وحدت نیوز (اسلام آباد) شہدائے سانحہ جیکب آباد کے لواحقین کا انصاف کے لئے سڑکوں پر آنا ریاست کی ناکامی ہے،مجلس وحدت مسلمین مظلوموں کو انصاف ملنے تک خوانوادہ گان شہداء کے شانہ بشانہ کھڑی ہے،جیکب آباد پولیس کی جانب سے پرامن مظاہرین کیخلاف طاقت کا استعمال ریاستی دہشت گردی ہے،سندھ کے حکمران مظلوموں کو انصاف دلائیں اور لواحقین شہداء پر تشدد سے باز رہے،ان خیالات کا اظہار مجلس وحدت مسلمین پاکستان کے سربراہ علامہ راجہ ناصر عباس جعفری نے مرکزی رہنماوُں کے اجلاس سے خطاب میں کیا۔

انہوں نے کہا کہ سندھ اور بلوچستان دہشت گردوں کی آماجگاہ بن چکا ہے،سانحہ شکارپور کے دلخراش اور انسانیت سوز واقعے کے باوجود سندھ حکومت دہشت گردوں کیخلاف کاروائی نہ کرسکی،پیپلز پارٹی میں انتہا پسند اور تکفیری سوچ رکھنے والے قابض ہو چکے ہیں،دہشت گردوں سے ان کے مفاد وابسطہ ہے،اگر شہداء کے لواحقین کو انصاف نہ ملا تو احتجاج لانگ مارچ میں تبدیل ہوگا اور احتجاج کا دائرہ ملک بھر میں پھیلے گا،انہوں نے کہا کہ جیکب آباد میں اس وقت کوئی ایک مسلک نہیں بلکہ پوری انسانیت سڑکوں پر ہے،شیعہ ،سنی،ہندو اور سکھ برادری متحد ہو کر انتہا پسندی اور دہشت گردوں کیخلاف بے رحمانہ کاروائی کے لئے سراپا احتجاج ہے،بے گناہ پاکستانیوں کے بہیمانہ قتل عام پر انصاف لئے بغیر ہم چین سے نہیں بیٹھیں گے،سندھ اور بلوچستان کے حکمرانوں کا کالعدم جماعتوں کے ساتھ راوابط اور ان سے ملاقاتیں اس بات کی غمازی ہے کہ آپریشن ضرب عضب اورنیشنل ایکشن پلان کی ان کے نزدیک کوئی اہمیت نہیں،ان حکمرانوں کو پاکستانی عوام اور ریاست سے نہیں اپنے اقتدار اور دولت سے محبت ہے۔

وحدت نیوز(اسلام آباد)وفاقی دارالحکومت اسلام آباد کے سیکٹرG-10میں مسجد وامام بارگاہ امام حسنؑ سے 20محرم الحرام کو نکالےجانے والے سالانہ لائسنس شدہ جلوس عزاپر پولیس کا دھاوا،پولیس گردی کے بدترین مناظردیکھنے میں آئے،بانی جلوس ،ایم ڈبلیوایم کے ارشادبنگش سمیت 14عزادارگرفتار،4زخمی ،خواتین ومردشرکاءپر لاٹھی چارج،متعددزخمی،آنسوگیس کا اندھادھنداستعمال،عزادارتمام رکاوٹیں عبورکرتے ہوئے لبیک یا حسین ؑکی صدائوں میں منزل مقصودتک پہنچ گئے،تفصیلات کے مطابق اسلام آباد سیکٹرG-10میں  مسجد وامام بارگاہ امام حسنؑ سے20محرم الحرام کو برآمد ہونے والے سالانہ جلوس عزاکو گذشتہ سال بھی بعض شرپسند تکفیری عناصراور انتظامیہ کی ملی بھگت سے روکنے کی کوشش کی گئی تھی،لہذٰا اسی سازش کے تحت اس لائسنس شدہ جلوس کی برآمدگی میں رکاوٹیں ڈالی گئیں،جسے عزادارمائوں بہنوں اور بزگوں جوانوں نے حسینی ؑجذبے سے ناکام بنا دیا۔

وحدت نیوز(لاہور) جیکب آباد پولیس کی جانب سے شہداء کے لواحقین پرپولیس گردی کی مذمت کرتے ہیں،سندھ حکو مت دہشت گردوں کے خلاف کاروائی سے کیوں گریزاں ہے؟ملک میں دم توڑتی پیپلز پارٹی اپنی بقا کے لئے دہشت گردوں کا سہارا لے رہی ہے،سندھ میں کالعدم دہشت گرد جماعتوں سے وزیر اعلیٰ سندھ کے مشیروں کے رابطے اور ان کے مراکز کے دورہ جات اس بات کی دلیل ہے کہ سندھ دہشت گردوں کے لئے محفوظ پناہ گاہ ہے،ان خیالات کا اظہار مجلس وحدت مسلمین پنجاب کے سیکرٹری جنرل علامہ عبدالخالق اسدی نے صوبائی کابینہ کے رہنماوں کے اجلاس سے خطاب میں کیا۔

 انہوں نے کہا کہ دہشتگردی کیخلاف جنگ کو منطقی انجام تک پہنچانے میں سب سے بڑی رکاوٹ موجود حکمران خود ہیں،سانحہ جیکب آباد اور نصیرآباد چھلگری کے شہداء بھی اس ملک کے فرزند ہیں،کیا سندھ اور بلوچستان میں شہید ہونے والے معصوم بچے پاکستانی نہیں،ہم اپنے ان شہداء کے پاک لہو کو رائیگاں نہیں جانے دینگے،انہوں نے کہا کہ جیکب آباد اور نصیرآباد کے شہداء کو انصاف نہ ملا تو پنجاب کے شیعہ اور سنی عوام ان مظلوموں کو انساف دلانے کے لئے سڑکوں پر آئیں گے،سندھ اور بلوچستان میں کالعدم جماعتیں اپنی شاطرانہ کاروائیوں میں مصروف ہے،وفاق،چاروں صوبوں سمیت گلگت بلتستان میں نیشنل ایکشن پلان کا اصل ہدف دہشت گرد مخالف قوتیں ہیں،دہشت گردوں اور ان کے سہولت کاروں کیخلاف صوبائی حکومتیں کریک ڈاوُن کے بجائے ان سے معاملات طے کرنے میں مصروف ہیں،دہشت گردی کیخلاف جنگ کو انجام تک پہنچانے میں سیاسی جماعتیں مخلص نہیں۔

وحدت نیوز (قم) مجلس وحدت مسلمین پاکستان کے مرکزی ڈپٹی سیکرٹری جنرل و خارجہ امور کے سیکریٹری ڈاکٹر علامہ سید شفقت حسین شیرازی نے کہا ہے کہ سب سے پہلے تو اس سال سانحہ منٰی میں یزیدان عصر کے ہاتھوں ہزاروں شہداء کی شہادت پر ہم پوری ملت اسلامیہ کی خدمت میں تعزیت و تسليت پیش کرتے ہیں، ليكن ہمارا صدمہ اور خساره بہت بڑا ہے، كيونکہ اس سانحے میں شہید ہونے والی عظیم شخصیات میں سے ایک ہمارے انتہائی عزيز اور واجب القدر دوست، مبلغِ اسلام، مایہ ناز اور بلند پايہ تنظیمی و علمی  شخصیت حجت الاسلام والمسلمين ڈاکٹر غلام محمد فخرالدین بھی ہیں، جو مجلس وحدت مسلمين شعبہ قم كے سربراه اور ہمارے ايک مركزی ليڈر شمار ہوتے تھے۔ ان کی شہادت سے ایک  ضعیف ماں اور کمسن بچوں کا سہارا ضرور ٹوٹا ہے اور یقیناً يہ شهيد کے اہلِ خانہ كيلئے ایک ناقابلِ فراموش گھاو ہے، ليكن درحقيقت ان کی شهادت سے پورے عالمِ اسلام میں اس زخم سے کئی گنا بڑا شگاف پيدا ہوگیا ہے، حديث شريف میں آيا ہے "اذا مات العالم ثلم في الاسلام ثلمة لايسدها شئ" ان کی مظلومانہ اور غريب الوطنی کی شهادت سے پورے عالمِ اسلام میں ایک شگاف پڑا ہے اور خلا پيدا ہوا ہے اور يہ پوری ملت پاکستان کا ناقابلِ تلافی نقصان ہے۔

ہم اس عظیم شہادت کی مناسبت سے وارث خون شهداء حضرت امام مهدی (عج)، انكے نائب ولی امر مسلمین، و مراجع عظام اور علماء كرام و ملت پاکستان بالخصوص مجلس وحدت مسلمین كے سربراه ناصر ملت علامہ راجہ ناصرعباس جعفری  کی خدمت میں تعزیت پیش کرتے ہیں۔ ہماری دعا ہے کہ خداوندِ عالم شہید کے اہلِ خانہ کو صبر و استقامت عطا کرے اور شہید کے چاہنے والوں کو ان کے مشن کو جاری رکھنے کی سعادت نصیب کرے۔ ہم یہاں پر پوری ملت اسلامیہ خصوصاً ملتِ پاکستان سے یہ اپیل کرتے ہیں کہ وہ آلِ سعود کے ظلم و جبر کے خلاف آواز بلند کرے اور حرمين شريفين كے انتظامات کی ذمہ داری نااہل سعودی حکومت کی بجائے (او آئی سی) يا مسلمانوں كے كسی معتمد ادارے کو سونپنے کی تحريک چلائے۔
مثلِ شبیرؑ جو پیغامِ عمل دیتے ہیں
ایسے ہی لوگ زمانے کو بدل دیتے ہیں

وحدت نیوز (کوئٹہ) مجلس وحدت مسلمین کوئٹہ ڈویژن کے میڈیا سیل سے جاری شدہ بیان میں ایم ڈبلیوایم کے رکن بلوچستان اسمبلی سید محمد رضا نے کہا کہ حاجی محمد صادق کی ٹارگٹ کلنگ کی بھرپورمذمت کرتے ہیں ، دہشتگردی میں ملوث افراد کو جلد از جلد ان کے انجام تک پہنچایا جائے. حاجی محمد صادق کی ٹارگٹ کلنگ ثابت کرتی ہے کہ نیشنل ایکشن پلان اب تک نتیجہ خیز نہیں ہوا،عوام میں خوف و حراس پھیلانے والوں کی جگہ جھیل ہے۔ دہشتگردوں کو ان کے آخری انجام تک پہنچانا ضروری ہے اور ان کا ساتھ دینے والوں کو بھی سلاخوں کے پیچھے ہونا چاہئے ، مگر جب تک کوئی واقعہ درپیش نہیں آتا انتظامیہ کو اس بات کا احساس ہی نہیں ہوتا کہ صوبے میں کوئی دہشتگرد ہے بھی یا نہیں. دہشتگردوں کا وجود وطن عزیز اور پاکستان کے آئین کی بقاء کیلئے اس وقت سب سے بڑا خطرہ ہے. جس سے جلد از جلد نمٹنا ہوگا. حکومت آئین کی پاسداری کرتے ہوئے دہشت گردعناصر اور ان کے سرپرستوں کو کیفرکردار تک پہنچائیں ۔ ملک میں دہشت پھیلانے والے پاکستان کے دشمن ہے. ان دہشتگردوں کی وجہ سے پاکستانیوں کو دنیا بھر میں شرمندگی کا سامنا کرنا پڑ رہا ہے انکے کارناموں کی وجہ سے دنیا ہمارے ملک کو دہشتگرد کہہ رہی ہے۔

انہوں نے مزیدکہا کہ کوئٹہ شہر ایک عرصے سے ٹارگٹ کلنگ اور بم دھاکوں کی زد میں ہیں۔ حالات ٹھیک ہوئے کا نام نہیں لے رہے۔ پولیس اور ایف سی دعویٰ کر رہی ہے کہ وہ ایک مہینے کے دوران سینکڑوں ملزمان گرفتار کئے۔ مگر ان میں سے کسی دہشت گرد کو ابھی عدالت میں پیش نہیں کیا گیا اور ان تنظیموں اور لوگوں کی جانب سے کوئٹہ شہر میں تواتر کے ساتھ ٹارگٹ کلنگ جاری ہیں اور یہ عناصر حکومت اور سیکورٹی اداروں کو یہ چیلنج دے رہے ہیں۔ کہ وہ جب چاہیے شہر کے وسط میں کاروائی کر سکتے ہیں ۔ بیان میں مزید کہا گیا ہے کہ گزشتہ روز جان محمد روڈ ،ٹارگٹ کلنگ میں شہید ہونے والے حاجی محمد صادق کے لواحقین سے دلی ہمدردی اور غم کا اظہار کرتی ہے۔ اور صوبائی حکومت کی نا اہل ، غفلت ، عدم دلچسپی اور کوتاہی کی مذمت کرتی ہے۔

وحدت نیوز (کراچی) مجلس وحدت مسلمین کراچی کے سیکر ٹری سیاسیات علی حسین نقوی نے کہا ہے کہ بلدیاتی انتخابات میں کسی سیاسی جماعت کی حمایت یا ساتھ الیکشن کااعلان نہیں کیا ایم ڈبلیو ایم کی جانب سے کسی مخصوص سیاسی جماعت کی حمایت یا ساتھ الیکشن لڑنے کے اعلان کی خبروں کی تردید کرتے ہیں ملک بھر کی طرح کراچی کے بلدیاتی الیکشن کے لئے بھی یونین کمیٹی کی سطح پرانتخابی سیٹ ایڈجسٹمنٹ کے لئے تمام ضلعی پولیٹیکل کاؤنسل کو بااختیار کیا گیا ہے اور ان کی جماعت کے امیدوار کراچی بھرمیں بلدیاتی الیکشن میں خیمہ کے انتخابی نشان پر بھر پور حصہ لیں گے تاکہ عوام کی تمام بنیادی مشکلات کے حل کے لئے اپنا بھر پور سیاسی کردار ادا کریں گے۔ان خیالات کا اظہار انہوں نے کراچی ایم ڈبلیو ایم ضلع غربی کے تحت پولیٹیکل کونسل کے اجلاس سے خطاب کر تے ہو ئے کیا۔

ان کا کہنا تھا کہ کراچی کے تمام اضلاع میں بلدیاتی انتخابی پینل تشکیل دیئے جا چکے ہے ۔ مرکزی پولیٹیکل سیکریٹری ناصر عباس شیرازی ایڈووکیٹ اور صوبائی پولیٹیکل سیکریٹری عبد اللہ مطہری کوانتخابی اتحاد اور سیٹ ایڈ جسٹمنٹ کے حوالے سے بریفنگ دی جائے گی۔ ان کا کہنا تھا کہ اضلاع کی سطح پر ہم خیال سیاسی و مذہبی جماعتوں کے ساتھ بات چیت جاری ہے ، تمام اضلاع کی پولیٹیکل کاؤنسل بااختیار ہیں ، ضلعی اور یونین کی صورتحال کو مد نظر رکھ کر بیشتر یونین کمیٹیز میں معتدل سیاسی جماعتوں کے ساتھ مل کر بلدیاتی الیکشن میں حصہ لیں گے ، ان کا کہنا تھا کہ ہماری کوشش ہے کہ ایسی مقامی قیادت کو متعارف کروایا جائے جو منتخب ہو کر حلقہ کے عوام کو بنیادی ضروریات کی فراہمی میں معاون ثابت ہوسکیں اور عوامی خدمت کی اعلیٰ مثال قائم کریں ۔