وحدت نیوز (گلگت) مجلس وحدت مسلمین پاکستان کے سربراہ علامہ ناصر عباس جعفری نے گلگت پریس کلب  میں پریس کانفرنس سے خطاب کرتے ہوئے کہا ہے کہ نالائق حکمرانوں نے ملک کو تباہی کے دہانے تک پہنچا دیا ہے، ملک میں قانون حاکم نہیں, عدلیہ عوام کو انصاف دینے میں ناکام ہوچکی, سیاست دان عوام کی خدمت کی بجائے تجارت کرتے ہیں۔ قومی وحدت پر تفرقہ بازی غالب آچکی ہے, امن و محبت کی جگہ دہشت گردی نے لی ہے۔ گلگت بلتستان کے عوام پاکستان کے عاشق ہیں, حکمرانوں نے یہاں کے عوام کو حقوق دینے کی بجائے قتل و غارت گری کو ترویج دے کر علاقے کو جہنم بنا دیا ہے، پہلے سے زیادہ گلگت بلتستان کے عوامی حقوق کیلئے جدوجہد کرینگے۔ مستقبل میں پاکستانی معیشت کا دارومدار پاک چائنہ اقتصادی کوریڈور پر ہے، حکومت نے اس اہم منصوبے میں گلگت بلتستان کے عوام نظر انداز کیا ہے۔

انہوں نے مزید کہا کہ مسلم لیگ نون سے ہماری سیاسی مخالفت ہے لیکن ایک دوسرے کے دشمن نہیں، نواز لیگ سیاسی مخالفت کی وجہ سے پنجاب اور گلگت بلتستان میں سیاسی انتقام لے رہی ہے۔ انہوں نے کہا کہ گلگت بلتستان کے عوام پرامن لوگ ہیں اور گندم سبسڈی تحریک کے دوران اپنی وحدت کا بھرپور ثبوت فراہم کیا, لیکن حکمرانوں کو اس علاقے میں سنی شیعہ وحدت پسند نہیں۔ پوری دنیا میں الیکشن کے ذریعے پاور شپ تبدیل ہوتی رہتی ہے, لیکن پاکستان میں عدلیہ کے معزز ججوں کی نگرانی میں انجینیئرڈ الیکشن ہوتے ہیں۔

پاک چائنہ اقتصادی کوریڈور پر بات کرتے ہونے انہوں نے کہا کہ مستقبل میں پاکستانی معیشت کا دارومدار اسی اقتصادی کوریڈور پر ہے، اقتصادی کوریڈور کمیٹی میں گلگت بلتستان کے عوام کو نمائندگی ملنی چاہیئے۔ گلگت بلتستان میں ٹیکسوں کے نفاذ پر بات کرتے ہوئے انہوں نے کہا کہ ایک طرف وفاقی وزراء گلگت بلتستان کو متنازعہ علاقے قرار دے رہے اور دوسری طرف ٹیکسوں کا اجراء کرکے غیر آئینی اقدامات اٹھا رہے ہیں۔ حکمران اگر چاہیں تو گلگت بلتستان کے عوام جو 68 سالوں سے آئینی حقوق سے محروم ہیں، بیک جنبش قلم آئینی حقوق دے سکتے ہیں۔ ایک سوال کے جواب میں انہوں نے کہا کہ اقوام متحدہ کی قراردادیں گلگت بلتستان کے عوام حقوق کی راہ میں رکاوٹ نہیں۔ نیشنل ایکشن پلان پر بات کرتے ہوئے علامہ ناصر عباس جعفری نے کہا کہ نیشنل ایکشن پلان کا غلط استعمال کیا جا رہا ہے، مسلم لیگ اپنے سیاسی مخالفین کو کچلنے کیلئے نیشنل ایکشن پلان کا غلط استعمال کر رہی ہے۔ یمن پر سعودی جارحیت کے خلاف پورے پاکستان میں مظاہرے ہوئے اور پاکستان عوام اور پارلیمنٹ نے یمنی مسلمانوں کے خلاف پاک فوج کے دستے سعودی عرب بھیجنے کی بھرپور مخالفت کی اور خود پاک فوج نے سعودی خواہش کی تکمیل سے انکار کر دیا، لیکن گلگت بلتستان میں ہمارے کارکنوں اور علماء کے خلاف جھوٹے مقدمات قائم کئے گئے۔ آخر میں انہوں نے کہا کہ ہم گلگت بلتستان میں اخوت اور بھائی چارے کی فضا قائم کرینگے، یہاں کے عوام کے حقوق کیلئے پورے پاکستان میں آواز اٹھاتے رہینگے۔

وحدت نیوز (گلگت) مجلس وحدت مسلمین پاکستان کے سربراہ علامہ ناصر عباس جعفری اور ایم ڈبلیو ایم پاکستان کے شعبہ سیاسیات کےمعکزی سیکریٹری  سید ناصر عباس شیرازی تنظیمی دورہ پر گلگت پہنچ گئے۔ گلگت پہنچتے ہی انہوں نے وفد کے ہمراہ گلگت جیل میں اسیر ایم ڈبلیو ایم گلگت بلتستان کے سیکرٹری سیاسیات غلام عباس، مطہر عباس، شیخ شہادت علی اور ڈویژنل صدر آئی ایس او گلگت  جمال اختر سے ملاقات کی۔ گلگت جیل میں ایم ڈبلیو ایم گلگت بلتستان کے متعدد رہنما وں کو یمن پر سعودی جارحیت کے خلاف احتجاجی ریلی نکالنے پر صوبائی حکومت نے پابند سلاسل کیا ہوا ہے اور ان کیخلاف دہشتگردی کے مقدمات درج ہیں۔ ایم ڈبلیو ایم کے رہنماوں کا کہنا ہے کہ صوبائی حکومت کا یہ عمل سیاسی انتقام کے سوا کچھ بھی نہیں ہے۔ اگر صوبائی حکومت نے گلگت کے اسیر رہنماوں کے خلاف موجود بلاجواز مقدمات کو ختم نہ کیا تو صوبائی حکومت کے خلاف گلگت بلتستان بھر میں احتجاج شروع کرنے پر مجبور ہونگے۔

وحدت نیوز (سکردو) مجلس وحدت مسلمین پاکستان کے مرکزی سیکرٹری جنرل علامہ ناصر عباس جعفری، سیکرٹری سیاسیات سید ناصر عباس شیرازی، ڈویژنل سیکرٹری جنرل آغا علی رضوی اور دیگر رہنماؤں نے اسکردو میں پریس کانفرنس سے خطاب کرتے ہوئے کہا ہے کہ گلگت بلتستان کو مکمل طور پر آئینی صوبہ بناکر پارلیمنٹ میں نمائندگی دی جائے، جب تک خطے کو آئینی صوبہ نہیں بنایا جائے گا، ہم چین سے نہیں بیٹھیں گے، آئینی صوبے کے قیام کیلئے بھرپور سیاسی طاقت کا مظاہرہ کریں گے اور ہر فورم پر جائیں گے، وہ زمانہ اور تھا جب ہم صرف گلی کوچوں میں مظاہرے کرتے تھے اب ہماری آوازاسمبلیوں کے اندر تک پہنچ چکی ہے ۔ اسکردو میں ہنگامی پریس کانفرنس سے خطاب کرتے ہوئے انہوں نے کہا کہ گلگت بلتستان کو آئینی صوبہ بنانے میں مسلم لیگ نون کی حکومت ہرگز سنجیدہ نہیں ہے، اگرسنجیدہ ہوتی تو کبھی کمیٹی قائم نہ کی جاتی، جو کام نہیں کرنا ہوتا، اس پر کمیٹیاں بٹھائی جاتی ہیں۔

انہوں نے کہا کہ ہم نے الیکشن سے پہلے ہی کہا تھا کہ مسلم لیگ نون گلگت بلتستان کو پانچوں آئینی صوبہ بنائے ہم الیکشن سے دستبردار ہو جائیں گے، مگر آئینی حقوق نہیں دیئے گئے، اگر حقوق دینا ہوتے تو بہت پہلے دے دیئے جاتے۔ مسلم لیگ نون کی تین مرتبہ حکومت بنی ہے، آئینی حقوق کیوں نہیں دیئے گئے؟ گلگت بلتستان انتہائی حساس خطہ ہے اس کو آئینی حقوق نہ دیئے گئے تو معاملہ خراب ہو جائے گا۔ گلگت بلتستان کو آئینی حقوق سے محروم رکھنا ہرگز ملکی مفاد میں نہیں ہے، اس لئے ہم پرزور مطالبہ کرتے ہیں کہ خطے کو مکمل طور پر آئینی صوبہ قرار دیا جائے اور اس خطے کے عوام کو سینٹ اور قومی اسمبلی میں نمائندگی دی جائے، آئینی حقوق سے کم کوئی چیز قبول نہیں ہوگی۔ اب ہم آئینی حقوق کے حصول کیلئے آخری حد تک جائیں گے۔

انہوں نے کہا کہ ہم اس وقت تک چین سے نہیں بیٹھیں گے جب تک گلگت بلتستان کو آئینی صوبہ بنا کر این ایف سی ایوارڈ کا حصہ نہیں بنایا جاتا۔ خطے کے عوام کے ساتھ ماضی میں بہت ظلم کیا گیا، اکنامک کوریڈور گلگت بلتستان سے گزر رہا ہے اور فائدہ ملک کے دوسرے حصے کے لوگوں کو پہنچ رہا ہے، جو بڑا ظلم ہے، ہم چاہتے ہیں کہ اکنامک کوریڈور زون گلگت بلتستان میں قائم کیا جائے اور اقتصادی راہداری کا فائدہ جی بی کے عوام کو پہنچایا جائے۔ انہوں نے کہا کہ 8 جون 2015ء کے انتخابات آر اوز کے الیکشن تھے، پچھلی حکومت کرپٹ تھی اور موجودہ حکومت دھاندلی زدہ ہے، اس سے کسی قسم کی خیر کی توقع نہیں رکھی جاسکتی۔ انہوں نے کہا کہ گلگت اسکردو روڈ کی تعمیر کیلئے کوئی منصوبہ بندی نہیں کی گئی، روڈ کی خستہ حالی کے باعث تجارت تباہ و برباد ہوگئی ہے۔

 انہوں نے کہا کہ گلگت بلتستان میں کرپشن کرنے والوں کو کھلی چھٹی دیدی گئی ہے، یہاں نیب غیر فعال ہے، نیب کو کارروائیوں سے خود مسلم لیگ نون کی حکومت روک رہی ہے، نیب کے احتساب کے بغیر خطے میں کوئی تبدیلی نہیں آئے گی، نیب کو کارروائیاں کرنے میں کوئی قانونی اور آئینی پیچیدگی نہیں ہے، اگر نیب کو کارروائی سے روکا گیا تو پھر یہاں اکنامک کوریڈور بھی نہیں بنایا جاسکتا، پھر بات بہت دور تک جائے گی۔ اس لئے نیب کی کارروائیوں میں خلل ڈالنے کی غلطی نہیں کی جانی چاہئے۔ انہوں نے کہا کہ گلگت بلتستان الیکشن میں دھاندلی کے خلاف ہم نے پٹیشن دائر کر رکھی ہے، لیکن ان پٹیشنز کی ابھی تک سماعت شروع نہیں کی گئی، یہ کتنے شرم کی بات ہے۔ انہوں نے کہا کہ محرم الحرام میں سکیورٹی کے خصوصی انتظامات کئے جائیں اور عزاداروں کی جان و مال کے تحفظ یقینی بنایا جائے۔

وحدت نیوز (سکردو) مجلس وحدت مسلمین پاکستان کے سیکرٹری جنرل علامہ ناصر عباس جعفری نے کہا ہے گلگت بلتستان کا انتظامی ڈھانچہ انتہائی نامناسب اور ظلم پر مبنی ہے، صحیح طریقے سے انتظامی امور کو چلانے کے لئے انصاف کی بنیادوں پر انتظامی تبدیلیاں لانے کی ضرورت ہے۔ انہوں نے کہا کہ گلگت بلتستان میں روندو بہت بڑا علاقہ ہے، جو جی بی میں موجود کئی اضلاع سے رقبے میں بڑا ہے، لیکن اسے ضلع کا دریا نہ دیا جانا ظلم ہے، اس کو فوری طور پر ضلع بنایا جائے اور برابری کی سیاست کی جائے۔ انہوں نے کہا کہ گلگت ریجن میں 6 اور بلتستان ریجن میں صرف 4 اضلاع ہیں، روندو کو ضلع بنایا گیا تو کسی حد تک انصاف ہوگا۔

 انہوں نے کہا کہ شگر، کھرمنگ اضلاع کا قیام مستحسن اقدام ہے، ہم حکومت کے اچھے کاموں کی حمایت کرتے ہیں، کبھی بھی تنقید برائے تنقید کی سیاست نہیں کی۔ روندو کو بھی ضلع بنایا گیا تو ہم سمجھیں گے کہ حکومت نے واقعی انصاف سے کام لیا ہے۔ انہوں نے کہا کہ گلگت بلتستان اور پنجاب میں ہمارے کارکنوں کو سیاسی انتقام کا نشانہ بنایا جا رہا ہے، ہم نے بار بار کہا کہ ایسا نہ کیا جائے، مگر لیگی حکومت انتقام کی سیاست کر رہی ہے۔ سندھ، بلوچستان اور خیبر پختونخوا میں ہمارے کارکنوں کو کوئی تنگ نہیں کیا جا رہا ہے، پنجاب اور گلگت بلتستان میں کارکنوں کو نشانہ بنایا جا رہا ہے اور ہمارے کئی کارکن اور رہنماء گرفتار کئے گئے ہیں، اگر گرفتار شدگان کو رہا نہ کیا گیا تو حالات خراب ہوسکتے ہیں۔ انہوں نے کہا کہ جی بی میں نیشنل ایکشن پلان کی خلاف ورزی ہو رہی ہے، جو ظلم ہے، نیشنل ایکشن پلان کی آڑ میں سیاسی انتقام لیا جا رہا ہے۔

وحدت نیوز (چنیوٹ) نیشنل ایکشن پلان کے تحت پاک فوج سیاستدانوں سمیت تمام کرپٹ عناصر کو کیفر کردار تک پہنچایاجائے ان خیالات کااظہار مجلس وحدت مسلمین کے مرکزی سیکرٹری سیاسیات سید ناصر عباس شیرازی نے چنیوٹ آمد پر مجلس وحدت مسلمین کی ضلعی کابینہ کے اجلاس سے خطاب کرتے ہوئے کیا ،انہوں نے مزید کہا کہ پاک فوج کے ان تمام اقدامات کی حمایت کرتے ہیں جو دہشت گردی ، کرپشن اور ان کے سہولت کاروں کے قلع قمع کرنے کیلئے کیے جائیں، انہوں نے کہا کہ مجلس وحدت مسلمین بلدیاتی الیکشن میں بھرپور حصہ لے رہی ہے ،انہوں نے حکمرانوں پر الزام لگایا کہ وہ مجلس وحدت مسلمین کے کارکنوں کو ہراساں کرنے کیلئے اوچھے ہتھکنڈے استعمال کررہے ہیں جس کی بھرپور مذمت کرتے ہیں، انہوں نے کہا کہ یہ امر باعث تشویش ہے کہ ملک کی حکمران جماعت الیکشن پر اثر انداز ہو ہم ان تمام اقدامات پر گہری تشویش کا اظہار کررہے ہیں، انہوں نے آخر میں کہا کہ دہشت گردوں اور کرپشن مافیا کے سہولت کار وں کو فی الفور کیفر کردار تک پہنچایاجائے اور ان کو کسی بھی صورت میں دہشت گردی اور کرپشن کی حوصلہ نہ ملنے پائے ۔

وحدت نیوز(اسلام آباد) پشاور کے علاقے بڈھ بیرمیں پاکستان ایئرفورس کے کیمپ پر تکفیری طالبان دہشت گردوں کے حملے پر اظہار افسوس کرتے ہوئے مجلس وحدت مسلمین کے مرکزی سیکریٹری جنرل علامہ راجہ ناصرعباس جعفری نے کہا ہے کہ تکفیریت کا بھوت اب تک پاکستان کے جڑوں سے لپٹا ہواہے، پشاور میں شہید ہونے والے درجنوں اہل تشیع شہریوں کے قاتلوں کو سزاملتی تو آج پشاور میں دہشت گردی کا یہ سنگین واقعہ پیش نہ آتا، بڈھ بیرمیں فضائی بیس پر تکفیری دہشت گردوں کا حملہ قابل مذمت ہے، پاک فوج ایڑیاں رگڑتے ، بلبلاتے ان سفاک قاتلوں پر شکنجہ مزید کسے،کسی بھی قسم کی کوتھائی،بڑے نقصان کا باعث بن سکتی ہے،بے گناہ نمازیوں کو بے دردی سے نشانہ بنانے والےدہشت گرد اسلحہ سے لیس ہونے کے باوجود بزدل تھے جنہوں نے نہتے نمازیوں پر پیچھے سے وار کیا،مرکزی سیکریٹریٹ سے جاری اپنے بیان میں انہوں نے مزید کہا کہ پاکستان تحریک انصاف کی صوبائی حکومت  نیشنل ایکشن پلان پر عمل درآمدمیں پاک فوج کے ہم قدم نظرنہیں آتی،پاکستان بالخصوص خیبرپختونخواہ کو درپیش دہشت گردی جیسے سنگین چیلنجز کا مقابلہ کرنے کے لئے پاک فوج ، حکومت اور عوام کاایک پیج پر جمع ہونا ناگزیز ہے، پاک فوج جواں مردی کے ساتھ سرحدوں کے اندر اور باہرملک کے دفاع کو ناقابل تسخیر بنانے کیلئے دن رات کوشاں ہے، آج کے اس سانحے میں بھی پاک فوج کے کیپٹن اسفندیار بخاری نے مادر وطن کے دفاع کی خاطر فرنٹ لائن پر جام شہادت نوش کیا ہے،جسے ہم سلام پیش کرتے ہیں ،مجلس وحدت مسلمین حملے میں شہید ہونے والے فوجی وسول شہریوں کے اہل خانہ کے غم میں برابرکی شریک ہے ۔