وحدت نیوز(لاڑکانہ) گلگت بلتستان میں وفاقی وصوبائی حکومت کی نااہلی اور مہنگائی ، لوڈشیڈنگ میں ہو شربہ اضافے اور گندم پر دی جانے والی سبسڈی کے خاتمے کے خلاف علامہ راجہ ناصر عباس جعفری کی اپیل پر لاڑکانہ میں بعد نماز جمعہ ایم ڈبلیو ایم کے زیر اہتمام مرکزی جامع مسجد و امام بارگاہ جعفریہ کے سامنے احتجاجی مظاہرہ کیا گیا، احتجاجی مظاہرین سے خطاب کرتے ہوئے ضلعی سیکریٹری جنرل طارق حسین بدوی نے کہاکہ گلگت بلتستان کے عوام کو بنیادی حقوق سے محروم رکھنا حکمرانوں کی فرعونیت کی عکاسی کرتا ہے، مہنگائی ، لوڈشیڈنگ،کرپشن اور گندم کی آسمان سے باتیں کر تی قیمتوں نے عوام کا جینا محال کر دیا ہے، مہدی شاہ گلگت بلتستان کے نااہل ترین وزیر اعلیٰ ثابت ہوئے ہیں ، جو کہ آج تک اپنے صوبے کے عوام کے مسائل سے حل کے لئے ایک قدم بھی نہ اٹھا سکے۔ طارق بدوی نے حکومت کو متنبہ کیا کہ اگر عوامی ایکشن کمیٹی کے چارٹر آف ڈیمانڈ کو جلد از جلد تسلیم نہ کیا تو مجلس وحدت مسلمین ملک بھر میں احتجاج کا دائرہ کار بڑھا دے گی۔واضح رہے کہ لاڑکانہ کی تحصیل رتوڈیرو اور ڈوکری میں بھی اہلیان گلگت بلتستان سے اظہار یکجہتی کے لئے احتجاج کیا گیا۔

وحدت نیوز(ٹنڈو محمد خان) مجلس وحدت مسلمین پاکستان ضلع ٹنڈومحمد خان کے زیر اہتمام علامہ راجہ ناصر عباس جعفری کی اپیل پر گلگت بلتستان میں گندم پر سبسڈی کے خاتمے کے خلاف احتجاجی ریلی نکالی گئی، جس کی قیادت ضلعی سیکریٹری جنرل محب علی بھٹو نے کی ، جب کہ صوبائی ڈپٹی سیکریٹری جنرل عالم کربلائی اور صوبائی سیکریٹری تنظیم سازی یعقوب حسینی نے خصوصی شرکت کی،ریلی میں  شریک بڑی تعداد میں مظاہرین نے ہاتھوں میں بینر اور پلے کارڈ اٹھا رکھے تھے جن پر گلگت بلتستان کے محروم عوام سے اظہار یکجہتی اور وفاقی اور صوبائی کے استحصالی رویئے کے خلاف نعرے درج تھے،ریلی شہر کے گشت کر تے ہوئے پریس کلب پہنچی تو مظاہرین تین روزہ علامتی بھوک ہڑتال پر بیٹھ گئے ، اس موقع پر خطاب کر تے ہوئے مقررین نے کہا کہ گلگت بلتستان کے عوام کے ساتھ وفاقی اور صوبائی حکومت کا سوتیلی ماں جیسا سلوک انتہائی افسوس ناک ہے، عوام کو بنیادی حقوق سے محروم رکھنازیادتی ہے، عوامی ایکشن  کمیٹی گلگت بلتستان کی جانب سے پیش کردہ چارٹرڈ آف ڈیمانڈ کی بھر پور تائید کرتے ہیں۔

وحدت نیوز(لاہور) مجلس وحدت مسلمین،جماعت اسلامی،پاکستان تحریک انصاف،پاکستان عوامی تحریک کے رہنماوُں سیدناصرعباس شیرازی ایڈووکیٹ ، لیاقت بلوچ،اعجاز چوہدری اور قاضی فیض السلام نے پریس کلب لاہور میں مشترکہ پریس کانفرنس کرتے ہوئے گلگت بلتستان کے عوامی ایکشن کمیٹی کے گندم سبسڈی کے خاتمے کیخلاف احتجاجی دھرنوں اور گذشتہ پانچ روز سے جاری شٹر ڈاوُن ہڑتال کی مکمل حمایت کا اعلان کرتے ہوئے وفاقی حکومت سے مطالبہ کیا کہ وہ فی الفور گلگت بلتستان کے عوام کے مطالبات پر عمل کرتے گندم سبسڈی بحال کیا جائے جو اس علاقے کے عوام کا بنیادی حق ہیں اگر حکومت نے گلگت بلتستان کے عوامی مطالبات کو نذر انداز کیا تو اس پریس کانفرنس میں شریک تمام قومی جماعتیں پارلیمنٹ ہاوُس کے سامنے دھرنا دینگے پریس کانفرنس میں قومی جماعتوں کے رہنماوُں نے اس علاقے کی اہمیت اور تاریخ پر روشنی ڈالتے ہوئے کہا کہ گلگت بلتستان پاکستان کا وہ جنت نظیر خطہ ہے کہ جس نے 1948ء میں اپنے زور بازو سے ڈوگرہ راج سے آذادی حاصل کرکے غیرمشروط طور پر پاکستان سے الحاق کا اعلان کیا ۔دشوار گزار پہاڑوں کی یہ سر زمین دنیا کے تین بلند ترین کوہستانی سلسلوں ہمالیہ ، قراقرم،اور ہندوکش کا سنگم ہونے کی وجہ سے دنیا کی چھت کہلاتی ہے۔ وطن عزیز کو سیراب کرنے والے پانی کا اصل منبع اسی سر زمین کے گلیشیرز ہیں۔محققین کے مطابق صرف پانی سے 80 ہزار میگاواٹ بجلی پیدا کرنے کی استعداد اسی خطے میں موجود ہے سونا، تانباتو یہاں کے دریاؤں سے عام نکالا جاتا ہے جبکہ د یگر معدنی ذخائر کا تخمینہ حیران کردینے والا ہے پاکستان کے اہم دوست چین سے واحد زمین راستہ، کارگل ،دراس اور سیاچن جیسے حساس محاذوں کا حامل یہ خطہ وطن عزیز کا فطری دفاع ہے۔ا تنے پرامن عوام کہ پورے صوبے کی جیلوں میں گرفتار افراد کی تعداد سینکڑوں میں نہیں ہے۔ بہترین سیاحتی ثقافت کا حامل یہ علاقہ وطن عز یز کی کئی مشکلات کو حل کر سکتا ہے۔لیکن بد قسمتی سے یہ سر زمین بے آئین آج بھی بنیادی حقوق سے محروم ہے نہ یہاں کوئی کشمیرطرز پر آزاد پارلیمان ہے نہ دیگر صوبوں کی طرح ایک مکمل صوبے کے اختیارات۔ حد تو یہ ہے کہ قبائلی علاقہ جا ت کو پارلیمنٹ میں حاصل نمائندگی کے حق جیساحق بھی اس خطے کے عوام کو حاصل نہیں ہے۔ستم بالائے ستم یہ ہے کہ گلگت بلتستان کے محروم عوام کو چار دہا ئیوں سے حاصل گندم کی سبسڈی کے حق کو بھی واپس لینے کا اعلان کردیا گیاہے جو سراسر نا انصافی اور ظلم کے مترادف ہے آئین پاکستان بھی محروم علاقو ں کیلئے خصوصی رعایتوں کی تاکید کرتاہے جبکہ جنیوا کنونشن کے تحت بھی گندم سبسڈی اس خطے کے عوام کے بنیادی حقوق میں سے ایک ہے۔لہذا گلگت بلتستان کے عوام نے آٹا اور گندم سبسڈی بحالی کیلئے جو عظیم الشان گلگت بلتستان عوامی ایکشن کمیٹی کے نام سے تحریک شروع کہ ہے وطن عزیز کے عوام اور قومی جماعتیں اس پُر امن احتجاج میں گلگت بلتستان کے عوام کے ساتھ ہیں اور اس پُر امن تحریک میں اُنکی بھرپور حمایت کا اعلان کرتے ہیںاور حسب ضرورت گلگت بلتستان کے عوام کی صدائے احتجاج کو ملک کے طول وعرض میں پھیلانے اور اقتدار کے ایوانوں تک پہنچانے کیلئے بھی ضروری وسائل استعمال کرینگے یہ امرانسانی خوش آئندہے کہ گلگت بلتستان عوامی ایکشن کمیٹی نے علاقائیت ، زبان، اور فرقہ واریت کی شناختوں کو ختم کرکے لوگوں کو اُن کے حقوق کی بنیاد پر متحد کیا ہے جو خطے اور وطن عزیز کیلئے انتہائی نیک شگون ہے۔

وحدت نیوز(اسلام آباد) مجلس وحدت مسلمین پاکستان کے مرکزی سیکریڑی تبلیغات علامہ اعجاز بہشتی نے وحدت سیکریٹریٹ سے جاری کردہ بیان میں کہا ہے کہ گلگت بلتستان میں چار روز سے دھرنا جاری ہے حکومت کو چاہیے کہ وہ فوری طور پر عوامی ایکشن کمیٹی کے چارٹر آف ڈیمانڈ کو تسلیم کریں اورگندم سبسڈی کو بحال کریں۔گلگت بلتستان کے غیور اور محب وطن عوام چارر روز سے اپنے جائز حقوق کے لئے پُر امن دھرنا جاری رکھا ہوا ہے جو کہ گلگت بلتستان کا تاریخی دھرنا ہے حکومت کو چاہیے کہ عوام کے صبر کا امتحان نہ لیں اور مطالبات کو فوری تسلیم کریں۔ان کا کہنا تھا کہ گلگت بلتستان کے عوام نے آئینی حقوق سے محروم ہونے کے باوجود ہر مشکل وقت میں وطن عزیز کے لئے قربانیاں دی ہے اور گلگت بلتستان کے جوانان پاکستان کے ہر محاز پر دشمن سے نبرد آزما ہے مگر افسوس کہ حکومت پاکستان نے چار روز گزنے کے باوجود گلگت بلتستان کے عوام کے جائز اور آئینی حقوق کو تسلیم نہیں کیا۔

علامہ اعجاز حسین بہشتی کا کہنا تھا کہ گلگت بلتستان کے عوام کے حوصلے کے ٹو کے مانند بلند اور پُر عزم ہے وہ اپنے جائز مطالبات کے تسلیم ہونے تک میدان میں رہینگے ۔حکومت پاکستان نے ہمیشہ گلگت بلتستان کے ساتھ سوتیلا سلوک کیا ہے گلگت بلتستان کے پاکستان سے الحاق ہوئے ۶۶ سال گزر چکے ہیں مگر ابھی تک آئینی حقوق سے محروم ہے اب نوبت یہاں تک آگئی ہے کہ عوام سے اُس کے بنیادی حقوق بھی غصب کیئے جارہے ہیں جو کہ لمحہ فکریہ ہے۔ان کا مزید کہنا تھا کہ گلگت بلتستان جغرافیائی طور پر نہایت اہم خطہ ہے اور یہ پاک چین رابطے کا واحد زمینی راستہ بھی ہے جو چار روز سے دھرنےکے باعث بند ہے ۔