وحدت نیوز ( کوئٹہ) مجلس وحدت مسلمین پاکستان کے رہنماء علامہ ہاشم موسوی نے قوم سے اپیل کی ہے کہ وہ خانوادہ شہدا اور سیلاب متاثرین کو عید کے موقع پر فراموش نہ کریں اور ان سے اظہار یکجہتی کیلئے عید سادگی سے منائیں۔انہوں نے کہا ہے کہ پورے ملک بالخصوص بلوچستان مختلف آفات اور مشکلات کی ذد میں ہے لہذاً عوام کو دانشمندی ،صبر ،جرات اور سادگی کا مظاہر ہ کرنے کی ضرورت ہے ۔

انہوں نے کہا کہ ملت تشیع بالخصوص مشکلات کے ذد میں ہے کیونکہ ایک طرف سے وہ بزدل اور پیسہ پرست تکفیری دہشتگردوں سے نبردآزمائیں جو چھپ کر وار کرتے ہیں اور دوسری طرف سے وہ اپنے اندر چھپے ہوئے نسل پرست اور فاشسٹ دشمنوں سے نمٹ رہے ہیں جو منافقت کے لبادے میں دوست بنکر در اصل دشمنوں کے ایجنٹ ہیں۔انہوں نے عید کے دن حکومت سے سیکورٹی سخت کرنے کا مطالبہ کرتے ہوئے عوام سے بیدار رہنے کی اپیل کی ہے ۔

وحدت نیوز (لاہور)  شام میں مزارات مقدسہ پر حملوں اور پاکستان میں دہشتگردی کے واقعات کے پیش نظر لاہور کے اہل تشیع عیدالفطر انتہائی سادگی سے منائیں گے۔ اس حوالے سے مجلس وحدت مسلمین پنجاب کے سیکرٹری جنرل علامہ عبدالخالق اسدی نے ’’اسلام ٹائمز‘‘ سے ٹیلی فونک گفتگو کرتے ہوئے کہا کہ نواسی رسول حضرت بی زینب سلام اللہ علیہا اور اصحاب رسول رضی اللہ تعالٰی عنہ کے مزارات پر حملوں اور بے حرمتی سے ملت اسلامیہ کے دل رنجیدہ ہیں۔

انہوں نے کہا کہ امسال ان واقعات کے پیش نظر ہی عیدالفطر سادگی سے منائی جائیگی اور نماز عید کے بعد احتجاجی مظاہرے کئے جائیں گے۔ انہوں نے کہا کہ لاہور میں کربلا گامے شاہ اور ناصر باغ کے باہر بڑے مظاہرے ہونگے، جن کی قیادت شیعہ رہنما الحاج حیدر علی مرزا کرینگے۔ انہوں نے کہا کہ دہشت گردی کی لہر پنجاب میں پہنچ گئی ہے، گذشتہ ہفتے رحیم یار خان میں 2 شیعہ افراد اور 2 ہی سرگودھا میں قتل کئے گئے جبکہ سید شاکر علی رضوی، ڈاکٹر شبہیہ الحسن ہاشمی، ڈاکٹر علی حیدر اور انکے بیٹے مرتضٰی حیدر کے قاتل تاحال گرفتار نہیں ہوسکے۔

علامہ اسدی نے کہا کہ عیدالفطر کے اجتماعات کے بعد پورے پنجاب میں مظاہرے کئے جائیں گے، جن کے شرکاء شام میں امریکی مداخلت کی مذمت میں احتجاجی مظاہرے کریں گے۔ انہوں نے کہا کہ مجلس وحدت مسلمین نے پنجاب بھر میں اپنے یونٹس کو سرکلر جاری کر دیا ہے جس میں مظاہروں کی ہدایت کی گئی ہے۔ علامہ اسدی نے کہا کہ حکومت دہشت گردی کے خلاف سنجیدہ اقدامات کرے، بصورت دیگر اقتدار سے باہر ہونے کیلئے تیار ہو جائے۔ انہوں نے کہا کہ نئی حکومت سے عوام کو جو توقعات تھیں وہ پوری نہیں ہوئیں اور عوام مایوس ہونا شروع ہوگئے ہیں، توانائی سمیت کوئی بھی بحران حکومت سے کنٹرول نہیں ہو رہا۔

وحدت نیوز (پشاور) مجلس وحدت مسلمین خیبر پختونخوا کے ڈپٹی سیکرٹری جنرل اور ترجمان علامہ سید عبدالحسین الحسینی نے کہا ہے کہ شہید قائد علامہ سید عارف حسین الحسینی (رہ) کے افکار کو مشعل راہ بنا کر پاکستانی قوم تمام بحرانوں سے نکل سکتی ہے۔ شہید قائد نے حقیقی معنوں میں امام خمینی (رہ) کا روحانی فرزند ہونے کا حق ادا کیا۔ ان خیالات کا اظہار انہوں نے شہید قائد ملت جعفریہ پاکستان علامہ سید عارف الحسینی کی برسی کی مناسبت سے ایم ڈبلیو ایم ضلع پشاور کے زیراہتمام منعقدہ تقریب سے خطاب کرتے ہوئے کیا۔ ان کا کہنا تھا کہ مجلس وحدت مسلمین کو یہ اعزاز ہے کہ قائد شہید کے مشن کو زندہ کیا اور ان کے افکار کو لیکر آگے آئی۔ پاکستان کے حالات کسی صورت بھی اس امر کے متقاضی نہیں کہ ہم ایک دوسرے پر تنقید کریں، اگر کوئی ملک و ملت کیلئے کوئی بہتر اقدام کرتا ہے تو اس کو سراہا جائے اور اگر کوئی کچھ نہیں کرتا تو اس پر تنقید کرنے کی بجائے ہمیں اس اندھیرے میں خود شمع روشن کرکے اپنا فرض ادا کرنا چاہئے۔

انہوں نے کہا کہ پاکستان کے عوام جن بحرانوں میں گھرے ہوئے ہیں، ان کا آسان حل یہی ہے کہ شہید قائد علامہ سید عارف حسین الحسینی (رہ) کے مشن اور افکار کو اپنا لیا جائے، کیونکہ قائد شہید کی شخصیت بے پناہ خصوصیات کی حامل تھی، شہید کے افکار پر عمل پیرا ہوکر پاکستان کو بحرانوں سے نکالا جاسکتا ہے۔ انہوں نے مزید کہا کہ شہید قائد پاکستان میں استعمار دشمنی کی علامت بن گئے تھے، اسی جرم میں انہیں شہید کیا گیا۔ تاہم شہید قائد نے حقیقی معنوں میں امام خمینی (رہ) کا روحانی فرزند ہونے کا حق ادا کیا۔

وحدت نیوز (اسلام آباد) اتحاد بین المسلمین کے عظیم داعی، فرزند امام خمینی، معروف مذہبی رہنماء اور شہید قائد ملت جعفریہ پاکستان علامہ سید عارف حسین الحسینی کی 25 ویں برسی کے موقع پر مجلس وحدت مسلمین پاکستان کے مرکزی سیکریٹری جنرل علامہ راجہ ناصر عباس جعفری کی ہدایت پر ایم ڈبلیو ایم کے تحت ملک کے مختلف اضلاع و یونٹس میں تعزیتی اور دعائیہ تقریبات کے انعقاد کا سلسلہ جاری ہے۔ اس سلسلے میں ایم ڈبلیو ایم کے تحت علامہ سید عارف حسین الحسینی کی برسی کی مناسبت سے مرکزی ملک گیر اجتماع 8 ستمبر کو اسلام آباد میں منعقد ہوگا۔ جس میں پاکستان و بیرون ملک سے شہید علامہ عارف حسین الحسینی کے عقیدت مندان لاکھوں کی تعداد میں شرکت کرینگے۔ اس حوالے سے مرکزی سیکریٹری امور فرہنگ علامہ اعجاز حسین بہشتی کی سربراہی میں کمیٹیاں بھی قائم کر دی گئیں، جو برسی کے امور کو دیکھیں گی۔ واضح رہے کہ اس سے قبل یہ پروگرام 25 اگست کو منعقد کیا جانا تھا تاہم مرکزی کابینہ کے اجلاس میں اس پروگرام کی تاریخ میں تبدیلی کی گئی ہے اور اب یہ پروگرام مقررہ تاریخ پر پوری شان و شوکت کے ساتھ منعقد ہوگا۔