وحدت نیوز(ڈیرہ غازی خان) مجلس وحدت مسلمین جنوبی پنجاب کے قائم مقام سیکرٹری جنرل سلیم عباس صدیقی ایک روزہ تنظیمی دورہ پر ڈیرہ غازیخان پہنچے، جہاں اُنہوں نے ایم ڈبلیو ایم ڈی جی خان کے ضلعی رہنمائوں سے ملاقات کی، اس موقع پر ضلعی سیکرٹری جنرل سید فضل الہی نقوی(ایڈووکیٹ)، ضلعی سیکرٹری تربیت سید انعام حیدر زیدی، یاور عباس عباس، کاظم رضا اور دیگر موجود تھے۔ اجلاس کے موقع پر ضلع بھر کی مجموعی طور پر تنظیمی اور تربیتی صورتحال کا جائزہ لیا گیا، اس موقع پر ڈپٹی سیکرٹری جنرل سلیم عباس صدیقی نے ضلعی کابینہ کو ملتان میں 13,14 جنوری کو منعقدہ تربیتی ورکشاپ میں شرکت کی دعوت دی، بعدازاں اُنہوں نے دیگر پروگراموں میں شرکت کی، سلیم عباس صدیقی کا کہنا تھا کہ قومی اداروں میں میرٹ کو نظرانداز کرکے من پسند افراد کو نوازا جا رہا ہے۔ اہم اداروں میں کلیدی پوسٹوں پر نااہل افراد کی تعیناتی اس امر کی عکاس ہے کہ حکومت کو قومی اداروں اور ملکی ترقی سے کوئی لگا نہیں۔ موجودہ حکومت لوٹو اور لوٹنے دو کی پالیسی پر گامزن ہے۔ حکومت کے غیر ذمہ دارانہ طرز عمل نے عوام اور نون لیگ میں فاصلے پیدا کر دیئے ہیں۔ نواز شریف کی سیاست اب روبہ زوال ہوچکی ہے۔ پاکستان کی آئندہ سیاست میں نواز شریف اینڈ فیملی کی جگہ باقی نہیں رہی۔ انہوں نے کہا کہ مجلس وحدت مسلمین الیکشن 2018 کے حوالے سے اپنا لائحہ عمل طے کر رہی ہے۔ قومی انتخابات میں بھرپور طور پر حصہ لیا جائے گا اور کسی ایسی جماعت کے ساتھ قطعی اتحاد نہیں کیا جائے گا جو تکفریت کے فروغ یا دفاع کے لئے کام کر رہی ہو۔

وحدت نیوز(کوٹ ڈیجی) امامیہ اسکاؤٹس کے زیراہتمام مرکزی خاتم المرسلین ﷺ اسکاؤٹس کیمپوری سے (ایثار و مقاومت) کے موضوع پر خطاب کرتے ہوئے مجلس وحدت مسلمین سندہ کے سیکریٹری جنرل علامہ مقصودعلی ڈومکی نے کہا ہے کہ حکیم الامت حضرت علامہ محمد اقبال ؒ نے سرزمین برصغیر کے مسلمانوں کی بیداری کے لئے جس تحریک کا آغاز کیا تھا، ہمیں اس تحریک کو آگے بڑھانا ہے۔وطن عزیز پاکستان کو امریکی غلامی سے تباہی اور بربادی کے سوا کچھ حاصل ہوا نہ ہوگا، وہ دن اس قوم کے لئے یوم عید ہوگا جس دن ہم نے امریکی غلامی سے نکلنے کا فیصلہ کیا۔ انہوں نے کہا کہ شیطان بزرگ امریکہ سے اسلام دشمنی اور انسانیت سے عداوت کے علاوہ کوئی توقع نہیں۔ دنیا بھر کے غیور مسلمان اپنی طاقت سے امریکی فیصلے کو پیروں تلے روندیں گے۔فلسطین کے مظلوم عوام خود کو تنہا نہ سمجھیں ہم جدوجہد کے ہر مرحلے پر قبلہ اول کی آزادی کے لئے آواز بلند کریں گے۔ اب وہ دن زیادہ دور نہیں جب بیت المقدس آزاد ہو۔ قدس کی آزادی تک اور اسرائیل کی بربادی تک ہماری جدوجہد جاری رہے گی۔

انہوں نے کہا کہ آئی ایس او محب وطن جوانوں کی جماعت ہے جنہوں نے ہمیشہ مادر وطن کی سربلندی کے لئے جدوجہد کی ہے۔ پاک وطن کی سلامتی اور استحکام ہمارا نصب العین ہے، پاک وطن کے بہادر بیٹے ملک سے دھشت گردی اور تکفیری سوچ کے خاتمے کے لئے پرعزم ہیں۔ انہوں نے کہا کہ ہم حکیم الامت علامہ اقبال ؒ اور حضرت قائد اعظم محمد علی جناح ؒ کے افکار کی روشنی میں پاکستان کی تعمیر کریں گے۔

وحدت نیوز (اسلام آباد) مجلس وحدت مسلمین پاکستان کے مرکزی سیکرٹری جنرل علامہ راجہ ناصر عباس جعفری نے کہا ہے کہ امریکی صدر ڈونلڈ ٹرمپ کے بیان پرحکومت کی جانب سے تمام سیاسی و مذہبی جماعتوں کی کانفرنس بلائی جائے اور امریکہ سے تعلقات منقطع کرنے کی قرار داد پیش کی جائے۔انہوں نے کہا کہ سیاسی نوعیت کے معاملات میں اختلافات جس نہج پر بھی ہوں قومی و ملکی وقار کی حفاظت کے لئے پوری قوم متحد ہے۔امریکی صدر کسی مغالطے میں نہ رہیں۔ پوری دنیا پر یہ واضح ہوچکا ہے کہ امریکہ ایک ناقابل اعتبار اور موقعہ پرست دوست ہے جس نے ہمیشہ انہی دوستوں کو نقصان پہنچایاجنہوں نے آڑے وقت میں اس کی مدد کی۔ جس تھالی میں کھانا اسی میں چھید کرنا امریکہ کی پرانی روش ہے۔ امریکی صدر ڈونلڈ ٹرمپ نے اقتدار سنبھالتے ہی عالم اسلام کے خلاف جس سرد جنگ کا آغاز کیا تھا اسے اب وہ عملی شکل دینے کے لئے بے تاب دکھائی دے رہا ہے۔امریکی صدر ٹرمپ خود امریکہ کی سالمیت و بقا کے لئے بھی خطرہ ہے۔امریکی عوام اگر ملک بچانے چاہتے ہیں تو اس کے خلاف اٹھ کھڑے ہوں۔

انہوں نے کہا کہ دہشت گردی کے خلاف جنگ میں پاکستان کی قربانیوں کو بین الاقوامی سطح پر تسلیم کیا جاتا رہا ہے۔ عالمی امن کے قیام کے لیے پاکستان نے اپنی سلامتی کو داؤ پر لگائے رکھے۔ ہمارے ستر ہزار سے زائد نوجوان دہشت گردی کی بھینٹ چڑھے۔ملک میں دہشت گردی کے واقعات نے بیرونی سرمایہ کاروں کی راہ روکی ۔جس سے ملکی معشیت تباہی کے دہانے پر پہنچ گئی۔امریکی حمایت نے اس ملک کو اربوں ڈالر ز کے نقصان سے دوچار کیا۔دہشت گردی کے خلاف جنگ کے لئے نیٹو فورسز اور پاکستان کی دیے جانے والے کولیشن سپورٹ فنڈ کو امداد کا نام دے کر اقوام عالم کی آنکھوں میں دھول جھونکنے کی کوشش کی جارہی ہے۔انہوں نے کہاامریکی صدر کا جواب ایسے ہی لب ولہجہ میں دیا جانا ہی قومی وقار کا تقاضہ ہے۔حکومت کے جراتمندانہ اور دوٹوک موقف پر پوری قوم ساتھ کھڑی رہے گی۔

وحدت نیوز(اسلام آباد) مجلس وحدت مسلمین پاکستان کے مرکزی سیکرٹری جنرل علامہ راجہ ناصر عباس جعفری نے کہا ہے کہ نااہل حکمران ایک طرف لوگوں کو سہانے خواب دکھانے میں مصروف ہیں جبکہ دوسری طرف عوام پرمشکلات کے پہاڑ توڑے جا رہے ہیں۔ اشیائے خورد و نوش کی قیمتوں میں غیر معمولی اضافہ نے غریب عوام کی زندگی مزید اجیرن بنا دی ہے۔حکومتی حلقوں میں سال 2018 کے حوالے سے ترقی و استحکام کے جو بلند و بانگ دعوے کیے جا رہے ہیں وہ محض عوام کو بے وقوف بنانے کے لئے ہیں۔ حکومت ملکی نظم و ضبط اور انتظامی معاملات سنبھالنے میں بری طرح بے بس ہو چکی ہے۔قومی ادارے تنزلی کا شکار ہیں۔ عوام پینے کے صاف پانی اور سوئی گیس جیسی عام ضروریات زندگی سے محروم ہیں۔سڑکوں کی مخدوش حالت آدھے گھنٹے کی بارش میں ملک کو پیرس بنانے کے تمام دعووں کی قلعی کھول دیتی ہے۔سرکاری ہسپتالوں میں مریضوں کے لئے بستر نہیں۔ سڑکوں ، پارکوں اور فٹ پاتوں پر بچوں کی پیدائش کے واقعات میڈیا کی زینت بن رہے ہیں۔ کیا یہی جمہوریت کا حسن ہے ۔

انہوں نے کہا حکمرانوں کی کرپشن نے پورے نظام کو کھوکھلا کر کے رکھ دیا ہے۔انہیں اپنے اثاثے بنانے اور بچانے کے علاوہ کسی دوسری چیز کی پروا نہیں۔2018 الیکشن کا سال ہے۔ اس ملک کو بچانے کے لئے عوام کو ووٹ کے استعمال میں دانشمندی اوربصیرت کا مظاہرہ کرنا ہوگا۔وطن عزیز کو اس وقت دیانتدار اور صالح قیادت کی ضرورت ہے جو ذاتی مفاد سے بالا تر ہو کر ارض پاک کی ترقی واستحکام کو مقصد حیات سمجھے۔عوام کو اپنا فیصلہ سوچ سمجھ کر کرنا ہو گا۔کرپٹ عناصر کا دوبار اقتدار میں آنا ملک دشمن قوتوں کی تقویت کا باعث اور پاکستان کے وجود کے لئے خطرناک ثابت ہو گا۔

وحدت نیوز(کراچی) وحدت یوتھ کراچی ڈویژن کے زیراہتمام جشن معصومین ؑکا مسجد وامام بارگاہ مدینتہ العلم گلشن اقبال میں شاندارانعقادکیا گیا، پروگرام کاآغاز قاری علی احسن سیکریٹری امور تربیت وحدت یوتھ کراچی ڈویژن نے تلاوت کلام پاک سے کیا جبکہ نظامت کے فرائض شہید استاد سبط جعفرکے رفیق اور دیرینہ ساتھی الحاج ناصرعبا س اور ایم ڈبلیوایم کراچی ڈویژن کے ڈپٹی سیکریٹری جنرل علامہ مبشرحسن نے انجام دیئے،شہرکراچی کے معروف شعراءاہل بیتؑ جناب قمرحسنین، میرحیدر حسین تکلمؔ، ثمرحسنین سمیت معروف منقبت وثناءخوانِ اہل بیت ؑجناب شجاع رضوی، مختار فتحپوری،دستہ امامیہ کے صاحب بیاض وسیم الحسن عابدی، امانت علی خان و غلام عباس خان (سونو مونو)، صبیب عابدی ، میثم زیدی، زاہد رضاو دیگر نے بھی بارگاہ معصومین ؑ میں اپنی منفردانداز میں نذرانہ عقیدت پیش کیا۔مجلس وحدت مسلمین کے مرکزی رہنما علامہ محمد امین شہیدی، صوبائی رہنماعلی حسین نقوی،ڈویژنل سیکریٹری جنرل مولانامحمد صادق جعفری، مولانا نشان حیدرساجدی، مولانا سید حمید حسین الحسینی ، علامہ مبشر حسن ،مولانا غلام عباس کمیلی،رضی حیدررضوی ،مختلف سماجی شخصیات اور مومنین کی بڑی تعدادمیں شرکت کی،مجلس وحدت مسلمین کے مرکزی رہنما علامہ محمد امین شہیدی نے جشن کی محفل سے خصوصی خطاب کیا، جشن کے اختتام پر ایام عزاءمیں شہرکراچی کی مختلف مجالس وجلوس ہائے عزاءمیں سکیورٹی کے بہترین انتظامات اور عزاداروں کی خدمت میں پیش پیش رہنے والے وحدت یوتھ کراچی کےرضا کاروں میں مجلس وحدت مسلمین کے رہنمامولانا صادق جعفری، مولانا نشان حیدر، مولاناغلام عباس کمیلی،مولانا حمید حسین الحسینی، میر تقی ظفر، احسن عباس رضوی اور رضی حیدرکے ہاتھوں اعزازی اسنادبھی تقسیم کی گئیں، جشن کےاختتام پر حاضرین کے لئے طعام کا اہتمام کیاگیاتھا۔

وحدت نیوز(ڈی آئی خان) مجلس وحدت مسلمین ضلع ڈیرہ اسماعیل خان کے سابق سیکریٹری جنرل  مولانا زاہدحسین جعفری طویل علالت کےبعد،بقضائے الہی، اس دار فناء کو وداع کرکے دار بقاء کی جانب، ابدی و دائمی اورنہ ختم ہونے والی زندگی کےسفر پر روانہ ہوگئے،مرحوم کے انتقال پر مجلس وحدت مسلمین پاکستان کے مرکزی سیکریٹری جنرل علامہ راجہ ناصرعباس جعفری،علامہ احمد اقبال رضوی، علامہ اقبال بہشتی ، علامہ غضنفر عباس نقوی سمیت دیگررہنماوں نے دلی افسوس اوررنج وغم کا اظہار کیا ہے،انہوں نے کہا کہ مولانا ذاہد حسین جعفری کی دینی وملی میدان میں خدمات قابل تحسین ہیں،مرحوم نےانتہائی شکل وقت اور حالات میں ڈیرہ اسماعیل خان میں دین کی خدمت کا فریضہ انجام دیا، مرحوم اوئل سے ہی مجلس وحدت مسلمین سے وابستہ تھے،رہنماوں نے کہاکہ یہ دنیا فانی ہےاو ر ہم سب نے بھی اسی منزل کیطرف ہی جانا ہے،ہم ڈی آئی خان کےمؤمنین، تنظیمی ساتھیوں، اورخصوصامرحوم کےخانوادہ ورشتہ داروں کواس سانحہ پر تعزیت و تسلیت عرض کرتے ہیں ،اللہ تعالی مرحوم کو اپنی رحمت واسعۃ میں جگہ عنایت فرمائے، ان کے بازماندگان کو صبر جمیل عطافرمائے، ہمیں انکےحق میں دعا، اور اپنے سفر آخرت کی تیاری کی توفیق عطافرمائے۔