وحدت نیوز (کوئٹہ) مجلس وحدت مسلمین کوئٹہ ڈویژن کے میڈیا سیل سے جاری کردہ بیان میں کونسلر رجب علی نے کہا ہے کہ سارے نظام پر نگاہ ڈالتے ہیں تو انسان، عام شہری اور جمہور اس نظام میں کہیں بھی نظر نہیں آتے، یوں لگتا ہے جیسے اس جمہوریت کے فریم سے جمہور غائب ہے اور باقی ریت ہی ریت ہے۔ حکومت کی کسی پالیسی ، منصوبہ بندی اور مستقل بینی میں بنیادی اکائی یعنی انسان، عام شہری اولین ترجیح نظر نہیں آتا ۔ کیا جمہوریت بغیر جمہور مضبوط ہوسکتی ہے۔ کیا کوئی سیاسی نظام عام شہری کو زندگی مہیا کیے بغیر پھل پھول سکتے ہیں، انسان کو زندہ رہنے کے لیے کچھ بنیادی ضروریات کی ضرورت ہوتی ہے۔ اگر وہ ضروریات حکومتی ترجیح نہ ہوں تو زندگی مشکل ہوجاتی ہے اور پھر زندگی کا وہی حشر ہوتا ہے، جوکراچی میں ہوا۔ گرمی کی لہر چلی ، آسمان سے آگ برسی، جب زمین و آسمان دونوں تندور بن گئے تو زندہ رہنے کے لیے بجلی ، پانی کی ضرورت تھی حکومتی سائباں اور سائے کی ضرورت تھی ۔ جب دونوں ضروریات مہیا نہ ہوئیں تو انسان مرنے لگے یوں جیسے خزاں میں درختوں کے پتے گرتے ہیں۔ لوگ گرمی لگنے سے سٹرکوں پر تڑپ تڑپ کر مر گئے، جو سائے، ہوا اور پنکھے کی تلاش میں سرگرداں زندگی کی بازی ہار گئے۔ یہ غریب، بے سہارا اور محروم طبقوں کے نمائندے تھے ۔ امرا نے لوڈ شیڈنگ ہوئی تو جنریٹر چلا لیے ، ائیر کنڈیشنر آن کر لیے اور ٹھنڈے مشروبات سے گرمی کو شکست دینے میں کامیاب ہوئے۔کراچی پر گزرنے والے اس سانحے میں ریاست مکمل طور ناکام نظر آئی۔ اس بات سے کسی کو غرض نہیں ہے کہ ہنگامی صورتحال سے نمٹنے کی ذمہ داری وفاقی حکومت کی تھی یا صوبائی حکومت کی لوگ مجموعی طور پر اسے ریاست کی ناکامی تعبیر کررہے ہیں۔

وحدت نیوز (لاہور) مجلس وحدت مسلمین لاہور کے سیکرٹری جنرل علامہ امتیاز کاظمی کا کہنا ہے کہ سانحہ ماڈل ٹاؤن نواز حکومت کے ظلم و بربریت کی بدترین مثال ہے۔انہوں نے کہا کہ جمہوریت کا لبادہ اوڑھے شریف برادران سے بڑا آمر اس ملک میں کوئی نہیں ہے جس کے اشاروں پر نہتے لوگوں کو گولیوں سے چھلنی کردیا جاتا ہے ،اور ظلم و بربریت کے مجرم کو انعام میں دوبارہ وزارت کی کرسی پر بٹھا دیا گیاہے مجلس وحدت مسلمین شالیمار ٹاوُن کے عہدیداران کے تقریب حلف برداری سے خطاب میں علامہ امتیاز کاظمی کا کہنا تھا کہ مسلم لیگ ن کے اقدامات اس کا گھیرہ تنگ کر رہے ہیں وہ وقت دور نہیں ہے کہ جب ان ظالم حکمران کے خلاف عوام گھروں سے ایک بار پھر باہر نکلے گی انہوں نے کہاکہ فوری طورپر متاثرہ افراد کی رضامندی کو مد نظر رکھتے ہوئے نئی جے آئی ٹی تشکیل دی جائے جو کہ صاف شفاف تحقیقات کرکے سانحہ ماڈل ٹاؤن کے ذمہ داران کو بے نقاب کرے۔ انہوں نے کہا کہ مجلس وحدت مسلمین نے ہمیشہ مظلوموں کے ساتھ مل کر ظالم کے خلاف آواز بلند کی ہے آج بھی وہ پاکستان عوامی تحریک کے صاف شفاف تحقیقات کے موقف کی حمایت کرتے ہیں، موجودہ بے حس حکومت سے عوام کو انصاف کی کوئی توقع نہیں ہے تاہم وہ اپنی جدوجہد جاری رکھیں گے اور وہ وقت ضرور آئے گا جب ظالم اپنے منطقی انجام تک پہنچیں گے۔

وحدت نیوز (لاہور) مجلس وحدت مسلمین پنجاب کے سیکرٹری جنرل علامہ عبدالخالق اسدی کا کہنا ہے کہ کویت میں فقہ جعفریہ سے تعلق رکھنے والے افراد کی مسجد میں ایک سعودی شہری نے خود کش حملہ کیا جس کی ذمہ داری داعش کی جانب سے قبول کی، اس خود کش حملہ کا مقصد کویت میں شیعہ سنی مسلمانوں کے درمیان دوریاں پیدا کرنا تھا مگر وہاں کے عوام میں نہایت مثبت رد عمل دیکھنے میں آرہا ہے، کویتی عوام کی جانب سے ہر سطح پر اس واقعہ کی نا صرف شدید مذمت کی جارہی ہے بلکہ اس خود کش حملہ کو کسی ایک فرقہ کے افراد پر نہیں بلکہ اسلام پر حملہ قرار دیا گیا ،جنوبی پنجاب کے عہدیداران کے اجلاس سے خطاب کرتے ہوئے علامہ اسدی کا کہنا تھا کہ اس وقت سماجی ویب سائٹس اور گلی بازاروں میں نہ صرف اس واقعہ کے خلاف شدید رد عمل دیکھنے میں آرہاہے بلکہ شیعہ سنی عوامکی جانب سے عملی اقدامات بھی سامنے آرہے ہیں اور خون کے عطیات دیے جارہے ہیں،انہوں نے کہا کہ شدت پسندوں کے خلاف متحد ہونا نہایت اہم ہے جس کی حالیہ مثال کویت میں دیکھنے کو مل رہی ہے۔ انہوں نے اس بات پر بھی زور دیا کہ خود کش حملہ آور کا سعودی شہری ہونے نے ایک بار پھر سعودیہ عرب میںدیگر مکاتب فکر کے خلاف بڑھتی ہوئی نفرت پر سوالیہ نشان کھڑا کردیا ہے، آل سعودکو اپنی پالیسیوں پر نظر ثانی کرنے کی ضرورت ہے جن کے باعث اس وقت مسلمانو ں کا پوری دنیا میں پانی کی طرح خون بہایا جارہا ہے، انہوں نے کہا کہ وقت آگیا ہے کہ ان شدت پسندوں کا مقابلہ کرنے کے لئے تمام اختلافات کو بالائے طاق رکھ کر جدوجہد کی جائے ورنہ کوئی بھی ان کے شر سے محفوظ نہیں رہے گا۔

وحدت نیوز (لاہور) مرکزی ڈپٹی کوآرڈینیٹرایم ڈبلیوایم شعبہ خواتین خواہر تحسین شیرازی نے مرکزی سیکریٹریٹ سے جاری اپنے ایک بیان میں کہا کہ  ماہ مبارک رمضان روز جمعہ امریکی و سلفی اسلام کے پیروکاروں کا حالت سجدہ میں اسلام ناب محمدی کے پیروکاروں کو خون میں نہلا دینے کا عمل جہاں داعش،القاعدہ کی بربریت پر مبنی سوچ کا مظہر ہے وہاں پوری ملت اسلامیہ کو باطل و حقیقی اسلام مخالف قوتوں کے خلاف یکجا کردینے کا باعث بنا ہے جس کا حقیقی مظاہرہ سنی و شیعہ کو یت کے مسلمانوں نے عملی یکجہتی کا اظہا رکر کے کیااسلام کا نقاب اوڑھے اسلام مخالف قوتوں کو صرف اور صرف ملت اسلامیہ اتحاد اور شجاعت کی قوت سے لیس ہو کر ختم کر سکتی ہے ۔سجدوں میں خون میں نہانا سنت شبیری و حیدری ہے یہ جذبوں کو تو انا تر کر سکتی ہے کم نہیں شہداء کویت یقیناً بلند مقام پر فائز ہوں گے اور ان کے خانوادگان ہمارے لئے باعث برکت ہیں۔کویت کے مظلوم شیعہ نمازیوں کا خون مسلمانوں کی بیداری اور داعش کی نابودی کا باعث بنے گا۔

وحدت نیوز (گلگت) گلگت  کے ایک غریب اور متوسط گھرانے سے تعلق رکھنے والی بی بی سلیمہ مجلس وحدت مسلمین کےپلیٹ فارم سے رکن صوبائی اسمبلی نامزد ہونے والی پہلی خاتون قرار پائی ہیں، گلگت بلتستان قانون ساز اسمبلی میں ایم ڈبلیوایم کے اراکین کی مجموعی تعداد 3ہو گئی،بی بی سلیمہ انتہائی ہونہار، قابل خاتون  ہو نے کے ساتھ ساتھ انتہائی غریب گھرانے سے تعلق رکھتی ہیں ، جن کے ممبر اسمبلی بننے سے ایم ڈبلیوایم نے ثابت کردیاکہ الہیٰ جماعت میں منصب ، شہرت اور دولت نہیں بلکہ کردار ، سیرت اور قابلت اہمیت کی حامل ہوتی ہے۔

وحدت نیوز (کراچی) کمشنرکراچی ڈویژن شعیب احمد صدیقی نے مجلس وحدت مسلمین کراچی ڈویژن کی دعوت پرجعفرطیار سوسائٹی کا ہنگامی دورہ کیا، اس موقع پر ایم ڈبلیوایم ضلع ملیر کے سیکریٹری جنرل اور فوکل پرسن  احسن عباس رضوی ، ایم ڈبلیوایم کے دیگر رہنما ثمر عباس ،آصف نقوی، اسدزیدی، عارف زیدی ودیگر موجود تھے، رہنماوں نے کمشنر کراچی کو جعفرطیا رسوسائٹی کو درپیش صفائی ستہرائی اور سیوریج کے ناقص انتظامات کے حوالے سے آگاہ کیا،احسن عباس کا کہنا تھاجعفرطیار سوسائٹی سمیت ملیر کی مختلف آبادیاں گٹرکے گندے بدبو دار پانی میں گھری ہوئی ہیں ، ماہ مبارک رمضان میں نمازی حضرات کو سیوریج کے گندے پانی کے سبب مساجد آنے جانے میں شدید مشکلات کا سامنا ہے، انہوں نے کہا کہ ایام شہادت حضرت علی ؑنزدیک ہیں گلی گلی مجالس و جلوس کا انعقاد ہوگا لیکن صفائی ستہرائی کے انتظامات بلکل ناقص ہیں ،گلی گلی کوچہ کوچہ سیوریج کا گندا پانی کھڑا ہے، واٹر بورڈ انتظامیہ اہلیان جعفرطیار کو پاکستان کا شہری ہی تسلیم نہیں کرتی،پچاس ہزار سے زائد نفوس پر مشتمل آبادی کے سیوریج کے پانی کی نکاسی کیلئےتین ماہ میں ایک بار واٹر بورڈ انتطامیہ سیکشن وراڈنگ مشین کا ایک پیئرپھیج کراحسان جتاتی ہے۔

احسن عباس کا مزید کہنا تھا کہ  شیش محل تا ملیر پندرہ کھڑےسیوریج کے گندے پانی کے باعث مقامی تاجر کاروبار بند کرکے جانے پر مجبور ہوگئے لیکن اہلیان جعفرطیار اپنے گھر بار چھوڑ کر نہیں جائیں بلکہ سڑکوں پر نکلیں گے اور اپنا جائز حق چھین کر لیں گے،احسن عباس نے ملیر میں بجلی کی غیر منصافہ لوڈشیڈنگ پر بھی تشویش کا اظہار کیااور کہا کہ سترفیصدبلنگ کے باوجودملیر اور جعفرطیار کے عوام پرساڑھے سات گھنٹے کی شیڈول اور دو گھنٹے کی بغیر شیڈول لوڈشیڈنگ کی صورت میں  کے الیکٹرک کاظلم جاری ہے ، جس پر کمشنر کراچی شعیب احمد صدیقی نے متعلقہ حکام پر سخت برہمی کا اظہار کیا، انہوں نے کے الیکٹرک ،واٹر بورڈ، ڈی ایم سی اور کےایم سی کے متعلقہ حکام کوہدایات جاری کیں کے اہل علاقہ کو درپیش مشکلات کیلئے فوری وموثراقدامات کیئے جائیں اور سیوریج کے پانی کی نکاسی کا مستقل حل تلاش کرکے کام کا آغا زکیا جائے۔