وحدت نیوز(سکردو) ورلڈ ماؤنٹین ڈے کے موقع پر پریس کلب سکردو اور یو این ڈی پی کے زیر اہتمام تقریب کا اہتمام کیا گیا۔ تقریب کے مہمان خصوصی صوبائی وزیر ذراعت محمد کاظم میثم تھے۔ تقریب میں معروف دانشور جناب حسن حسرت ، پریس کلب کے صدر و سینئیر صحافی قاسم نسیم، پریس کلب کے عہدیداران سمیت معروف سماجی وصحافتی شخصیات کے علاؤہ گلگت بلتستان کے کوہ پیماؤں کی بھی اچھی تعداد نے شرکت کی اور اس اہم دن کی مناسبت سے اظہار خیال کیا۔ اپنے خطاب میں صوبائی وزیر زراعت اور مجلس وحدت مسلمین کے رہنما نے کہا  پہاڑوں، جنگلی حیات اور گلیشیئرز کے تحفظ کو یقینی بنانا ناگزیر ہے۔

 انکا کہنا تھا کہ گلگت بلتستان میں کوہ پیمائی بہترین صنعت کی حیثیت اختیار کرسکتی ہے مگر افسوسناک امر یہ ہے کہ کوہ پیمائی اور اس شعبے سے وابستہ افراد کی حکومتی سطح پر حوصلہ افزائی نہیں جس کی ضرورت ہے۔ ماحولیات کے تحفظ کیلئے جہاں انفرادی طور پر کوششیں ہونی چاہئے وہاں حکومتی اور انتظامی سطح پر بھی اقدامات کی ضرورت ہے، اس سلسلے میں بلین ٹریز سونامی پروگرام موجودہ وفاقی حکومت کیجانب سے ایک قابل قدر اور لائق تحسین اقدام ہے جس کو عالمی سطح پر پذیرائی مل رہی ہے۔ ماحولیات کو محفوظ بنانے کیلئے اسطرح کے بڑے پروگرام کی یقینا حوصلہ افزائی ہونی چاہئے۔

 اپنے خطاب میں کاظم میثم کا کہنا تھا کہ پہاڑوں کا تعلق سیاحت کے شعبے سے بھی ہے ، ماحولیاتی تبدیلیوں کی وجہ سے پہاڑوں پر جنگلی حیات کو خدشات وابستہ ہیں، سیاحت بھی اس طرح متاثر ہونے کا خدشہ ہے۔ جبکہ حقیقت حال یہ ہے کہ ان آپس میں مربوط شعبہ جات پر توجہ دیکر ملکی معاشی نظام کو بہتر کرنے میں بھی مدد مل سکتی ہے۔ پاکستان جبکہ معاشی طور مستحکم نہیں، ایسے میں گلگت بلتستان کو قدرت کیطرفسے ملے ان انمول وسائل سے بھرپور استفادہ کرکے نہ صرف خطہ گلگت بلتستان بلکہ پوری ملکی معیشت کو سہارا دیا جاسکتا ہے۔

وحدت نیوز(سکردو)رہنما مجلس وحدت مسلمین گلگت بلتستان و صوبائی وزیر زراعت محمد کاظم میثم کا محکمہ زراعت کے آفس آمد پر ڈائریکٹر محکمہ زراعت بلتستان ریجن اور محکمے کے دیگر ذمہ داران نے استقبال کیا۔

اس موقع پر صوبائی وزیر زراعت کو محکمہ زراعت کے افسران سے اور محکمہ زراعت کے مختلف شعبوں کے سربراہان نے ایگریکلچر ایکسٹینشن ،ریسرچ، ای ٹی آئی اور واٹر منیجمنٹ کے بارے میں تفصیلی بریفنگ دی۔

صوبائی وزیر زراعت کاظم میثم نے کہا کہ گلگت بلتستان میں زراعت کے مواقع بہت زیادہ ہے اور انتہائی پوٹینشل ایریا ہے اور انشاء اللہ اس پہ بھرپور وسائل کا استعمال اور بھرپور توانائی صرف ہوگی اور صوبائی حکومت انقلابی زرعی اصلاحات کے لئے جدوجہد کر رہی ہے تاکہ عوام کی معیار زندگی بلند ہو اور گلگت بلتستان سرسبز شاداب ہو۔

آخر میں محکمہ زراعت کے ذمہ داران نے کاظم میثم کو صوبائی وزیر زراعت کے قلمدان سنبھالنے پر مبارکباد دی اور نیک خواہشات کا اظہار کیا۔

وحدت نیوز (اسلام آباد) مجلس وحدت مسلمین پاکستان کے مرکزی سیکرٹری جنرل علامہ راجہ ناصر عباس جعفری نے کہا ہے کہ حکومت مخالف جماعتوں کا واویلا جمہوریت کے لئے نہیں بلکہ اپنی لوٹ مار پر پردہ ڈالنے کے لئے ہے۔وہ سیاسی جماعتیں جو کل تک ایک دوسرے پر الزام تراشیاں کرتی رہیں آج اپنے مفادات کے تحفظ کے لیے یک جاں ہوں گئی ہیں۔ان کے احتجاج ملک و قوم کے لیے نہیں بلکہ قومی خزانے کی لوٹ مار سے بنائے گئے اثاثوں کے تحفظ کے لیے ہے۔جمہوری بالادستی کی آڑ میں ملک و قوم کےخلاف کسی بھی سازش کو عوام کامیاب نہیں ہونے دیں گے۔

انہوں نے کہا کہ بھارت کی بزدلانہ کاروائیاں ہماری قوم کے عزم و حوصلوں کو متزلزل نہیں کر سکتیں۔وطن عزیز کا ہر باشعور شہری بھارتی عزائم سے آگاہ ہے۔ملک دشمنوں کی کسی بھی جارحیت کا جواب پوری قوم مل کر دے گی۔وطن عزیز کی نظریاتی و جغرافیائی سرحدوں کا دفاع ہماری زندگی کی اولین ترجیح ہے۔اپنے اس موقف سے ایک انچ بھی پیچھے نہیں ہٹیں گے۔انہوں نے کہا کہ گلگت بلتستان کے عوام کی ارض پاک کے لیے ان گنت قربانیاں ہیں جنہیں فراموش نہیں کیا جا سکتا۔ جی بی کے عوام کی محرمیوں کے ازالے کو قومی فریضہ سمجھ کر تمام ممکن اقدامات کیے جائیں گے۔

انہوں نے کہا کہ انتہا پسندی کے خلاف پوری قوم نے ایک طویل اور صبر آزما جنگ لڑی ہے۔جو عناصر اسے ناکام بنانا چاہتے ہیں وہ ناپختہ فکر اور انتہا پسندانہ سوچ رکھتے ہیں۔انتہا پسندی کے خلاف پوری قوم متحد ہے۔انہوں نے کہا کہ کرپشن کسی بھی ملک کی ترقی میں سب سے بڑی رکاوٹ ہے۔ملک کو کرپشن سے پاک کرنے کے لیے ذمہ دار اداروں کو بغیر کسی دباو کے عملی اقدامات کرنے ہوں گے۔نیب اور قانون نافذ کرنے والے ادارے قومی خزانہ لوٹنے والوں کی بد دیانتیوں کو منظر عام پرلائیں تاکہ عوام کے سامنے ان کے اصل چہرے بے نقاب ہوں۔

وحدت نیوز(جیکب آباد) مجلس وحدت مسلمین مین شعبہ خواتین ضلع جیکب آباد کے زیراہتمام مدرسہ خدیجۃ الکبری سلام اللہ علیہا میں تربیتی نشست منعقد کی گئی۔ نشست سے خطاب کرتے ہوئے ایم ڈبلیو ایم کے مرکزی ترجمان علامہ مقصود علی ڈومکی نے کہا ہے کہ اللہ تعالی نے انسان کو احسن تقویم بہترین سانچے میں عظمت کے ساتھ پیدا کیا ہے۔ اسی لئے اسے اپنی امانت کا امین بنایا۔ خدا کا دین اور شریعت بہترین نظام زندگی ہے جو ہر طرح کی کجی اور عیب سے پاک ہے۔ اس پر عمل پیرا ہو کر ہم خدا کے خلیفہ بن سکتے ہیں۔ اللہ تعالی نے ملائکہ کے ہوتے ہوئے زمین پر آدم اور بنی آدم کو منصب خلافت عطا کیا۔ ہمیں اللہ سے کیے ہوئے عہد کو پورا کرنا ہے۔ یہ اسی صورت ممکن ہے جب ہم اپنے ازلی دشمن ابلیس سے محتاط رھیں۔

 انہوں نے کہا کہ تعلیم اور تربیت میں خواتین کا بنیادی کردار ہے تعلیم اور تربیت کے ذریعے خواتین آئندہ انسانی نسل کو مفید اور کارآمد بنا سکتی ہیں۔ انہوں نے کہا کہ مجلس وحدت مسلمین پاکستان اعلیٰ انسانی اقدار کی محافظ ہے اور وطن عزیز پاکستان میں دین اسلام کی سربلندی کے لیے مصروف جدوجہد ہے۔

انہوں نے کہا کہ عالم مغرب نے دین اسلام کی عظیم تعلیمات کے خلاف ثقافتی یلغار کی ہے۔ مغرب ثقافتی شب خون کے ذریعے حجاب حیا عفت پاکدامنی جیسی اسلامی اور اعلیٰ انسانی قدروں کی نابودی کیلئے صف آراہو چکا ہے میڈیا اور سوشل میڈیا کے ہتھیار کو استعمال کرتے ہوئے اسلام دشمن سامراجی قوتیں اور مغربی تہذیب بے حیائی اور عریانی بے حجابی کی ترویج میں مصروف ہے اور حیا عفت اور عصمت جیسی اعلی انسانی قدروں کا خاتمہ چاہتا ہے مسلم خواتین کو چاہئے کہ وہ مغربی ثقافتی یلغار کے مقابلے کے لئے قرآن کریم اور آل محمد کی پاکیزہ سیرت کو اپنائیں سیدہ خدیجہ الکبری سیدہ فاطمہ زہرا اور حضرت زینب کبریٰ سلام اللہ علیہن مسلم خواتین کے لئے بہترین نمونہ عمل ہیں۔