وحدت نیوز (کراچی) مجلسِ وحدت مسلمین شعبہ خواتین کراچی ڈویژن کی جانب  سے ''عشرہ اول'' میں امام بارگاہ اسلامک ریسرچ سینٹر''  اور "شاهِ كربلا رضويه" میں خواتین کی سہولت کے لیے رابطہ کیمپ لگایا گیا، اسکے علاوہ ۱۲ محرم کو '' سوئمِ شھدائے کربلا'' کی مناسبت سے برآمد ہونے والے جلوسِ عزا میں بھی، مجلسِ وحدت مسلمین شعبہ خواتین کراچی کی جانب سے کیمپ لگایا گیا. کیمپ میں  خواتین کی سہولت کے پیشِ نظر مختلف اسلامی کتابوں اور مختلف ضروریاتِ حجاب کی اشیاء کے لئے سامان رکھا گیا.اسکےعلاوہ وہ خواتین جو مجلسِ وحدت مسلمین شعبہ خواتین میں شامل ہوکر ملک وملت ک لیئے اپنی خدمات پیش کرنا چاہتی تھیں ان کے لئےممبرشپ فارم بھی موجود تھے.خواتین نے بڑی تعداد میں ممبرشپ فارم جمع کروائے اور مجلسِ وحدت مسلمین شعبہ خواتین کی کوششوں اور کاوشوں کو سراہا۔

وحدت نیوز (کوئٹہ) مجلس وحدت مسلمین پاکستان کے رکن بلوچستان اسمبلی سید محمد رضا نے کہا ہے کہ کچھ شرپسند عناصر مسلسل شہر میں وارداتوں کے ذریعے فرقہ واریت کی آگ بھڑکانے کی کوشش کر رہے ہیں۔ دن دہاڑے بے گناہ شہریوں کو ٹارگٹ کلنگ کا نشانہ بنایا جا رہا ہے، جو لمحہ فکریہ ہے۔ ہزاروں اہلکاروں کی موجودگی اور حکومت اور اداروں کی امن و امان کی بحالی اور بدامنی کے خاتمے کے بیانات کے باوجود آئے روز شہر میں فائرنگ سے تاجر پیشہ افراد، راہگیر اور عام شہریوں کو دہشتگردانہ کارروائیوں کے ذریعے ہراساں کیا جا رہا ہے۔ محرم الحرام کے شروع ہوتے ہی پورے بلوچستان میں دہشتگردوں نے نئی کاروائیوں کا آغاز کر دیا ہے۔ جس میں آٹھویں محرم کو سانحہ چھلگری، سریاب روڈ دھماکہ، سانحہ جیکب آباد شامل ہیں۔ کوئٹہ میں ایک مرتبہ پھر ٹارگٹ کلنگ کی ایک مسلسل لہر شروع ہو چکی ہے۔ ایک ہفتے سے کوئٹہ میں ارباب کرم خان روڈ، جان محمد روڈ، اسپنی روڈ اور پٹیل باغ پر ٹارگٹ کلنگ جیسے واقعات رونما ہونے کے باوجود حکومت اور سکیورٹی اداروں کی طرف سے کوئی بھی عملی اقدام دیکھنے میں نہیں آرہا۔ جبکہ نیشنل ایکشن پلان کے اندر یہ بات طے ہوچکی تھی کہ دہشتگردوں اور اُن کے سہولت کاروں کے خلاف بھرپور کارروائی عمل میں لائی جائے گی۔ اُن کے تمام نیٹ ورکس کو توڑا جائے گا لیکن چند ایک بدنام زمانہ دہشت گردوں کو کیفر کردار تک پہنچانے کے علاوہ کوئی خاطر خواہ پیشرفت نہیں کی جا سکی اور اُن کے نیٹ ورکس اور دہشتگرد پیدا کرنے کے مراکز ابھی بھی پوری طرح فعال ہیں۔ ان واقعات سے عوام میں دہشتگردی کی عفریت سے آزاد ہونے کی جو اُمید پیدا ہوچکی تھی، وہ آہستہ آہستہ دم توڑ رہی ہے۔ دہشتگردی کے خاتمے کے حکومتی اور اداروں کی سنجیدگی پر شکوک و شبہات پیدا ہورہے ہیں جبکہ مٹھی بھر عناصر آج بھی شہر کے امن و امان کو تہہ و بالا کرنے کی سازشوں میں مصروف ہیں۔ عوام کی اُمیدوں کو بحال کرنے اور اُن کے خدشات کو دور کرنے کیلئے حکومت اور اداروں کو دہشت گردوں اور اُن کے نیٹ ورکس کے خلاف سنجیدہ اور ٹھوس اقدامات کرنے ہونگے۔

سید محمد رضا کا مزید کہنا تھا کہ ہم مذہبی دہشت گردی اور انتہا پسندی کو وطن عزیز اور صوبے کے امن وا مان اور بھائی چارگی کیلئے زہر قاتل سمجھتے ہیں۔ جس کے ہوتے ہوئے پاکستان کبھی ترقی نہیں کر سکتی۔ دہشتگرد صرف ایک مسلک یا قبیلے کا دشمن نہیں، بلکہ پورے ملک، صوبے اور عوام کے دشمن ہیں، جو عالمی سطح پر ملکی ساکھ کو نقصان پہنچا رہے ہیں۔ آج بھی نام بدل کر دہشتگردی کی کارروائیاں کرنے والی جماعت، جس نے کھلم کھلا عالمی دہشتگرد تنظیم داعش کی حمایت کا اعلان کیا تھا، بڑی دیدہ دلیری کے ساتھ اپنی کارروائیوں میں مصروف ہے۔ روزانہ کی بنیاد پر تمام اخبارات میں بیانات جاری کر رہے ہیں جبکہ ہمارے ملک کے سربراہان کے بیانات ریکارڈ پر ہیں کہ ہم داعش کا سایہ بھی ملک پر نہیں پڑنے دینگے۔ مجلس وحدت مسلمین ٹارگٹ کلنگ کے حالیہ واقعات کی بھر پور مذمت کرتے ہوئے قانون نافذ کرنے والے اداروں پر زور دیتی ہیں کہ نیشنل ایکشن پلان کی رفتار تیز کرتے ہوئے اُسکی اصل روح کے مطابق اُس پر عمل درآمد کیا جائے۔ دہشت گردی کو جڑ سے ختم کرکے ملک کو ترقی کی راہ پر گامزن کریں۔ آخر میں شہداء کے لواحقین سے دلی تعزیت کرتے ہوئے زخمی ہونے والے افراد کی جلد صحت یابی کے لئے دُعاگو ہیں۔

وحدت نیوز (اسلام آباد) چند روز قبل رہائی پانے والے مجلس وحدت مسلمین پاکستان کے رہنماء ارشاد حسین بنگش کا کہنا ہے کہ ہم عزاداری سید الشہداء (ع) پر کوئی آنچ نہیں آنے دینگے، اس کے لئے اگر ہماری جانیں بھی چلی جائیں تو ہم حاضر ہیں، اپنے ایک بیان میں نے کہا کہ 20 محرم الحرام کو مسجد امام حسن عسکری (ع) اسلام آباد سے برآمد ہونے والے جلوس پر انتظامیہ کی طرف سے ظالمانہ تشدد کی بھرپور مذمت کرتے ہیں۔ اگر اسلام آباد کی انتظامیہ نے جلوس کو روکنے کے لئے جتنی نفری لگائی تھی اسکے دس فیصد بھی تکفیریوں کا راستہ روکنے کے لئے لگائی ہوتی تو لاٹھی چارچ یا شیلنگ کی نوبت ہی نہ آتی۔ انتظامیہ نے بے گناہ خواتین، بچوں اور عزاداروں پر شیلنگ، پتھرائو اور لاٹھیاں برسائیں، جو ہمارے مذہبی حق کو چھیننے کے مترادف ہے۔ ان کا مزید کہنا تھا کہ مجلس اور جلوس امام حسین (ع) پر کوئی سمجھوتہ کرنے کو تیار نہیں۔ اسکے لئے زندانوں میں بند کرنا تو کیا ہم اسکے لئے جان دینے سے بھی دریغ نہیں کریں گے۔ انہوں نے مزید کہا کہ جن جوانوں کو گرفتار کیا گیا میں ان کے حوصلوں کو سلام پیش کرتا ہوں اور جیل کی سلاخوں کو سنت امام سجاد (ع) اور حضرت بی بی زینب علیہا السلام کی سنت قرار دیکر خوشی سے قبول کروں گا۔

وحدت نیوز (قم المقدس) یومِ اقبال کی مناسبت سے ایم ڈبلیو ایم قم کے دفتر سے جاری کردہ اعلامئے کے مطابق ایم ڈبلیو ایم قم کےسیکریٹری اطلاعات آغانذرحافی نے کہا ہے کہ  پاکستان میں حکومتِ پاکستان کی سرپرستی میں افکار اقبال کے بجائے سعودی افکارونظریات کی ترویج و اشاعت کا کام زوروں پر ہے۔پاکستان میں دہشت گردی کا ناسور بونے میں سعودی افکار کو بنیادی اہمیت حاصل ہے۔اعلامئے میں سیکرٹری سیاسیات و ارتباطات عاشق حسین آئی آر نے کہا ہے کہ افسوس کی بات ہے کہ نواسہ رسول ﷺ کی عزاداری پر پابندیاں لگائی جاتی ہیں لیکن نظریہ پاکستان کے دشمن کھلے عام  اپنے اجتماعات منعقد کررہے ہیں اوراپنے افکارو نظریات کی تبلیغ کرنے کے ساتھ ساتھ دہشت گردوں کی سرپرستی کررہے ہیں۔انہوں نے کہا کہ آج پاکستان میں اقبالیات کی جگہ سعودی نظریات و عقائد کو حاصل ہے جس کی وجہ سے پاکستان  کھوکھلا ہوتاچلاجارہاہے۔

وحدت نیوز (کوئٹہ) مجلس وحدت مسلمین کے رکن بلوچستان اسمبلی آغا رضا نے جمعہ کے روز اسمبلی اجلاس سے خطاب کرتے ہوئے کہا کہ محکمہ تعلیم میں این ٹی ایس کے ذریعے بھرتیوں میں بے قاعدگیاں ہوئی ہیں میرٹ پر آنے والوں کو نظر انداز کیا گیا ہے۔ اس کی تحقیقات کے لیے کمیٹی تشکیل دی جائیں۔انہوں نے مزیدکہاکہ دیگردور دراز علاقوں سے پی بی 2 میں تعینات کیاگیا جو کہ سراسر میرٹ کے خلاف ہے۔ این ٹی ایس پر بھرتیوں کے آرڈر خیرات کی طرح تقسیم ہورہے ہیں۔ ڈپٹی کمشنر بارکھان کے درخواست کا حوالہ دیتے ہوئے کہا کہ صرف بارکھان میں انتہائی نالائق اور اشتہاری ملزمان کو بھی حالیہ بھرتیوں کے آرڈرز دیے گئے ہیں۔ جن میں جعلی رزلٹ اور اشتہاری ملزم بھی شامل ہیں۔انشاء اللہ جلد ہی اسٹینڈنگ کمیٹی کو این ٹی ایس کے ذریعے بھرتیوں میں بے قاعدگیوں کے خلاف دستاویزات فراہم کی جائیں گی تاکہ میرٹ لسٹ میں حقدار کو ان کا حق مل جائیں۔

اسمبلی اجلاس میںآغا رضا نے گزشتہ دنوں کوئٹہ میں ایک بار پھر دہشت گردی کے واقعات کا حوالہ دیتے ہوئے کہا کہ ہلاک ہونے والا شخص شیعہ موٹر مکینک تھا اور صبح جان محمد روڑ پر واقع اپنے گیراج کی جانب جا رہا تھا کہ ایک موٹر سائیکل پر سوار دہشت گردوں نے اس پر فائرنگ کر دی۔ جس سے ایک گولی اس کے سر میں لگی اور شدید زخمی ہونے کے باعث وہ موقع پر شہید ہو گیا۔ حملہ آور جائے وقوعہ سے فرار ہونے میں کامیاب ہوگئے۔اسمبلی میں ان کاکہناتھا کہ کوئٹہ میں فائرنگ کے نتیجے میں دو بھائی ایک شہید اور دوسرا زخمی ہوا۔ اطلاعات کے مطابق دونوں بھائی ارباب کرم خان روڈ پر ایک گاڑی میں جا رہے تھے کہ دہشت گرد عناصر موٹر سائیکل سواروں نے ان کی گاڑی پر فائر کھول دیا۔ فائرنگ کے باعث ان میں سے ایک شہید اور ایک شدید زخمی ہوا۔ حملے میں نشانہ بننے والے افراد کا تعلق شیعہ مسلک سے ہے۔آج اس اسمبلی فلور سے پہ درپہ واقعات کی شدید مذمت کرتا ہوں۔ پاکستان کے صوبہ بلوچستان کے دارالحکومت کوئٹہ میں ایک بار پھر حالات خرابی کی طرف جارہی ہے۔اس واقعہ کے خلاف وحدت المسلمین نے علمدار روڈ پر احتجاج کیا ہے اور قاتلوں کی فوری گرفتاری کا مطالبہ کیا ہے ۔

وحدت نیوز (اسلام آباد) علامہ راجہ ناصرعباس جعفری کی زیر صدارت مجلس وحدت مسلمین پاکستان کے مرکزی سیکریٹریٹ میں راولپنڈی اسلام آبادکی شیعہ تنظیموں ، ٹرسٹیز،بانیان جلوس،سالاران دستہ،ماتمی انجمنوں کا مشترکہ اجلاس منعقد ہوا، جس میں 20محرم الحرام کو سیکٹرجی10اسلام آباد میں مرکزی جلوس عزاپر پولیس کے حملے ،رکاوٹ ڈالنے اورعزاداروں کی بلاجوازگرفتاریوں کے واقعات کا جائزہ لیا گیا، اس موقع پر بانی جلوس ہذٰابھی موجودتھے،اس موقع پر علامہ راجہ ناصرعباس کا کہنا تھا کہ عزاداری سید الشہداءؑملت تشیع کا آئینی ،قانونی،جمہوری حق ہے،جس پرکوئی پابندی،رکاوٹ یا حملہ ناقابل پرداشت ہے،انہوں نے کہا کہ 30محرم سے قبل راولپنڈی اسلام آباد کی تمام شیعہ تنظیمیں ، ٹرسٹیز،بانیان جلوس،سالاران دستہ،ماتمی انجمنیں آئندہ کے  مشترکہ لائحہ عمل کااعلان کریں گے۔