وحدت نیوز( اصفہان) حکومت ہوش کے ناخن لے، ہم ملت کے غیور فرزندان، علمائے کرام اور بالخصوص سید ناصر عباس شیرازی ایڈووکیٹ کی جبری گمشدگی کی پرزور مذمت کرتے ہیں، ان خیالات کا اظہار مجلس وحدت مسلمین شعبہ قم المقدس کے رہنما مولانا رضوان جعفری نے المصطفی انٹرنیشنل یونیورسٹی شعبہ اصفہان کے طلاب سے گفتگو کرتے ہوئے کیا، انہوں نے اسیران ملت اور بالخصوص مجلس وحدت مسلمین کے مرکزی ڈپٹی سیکرٹری سید ناصر عباس شیرازی کی جبری گمشدگی کی پرزور مذمت کی، انھوں نے کہا کہ ہم پاکستان کے وفادار شہری ہیں، ہمارے آباؤ اجداد نے اس وطن کو جان کی قربانیاں دے کر حاصل کیا، موجودہ حکومت انتقام کی سیاست کر رہی ہے، ملت تشیع کو مجبور نہ کیا جائے کہ ہم اپنے اسیران  بالخصوص سید ناصر عباس شیرازی  کی بازیابی کی لیے انتہائی قدم اٹھانے پر مجبور ہو جائیں، اس موقع پہ تمام طلاب کرام نے ہر قسم کی تحریک کی حمایت اور مکمل تعاون کا اعلان کیا، مزید انھوں نے طلاب عظام کو نظام ولایت کے ہاتھوں داعش کی عراق اور شام سے مکمل خاتمے کی مبارک باد پیش کی۔

وحدت نیوز(اسلام آباد) خیر العمل ویلفیئر اینڈ ڈیولپمنٹ ٹرسٹ شعبہ فلاح وبہبودمجلس وحدت مسلمین پاکستان کے چیئرمین علامہ باقرعباس زیدی نے کہا ہے کہ ر بیع الاول کا مقدس مہینہ آقائے دوجہاں رحمۃللعالمین ﷺ کی ذات گرامی سے متعلق ہے، اس مبارک مہینہ میں عاشقان رسول ﷺ پیغمبر رحمت سے اپنے عشق و مودت کا اظہار کرتے ہیں اسی مناسبت سے خیر العمل ویلفیئر اینڈ ڈیولپمنٹ ٹرسٹ کی جانب سے  ملک بھر میں عید میلاد النبی ﷺ کے جلوسوں پر پھولوں کی پتیاں نچھاور کریں گے اوراس پر مسرت موقع پربرادران اہل سنت کیلئے  سبیلیں لگائیں گے اور دس سے سترہ ربیع الاول تک ہفتہ وحدت منائیں گے۔

وحدت نیوز( کراچی) مجلس وحدت مسلمین پاکستان صوبہ سندہ کے سیکریٹری جنرل علامہ مقصودعلی ڈومکی نے کہا ہے کہ ربیع الاول کا مقدس مہینہ سیدالانبیاء ﷺ کی ذات گرامی سے منسوب ہے ، ہمیں اس مہینے میں اپنے کردار کو سیرت نبوی ﷺ کی روشنی میں ڈھالنا ہوگا۔ سیرت نبوی، عصر حاضر کی تاریکیوں میں نور کی کرن بن کر ہمارے کردار کی تعمیر کرے گا۔

انہوں نے کہا کہ ماہ ربیع الاول کے موقع پر عیدمیلاد النبی ﷺ اور ھفتہ وحدت کی مناسبت سے سندہ کے مختلف اضلاع میں خصوصی تقاریب منعقد کی جائیں گی،انہوں نے کہا کہ ھفتہ وحدت کے موقع پر ہمیںشیعہ سنی وحدت کے سلسلے میں خصوصی تاکید کرنا ہوگی، کیونکہ اسلام دشمن سامراجی قوتیں شیعہ سنی وحدت سے خائف ہیں، اسی لئے مسلمانوں کے درمیان نفرت کی آگ جلانا اسلام دشمن سامراج کا پسندیدہ مشغلہ ہے۔ حضرت امام خمینی ؒ کے فرمان کی روشنی میں ھفتہ وحدت کو اتحاد بین المسلمین کے طور پر منایا جائے گا۔آج امت مسلمہ کو اسلام دشمنوں کی جانب سے نت نئی سازشوں کا سامنا ہے۔ داعش کی شکست کے بعد شیطانی قوتیں کسی نئی سازش کی تیاری میں مصروف ہیں۔ قوموں کی بیداری اور وحدت دشمن کے عزائم خاک میں ملادے گا۔
             
انہوں نے کہا کہ مجلس وحدت مسلمین کے مرکزی ڈپٹی سیکریٹری جنرل سید ناصر عباس شیرازی کی رہائی کے سلسلے میں ریاستی اداروں کو اپنی ذمہ داریاں پورا کرنا ہوں گی۔ ریاست کا بنیادی فرائض میں شامل ہے کہ وہ شہریوں کے جان و مال کا تحفظ یقینی بنائے۔

وحدت نیوز(لاہور) مجلس وحدت مسلمین پنجاب کے زیر اہتمام مرکزی ڈپٹی سیکرٹری جنرل سید ناصر شیرازی کی جبری گمشدگی اور عدم بازیابی کیخلاف حتمی لائحہ عمل طے کرنے کے لئے ملک بھر کی شیعہ جماعتوں اور تنظیموں کی شیعہ آل پارٹیر کانفرنس آج(25نومبر) کو قومی مرکزی شاہ جمال لاہور میں منعقد ہوگی،ترجمان مجلس وحدت مسلمین پنجاب راجہ امجد حسین  کےمطابق کانفرنس میں چاروں صوبوں آزاد کشمیر سمیت گلگت بلتستان سے شیعہ جماعتوں اور تنظیموں کے رہنما شریک ہونگے،اجلاس کی صدارت مجلس وحدت مسلمین پاکستان کے سربراہ علامہ راجہ ناصر عباس جعفری کرینگے،اجلاس کے بعد سہ پہر چار بجے شرکاء کانفرنس کے ہمراہ سربراہ مجلس وحدت مسلمین علامہ راجہ ناصر عباس جعفری اہم پریس کانفرنس کے ذریعے آئندہ کے لائحہ عمل کا اعلان کرینگے۔

وحدت نیوز(تہران) رہبر انقلاب اسلامی آیت اللہ العظمٰی سید علی خامنہ ای نے کہا ہے کہ اسلامی جمہوریہ ایران عالمی سامراج اور صیہونی محاذ کی جانب سے مسلمانوں کے درمیان جنگ اور تنازعات پیدا کرنے کی سازشوں کا ڈٹ کر مقابلہ کر رہا ہے اور حکم الٰہی سے وہ اس جنگ میں کامیاب بھی رہے گا۔ جمعرات کی صبح محبان اہلبیت اور تکفیریوں کے مسئلہ کے زیر عنواں تہران میں منعقدہ عالمی کانفرنس کے شرکاء اور مندوبین سے خطاب کرتے ہوئے رہبر انقلاب اسلامی نے کہا کہ اگرچہ عراق اور شام میں داعش کا کام تمام ہوگیا ہے، لیکن دشمن کی چالوں سے پوری طرح ہوشیار رہنے کی ضرورت ہے۔ آیت اللہ العظمٰی سید علی خامنہ ای نے کہا کہ امریکہ، صیہونیزم اور ان کے دم چھلے، اسلام دشمنی سے باز نہیں آئیں گے اور ہوسکتا ہے کہ وہ خطے میں داعش اور اسی طرح کی دوسری سازشیں تیار اور ان پر عملدرآمد کی کوشش کریں۔ رہبر انقلاب اسلامی نے کہا کہ عالم اسلام، عالم کفر و استکبار کا مقابلہ کرنے کی پوری طاقت رکھتا ہے اور اسلامی شریعت کے مکمل نفاذ کا خواہاں ایران، دشمنان اسلام کے خلاف کامیابی کے حصول کا ذریعہ ثابت ہوسکتا ہے۔

آیت اللہ العظمٰی سید علی خامنہ ای نے پچھلے چالیس برس کے دوران ایران کے خلاف امریکہ اور صیہونیزم کی سازشوں، دباؤ اور پابندیوں کی جانب اشارہ کرتے ہوئے صراحت کے ساتھ کہا کہ دنیا میں جہاں کہیں بھی کفر و استکبار کے مقابلے میں مدد کی ضرورت ہوگی، اسلامی جمہوریہ ایران مدد کرے گا اور اس معاملے میں کسی بھی چیز کو خاطر میں نہیں لائے گا۔ رہبر انقلاب اسلامی نے مسئلہ فلسطین کو عالم اسلام کا اولین مسئلہ قرار دیتے ہوئے کہا کہ مسئلہ فلسطین ہی دشمن پر غلبہ پانے کی کنجی ہے، کیونکہ کفر، سامراج اور صیہونیزم کے محاذ نے فلسطین جیسے اسلامی ملک پر غاصبانہ قبضہ کرکے، اسے خطے کے ملکوں کی سلامتی میں رخنہ اندازی کا اڈہ بنا رکھا ہے، لہذا اس سرطانی پھوڑے اسرائیل کا مقابلہ کرنا ضروری ہے۔ آیت اللہ العظمی سید علی خامنہ ای نے کہا کہ مسلمانوں کے درمیان اختلافات اور تنازعات کو ہوا دینے کا اصل مقصد اسرائیل کے گرد سکیورٹی حصار قائم کرنا ہے۔ رہبر انقلاب اسلامی نے کہا کہ جس دن فلسطین، فلسطینی عوام کی آغوش میں واپس آجائے گا، اس دن عالمی سامراج کی کمر ٹوٹ جائے گی اور ہم اس مقصد کے حصول کی کوشش کر رہے ہیں۔

وحدت نیوز(لاہور) مجلس وحدت مسلمین پاکستان کے سربراہ علامہ راجہ ناصر عباس جعفری نےپشاور حیات آباد دھماکے کی شدید مذمت کرتے ہوئے کہا کہ ایڈیشنل آئی جی کے پی کے شہید محمد اشرف نور اور ان کے محافظ کی شہادت پر پوری قوم سوگوار ہے،وطن عزیز کی سلامتی کے لئے گلگت بلتستان کا ایک اور سپوت اپنی جان نچھاور کر گیا،اس المناک سانحے پر خانوادہ شہید اور گلگت بلتستان کے غیور عوام کو تعزیت پیش کرتے ہیں،انسانیت دشمن تکفیری دہشتگردوں کیخلاف قوم کو متحد ہونا ہوگا،دہشتگردی کے اصل مراکز تکفیری مداس ہیں،اس کیخلاف حکومت مصلحت پسندی کا شکار ہے،جب تک دہشتگردوں کے سیاسی سرپرستوں کیخلاف گھیرا تنگ نہیں کیا جاتا یہ سلسلہ جاری رہیگا،کنفیوژ اور نااہل حکمرانوں کی سرپرستی میں دہشتگردی پر قابو پانا ممکن نہیں۔