وحدت نیوز(جامشورو)6 اگست برسی قائد شہید علامہ سید عارف حسین الحسینی ؒ کی برسی کی مناسبت سے اسلام آباد میں منعقد کی جانے والی مہدیؑ برحق  عج کانفرنس کے سلسلے میں مجلس وحدت مسلمین سندھ کے صوبائی سیکریٹری جنرل علامہ مقصودعلی ڈومکی نے سندہ کے مختلف اضلاع کا دورہ کیا۔ ضلع دادو، جامشورو، جیکب آباد میں تنظیمی ذمہ داران، عوامی اجتماعات اور شخصیات سے گفتگو کرتے ہوئے علامہ مقصودعلی ڈومکی نے کہا کہ عصر حاضر کے دشمنان دین کا مقابلہ کرنے کے لئے ہمیں عزم و حوصلے اور بصیرت کی ضرورت ہے، خدا کا شکر ہے کہ اللہ تعالیٰ نے ہمیں رہبر معظم نائب امام زمانہ عج حضرت آیۃ اللہ خامنہ ای کی شکل میں ایک صاحب بصیرت قائد و رہبر سے نوازا ہے، جو عصر غیبت میں ظہور امام زمانہ ؑ کے لئے زمینہ سازی کر رہے ہیں۔ وہ زمینہ سازی جسے شاید بعض نادان دوست سمجھنے سے قاصر ہیں مگر دشمن اس بات کو اچھی طرح سمجھ چکا ہے کہ ولایت فقیہ عصر غیبت میں ظہور امام زمانہؑ کی زمینہ سازی کا عنوان ہے۔ الحمد للہ آج ظہور امام ؑ کی تحریک ایک عالمی انقلابی تحریک کا رخ اختیار کرچکی ہے۔ قائد شہید علامہ سید عارف الحسینی   ؒ نے ہمیں نظام ولایت سے متصل کیا اور ہم نے عشق خمینی ؒ کا درس قائد شہید سے لیا۔انہوں نے کہا کہ قائد وحدت علامہ راجہ ناصر عباس جعفری کی قیادت میں مجلس وحدت مسلمین ، عوام کی امیدوں کا مرکز بن چکی ہے۔ صالح قیادت، انقلابی افکار، اصلاح معاشرے کا عزم راسخ مجلس وحدت مسلمین کا طرہ امتیازہے۔  سندہ بھر سے ہمارے کارکن اسلام آباد کے قومی اجتماع میں بھرپور شرکت کریں گے۔

وحدت نیوز(آرٹیکل) غیر ملکی میڈیا کے مطابق  گزشتہ روز عراق میں  بعقوبہ کے شمال مغربی علاقے میں ایک  دھماکے میں 5شہری ہلاک اور 9زخمی ہوگئے ۔ یہ بھی گزشتہ روز کی ہی خبر ہے کہ   افغانستان کے دارالحکومت کابل کے مغربی علاقے میں کار بم دھماکے کے نتیجے میں 36 افراد ہلاک جبکہ 42 زخمی ہوگئے۔

یہاں پر یہ بیان کرنا ضروری ہے کہ  کابل کے مغربی حصے میں ہزارہ برادری  کے لوگ رہائش پذیر ہیں جنہیں وقتاً فوقتا حملوں کا نشانہ بنایا جاتا ہے۔

اس سے یہ بھی پتہ چلتا ہے کہ ہزارہ کشی فقط پاکستان تک محدود نہیں بلکہ کسی  عالمی ایجنڈے کا حصہ ہے۔ دوسری طرف  یہ بھی بیان کرنا ضروری ہے کہ گزشتہ روز ہی افغانستان میں طالبان نے دو مزید ضلعی ہیڈکواٹرز پر قبضہ کر لیا ہے۔

آج پاکستان میں پنجاب کے دارلحکومت    لاہور میں فیروز پور روڈ پرارفع کریم سنٹر اور پرانی سبزی منڈی کے سامنے پولیس اہلکاروں کو  خود کش حملے کا نشانہ  بنایا گیا، اب تک کی اطلاعات کے مطابق  اس خودکش دھماکے میں9پولیس اہلکاروں سمیت 28افراد شہید جبکہ56 زخمی ہو گئے ہیں۔

یہ سب کچھ ایسے وقت میں ہو رہاہے کہ جب  انٹرپول نے مگربی ممالک کو  مطلع کیا ہے کہ   داعش کے  انتہائی ماہر اور تجربہ کار ایک سو تہتر دہشتگرد یورپ میں خودکش حملے کرنے اور دہشتگردی کو رواج دینے  کا حلف اٹھا چکے ہیں ۔

اگرچہ انٹرپول نے یورپی ممالک کو داعش کے دہشتگردوں کے ناموں کی فہرست بھی دی ہے۔ تاہم  لمحہ فکریہ یہ ہے کہ دہشت گردی کے خلاف بنایا جانے والا سعودی اتحاد اس سلسلے میں بالکل خاموش ہے۔

عین اس وقت پاکستان اور بھارت کی سرحدوں پر کشیدگی کے ساتھ ساتھ چین اور بھارت کے درمیان بھی زبردست کشیدگی پائی جاتی ہے۔ چینی وزارت دفاع کے ترجمان ووقیان نے پریس بریفنگ میں بھارت کو خبردار کرتے ہوئے کہا کہ بھارت ملکی دفاع کے حوالے سے چینی فوج کی صلاحیتوں سے متعلق غلط فہمی میں نہ رہے ،چین نے بھارت کو سرحد پار علاقے سے اپنی فوج فوری ہٹانے کو کہا ہے۔

اسی طرح ریاض کانفرنس کے بعد امریکہ اور اسرائیل نے مسلسل ایران کے خلاف سفارتی محاز گرم رکھا ہوا ہے۔  اگرچہ امریکہ نے چند روز پہلے ہی ایران کے بیلسٹک میزائل پروگرام کے تسلسل پر تہران پر اقتصادی پابندیاں عاید کی  تھیں لیکن ایران نے  امریکی دباو  اور پابندیوں کو مسترد کرتے ہوئے  ایک  نئے میزائل’شکار 3‘ کا بھی افتتاح کیا ہے

   اس میزائل کے بارے میں بتایا جاتا ہے کہ یہ 27 کلو میٹر بلندی پر 120 کلو میٹر دور اپنے ہدف ٹھیک نشانہ بنانے کے علاوہ  جنگی طیاروں، ڈرون طیاروں، کروز میزائلوں اور جنگی ہیلی کاپٹروں کو  بھی  مار گرائے گا۔

امریکہ اور اسرائیل کے ساتھ ایران کے کے بگڑتے ہوئے حالات اپنی جگہ خراب سے خراب تر ہوتے جا رہے ہیں جبکہ انہی دنوں میں کویت نے بھی  ایران کو کویت میں اپنا سفارتی عملہ کم کرنے اور دفاتر بند کرنے کا حکم دیاہے۔

موجودہ عالمی تناظر میں   عالمی برادری اور خصوصا دہشت گردی سے متاثر تمام ممالک کو پرانی رنجشوں کو بھلا کر از سر نو پالیسیاں تریب دینے کی ضرورت ہے۔

دہشت گردی کے بیج بونے والے، دہشت گردوں کی سرپرستی اور  سہولت کاری کرنے والے،  دہشت گردوں کو ٹریننگ اور گرین کارڈز فراہم کرنے والے آج کے دور میں کسی سے پوشیدہ نہیں ہیں۔

اسی طرح ممالک کے درمیان جغرافیائی اور سرحدی کشیدگی پر بھی عالمی برادری کو منصفانہ اور دوٹوک موقف اختیار کرنا چاہیے۔

اس وقت صورتحال اس طرف جا رہی ہے کہ کسی بڑے انسانی سانحے سے بچنے کے لئے  عالمی برادری اور بین الاقوامی اداروں کو   مختلف ممالک اور اقوام کو دہشت گردی میں ملوث قرار دینے کے بجائے اُن ممالک میں موجود شخصیات کو کے نامزد کر کے ان کے خلاف کارروائی کا مطالبہ کیاجائے۔

ایسے افراد جنہوں نے اپنا اسلحہ فروخت کرنے، اور مختلف اقتصادی مفاد کے لئے  ملکی و قومی عہدوں اور اختیارات کا ناجائز استعمال کرتے ہوئے ، مختلف ممالک کے درمیان کشیدگی کی فضا قائم کر رکھی ہے اور یا پھر داعش اور القاعدہ جیسے دہشت گردوں کے نیٹ ورکس قائم کئے ہیں ان کو بلاتفریق ممالک نامزد کر کے ان کے خلاف عالمی قوانین کے مطابق کارروائی کی جائے۔

عالمی جنگ  یا بین الاقوامی دہشت گردی سارے انسانوں کا مشترکہ مسئلہ ہے۔

 جس طرح یہ دعویٰ کیاجاتا ہے کہ دہشت گردوں کا کوئی مسلک نہیں ہوتا اسی طرح اب اس دعوے کی بھی ضرورت ہے کہ دہشت گردوں کا کوئی ملک بھی نہیں ہوتا۔

دہشت گرد مسالک و ممالک کو اپنی ڈھال کے طور پر استعمال کرتے ہیں۔ اسی طرح جیسے القائدہ  و داعش کی دہشت گردی زبان زد عام ہے اسی طرح دوسرے ممالک کی سرحدوں پر کشیدگی پھیلانے اور فائرنگ کے واقعات کو بھی  دہشت گردی کے زمرے میں لائے جانے کی ضرورت ہے۔ اور اس طرح کے واقعات کے ذمہ دار افراد کو بھی انسانی جانوں کا دشمن قرار دے کر قرار واقعی سزائیں دی جائیں۔

کشمیر اور فلسطین جیسے دیرینہ مسائل کو بطور عادی لینے کا وقت گزر چکا ہے،  اس وقت دنیا تیزی سے آگ اور بارود کے ایک گولے میں تبدیل ہوتی جارہی ہے۔

ایسے میں اگر دنیا کے باشعور لوگوں نے اپنے اپنے ممالک میں موجود انسان دشمنوں اور دہشت گردی کے ذمہ داروں کو نامزد نہیں کیا تو اس کا خمیازہ پوری دنیا کو بھگتنا پڑے گا۔  عالمی برادری کو اب یہ حقیقت تسلیم کرنی چاہیے کہ دہشت گردی خواہ سرحدی ہو یا ملکی ، دہشت گرد  چند ممالک نہیں بلکہ مختلف ممالک کی پوسٹوں پر بیٹھے ہوئے   چند افراد ہیں لہذا انہیں نامزد کیا جائے ، ان کے جرائم بیان کئے جائیں اور ان کے خلاف کارروائی کی جائے۔

چند بیمار ذہن ، حریص دماغ اور کم فکر لوگ پوری انسانی برادری کے امن سے کھیل رہے ہیں۔

تحریر۔۔نذر حافی

This email address is being protected from spambots. You need JavaScript enabled to view it.

وحدت نیوز(قم) مجلس وحدت مسلمین شعبہ قم کے سیکرٹری جنرل و موسسہ رسول اعظم (ص) قم  کے مدیر  ڈاکٹر علامہ  گلزار حسین جعفری   کو "شعبہ قرآن وعلوم" کے پی ایچ ڈی تھیسزمیں بہترین نمبروں کیساتھ کامیابی پرایم ڈبلیوایم کے مرکزی قائدین سمیت مختلف رہنماوں نے مبارک باد پیش کی ہے، مرکزی سیکریٹری جنرل علامہ راجہ ناصرعباس جعفری ، مرکزی ڈپٹی سیکریٹری جنرل علامہ سید احمد اقبال رضوی ، مرکزی سیکریٹری امور خارجہ علامہ ڈاکٹرشفقت حسین شیرازی سمیت دیگر نے اپنے تہنیتی پیغام میں کہاہے کہ ڈاکٹر علامہ گلزار حسین جعفری کی تدریسی،  تبلیغی اور ثقافتی خدمات کیساتھ تعلیمی اعلی مدارج میں کامیابی روشن مستقبل کی طرف ایک اہم قدم ہیں،  ڈاکٹر علامہ  گلزار حسین جعفری نے مجلس وحدت مسلمین قم کی ذمہ داری اور موسسہ رسول اعظم ص کی مدیریت کیساتھ پی ایچ ڈی میں اعلیٰ  نمبر حاصل کرکے  تعلیمی وثقافی امور کے حسن امتزاج کیساتھ قوم ملت اور قومی جماعت  کا سر فخر سے بلند کیا ہے،مجلس  وحدت مسلمین کی تاریخ میں ماشاءاللہ سے تمام ذمہ دار برادران نے ثقافتی واجتماعی خدمات کیساتھ علمی مدارج میں نہایت اہم کردار ادا کیا ہے، مجلس کے سابقہ سیکریٹری جنرل شہید منا ڈاکٹر فخرالدینؒ نے المصطفی انٹرنیشنل یونیورسٹی میں اب تک کے پی ایچ ڈی اسکالرز میں سب سے زیادہ نمبر حاصل کیئےتھے،جوان طالبعلموں کو ان سے درس لیتے ہوئے تعلیمی اعلی مدارج کے حصول کیساتھ زمانہ شناسی سیاسی اجتماعی اور ثقافتی میادین میں قوم وملت کی خدمت کے لے اپنے آپ کو آمادہ کرنا چاہئے۔

وحدت نیوز(لاہور) مجلس وحدت مسلمین کا اسلام آباد پریڈ گرونڈ میں 6 اگست کو منعقدہ اجتماع کے لئے رابطہ مہم اور کارنر میٹنگ جاری،سنٹرل پنجاب سے ریکارڈ تعداد میں کارکنان شریک ہوں گے،ان خیالات کا اظہار مجلس وحدت مسلمین پنجاب کے سیکرٹری روابط رائے ناصر علی نے صوبائی کانفرنس کمیٹی کے اراکین کو اجلاس میں بریفنگ کے دوران کیا ،انہوں نے کہا ہمارے تمام شرکاء اپنی مدد آپ کے تحت اس اجتماع میں شریک ہونگے،اجتماع کے حوالے سے سنٹرل پنجاب کے تمام اضلاع کے کارکنان مسلسل کارنر میٹنگز اور ڈور ٹو ڈور رابطہ مہم میں مصروف ہیں،انشااللہ 6 اگست کو سنٹرل پنجاب سے مثالی شرکت کو یقینی بنائیں گے،انہوں نے کہا کہ سنٹرل پنجاب سے علمائے کرام ،ذاکرین ،مشائخ کی کثیر تعداد شریک ہونگے،مجلس علمائے امامیہ ،مدارس جعفریہ پاکستان،مختلف ماتمی انجمنیں،عمائدین شہر کی بڑی تعداد اس عظیم الشان اجتماع میں شریک ہونگے،اسلام آباد جلسہ گاہ میں ایم ڈبلیوایم یوتھ ونگ سنٹرل پنجاب کی جانب سے میڈیکل کیمپ،شرکاء کی رہنمائی کے لئے موٹروے سے جلسہ گاہ تک مختلف مقامات پر استقبالیہ کیمپس کا بھی اہتمام کیا گیا ہے،اجلاس میں اجتماع کے حوالے سے رابطہ مہم پر اظہار اطمینان کرتے ہوئے ایم ڈبلیوایم پنجاب کے سیکرٹری سیاسیات سید حسن کاظمی نے کہا کہ انشااللہ 6 اگست کا جلسہ دہشتگردی اور کرپٹ مافیا کیخلاف ریفرنڈم ثابت ہوگا،اجلاس میں رانا ماجد علی،سید حسین زیدی،زاہدمہدوی،نقی مہدی،سید سجاد نقوی،سید حسن کاظمی سمیت دیگر رہنما شریک ہوئے۔

وحدت نیوز(کراچی) مجلس وحدت مسلمین پاکستان ضلع وسطی کے سابق سیکریٹری جنرل اور خیرالعمل فاؤنڈیشن پاکستان کراچی ڈویژن کے سیکریٹری برادر زین رضا رضوی کے والد سید سبطین رضا رضوی کے انتقال پر ایم ڈبلیوایم کے مرکزی صوبائی او ر ضلعی رہنماوں نے افسوس او ر تعزیت کا اظہار کیا ہے، ایم ڈبلیوایم کے مرکزی سیکریٹری جنرل علامہ راجہ ناصرعباس جعفری، مرکزی ڈپٹی سیکریٹری جنرل علامہ سید احمد اقبال رضوی، مرکزی سیکریٹری امور تنظیم سازی مہدی عابدی،مرکزی سیکریٹری فلاح وبہبود علامہ باقر عباس زیدی، صوبہ سندھ کے سیکریٹری جنرل علامہ مقصودڈومکی،کراچی ڈویژن کے سیکریٹری جنرل میثم عابدی اور دیگر نے مشترکہ تعزیتی بیان میں کہا کہ  برادر زین رضوی اور ان کے اہلِ خانہ کی خدمت میں دلی تعزیت پیش کرتے ہیں اور دعاگو ہیں کہ اللہ رب العزت مرحوم کے درجات بلند اور انکو شہدائے کربلا ؑکے ساتھ محشور فرمائے اور بردار زین رضوی اور انکے اہلِ خانہ کو صبر و استقامت عطا فرمائے۔

واضح رہے کہ مرحوم سید سبطین رضا رضوی گذشتہ ایک ہفتے سے کراچی کے مقامی اسپتال میں انتہائی نگہداشت کے وارڈ میں زیر علاج تھے اور جانبرنا ہو سکے،  مرحوم کی نماز جنازہ مسجد و امام بارگاہ کاروانِ حیدری نیو کراچی سیکٹر 11-D میں ادا کی گئی ، اس موقع پر مرحوم کے اہلِ خانہ سمیت مجلس وحدت مسلمین پاکستان کے مرکزی رہنماؤں علامہ سید باقر زیدی، سید محسن شہریار، کراچی ڈویژن اور ضلع وسطی کے رہنماؤں، کارکنان سمیت دیگر سیاسی و مذہبی جماعتوں کے رہنماؤں اور مومنین کی کثیر تعداد شریک تھی۔

وحدت نیوز(پاراچنار) کرم ایجنسی کے رہنما شبیر ساجدی نے لاہور میں خود کش حملے کی مذمت کرتے ہوئے اسے بزدلانہ اقدام قرار دیا ہے اور حکومت سے خود کش حملوں کے ماسٹر مائنڈ تک رسائی اور اسے بے نقاب کرنے کا مطالبہ کیا ہے۔ پاراچنار میں مجلس وحدت مسلمین کے ہنگامی اجلاس سے خطاب کرتے ہوئے ایم ڈبلیو ایم کرم ایجنسی کے سیکریٹری جنرل شبیر ساجدی نے کہا ہے کہ ملک بھر میں دہشت گردی کے واقعات میں معصوم لوگ نشانہ بن رہے ہیں۔ لاہور خود کش حملے کی مذمت کرتے ہوئے شبیر ساجدی نے واقعے پر افسوس کا اظہار کیا اور اسے بزدلانہ اقدام قرار دیا۔ شبیر ساجدی نے حکومت سے مطالبہ کیا کہ حکومت خود کش حملوں کے ماسٹر مائیڈ تک رسائی حاصل کریں اور انہیں عبرت کا نشان بنائیں۔ شبیر ساجدی نے کہا کہ حکومت دہشت گردوں کے خلاف قدم بڑھائیں، عوام فورسز کے شانہ بشانہ دہشت گردوں کے خلاف لڑیں گے۔