وحدت نیوز:(چنیوٹ ) ضلع چنیوٹ میں برادر سید عاشق حسین بخاری ضلعی صدر مجلس وحدت مسلمین پاکستان ضلع چنیوٹ اور برادر مظہر عباس جعفری صوبائی سیکریٹری تنظیم سازی کی ذاتی کاوشوں اور الہی ذمہ داریوں کے پیش نظر ضلع چنیوٹ میں تنظیمی تربیتی فعالیت کا باقاعدہ آغاز ہوچکا ہے ۔

رہبر معظم انقلاب اسلامی حضرت آیت اللہ العظمیٰ سید علی خامنہ ای حفظہ اللہ کی شہرہ آفاق کتاب ( ہمارے آئمہ اور ان سیاسی جدوجہد) کا اسٹڈی سرکل (حلقہ مطالعہ) کا باقاعدہ آغاز چنیوٹ شہر میں ہوا جس میں ضلعی صدر و کابینہ کے معزز اراکین کے علاوہ صوبائی سیکریٹری تنظیم سازی نے شرکت کی ۔

ملک بھر میں صوبائی و ضلعی مسئولین اس تعلیمی تربیتی دروس کی جانب متوجہ ہوں اور اپنی ترجیحات میں اس کو شامل کریں تو یہ ایک بہت ہی سادہ اور آسان روش ہے جس سے ہمارے ضلعی اور یونٹس کے معزز اراکین کی تربیت ہوسکے گی ۔ اس سارے پروسیس میں صوبائی کابینہ کے معزز ممبران اپنی ذاتی کاوشوں اور سرپرستی سے اس کار خیر میں اپنا بہترین کردار ادا کرسکتے ہیں ۔

اللہ تعالی آپ سب کی توفیقات خیر میں اضافہ فرمائے ۔

برادر سید عاشق حسین بخاری ضلعی صدر مجلس وحدت مسلمین ضلع چنیوٹ نے کہا کہ اسٹڈی سرکل کا یہ سلسلہ ان شاءاللہ ضلع چنیوٹ میں جاری و ساری رہے گا ۔

برادر مظہر عباس جعفری صوبائی سیکریٹری تنظیم سازی کا کہنا تھا کہ اب اگلا اسٹڈی سرکل 9 اکتوبر بروز اتوار کو منعقد ہو گا ۔ ان شاءاللہ۔

وحدت نیوز:(برمنگھم ) 17 ستمبر بروز اتوار ادارہ معارف اسلام برمنگھم میں قائد شہید علامہ سید عارف حسین الحسینی رح کی 35 برسی مجلس وحدت المسلمین برطانیہ کے اہتمام شایان شان طریقے سے منعقد کی گئی۔

اس اجتماع میں برطانیہ کے طول عرض سے مومنین کے علاوہ زعماء و علماء ملت جعفریہ نے بھرپور شرکت فرمائی۔

سٹیج سیکرٹری کے فرائض مجلس وحدت المسلمین برطانیہ کی مرکزی کمیٹی کے رکن جناب سید وجاہت علی الحسینی نے سرانجام دیئے۔ سید مبشر حسین نقوی نے قائد شہید کو خراج عقیدت پیش کرنے کے لئے ایک ترانہ پیش کیا اور نوجوان علی حسین نے انگلش شاعری میں قائد شہید کو خراج عقیدت پیش کیا۔

اس اجتماع سے ایم ڈبلیو ایم برطانیہ کے صدر جناب حجت الاسلام مولانا ابرار حسین الحسینی، برمنگھم کے ریزیڈنٹ عالم حجت الاسلام مولانا سید ظفر عباس نقوی، حجت الاسلام مولانا مشرف حسین الحسینی، ہدایت ٹی وی کے ڈائریکٹر اور مجلس علماء امامیہ برطانیہ کے صدر جناب حجت الاسلام علامہ ڈاکٹر غلام حسین عدیل اور جناب حجت الاسلام علامہ غلام حر شبیری اور انگریزی زبان کے مقرر مولانا علی الھادی نے خطاب فرمایا۔

تمام مقررین نے قائد شہید کے حالات زندگی اور افکار کردار پر مفصل گفتگو کی اور ایم ڈبلیو ایم برطانیہ کی طرف سے دیار غیر میں اس طرح کے روحانی اور انقلابی جتماع منعقد کرنے کو سراہا ۔ اجتماع میں ایم ڈبلیو ایم پاکستان کے چیئرمین قائد وحدت ناصر ملت عالی جناب حجت الاسلام علامہ راجہ ناصر عباس جعفری صاحب حفظ اللہ کا پیغام بھی بڑی سکرین پر دیکھایا گیا اور قائد شہید علامہ سید عارف حسین الحسینی رح پر ایک ڈاکومنٹری فلم بھی دکھائی گئی۔

آخر میں دعا امام زمانہ عج سے اجتماع کا اختتام ھوا ۔ ان تمام انتظامات کرنے پر ایم ڈبلیو ایم برطانیہ کے صدر و علماء نے خصوصی طور پر برطانیہ مڈلینڈ برمنگھم اور سینئر نائب صدر ایم ڈبلیو ایم برطانیہ جناب آغا محمد جواد ہزارہ ہمراہ دوستان کا تہہ دل سے شکریہ ادا کیا جن کی کاوشوں سے یہ اجتماع کامیاب ہوا ۔

وحدت نیوز:(ملتان) مجلس وحدت مسلمین عزاداری ونگ جنوبی پنجاب کے صدر و ممبر ڈویژنل امن کمیٹی ملتان انجینئر سخاوت علی سیال نے کہا ہے کہ حکومت کی غریب کش پالیسی، جبر اور ناانصافی نامنظور ہے، پٹرول کی قیمت میں اضافے کو مسترد کرتے ہیں، پٹرولیم مصنوعات کی قیمتوں میں اضافے کا اثر براہ راست روزمرہ استعمال کی اشیائے ضرورت پر پڑے گا۔ جبکہ مہنگائی نے پہلے ہی عوام کا جینا محال کر رکھا ہے۔ حکومت کا کام غریب اور متوسط طبقے کو ریلیف دینا ہوتا ہے جبکہ یہاں برعکس ہورہا ہے۔

ان خیالات کا اظہار انہوں نے صوبائی کابینہ کے اجلاس سے خطاب کرتے ہوئے کیا۔ انجینئر سخاوت علی کا مزید کہنا تھا کہ رات کے اندھیرے میں عوام پر شب خون مارنے والے عوام سے زندگی بسر کرنے کا حق چھیننا چاہتے ہیں، اشرافیہ اور ملک پر قابض حکمران کسی عذاب سے کم نہیں ہیں، اگر یہی صورتحال رہی تو عوام حکمرانوں سے خود حساب لیں گے۔

اس موقع پر صوبائی جنرل سیکریٹری عون رضا انجم ایڈووکیٹ، سردار صفدر حسین خان، عامر عباس ایڈووکیٹ، مرزا وجاہت علی، سید ظفر عباس زیدی اور دیگر موجود تھے۔

وحدت نیوز:(کراچی) مجلس وحدت مسلمین پاکستان صوبہ سندھ کے سیکریٹری سیاسیات سید علی حسین نقوی نے کہا ہے کہ فرقہ واریت پھیلانے والے تمام عناصر دین کے بھی دشمن اور وطن کے بھی دشمن ہیں۔

سوشل میڈیا پر جاری اپنے بیان میں انہوں نے کہا کہ کیا ہم سب ارض پاک میں ایک دوسرے کے عقیدے کا احترام کرتے ہوئے امن و آتشی کے ساتھ نہیں رہ سکتے، کیا ایک دوسرے کو کافر مرتد مردود کہنے سے ہم دین کی کوئی بڑی خدمت کررہے ہیں یا وطن عزیز کی تعمیر وترقی کررہے ہیں۔

علی حسین نقوی کا کہنا تھا کہ تمام مکاتب فکر کے علماء کرام سے میں ہاتھ جوڑ کر گزارش کرتا ہوں کہ خدا کے لئے ایک دوسرے سے محبت و احترام کا درس دیں امت کو جوڑنے اور متحد ہونے کا درس دیں، دین محمدی ہمیں محبت و امن کا درس دیتا ہے، اسلام سلامتی کا دین ہے، خدا کے لئے تفریق اور تفرقہ کے درس دینے والے عناصر کی حوصلہ شکنی کریں تاکہ وطن عزیز میں محبت امن اور رواداری کا ماحول فروغ پا سکے۔