وحدت نیوز (ملتان) مجلس وحدت مسلمین پنجاب کے ڈپٹی سیکرٹری جنرل علامہ اقتدار حسین نقوی نے پاراچنار میں ہونے والے دھماکے کی شدید الفاظ میں مذمت کرتے ہوئے کہا کہ دو روز پہلے وزیراعظم نے اپنے دورہ پشاور کے دوران اسے پُرامن اور دہشت گردی کے خاتمے کا اعلان کیا لیکن دو روز بعد پاراچنار میں ہونے والے دھماکے نے وفاقی اور صوبائی حکومتوں کے دعوئوں کی قلعی کھول دی ہے۔ ملتان سے جاری پریس ریلیزکے مطابق ایم ڈبلیو ایم پنجاب کے ڈپٹی سیکرٹری جنرل کا کہنا تھا کہ پاراچنار میں ہونے والے حملے کے بعد سیکیورٹی فورسز کو چاہیے کہ ضرب عضب کا دائرہ کرم ایجنسی تک بڑھایا جائے۔ اس موقع پر اُنہوں نے آرمی چیف جنرل راحیل شریف اور چیف جسٹس آف پاکستان سے اس واقعے کا نوٹس لینے کا مطالبہ کیا۔ علامہ اقتدار نقوی نے مزید کہا کہ سانحہ آرمی پبلک سکول کے موقع پر قوم کو ایک اور سانحے سے دوچار کر دیا گیا ہے۔

وحدت نیوز (سکردو) مجلس وحدت مسلمین پاکستان گلگت بلتستان کے ڈپٹی سیکرٹری جنرل علامہ آغا علی رضوی نے پاراچنار میں ہونے والے دہشتگردی کے بہیمانہ حملے کی شدید الفاظ میں مذمت کرتے ہوئے کہا ہے کہ پاراچنار میں افسوسناک دھماکہ قومی ایکشن پلان کے غلط اور سیاسی استعمال کا نتیجہ ہے۔ اگر وفاقی حکومت کی قومی ایکشن پلان کو اسکی روح کے ساتھ نافذ کرنے کی کوشش ہوتی اور اس کو اپنے سیاسی مخالفین کے خلاف استعمال کرنے کی بجائے ملک دشمن عناصر کے خلاف استعمال کیا جاتا تو یہ افسوسناک واقعہ پیش نہیں آتا۔ پاراچنار میں ہونے والا افسوسناک دھماکہ سکیورٹی اداروں اور حکومت کی ناکامی کا بین ثبوت ہے۔ انہوں نے کہا کہ آپریشن ضرب عضب کی راہ میں حال تمام رکاوٹوں کو جب تک دور کرکے آپریشن کو ملک گھیر نہیں کیا جائے گا دہشتگردوں کے خاتمے کا خواب شرمندہ تعبیر نہیں ہوسکتا۔ آپریشن ضرب عضب کی راہ میں سیاسی جماعتوں کے علاوہ ایڈمنسٹریشن میں موجود تکفیری مائنڈسیٹ رکاوٹ ہے۔ انہوں نے کہا کہ آرمی چیف کی جانب سے دہشتگردوں کے ساتھ سہولت کاروں کے خلاف کارروائی کرنے کے اعلان پر ملک گھیر عمل نہیں کیا جاتا، ملک میں دہشتگردی ختم نہیں ہوسکتی۔ دہشتگردی کو ختم کرنے کے لیے ضروری ہے انکی اخلاقی، سیاسی، معاشی اور فکری پشت پناہی کرنے والوں کے لیے پاکستان کی سرزمین تنگ کر دی جائے۔ اس وقت دہشتگردی کے خلاف عوام کی نگاہیں صرف پاکستان آرمی کی طرف اٹھی ہوئی ہیں اور اس عفریت کو پاکستان آرمی ہی ختم کر سکتی ہے، سیاسی جماعتوں میں نہ صرف دہشتگردی ختم کرنے کی صلاحیت نہیں بلکہ یہ سیاسی جماعت کی سیاہ کاریوں کا ہی نتیجہ ہے۔

وحدت نیوز (چنیوٹ) ایم ڈبلیو ایم ضلع چنیوٹ کے زیر اہتمام غریب اور نادار مریضوں کی فلاح و بہبود کے لیے بھوانہ میں فری ڈسپنسری کا آغاز کر دیا گیا ہے۔ اس موقع پر مجلس وحدت مسلمین کے ضلعی سیکریٹری جنرل سید انیس عباس زیدی اور صوبہ پنجاب کے سیاسی مسئول آصف رضا نے افتتاحی تقریب میں شرکت کی اور مجلس وحدت مسلمین ضلع چنیوٹ کے اس اقدام کو سراہا۔ واضح رہے کہ بھوانہ میں قائم کی گئی فری ڈسپنسری میں مذہب اور مسلک کی تفریق کے بغیر نادار مریضوں کے لیے مفت ادویات اور علاج معالجے کی سہولت دستیاب ہے۔

وحدت نیوز (قم) مجلس وحدت مسلمین پاکستان کے مرکزی ڈپٹی سیکرٹری جنرل و سیکرٹری امور خارجہ ڈاکٹر علامہ سید شفقت حسین شیرازی نے نائجیریا میں اسلامک موومنٹ آف نائجیریا کے سربراہ علامہ شیخ ابراہیم زکزکی کے گھر پر حملے ، ان کے نائب سمیت تین سو بے گناہ شہریوں کے قتل عام کی شدید الفاظ میں مذمت کرتے ہوئے کہا کہ نائجیرین حکومت بوکو حرام کے دہشت گردوں کو کنٹرول کرنے سے عاجز ہے، جو بے گناہ انسانیت کا خون بہا رہی ہے اور پرامن وحدت اسلامی کے علمبردراوں کو ظلم کا نشانہ بنایا جا رہا ہے۔علامہ شیخ ابراہم زکزکی کی گرفتاری اور سینکڑو ں حامیوں کے قتل عام پر عالمی اداروں کی خاموشی قابل مذمت ہے ،  ہم اقوام متحدہ اور اسلامی ممالک کے سربراہان سے مطالبہ کرتے ہیں کہ نائجیرین حکومت پر زور ڈالیں، تاکہ بیگناہوں کو قتل ہونےسے بچایا جاسکے۔

 علاوہ ازیں ایم ڈبلیو ایم کے مرکزی رہنما نے نائجیریا میں ہونے والے شہدائے عاشورہ کے چہلم پر نائجیرین فوج کے چڑھاؤ کی مذمت کرتے ہوئے کہا کہ عزاداری امام حسین ؑ پوری دنیا میں امن کا نشان ہے۔

انہوں نے پارا چنار میں ہونے والے دھماکے کی بھی بھرپور مذمت کرتے ہوئے کہا ہے کہ حکومت اپنے سعودی آقاؤں کو خوش کرنے کے لئے دہشت گردوں کو سیاسی پناہ گاہیں مہیا کر رہی ہے۔ جب تک دہشت گردوں کے لئے نرم گوشہ موجود ہے، تب تک اس طرح کے اندوہ ناک واقعات ہوتے رہیں گے۔ ہم شہداء کے لواحقین کے غم میں برابر کے شریک ہیں اور زخمیوں کی جلد صحت یابی کی دعا کرتے ہیں۔

وحدت نیوز (اسلام آباد) مجلس وحدت مسلمین پاکستان کے سربراہ علامہ راجہ ناصرعباس جعفری نے اسلامک موومنٹ آف نائیجیریاکے سربراہ آیت اللہ شیخ ابراہیم زکزکی پر ریاستی جبر وتشدد کی سخت الفاظ میں مذمت کرتے ہوئےکہاکہ نائجیریا کی ہر دل عزیز،داعی اتحادبین المسلمین  اور محترم شخصیت شیخ ابراہیم زکزکی پر مقامی افواج کے حملے ،ان کی بلاجواز گرفتاری اورسینکڑوں حامیوں کا قتل عام انسانی حقوق کی کھلم کھلا خلاف ورزی ہے، فرانس میں دھماکوں پر شور مچانے والی عالمی برادری کانائیجیریامیں انسانیت سوز مظالم پر اف تک نہ کرناقابل مذمت ہے،دہشت گردی کسی بھی صورت میں کسی بھی منطقے میں کسی بھی انسان پر بھی ہوقابل مزمت فعل ہے، اقوام متحدہ اور اوآئی سی نائجیریا میں بڑھتی ہوئی بدامنی اور بے گناہوں کے قتل عام پر فوری نوٹس لیں ۔

وحدت نیوز (اسلام آباد) مجلس وحدت مسلمین پاکستان کے مرکزی جنرل سیکرٹری علامہ راجہ ناصرعباس جعفری نے عید گاہ مارکیٹ پارہ چنار میں ہونے والے دھماکے کی شدید مذمت کرتے ہوئے اس سیکورٹی اداروں کی غفلت قرار دیا ہے۔انہوں نے کہا کہ دہشت گردی کے خلاف جاری ضرب عضب مطلوبہ نتائج حاصل کرنے میں خاطر خواہ کامیابی حاصل نہیں کر سکی،ضرب عضب کو ڈیڑھ برس مکمل ہوچکا ہےاس آپریشن کا آخری دہشت گرد کےخاتمے تک جاری رہناناگزیر ہے ۔ملک میں امن و امان کے حقیقی قیام کے لیے سیاسی و عسکری قوتوں کو یکساں فیصلے کرنا ہوں گے۔حکومت اوراداروں میں تصادم ملک دشمن عناصر کے حوصلوں کو تقویت دینے کے مترادف ہے۔ اس المناک سانحہ سے وزیر اعظم کے پشاور میں دہشت گردی کے مکمل خاتمے کے دعوے کی قلعی کھل کر سامنے آگئی ہے۔یہ امر باعث حیرت ہے کہ بہت سارے سیکورٹی چیک پوائنٹس کی موجودگی میں بارود سے بھری گاڑی جائے حادثہ تک کیسے پہنچی۔اس واقعہ کی فوری تحقیقات کے لیے جوائنٹ انوسٹی گیشن ٹیم تشکیل دی جانی چاہیے۔ملک دشمن قوتوں کے سدباب کے لیے ضرب عضب کے دائرے کو وسیع کرتے ہوئے اس کرم ایجنسی تک بڑھایا جائے تاکہ ان کمین گاہوں کو تلف کیا جا سکے جہاں سے دہشت گردوں کی فکری تربیت اور معاونت کی جاتی ہے۔ قیمتی انسانی جانوں کا ضیاع ناقابل تلافی نقصان ہے۔ریاست کے ہر شہری کے جان و مال کا تحفظ حکومت کی اولین ذمہ داری ہے۔دہشت گرد عناصر کے خلاف موثر اقدامات کی اشد ضرورت ہے۔حکومت کو چاہیے کہ زبانی جمع خرچ کی بجائے عملی طور پر اپنے اہلیت کو ثابت کرے۔جو حکومت اپنی عوام کو جان و مال کا تحفظ نہیں دے سکتی اسے اقتدار میں رہنے کا کوئی حق نہ پہنچتا۔علامہ ناصر نے اظہار تعزیت کرتے ہوئے شہدا کی بلندی درجات اور پسماندگان کے صبر جمیل کے لیے دعا کی ہے۔