وحدت نیوز (پاراچنار) مجلس وحدت مسلمین پاکستان کے پارلیمانی لیڈر و رکن قومی اسمبلی انجینئر حمید حسین طوری کا چیف سیکرٹری خیبر پختونخواہ اور آئی جی خیبر پختونخواہ کے ہمراہ پارہ چنار ضلع کرم کا دورہ،اس دوران انجینئر حمید حسین طوری نے گورنر کاٹیج پاراچنار میں ایک اہم جرگہ سے خطاب کرتے ہوئے کہا کہ ٹل پارہ چنار روڈ صرف ایک سڑک نہیں بلکہ ہماری شہ رگِ حیات ہے۔ اس کی سلامتی اور بحالی ہمارے لیے قومی وقار اور عزت کا مسئلہ ہے۔ انہوں نے زور دیا کہ چپھری سے لے کر تری منگل تک تمام راستوں کو مکمل طور پر محفوظ بنایا جائے اور فوری طور پر بحال کیا جائے تاکہ عوام کو درپیش مشکلات کا خاتمہ ہو سکے۔

انہوں نے چیف سیکرٹری خیبر پختونخواہ، سیکرٹری ہیلتھ، کمشنر کوہاٹ ڈویژن اور دیگر افسران کے ہمراہ ڈسٹرکٹ ہیڈ کوارٹر ہسپتال پارہ چنار کا دورہ بھی کیا اور ہسپتال اپگریڈیش، ادویات کی فراہمی، آکسیجن پلانٹ و دیگر سہولیات کی فوری فراہمی پر تفصیلی گفتگو کی، ایم این اے انجینئر حمید حسین نے چیف سیکرٹری خیبر پختونخواہ سید شہاب علی شاہ، آئی جی خیبر پختونخواہ ذوالفقار حمید اور دیگر فوجی و سول آفسران کے ہمراہ لوئر کرم صدہ میں منعقدہ جرگے میں بھی شرکت کی۔ انجینئر حمید حسین نے مرکزی امام جمعہ والجماعت آغائے فدا حسین مظاہری سے ملاقات کی اور انکی احوال پرسی اور عیادت بھی کی۔ ضلعی آفس میں عمائدین اور مشران سے بھی ملاقات اور مسائل پر تفصیلی گفتگو۔

وحدت نیوز(لاہور) بانی امام خمینیؒ فاؤنڈیشن پاکستان سید امیر علی شاہ کی نماز جنازہ علامہ سید امتیازعباس کاظمی کی زیراقتداء  امامیہ مسجد سمن آباد نزد شباب چوک لاہور میں ادا کی گئی۔

نماز جنازہ میں سید مروت علی شاہ سابق( IG )  خواجہ محسن عباس، سید اسد عباس نقوی مرکزی سیکرٹری سیاسیات مجلس وحدت مسلمین پاکستان،  امیر عباس مرزا رہنما مجلس وحدت مسلمین پاکستان،خواجہ میثم عباس  فخرایشیانویدشاہ ،ظہیرشاہ  موسوی ، صوبائی سیکرٹری فلاح وبہبود شیخ عمران علی ،صوبائی سیکرٹری مالیات سید فصاحت علی بخاری ،ضلعی صدر مرزا نجم عباس خان ،ضلعی جنرل سیکرٹری برادر نقی مھدی ،ضلعی ڈپٹی جنرل سیکرٹری سید سجاد حسین نقوی ، برادر شعیب ، علامہ ظہیر کربلائی صوبائی آفس سیکرٹری مجلس وحدت مسلمین پاکستان ،سید تاثر رضا نقوی عدنان علی ،عمار نقوی ،سید خرم عباس نقوی و دیگرنے شرکت کی۔

وحدت نیوز(مری) سینیٹ کی قائمہ کمیٹی برائے ہاؤسنگ اینڈ ورکس کا اجلاس، مری و لاہور میں سرکاری اراضی پر قبضوں کا تفصیلی جائزہ

سینیٹ کی قائمہ کمیٹی برائے ہاؤسنگ اینڈ ورکس کا اجلاس گورنمنٹ ہاؤس کشمیر پوائنٹ مری میں منعقد ہوا، جس کی صدارت کمیٹی کے چیئرمین سینیٹر ناصر بٹ نے کی۔

 اجلاس میں سربراہ مجلس وحدت مسلمین پاکستان سینیٹر علامہ راجہ ناصر عباس جعفری، سینیٹر بلال مندوخیل، سینیٹر حسنہ بانوسمیت وزارتِ ہاؤسنگ کے اعلیٰ حکام، ڈی جی اسٹیٹ، کمشنر راولپنڈی، ڈپٹی کمشنر مری، اسسٹنٹ کمشنر مری، ڈی پی او مری، ڈی جی پی ڈبلیو ڈی اور دیگر متعلقہ افسران نے شرکت کی۔

اجلاس میں مری کے کشمیر پوائنٹ اور لاہور کی وفاقی کالونی میں سرکاری اراضی پر قبضوں (انکروچمنٹ) کے مسائل پر تفصیل سے غور کیا گیا۔ کمشنر راولپنڈی نے کمیٹی کو مری میں 36 کنال متنازعہ اراضی سے متعلق عدالتی کارروائی اور آئندہ سماعت (8 مئی) کے بارے میں آگاہ کیا۔ ڈپٹی کمشنر مری نے بھی کمیٹی کو اس معاملے پر تفصیلی بریفنگ دی۔

وفاقی کالونی لاہور میں 16 کنال قابض شدہ اراضی سے متعلق پی ڈبلیو ڈی حکام نے اجلاس کو مکمل صورتحال سے آگاہ کیا۔ اجلاس کے اختتام پر چیئرمین کمیٹی سینیٹر ناصر بٹ نے متعلقہ محکموں کو سختی سے ہدایت دی کہ وہ قابض شدہ اراضی واگزار کرانے کے لیے تمام ممکنہ اقدامات فی الفور کریں۔

قبل ازیں، سینیٹر ناصر بٹ اور کمیٹی کے دیگر ارکان نے کمشنر راولپنڈی، ڈی سی مری، ڈی پی او مری اور دیگر متعلقہ افسران کے ہمراہ 36 کنال قابض شدہ اراضی کا دورہ کیا اور محکمہ مال، ٹی ایم اے مری اور پی ڈبلیو ڈی کے ساتھ موقع پر صورتحال کا جائزہ لیا۔

وحدت نیوز (اسلام آباد) مجلس وحدت مسلمین پاکستان کے سربراہ علامہ راجہ ناصرعباس جعفری ،وائس چیئرمین علامہ سید احمد اقبال رضوی، سید اسدعباس نقوی ، صوبائی صدر پنجاب علامہ سید علی اکبر کاظمی ودیگر قائدین نے امام خمینیؒ فاؤنڈیشن پاکستان کے بانی سید امیر علی شاہ کے انتقال پر دلی افسوس اور رنج و غم کا اظہار کیا ہے ۔

ایم ڈبلیوایم قائدین نے اپنے تعزیتی بیان میں کہا ہے کہ لاہور شہر کی فضا آج ایک محبِ اہل بیت، ایک دردمند دل اور ایک بےلوث خدمت گزار کی جدائی پر سوگوار ہے۔ جناب امیر علی شاہ کی وفات حسرت آیات کی اندوہناک خبر نے دلوں کو غم زدہ کر دیا ہے۔مرحوم ایک ایسی ہمہ جہت شخصیت کے مالک تھے جن کی دینی بصیرت، سیاسی شعور، سماجی وابستگی اور عزاداری سے والہانہ لگاؤ ہر محفل کا مرکزِ نگاہ تھا۔وہ اخلاص، محبت، انکساری اور خدمت کے پیکر تھے۔ ان کی شرکت مجالسِ عزاء کی رونق اور جلوس ہائے عزاء کی روح ہوا کرتی تھی۔مرحوم کو حضرت امام خمینی رحمۃ اللہ علیہ اور شہید قائد علامہ عارف حسین الحسینی رحمۃ اللہ علیہ کی فکر و فلسفہ سے گہرا عشق تھا۔ مرحوم امام خمینی فاونڈیشن پاکستان کے بانی تھے۔ انہی افکار کی روشنی میں وہ ملتِ جعفریہ کے حقوق کے لیے ہر محاذ پر صفِ اول میں نظر آتے۔خواہ کوئٹہ ہو یا پاراچنار، گلگت ہو یا بلتستان، یا مظلومینِ عالم کی حمایت میں جناب امیر علی شاہ ہر احتجاج کو اپنی دینی و اخلاقی ذمہ داری جان کر شریک ہوتے اور اپنے کردار سے حق کا علم بلند رکھتے۔اگرچہ آج وہ ہمارے درمیان نہیں، مگر ان کی نرم گفتاری، روشن خیالی اور پُرخلوص خدمات کو ہمیشہ یاد رکھا جائے گا۔

قائدین نے کہا ہے کہ جناب امیر علی شاہ کے انتقال پر مرحوم کے خانوادہ گرامی کی خدمت میں دلی تعزیت و تسلیت پیش کرتے ہیں، مرحوم امام خمینی فاونڈیشن پاکستان کے بانی تھے۔ وہ ملتِ جعفریہ کے حقوق کے لیے ہر محاذ پر صفِ اول میں نظر آتےتھے ۔دینی بصیرت، سیاسی شعور،  اخلاص، محبت، انکساری اور خدمت کے پیکر سماجی وابستگی اور عزاداری سے والہانہ لگاؤ ہر محفل کا مرکزِ نگاہ تھے ۔خدا وند متعال سے دعاگو ہیں کہ صدقہ چہاردہ معصومین علیہم السلام مرحوم کی مغفرت و درجات بلند فرمائے اور تمام لواحقین کو صبر جمیل عطا فرمائے۔آمین یااللہ