخوت سے عالم استکبار کو عبرت ناک شکست سے دوچار کر سکتا ہے ۔روزعید کے اس مذہبی تہوارکو امت مسلمہ روزِ عہد کے طور پر منائے اور اس پیمان پر یکجا ہو ہم اسلام دشمن یہودی و نصرانی قوتوں کو اپنے اتحاد اور قوت ایمانی سے شکست دیں گے۔ہمیں اپنے عمل سے یہ ثابت کرنا ہو گا کہ سپر پاور کے زعم میں مبتلا ہم کسی ریاست کے احکامات کو دین اسلام کی سربلندی کی راہ میں رکاوٹ نہیں بننے دیا جائے گا۔

وحدت نیوز(لاہور) مجلس وحدت مسلمین،جماعت اسلامی، مرکزی جماعت اہلحدیث، منہاج القرآن، جماعت الدعوۃ کے رہنماوُں کا کہنا تھا کہ مسلم امہ کے اتحاد اور وحدت سے ہی اسلام دشمنوں کے ناپاک عزائم خاک میں ملائے جاسکتے ہیں، آج سٹی 42 والے مبارکباد کے مستحق ہیں کہ تمام مکاتب فکر کو ایک جگہ جمع کرکے جس اتحاد یکجہتی کا مظاہرہ کیا ہے تمام جماعتوں اور مدارس سمیت ہر ایک کو اس عمل کی تقلید کرتے ہوئے اتحاد وحدت کے پیغام کو قریہ قریہ تک پہنچانا ہوگا۔
 
سعودی عرب اور کویت میں دہشت گردی کے واقعات کے بعد اہل تشیع اور اہل سنت نے دشمن کے عزائم خاک میں ملانے کے لئے مشترکہ نماز کا اہتمام کرکے اسلام دشمنوں کے منہ پر وہ طمانچہ رسید کیا جس کی مثال نہیں ملتی۔ سعودی عرب اور کویت کے بعد شیعہ سنی اتحاد کا مظاہرہ پاکستان کے دل لاہور میں دیکھنے کو ملا، جب ایک ٹی وی چینل نے ہمت کا مظاہرہ کرتے ہوئے تمام محمودوں اور ایازوں کو لا کر ایک صف میں کھڑا کر دیا۔ لاہور کے معروف ٹی وی چینل سٹی 42 نے پنجاب یونیورسٹی کے جامع مسجد میں "نماز اخوت" کا اہتمام کیا، جس میں مجلس وحدت مسلمین پاکستان کے مرکزی رہنماوُں علامہ سید مبارک علی موسوی، علامہ احمد اقبال رضوی، علامہ محمد اقبال کامرانی، علامہ ابوذر مہدوی، علامہ ناظم رضا عترتی، ایگزیکٹیو ممبر عزاداری سیل ایم ڈبلیو ایم لاہور سید خرم نقوی، مظاہر شگری سیکرٹری اطلاعات ایم ڈبلیو ایم پنجاب اور مدارس جعفریہ پاکستان کے سربراہ علامہ سید حسین نجفی، مولانا حسنین عارف،  شیعہ علماء کونسل پنجاب کے نائب صدر علامہ حافظ سید کاظم رضا نقوی، جامعۃ المنتظر سے علامہ محمد مہدی، جماعت اسلامی کے قائم مقام امیر لیاقت بلوچ، جماعت الدعوۃ کے یحییٰ مجاہد، بادشاہی مسجد کے خطیب عبدالخیر آزاد، داتا دربار مسجد کے خطیب رمضان سیالوی، سمیت تاجروں، صنعت کاروں، سیاست دانوں، حکومتی اور اپوزیشن ارکان اسمبلی نے خصوصی شرکت کی۔ نماز میں مشیر وزیراعلٰی پنجاب خواجہ احمد حسان، پارلیمانی سیکرٹری برائے صحت خواجہ عمران نذیر، اپوزیشن لیڈر ان پنجاب اسمبلی میاں محمود الرشید، تحریک انصاف پنجاب کے رہنما اعجاز چودھری، پیپلز پارٹی پنجاب کے رہنما شوکت بسرا،سی سی پی او لاہور امین وینس، ڈی آئی جی آپریشنز ڈاکٹر حیدر اشرف، ڈی سی او لاہور کیپٹن (ر) محمد عثمان، وائس چانسلر پنجاب یونیورسٹی ڈاکٹر مجاہد کامران سمیت شہریوں کی کثیر تعداد شریک ہوئی۔

نماز کے بعد تمام مسالک کے علمائے کرام اور دیگر نمازی آپس میں بغل گیر ہوئے اور رقت آمیز مناظر دیکھنے کو ملے، جماعت اسلامی، مرکزی جماعت اہلحدیث، منہاج القرآن، جماعت الدعوۃ اورمجلس وحدت مسلمین پاکستان کے مرکزی رہنما علامہ احمد اقبال رضوی کا کہنا تھا کہ اسلام اور مسلمانوں کے دشمن فرقہ واریت کو ہوا دے کر اپنے مذموم مقاصد حاصل کرتے ہیں، ہمیں قرآن و سنت کے پرچم تلے جمع ہونا ہوگا،لاہور میں شیعہ سنی کی نماز اخوت، اسلام دشمنوں کے منہ پر طمانچہ ہے۔ مدارس جعفریہ پاکستان کے سربراہ علامہ حسین نجفی نے کہا کہ شیعہ سنی اسلام کے دو بازو ہیں، ان کے درمیان اختلاف پیدا کرنے والے درحقیقت استعمار کے ایجنٹ ہے۔مسلم امہ کے اتحاد اور وحدت سے ہی اسلام دشمنوں کے ناپاک عزائم خاک میں ملائے جاسکتے ہیں، آج سٹی 42 والے مبارکباد کے مستحق ہیں کہ تمام مکاتب فکر کو ایک جگہ جمع کرکے جس اتحاد یکجہتی کا مظاہرہ کیا ہے، تمام جماعتوں اور مدارس سمیت ہر ایک کو اس عمل کی تقلید کرتے ہوئے اتحاد وحدت کے پیغام کو قریہ قریہ تک پہنچانا ہوگا۔ وطن عزیز کی سلامتی و بقا کے لئے ضروری ہے کہ ہم ایک دوسرے کے ہاتھ میں ہاتھ ڈال کر آگے بڑھیں، تاکہ دشمن کے ناپاک ادرادوں کو خاک میں ملایا جاسکے۔

جماعت اسلامی کے قائم مقام سربراہ لیاقت بلوچ کا کہنا تھا کہ آج شیعہ اور سنی کا یہ اجتماع دشمن اسلام کے لئے بہت بڑا پیغام ہے کہ تو نے جس قوم کا شیرازہ بکھیرنے کے لئے کروڑوں ڈالر صرف کر دیئے، آج وہی قوم ایک امام کے پیچھے اللہ اکبر کے نعرے لگا رہی ہے۔ انہوں نے کہا کہ دشمن کی یہ بھول ہے کہ وہ شیعہ اور سنی کو لڑا سکے گا، شیعہ اور سنی اسلام کے دو بازو ہیں، انہیں جدا نہیں کیا جاسکتا، دشمن جان لے کہ پوری امت مسلمہ یک جان ہے اور اسلام کی سربلندی کے لئے اپنا تن من دھن قربان کرنے کے لئے تیار ہے۔ جماعت الدعوۃ کے رہنما یحیٰی مجاہد نے کہا کہ اسلام کو اس وقت تکفیریت کے آسیب کا سامنا ہے اور تکفیریت کی حوصلہ شکنی کے لئے ایسے اجتماعات سنگ میل کی حیثیت رکھتے ہیں۔ انہوں نے کہا کہ اسلام کے دشمنوں کے لئے آج پنجاب یونیورسٹی کی جامع مسجد سے بہت بڑا پیغام گیا ہے کہ امت مسلمہ متحد ہے اور دشمن کی سازشیں ناکام ہوچکی ہیں۔ انہوں نے کہا کہ اسلام کی بقا کے لئے ضروری ہے کہ تمام امت متحد ہو جائے، تکفیریت کی حوصلہ شکنی کرے اور تمام مکاتب فکر اپنی اپنی صفوں میں موجود کالی بھیڑوں کو محاسبہ کریں۔

لاہور کی تاریخ میں اتحاد امت کے بہترین مظاہرے پر عوامی حلقوں نے اظہار مسرت کیا، شہریوں کا کہنا تھا کہ ایسے اجتماعات سے ایک دوسرے کو برداشت کرنے کا جذبہ ملتا ہے، لہذا حکومتی سرپرستی میں ایسے اجتماعات کا انعقاد کیا جانا چاہیے تھا۔ شہریوں نے ٹی وی چینل سٹی 42 کی انتظامیہ کو خراج تحسین پیش کیا، جنہوں نے اس عظیم اجتماع کا اہتمام کیا۔ شہریوں کا کہنا تھا کہ امت مسلمہ متحد ہے، بیرونی اور اسلام دشمنوں کی سازشوں کے باعث ماضی میں شیعہ اور سنی اختلافات کو ہوا دے کر امت کو کمزور کرنے کی سازش کی گئی، مگر اب حالات اور سوچ بدل چکی ہے، اب امت جان چکی ہے کہ شیعہ اور سنی کا کوئی اختلاف نہیں، بلکہ دونوں شجر اسلام کی دو خوبصورت شاخیں ہیں۔ شہریوں نے ملک میں امن و امان کی بہتر ہوتی صورت حال پر اطمینان کا اظہار کیا اور پنجاب حکومت سے دہشت گردوں کے خلاف مزید کارروائیوں کا مطالبہ کرتے ہوئے کہا کہ حکومت سنجیدگی کا مظاہرہ نہیں کر رہی، اتحاد امت کے لئے کسی ٹی وی چینل کی بجائے پنجاب حکومت کی جانب سے ایسی "نماز اخوت" کا اہتمام کیا جاتا تو زیادہ بہتر ہوتا۔