وحدت نیوز (لاہور) مہنگائی ،بے روزگاری ،گرمی اور لوڈشیڈنگ کے ستائے عوام پروفاقی حکمرانوں کی جانب سے بجلی کی قیمتوں میں اضافہ کرنا سراسر ظلم ہے،ن لیگ کی حکومت آئی ایم ایف کی خوشنودی کے لئے کچھ بھی کر گذرنے کو تیار نظر آتی ہے،کاروباری لوگ ملک کو نہیں چلاسکتے،عوام بجلی کی عدم دستیابی سے لقمہ اجل بن رہی ہے،ایسے میں بجلی کی قیمتوں میں اضافہ کرکے غریبوں کے زخموں پر نمک پاشی کی ہے،ان خیالات کا اظہار مجلس وحدت مسلمین پنجاب کے سیکرٹری جنرل علامہ عبدالخالق اسدی نے لاہور میں افطار ڈنر سے خطاب کرتے ہوئے کیا انہوں نے کہا کہ ہم آئی ایم ایف اور ورلڈ بنک کی خوشنودی کے لئے حکومتی اداروں کی نجی کاری اور ہزاروں مزدورں کے معاشی قتل عام کی اجازت نہیں دینگے،زرعی،معدنی،آبی،اور ہر طرح سے قدرتی وسائل سے مالا مال پاکستان کو نا اہل اور کرپٹ حکمرانوں نے اپنے مفادات کے لئے برباد کر کے رکھ دیا ہے،شریف برادران اور زرداری ٹولہ ایک ہی سکے کے دو رخ ہیں،جب تک ان دونوں خاندانوں کے خلاف بے رحمانہ احتساب نہیں ہوتے ،ملک سے کرپشن اور ناانصافی کا خاتمہ ناممکن ہے،پاکستانی عوام اب اس دو خاندانوں کی سیاست سے تنگ آچکی ہے،ان کرپٹ حکمرانوں کے خلاف کاروائی نہ ہوئی تو خونی انقلاب کو کوئی روک نہیں سکے گا۔

وحدت نیوز (مظفرآباد) مجلس وحدت مسلمین دیگر ملی تنظیمات کے ساتھ ملکر آمد جمعہ کو یوم القدس کے طور پر منائے گی، فلسطینی عوام سے اظہار یکجہتی کے لیئے بعد از نماز جمعہ ریلیز کا انعقاد کیا جائے گا، اس یوم القدس کے موقع پر کشمیر ،یمن اور برما کے مظلوم مسلمانوں سے بھی اظہار یکجہتی کیا جائے گا۔ ان خیالات کا اظہار ریاستی سیکرٹری جنرل مجلس وحدت مسلمین پاکستان آزاد جموں و کشمیر علامہ سید تصور حسین نقوی الجوادی نے وحدت ہاوس مظفرآباد میں کابینہ کے اجلاس سے خطاب کے دوران کیا ، انہوں کہا کہ مجلس وحدت مسلمین ہر سال کی طرح اس سال بھی 22رمضان المبارک کو یوم القدس بھرپور جوش کو خروش سے منائے گی، فلسطین کا مسئلہ اسلامی مسئلہ ہے، قبلہ اول کی آزادی تک ہم مظلوم و محکوم فلسطینی عوام کے حق میں آواز بلند کرتے رہیں گے، سڑکوں پر آکر مردہ باد امریکہ و نامنظور نامنظور اسرائیل نامنظور کے نعرے لگاتے رہیں گے، عوام سے اپیل ہے کہ ریلیز میں بھرپور شرکت کرتے ہوئے اپنا شرعی فریضہ ادا کریں ، ہر پیر و جوان ظلم کے خلاف آواز بلند کرتے ہوئے اتحاد و یگانگت کا مظاہرہ کرے ۔قبلہ اول صہیونی طاقتوں کے قبضے میں ہے ، اس کی آزادی کے لیئے جو جسطرح سے کردار ادا کر سکتا ہے کرے۔مسلم حکمراں ہر اس امر پر خاموش ہوتا ہے جہاں مظلوم مسلمان ظلم کی چکی میں پس رہا ہو۔ اپنے اقتدار کی خاطر تو ہر قدم آگے بڑھنے کو تیار ہوتا ہے ، قبلہ اول کی آزادی کے لیئے اگر مسلم ممالک متحد ہو جائیں تو ہر گز اسرائیل کا قبضہ برقرار نہیں رہ سکتا، بلکہ اسرائیل کا ناپاک وجود بھی دنیا کے نقشے سے ختم ہو جائے گا۔ علامہ تصور جوادی نے کہا کہ اس مرتبہ یوم قدس مقبوضہ کشمیر، برما و یمن کی مظلوم عوام کے ساتھ بھی یکجہتی کے لیئے منایا جائے گا۔ مسلم حکمرانوں کے مردہ ضمیروں کو للکارا جائے گا۔ اسرائیلی و امریکی پرچم نذر آتش کیئے جائیں گے انہوں نے مذید کہا کہ تمام ضلعی ہیڈاکوارٹرز میں بعد از نماز جمعہ ریلی کا انعقاد کیا جائے گا جبکہ بعض اضلاع میں دو دو جگہوں سے ریلیز کا اہتمام کیا جائے گا۔ مظفرآباد میں بھی مرکزی ریلی زیر اہتمام آئی ایس او آزاد کشمیر کے زیر اہتمام مرکزی امام بارگاہ سے نکالی جائے گی ، جو عزیز چوک پر اختتام پذیر ہو گی، جہا ں قائدین خطاب کریں گے۔

وحدت نیوز (لاہور) رہنما مجلس وحدت مسلمین پنجاب علامہ حسن ہمدانی نے کہا ہے کہ داعش کی حماس کو حالیہ دھمکی اسرائیل کے ایماء پر گیدڑ بھبھکی کے سوا کچھ نہیں۔ حماس کی تاریخ شہداء کے مقدس خون سے سنہری حروف میں تحریر ہے۔ حماس نے آج تک اپنے کلمہ گو بھائیوں کو زندہ جلایا اور نہ ہی اولیاء خدا کے مزارات کو منہدم کیا۔ مسلمان بہنوں کی حرمت کو پامال کیا اور نہ ہی کعبہ کو گرانے کی دھمکی دی۔ شعائر اسلام کی حرمت کو پامال کرنے جیسے قبیح افعال کبھی انجام نہیں دیئے۔ دنیا کے کروڑوں افراد نہ صرف حماس کے لئے دعاگو ہیں بلکہ آزادی القدس کے لئے ان پر نظر رکھے ہوئے ہیں۔ حماس کی اسرائیل کے خلاف حالیہ مقاومت حماس کی خدا کے لئے قیام کی زندہ تصویر ہے، جس میں انہوں نے دشمن کے دانت کھٹے کئے۔ اس جمعۃ الوداع کو پوری دنیا کے غیرت مند مسلمان سڑکوں پر آکر القدس کی آزادی اور حماس کی حمایت میں امریکہ و اسرائیل اور ان کے لے پالک سعودی عرب کے پٹھو داعش، طالبان، النصرہ اور القاعدہ جیسوں سے اظہار برائت کرکے اپنے خدا کی رضائیں حاصل کریں گے۔

وحدت نیوز (ملتان) مجلس وحدت مسلمین پنجاب کے رہنما علامہ سید اقتدار حسین نقوی نے کہا ہے کہ اسرائیل عالم اسلام کے لئے ایک ناسور کی شکل اختیار کرتا جا رہا ہے، گذشتہ روز امدادی جہازوں کو روک کر امدادی اشیاء کو غزہ کے محصورین تک نہیں جانے دیا گیا، جو کہ عالمی قوانین کی سراسر خلاف ورزی ہے۔ لیکن اقوام عالم، اقوام متحدہ اور او آئی سی خاموش تماشائی کا کردار ادا کر رہے ہیں۔ ان خیالات کا اظہار اُنہوں نے محلہ طوطل میں کارکنان سے خطاب کرتے ہوئے کیا۔ اس موقع پر مجلس وحدت مسلمین کے دیگر رہنما اور کارکنان بھی موجود تھے۔ علامہ اقتدار نقوی نے کہا کہ یوم القدس کے موقع پر ہر مسلمان کو چاہیے کہ اپنا فرض اولین سمجھتے ہوئے قبلہ اول کی آزادی کے لئے باہر نکلے۔ اُنہوں نے اہل ملتان سے اپیل کی کہ یوم القدس کے موقع پر امام بارگاہ شاہ یوسف گردیز سے چوک گھنٹہ گھر تک نکالی جانے والی ریلی میں بھرپور شرکت کریں۔

وحدت نیوز (اسلام آباد) مجلس وحدت مسلمین پاکستان کے مرکزی جنرل سیکریٹری علامہ راجہ ناصر عباس جعفری نے کوئٹہ میں ہزارہ شیعہ قبیلے کے تین افراد کوفائرنگ کر کے شہید کرنے کے واقعہ پر شدید غم و غصے کا اظہارکرتے ہوئے کہا ہے کہ کوئٹہ میں ایک بار پھر شیعہ ٹارگٹ کلنگ کے واقعات میں اضافہ ہونا شروع ہو گیا ہے۔حکومت بلوچستان میں شر پسندی کے واقعات کو سنجیدہ نہیں لے رہی یہی وجہ ہے کالعدم تنظیموں نے اس علاقے کو اپنی محفوظ پناہ گاہ بنا رکھا ہے اور جب ان دہشت گرد عناصر کا جی چاہتا ہے بے گناہ انسانی جانوں کے ساتھ خون کی ہولی کھیل کر دندناتے ہوئے روپوش ہو جاتے ہیں جبکہ ایف سی میں موجود کالی بھیڑیں کوئٹہ میں جاری شیعہ نسل میں ملوث ہیں،۔حکومت کی مسلسل بے حسی ملت تشیع کے اضطراب میں اضافے کا باعث بن رہی ہے۔اگر ملت تشیع کے پانچ کروڑ شیعہ سڑکوں پر نکل آئے تو پھر حکومت کا اقتدار میں رہنا ممکن نہیں رہے گا۔ ۔ہم بارہا مطالبہ کر چکے ہیں کہ بلوچستان میں بھرپور فوجی آپریشن کر کے دہشت گردوں کی کمین گاہوں کو ملیا میٹ کیا جائے لیکن حکومت مسلسل پس وپیش سے کام لے رہی ہے۔جو حکومتی کمزوری ہے یا پھر کسی سیاسی مصلحت کا تقاضہ ہے،ریاستی ادارے کوئٹہ میں جاری شیعہ ٹارگٹ کلنگ میں برابر کے ذمہ دار ہیں،ہمیں کسی صورت گوارہ نہیں کہ بے گناہ انسانی جانوں کو سیاسی مقاصد کی بھینٹ چڑھایا جائے۔ہم وفاقی حکومت سے مطالبہ کرتے ہیں کہ بلوچستان میں ضرب عضب کی طرز کو فوجی آپریشن بلاتاخیر شروع کیا جائے جو آخری دہشت گرد کے خاتمے تک جاری رہے۔ علامہ راجہ ناصر نے شہدا کے خاندانوں سے اظہار تعزیت کرتے ہوئے شہدا کی بلندی درجات اور پسماندگان کے لیے صبر جمیل کی دعا کی ہے۔

وحدت نیوز (لاہور) مجلس وحدت مسلمین لاہور کی ضلعی شوریٰ کا اجلاس، اجلاس کی صدارت سیکرٹری جنرل مجلس وحدت مسلمین لاہور علامہ امتیاز کاظمی نے کی۔ اجلاس میں لاہور کے ستر سے زائد یونٹس کے سیکرٹری جنرلز اور ڈپٹی سیکرٹری جنرلز سمیت مبصر اراکین نے شرکت کی۔ امامیہ مسجد سمن آباد میں منعقدہ اجلاس میں بلدیاتی الیکشن میں بھرپور حصہ لینے کے فیصلے کے ساتھ کسی بھی جماعت سے اتحاد یا الائنس بنانے کا اختیار پولیٹکل سیل کو دے دیا گیا۔ لاہور میں یوم علیؑ کے جلوس اور یوم القدس کی ریلی کی فول پروف سکیورٹی کا مطالبہ کیا گیا، کسی بھی ناخوشگوار واقعے سے بچنے کے لئے چھوٹی تنظیموں کو مرکزی ریلی القدس اسلام پورہ تا اسمبلی ہال تک میں شرکت کرنے کی ہدایت کی گئی۔ اجلاس کے آخری سیشن میں مرکزی رہنما مجلس وحدت مسلمین سید ناصر شیرازی نے خصوصی خطاب کیا۔ انہوں نے اپنے خطاب میں کہا کہ بلدیاتی الیکشن میں بھرپور حصہ لیں گے، نون لیگ ہمارے خلاف انتقامی کارروائیوں میں مصروف ہے، گلگت بلتستان میں ہمارے مینڈیٹ پر شب خون مارا گیا، حکمرانوں کی نااہلی کے سبب ملک میں ہر چیز کا بحران ہے۔

انہوں نے کہا کہ دہشت گردی کے خلاف جنگ میں سب سے زیادہ قربانیاں ہم نے دی ہیں اور نیشنل ایکشن پلان کے تحت پاکستان کے پرامن اور دہشت گرد مخالف قوتوں کو نشانہ بنایا جا رہا ہے، پنجاب بھر میں ہمارے پرامن اور محب وطن کارکنان کو ہراساں کیا جا رہا ہے، کالعدم جماعتوں کو پنجاب میں مکمل آزادی حاصل ہے، جنوبی پنجاب ایک اور وزیرستان کی شکل اختیار کرتا جا رہا ہے، جب سے دہشت گردوں کے حامی اور سانحہ ماڈل ٹاوُن کے مرکزی کردار وزیر کو بحال کیا گیا ہے، دہشت گردوں کو پنجاب میں پھر سے پرٹوکول ملنا شروع ہوگیا ہے، سنی اتحاد کونسل کے سربراہ صاحبزادہ حامد رضا پر حملہ اسی سلسلے کی ایک کڑی ہے۔ سید ناصر شیرازی کا کہنا تھا کہ کراچی میں بارہ سو سے زائد اموات کی ذمہ دار وفاقی و صوبائی حکومتیں ہیں، اعلٰی عدالت کراچی کے اس المناک واقعے کے خلاف فوری ایکشن لے اور ذمہ داروں کو قرار واقعی سزا دے، بصورت دیگر عوام خود ان حکمرانوں کا احتساب کرنے نکلیں گے، پاکستانی قوم اب ان لٹیروں کو جان چکی ہے، ان کے اقتدار کا اصل ہدف تجارت کے ذریعے اپنے سرمایہ میں اضافہ کرنا ہے، عوامی بنیادی مسائل سے ان کو کوئی دلچسپی نہیں۔