وحدت نیوز (کراچی) مجلس وحدت مسلمین پاکستان کراچی ڈویژن کے رہنما علامہ مبشر حسن نے کہا ہے کہ علامہ مرزا یوسف حسین کو جلد رہا نہیں کیا گیا تو سندھ حکومت کے خلاف چہلم امام حسین کے جلوس میں شدید احتجاج کیا جائے گا۔ ان خیالات کا اظہار انہوں نے جامع مسجد نورایمان کے باہر سندھ حکومت کی جانب سے بزرگ عالم دین علامہ مرزا یوسف حسین کی بے گناہ گرفتاری کیخلاف احتجاجی مظاہرے سے خطاب کرتے ہوئے کیا۔ اس موقع پر علامہ بشیر انصاری، علامہ اظہار حسین نقوی، ناصر حسینی، شبیر حسین اور ثمر زیدی سمیت دیگر رہنما بھی موجود تھے۔ علامہ مبشر حسن نے مظاہرین سے خطاب کرتے ہوئے کہا کہ علامہ مرزا یوسف کا جرم دہشت گردوں کی مخالفت کرنا اور مظلوم کی حمایت کرنا ہے، ماضی میں ان پر کئی مرتبہ دہشت گردوں نے حملہ کیا تھا اور اس سے واضح ہوتا ہے کہ دہشت گرد انکے جانی دشمن ہیں، لیکن سندھ حکومت نے جس طرح کا سلوک ان سے کیا ہوا ہے، وہ بھی شرمناک عمل ہے، اس ضعیفی اور بیماری کی حالت میں پس زندان کرنا اور ضمانت دینے میں مشکلات کھڑی کرنا قابل مذمت ہے، وزیراعلیٰ سندھ بتائیں کہ سندھ حکومت کو علامہ مرزا یوسف سے کیا دشمنی ہے، نواز حکومت سے کچھ بھی بعید نہیں، لیکن جمہوریت کا نعرہ لگانے والی جماعت کے اس رویے کو کیا سمجھا جائے۔

علامہ مبشر حسن نے سندھ حکومت سے مطالبہ کیا کہ اتحاد بین المسلمین کے داعی بزرگ شیعہ عالم دین علامہ مرزا یوسف حسین کے خلاف درج کی گئی جعلی ایف آئی آر ختم کرکے انہیں فی الفور رہا کیا جائے۔ انہوں نے کہا کہ کالعدم دہشت گرد تنظیمیں کراچی سمیت ملک بھر میں دندنانی پھر رہی ہیں، وفاقی وزیر داخلہ کالعدم تنظیموں کے سربراہوں سے ملاقاتیں کرکے انہیں فعالیت کی اجازت دے رہے ہیں، ارباب اختیار ان سب کا نوٹس لیں۔انہوں نے کہا کہ اگر حکومت ہمارے مطالبات تسلیم نہیں کرتی تو ہم احتجاج کا دائرہ وسیع کر دینگے اور ملک بھر میں چہلم شہدائے کربلا کے جلوسوں میں سراپا احتجاج ہونگے کیونکہ کربلا نے ہمیں ظلم و خبر کے خلاف قیام کرنا سکھایا ہے، ہماری امن پسند قوم کو زبردستی فرقہ واریت کی آگ میں نہ دھکیلا جائے۔

وحدت نیوز (اسلام آباد) دفاعی کمیٹی کے رکن و ممبر قومی اسمبلی ساجد حسین طور ی نے مجلس وحدت مسلمین پاکستان کے مرکزی ڈپٹی سیکرٹری سید ناصر شیرازی سے ایم ڈبلیو ایم کے مرکزی سیکرٹریٹ میں ملاقات کی ۔ملاقات میں علاقائی صورتحال اور باہمی دلچسپی کے امور پر تبادلہ خیال کیا گیا۔فاٹا میں ترقیاتی منصوبوں کا آغاز اور قبائلی علاقوں کو صوبہ خیبر پختونخواہ میں ضم کرنے کے فیصلہ کو دونوں رہنماؤں نے مستحسن قرار دیتے ہوئے کہا کہ اس سے پسماندہ علاقوں کو بھی خوشحالی کے برابر مواقع حاصل ہوں گے۔انہوں نے کہا کہ پارہ چنارمیں امن وامان کی صورتحال میں کافی بہتری آئی ہے۔ یہاں کے لوگوں کو جب بھی کوئی سنگین صورتحال درپیش ہوئی مجلس وحدت مسلمین نے اپنی قومی ذمہ داری کا بھرپور حق ادا کیا ہے اور اپنی قوم کو کبھی تنہائی کا احساس نہیں ہونے دیا۔ظلم کی مخالفت اور مظلوم کی حمایت کے منشور پر ایم ڈبلیو ایم پوری طرح کاربند ہے۔انہوں نے کہا کہ ملکی سلامتی و استحکام کے لیے ضروری ہے کہ پاکستان سے بیرونی مداخلت کا مکمل خاتمہ ہو۔ افغانستان ، سعودیہ اورصیہونی مداخلت نے وطن عزیز کی سلامتی کو داؤ پر لگا رکھا ہے ہمیں ان سے چھٹکارا حاصل کرنا ہو گا۔ملک میں جاری ضرب عضب نے دہشت گردوں کے حوصلوں کو پست کیا ہے۔اس کے دائرہ کار کومزید وسعت دے کر بہترین نتائج حاصل کیے جا سکتے ہیں۔اب ضرب عضب کے ثمرات کو سمیٹنے کا وقت آ گیا ہے۔انہوں نے کہا کہ مہاجرین کی اپنے علاقوں میں واپسی کے عمل کو اب بلاتاخیر شروع ہو جانا چاہیے تاکہ موسم سرما میں انہوں رہائشی مشکلات کا سامنا نہ کرنا پڑے۔

وحدت نیوز (نجف اشرف) مجلس وحدت مسلمین کے سربراہ علامہ راجہ ناصرعباس جعفری نے اربعین حسینی ؑمیں شرکت کیلئے نجف تا کربلا پاپیادہ 80کلومیٹر طویل سفرکاآغاز کردیا ہے، اس سفر عشق حسین ؑمیں علامہ راجہ ناصرعباس جعفری کے ہمراہ مجلس وحدت مسلمین کے مرکزی ڈپٹی سیکریٹری جنرل علامہ سید احمد اقبال رضوی، مرکزی سیکریٹری امور خارجہ علامہ ڈاکٹر شفقت حسین شیرازی ،مرکزی سکریٹری امور تنظیم سازی سید مہدی عابدی سمیت ایم ڈبلیوایم کے کارکنان کی بڑی تعداد اور دیگر پاکستانی زائرین شامل ہیں،دوران سفرعلامہ راجہ ناصرعباس جعفری پول نمبر گیارہ سو بیس پر قائم مجلس وحدت مسلمین شوبہ امور خارجہ کے موکب شہدائے پاکستان میں زائرین سید الشہداءؑ سے خصوصی خطاب بھی کریں گے، علامہ راجہ ناصرعباس جعفری ودیگر زائرین تین روز میں نجف تا کربلاکے درمیان کا پیدل سفر طے کرکے اٹھارہ صفر المظفر کو کربلائے معلیٰ میں داخل ہونگے اور علامہ راجہ ناصرعباس جعفری روز اربعین ہزاروں پاکستانی زائرین کے ہمراہ حرم مطہرامام حسین ؑ میں حاضری دیں گے اورپرسہ داری کریں گے۔
            

وحدت نیوز (سکردو) مجلس وحدت مسلمین پاکستان گلگت بلتستان کے سیکریٹری جنرل علامہ آغا علی رضوی نے کہا ہے کہ مرزا یوسف حسین کو جلد رہا نہیں کیا گیا تو گلگت بلتستان میں سندھ حکومت کے خلاف احتجاج کیا جائے، انکا جرم دہشتگردوں کی مخالفت کرنا ہے، ان پر کئی مرتبہ دہشتگردوں نے حملہ کیا تھا اور اس سے واضح ہوتا ہے کہ دہشتگرد انکے جانی دشمن ہیں لیکن سندھ حکومت نے جس طرح کا سلوک ان سے کیا ہوا ہے وہ بھی شرمناک عمل ہے۔ اس ضعیفی میں اور بیماری کی حالت میں پس زندان کرنا اور ضمانت دینے میں کوتاہی برتنا قابل مذمت ہے۔ آغا علی رضوی نے کہاکہ پیپلز پارٹی گلگت بلتستان کے رہنماء بتائیں کی سندھ حکومت کو علامہ مرزا یوسف سے کیا دشمنی ہے۔ نواز حکومت سے کچھ بھی بعید نہیں لیکن جمہوریت کا نعرہ لگانے والی جماعت کے اس رویے کو کیا سمجھا جائے۔ یوں تو گلگت  بلتستان بلخصوص  بلتستان کے لیے شیخ مرزا یوسف حسین اور انکے پدر محترم محروم شیخ غلام محمد کی ناقابل فراموش خدمات ہیں۔ علامہ شیخ غلام محمد اگر اجازت نہ دیتے تو پیپلز پارٹی ماضی میں جی بی میں قدم نہیں رکھ سکتی ۔ گلگت بلتستان میں پہلی بار پیپلز پارٹی کو بھٹو کے دور میں سیاسی سرگرمی کرنے کی اجازت اپنی سرپرستی میں دی تھی کیا ذوالفقار علی بھٹو کے نواسے کو اس بات پر دکھ ہے۔ سندھ کی حکومت علامہ مرزا یوسف کو فوری طور پر رہا کرے ورنہ بلتستان میں سندھ حکومت کے اس ظالمانہ کارروائی کے خلاف احتجاج کیا جائے گا احتجاج میں  بلتستان کے عوام سندھ حکومت اور حکمران جماعت کے رہنماوں کے نواز شریف طرز کے طور طریقوں پر آواز اٹھا ئی جائے گی۔ آغا علی رضوی نے کہا کہ بلتستان کے جیالے بھی علامہ مرزا یوسف کی خدمات کے معترف ہیں اور ہم سے رابطے میں ہم نے انکو پیغام دیا ہے کہ ان کی شخصیت کے معترف ہیں اپنی قیادت اور حکومت سندھ کو نواز شریف طرز کے عمل سے باز رہنے کو کہیں ورنہ بلتستان بھر میں علامہ مرزا یوسف کی رہائی کے خلاف احتجاجی تحریک کا آغاز ہوگا اور ون پوائنٹ ایجنڈے پر ہی تحریک چلے گی۔

وحدت نیوز (کوئٹہ) مجلس وحدت مسلمین کوئٹہ ڈویژن کے سیکریٹری روابط اور کونسلر کربلائی رجب علی نے کہا ہے کہ ہمیں ملک میں عدل و انصاف کی عدم موجودگی کا سامنا ہے اور اسکی عدم موجودگی نے ملک کے اندر کرپشن، قانون شکنی، جرائم میں اضافے اور ایسے دیگر مسائل جنم دے دیئے ہیں۔جمہوریت انصاف کی بحالی کیلئے ہوتی ہے، اس نظام میں انصاف کو ترجیح دی جاتی ہے، پاکستان کے عوام حقیقی جمہوریت کے خواہش مند ہیں، ہماری قوم نے ہمیشہ جمہوریت کی حمایت کی ہے اور جاگیردارانہ نظام کے مقابلے میں کھڑے ہو کر اسے مسترد کر دیا ہے۔ بیان میں کہا گیا کہ حقیقی جمہوریت ایسی حکومت ہوتی ہے جس میں پارلیمانی نمائندے اپنے علاقے کے عوام کی ترجمانی کا حق ادا کرتے ہیں، عوامی نمائندے اپنے اختیارات کے استعمال سے عوام کو درپیش مسائل کو حل کرتے ہیں اور قوم کی خدمت حقیقی نمائندوں کی اولین ترجیح ہوتی ہے۔ بیان میں مزید کہا گیا کہ جمہوریت ایسی حکومت ہوتی ہے جس میں مقننہ، انتظامیہ اور عدلیہ سے کوئی شخص مایوس نہیں ہوتا مگر یہاں کا حال کچھ الگ ہی تصویر کشی کرتی ہے، جمہوری نظام میں عدلیہ بہت اہم کردار ادا کرتی ہے مگر افسوس کے ساتھ کہنا پڑتا ہے کہ اس معاملے میں ہم کامیاب نہیں رہے ہیں۔ ایک جمہوری ملک میں عدلیہ قانون ، آئین اور انسانی حقوق کی محافظ ہوتی ہے۔ قیام امن اور کرپشن کے خاتمے کیلئے اقدامات اٹھائے جانے چاہئے اور عدلیہ کو چاہئے کہ وہ بغیر کسی سیاسی دباؤ اور خوف کے فیصلہ کرے اور جمہوریت کی تکمیل میں اپنا  کردار ادا کرے۔ بیان کے آخر میں کہا گیا کہ موجودہ جمہوری نظام میں عدلیہ کا کردار سب سے زیادہ اہم ہو گیا ہے، بہتر نظام کیلئے عدل و انصاف کو یقینی بنایا جائے وگرنہ ہمارا نام صرف نام کا جمہوری نام رہ جائے گا اور اس کے اندر جمہوریت کی کوئی خوبی نظر نہیں آئے گی۔

وحدت نیوز (پشاور) مجلس وحدت مسلمین خیبر پختونخوا کے سیکرٹری جنرل علامہ اقبال بہشتی نے کہا ہے کہ دہشتگردوں اور ان کے سہولت کاروں کیخلاف سنجیدہ اور مصلحتوں سے بالاتر ہوکر کارروائی کرنا ہوگی، بصورت دیگر پاکستان کے بے گناہ عوام اسی طرح نشانہ بنتے رہیں گے۔ ان خیالات کا اظہار انہوں نے سانحہ حب پر تبصرہ کرتے ہوئے کیا۔ ان کا کہنا تھا کہ درگاہ شاہ نورانی پر دہشتگردانہ حملہ انتہائی افسوسناک ہے، آج پاکستان بنانے والوں کی اولادوں کو بے دردی سے قتل کیا جا رہا ہے، جبکہ پاکستان بنانے کے مخالفین کی اولادیں آج پاکستانیوں کو قتل کر رہی ہیں اور حکمران بھی ان کے سپورٹر بنے ہوئے ہیں۔ انہوں نے کہا کہ اگر پاکستان کو بچانا ہے تو دہشتگردوں کیخلاف تمام تر مصلحتوں سے بالاتر ہوکر کارروائی کرنا ہوگی، پوری قوم اور خاص طور پر حکومت کو دہشتگردوں کیخلاف کارروائی کیلئے پاک فوج کیساتھ ہونا ہوگا، نیشنل ایکشن پلان پر درست سمت پر عمل کرنا ہوگا اور محب وطن قوتوں کو تنگ کرنے کا سلسلہ فوری طور پر ختم کیا جائے۔