وحدت نیوز(اسلام آباد) مجلس وحدت مسلمین کے مرکزی سیکریٹری اطلاعات سید علی احمر زیدی کی والدہ ماجدہ قضائے الہیٰ سے انتقال کرگئیں، مرحومہ کے انتقال پر ایم ڈبلیوایم کے مرکزی سیکریٹری جنرل علامہ راجہ ناصرعباس جعفری سمیت دیگر مرکزی وصوبائی قائدین کا اظہار افسوس اور تعزیت ، تفصیلات کے مطابق ایم ڈبلیوایم کے مرکزی سیکریٹری اطلاعات سید علی احمر زیدی کی والدہ محترمہ مختصرعلالت کے بعد کراچی کے ایک نجی اسپتال میں داعی اجل کو لبیک کہہ گئیں، مرحومہ کو گذشتہ ہفتے فالج کا عارضہ لاحق ہوا تھا ، ڈاکٹرز نے انہیں بچانے کی بہت کوشش کی مگر وہ جانبرنا ہو سکیں، مرحومہ کی نماز جنازہ امامیہ امام  بارگاہ ایف سائوتھ جعفرطیار ملیر کراچی میں ادا کی گئی جبکہ تدفین وادی حسین ؑ میں عمل میں آئی،اس موقع پر ایم ڈبلیوایم کے مرکزی ڈپٹی سیکریٹری جنرل علامہ سید احمد اقبال رضوی، مرکزی سیکریٹری امور تنظیم سازی سید مہدی عابدی، کراچی ڈویژن اور ضلع ملیر کے رہنما، سیاسی وسماجی شخصیات ، علمائے کرام، پرنٹ والیکٹرونک میڈیا کے نمائندگان، صحافی حضرات سمیت مختف شعبہ ہائے زندگی سے تعلق رکھنےوالے سینکڑوں افراد نے شرکت کی۔

ایم ڈبلیوایم کے مرکزی سیکریٹری جنرل علامہ راجہ ناصرعباس جعفری ، علامہ سید احمد اقبال رضوی، ناصرشیرازی، علامہ اعجازبہشتی، علامہ مختارامامی، علامہ ڈاکٹر یونس حیدری، علامہ شفقت شیرازی، علامہ باقرعباس زیدی، علامہ عبدالخالق اسدی، اسدعباس نقوی، مہدی عابدی ، نثارفیضی، ملک اقرار حسین، صوبائی سیکریٹری جنرل صاحبان بشمول علامہ برکت مطہری، علامہ مبارک موسوی، علامہ مقصودڈومکی، علامہ آغاسید علی رضوی، علامہ اقتدار حسین نقوی، علامہ اقبال بہشتی، علامہ تصور حسین جوادی ودیگر نےمرکزی سیکریٹریٹ سے جاری اپنے مشترکہ تعزیتی پیغام میں کہاہے کہ ہمارے بھائی آقای سید علی احمر زیدی کو اس مشکل گھڑی میں تعزیت اور تسلیت عرض کرتے ہیں، خدا وند متعال مرحومہ کی مغفرت فرمائے،دعا ہے کہ اللہ سبحانہ وتعالیٰ انہیں صبر واستقامت دے ، خدا وندمتعال مرحومہ کی مغفرت فرمائے انہیں قرب اور شفاعت  جناب فاطمتہ الزہراؑ عنایت فرمائے،جملہ پسماندگان کو صبر جمیل عطا فرمائے اور اپنے نا ختم ہونے والے عظیم خزانے سے بہترین نعمتیں انہیں عطا کرے، ، دکھ کی اس گھڑی میں ایم ڈبلیوایم مرحومہ کے اہل خانہ کے غم میں برابر کی شریک ہے۔

وحدت نیوز (اسلام آباد) مجلس وحدت مسلمین پاکستان کے مرکزی سیکرٹری جنرل علامہ راجہ ناصر عباس جعفری نے یوم یکجہتی کشمیر کے موقع پر کہا ہے کہ کشمیر پاکستان کی شہ رگ ہے جس پر کسی بھی ملک کو ہاتھ ڈالنے کی قطعاََ اجازت نہیں دی جائے گی۔ مسئلہ کشمیر کو کشمیری عوام کی امنگوں کے مطابق حل کیا جانا چاہیے۔ مسئلہ کشمیر پر بھارتی ہٹ دھرمی اور مقبوضہ کشمیر میں بڑھتے ہوئے مظالم عالمی امن کے لیے خطرہ ہیں۔ مقبوضہ کشمیر میں انسانی حقوق کی بدترین پامالی پر اقوام عالم کی خاموشی اس حقیقت کی عکاس ہے کہ ان نام نہاد انسانی حقوق کے عالمی ٹھکیداروں کو مسلمانوں کے مسائل سے کوئی غرض نہیں۔ علامہ ناصر عباس نے کہا کہ بھارت کی بڑھتی ہوئی جارحیت اور پاکستانی سرحدوں کی مسلسل خلاف ورزی بھارتی فوج کی بربریت سے دنیا کی نظریں ہٹانے کی کوشش ہے۔ انہوں نے کہا کہ مقبوضہ کشمیر کو بھارت کے غاصبانہ تسلط سے آزاد کرانے کے لیے عالمی قوتوں کو کردار ادا کرنا ہو گا جب تک مسئلہ کشمیر کا پرامن اور کشمیر ی عوام کی امنگوں کے مطابق حل نہیں نکلتا تب تک پورے خطے کی سلامتی کو غیر یقینی صورتحال کا سامنا رہے گا۔ ہندوستانی حکومت مقبوضہ کشمیر میں ریاستی جبر کے ذریعے حق خود ارادیت کی آواز کو دبانا کی کوششوں میں مصروف ہے۔ بنیادی حقوق کے اس استحصال پر اقوام متحدہ کو اپنا کردار ادا کرنے کی ضرورت ہے۔ انہوں نے کہا کہ ہندوستانی وزیراعظم نریندد مودی کی رگوں میں پاکستان دشمنی سرایت کر چکی ہے۔ پاکستان کے خلاف لغوا ور بےبنیاد پروپیگنڈہ کے ذریعے اقوام عالم کو گمراہ کرنے کی خواہش وہ کبھی پوری نہیں کر سکیں گے۔ انہوں نے حکومت سے مطالبہ کیا کہ مسئلہ کشمیر کو عالمی فورمز پر بھرپور انداز سے اٹھایا جائے اور کشمیریوں کی آواز کو ان تک پہنچایا جائے۔

وحدت نیوز (قم) مجلس وحدت مسلمین پاکستان کے مرکزی سیکریٹری جنرل  علامہ راجہ ناصر عباس جعفری نے جمعے و ہفتے کی درمیانی شب بعد از نماز مغربین مسجد مدرسہ حجتیہ قم میں انقلاب اسلامی کی 40 ویں سالگرہ کی مناسبت سے منعقدہ سیمینار سے خطاب کیا۔ اس پروگرام میں علماء کرام، طلاب عزیز اور زائرین کی ایک بڑی تعداد نے شرکت کی۔ سیمینار سے خطاب میں علامہ راجہ ناصر عباس جعفری نے کہا کہ عصر غیبت میں تشیع تین مرحلوں سے گزری ہے۔ محدیثین سے رابطہ، مرجعیت سے رابطہ اور حکومت اسلامی یعنی ولایت فقیہ سے رابطہ۔ ان کا کہنا تھا کہ تیسرا مرحلہ تشیع کی جوانی کا مرحلہ ہے۔ عصر غیبت میں سب سے زیادہ تشیع آج مضبوط ہے، کیونکہ ایک عالم، فقیہ، شجاع، حکیم اور بابصیرت شخصیت کے پاس تشیع کی حکومت ہے۔

 انہوں نے مزید کہا کہ ہمیں ولایت فقیہ کی محوریت میں دو بنیادی ذمہ داریوں کو انجام دینا ہے، نمبر ایک ظلم اور ظالموں کے خاتمے کیلئے کوشش، نمبر دو عدل و قسط کے قیام کی کوشش، تاکہ لیظھرہ علی الدین کل اور یملا اللہ الارض قسطا وعدلا کما ملئت ظلما و جورا کے قرآنی و روائی اصولوں کو عملی جامہ پہنا سکیں اور پوری دنیا میں قسط و عدل کا عملی قیام ہو۔ اس عظیم عالمگیر حکومت کے قیام کے لئے ہمیں پاکستان کے محاذ میں تعلیمی، تربیتی، ثقافتی، اجتماعی و سیاسی سپشلسٹ افراد کی ضرورت ہے، تاکہ مدمقابل ظالم نظام کا تمام تر شعبوں میں راستہ روکے اور صبغۃ اللہ، یعنی الٰہی سوسائٹی کے قیام کی راہ میں ممد ثابت ہو۔

وحدت نیوز (ڈیرہ اسماعیل خان) تکفیری دہشت گردوں کی فائرنگ سے شہید ہونے والےمتولی امام بارگاہ محلہ شاہین مطیع اللہ عرف موتی کی نماز جنازہ  ادا کردی گئی، اس موقع  پر مومنین کا شدید احتجاج تحریک انصاف کی صوبائی حکومت اور ضلعی انتظامیہ کے خلاف شدید نعرے بازی،مجلس وحدت مسلمین کے ضلعی سیکریٹری جنرل علامہ سید غضنفر عباس نقوی  نے شہید مطیع اللہ کی نماز جنازہ کے موقع پر احتجاجی مظاہرے سے خطاب کرتے ہوئے صوبائی حکومت اور ضلعی سکیورٹی اداروں کو شدید تنقید کا نشانہ بنایا۔

 انہوں نے کہا کہ ڈیرہ میں شیعہ ٹارگٹ کلنگ میں تیزی حکومت اور قانون نافذ کرنے والے اداروں کی ناکامی کا منہ بولتا ثبوت ہے، شہید مطیع اللہ کے قاتلوں نے دن دھاڑے بھرے بازار میں انہیں نشانہ بنایا جس کا ثبوت سی سی ٹی وی فوٹیج میں واضح موجود ہے اور قاتل بھی قابل شناخت ہیں لیکن تاحال کسی دہشت گرد کی گرفتاری عمل میں نہیں لائی گئی، انہوں نے تحریک انصاف کے چیئرمین عمران خان ، وزیر اعلیٰ پرویز خٹک اور آئی جی خیبر پختونخوا سے مطالبہ کیا کہ شہید مطیع اللہ سمیت تمام شیعہ مقتولوں کے قاتلوں کو فوری طور پر گرفتار کرکے قرار واقعی سزادی جائے۔

دوسری جانب انہوں نے ڈیرہ اسماعیل خان سے بے گناہ شیعہ جوانوں کی بلاجواز جبری گمشدگی پر بھی شدید تشویش کا اظہار کیا ، انہوں نے کہا کہ چیف جسٹس آف پاکستان اور آرمی چیف ڈیرہ اسماعیل خان میں شیعہ نسل کشی اور شیعہ جوانوں کے اغواءکا فوری نوٹس لیں ، ریاستی اداروں کا ملت جعفریہ کے ساتھ ظالمانہ رویہ ناقابل برداشت ہے ، شہید بھی ہمارے جوان ہورہے ہیں اور اسیر بھی ہمارے ہی جوانوں کو بنایا جارہاہے ، اگر صورت حال تبدیل نا ہوئی تو جلد ملک بھر میں احتجاج کا نا ختم ہونے والا سلسلہ شروع ہو جائے گا،شہید کی نماز جنازہ شیعہ علماءکونسل کے مرکزی رہنما علامہ رمضان توقیر کی زیر اقتداء ادا کی گئی اور شہید کو آہوں اورسسکیوں میں سپرد خاک کردیا گیا۔

وحدت نیوز (ملتان) مجلس وحدت مسلمین جنوبی پنجاب کے سیکرٹری جنرل علامہ اقتدار حسین نقوی کے ماموں سید ارشاد حسین گیلانی جو کہ گزشتہ روز انتقال کر گئے تھے اُن کا نماز جنازہ جامع مسجد الحسین نیو ملتان میں علامہ قاضی شبیر حسین علوی کی اقتداء میں ادا کر دیا گیا، نمازجنازہ میں اہل علاقہ اور عمائدین شہر کی بڑی تعداد نے شرکت کی، نمازجنازہ میں علامہ اقتدار حسین نقوی، علامہ قاضی نادر حسین علوی، مولانا عمران ظفر، مولانا ہادی حسین ہادی، مولانا ممتاز حسین ساجدی، دربار حضرت شاہ شمس تبریز کے سجادہ نشین مخدوم طارق عباس شمسی، مخدوم ظفر عباس شمسی، سلیم عباس صدیقی، مہر سخاوت علی، سید دلاور عباس زیدی، سید وسیم عباس زیدی، حسنین علی بخاری، سید آصف رضا گردیزی، سید احسن رضا گردیزی، ثقلین نقوی اور دیگر نے شرکت کی۔

قبل ازیں مجلس وحدت مسلمین کے مرکزی سیکرٹری جنرل علامہ راجہ ناصر عباس جعفری، علامہ احمد اقبال رضوی، سید ناصر عباس شیرازی، سید اسد عباس نقوی اور دیگر نے علامہ اقتدار نقوی سے اُن کے ماموں کے انتقال پر تعزیت کی، مرحوم کی نماز جنازہ کے بعد میت کو آبائی علاقے شورکوٹ میں دفن کر دیا گیا، مرحوم کی رسم سوئم 5فروری کو شورکوٹ میں ادا کی جائے گی۔

وحدت نیوز (گلگت) خیبر پختونخواہ کے شہر ڈیرہ اسماعیل خان میں مسلسل شیعہ ٹارگٹ کلنگ پر حکومت اور اداروں کی مجرمانہ خاموشی قابل مذمت ہے،مجلس وحدت مسلمین گلگت بلتستان کے ترجمان محمد الیاس صدیقی نے ڈی آئی خان میں شیعہ ٹارگٹ کلنگ پر سخت برہمی کا اظہار کرتے ہوئے کہا ہے کہ کے پی کے حکومت کی نااہلی کی وجہ سے ٹارگٹ کلنگ کے واقعات وقوع پذیر ہورہے ہیں،مجرموں پر آہنی ہاتھ ڈالا جاتا تو ایسے ناخوشگوار واقعات رونما نہ ہوتے۔

انہوں نے کہا کہ مولانا فضل الرحمن کا حلقہ بھی ڈی آئی خان میں پڑتا ہے اور مولانا کا بھی فرض بنتا ہے کہ وہ شیعہ ٹارگٹ کلنگ پر آواز بلند کرتے ویسے تو کے پی کے حکومت کے خلاف سرزنش کا کوئی موقع ہاتھ سے جانے نہیں دیتے اور ایک عرصے سے جاری شیعہ ٹارگٹ کلنگ پر مولانا کی زبان کو تالے لگے ہوئے ہیں۔

انہوں نے کہا کہ کمزور اور غریب کے لئے ملک میں قانون اور ہے اور بڑے لوگوں کے قانون اور ہے.قانون کے دوہرے معیارات نے ملک کو سنگین خطرات سے دوچار کردیا ہے.کراچی میں ہزاروں لوگ قتل ہوئے لیکن کوئی سوموٹو نہیں لیا گیا اور مخصوص افراد جب نشانہ بنتے ہیں تو ساری حکومتی مشینری اور ادارے حرکت میں آتے ہیں.انہوں نے کہا کہ ملک میں کراچی سے کوٹئہ اور گلگت بلتستان تک ہزاروں کی تعداد میں شیعوں کو نشانہ بنایا گیا اور چن چن کر ڈاکٹرز،انجینئرز،صحافی،پروفیسرز کو ٹارگٹ کلنگ کا نشانہ بنایا گیا لیکن کسی کے سر میں جوں تک نہیں رینگی اور نتیجتا شیعوں کا خون ارزاں سمجھا گیا۔

انہوں نے حکومت کو خاص طور پر کے پی کے حکومت کو متنبہ کیا کہ ڈی آئی خان میں بیگناہ لوگوں کے خون سے ہولی کھیلنے والے سفاک مجرموں کو قانون کی گرفت میں نہ لایا گیا تو اس کے بھیانک نتائج برآمد ہونگے لہذا قانون سب کیلئے برابر ہے اور کسی بھی انسان کی زندگی کو نقصان پہنچانے والے درندے رحم کے قابل نہیں۔