وحدت نیوز(قم) مجلس وحدت مسلمین قم کے مسئول حجۃ الاسلام محمد موسٰی حسینی نے اپنے ایک بیان میں کہا ہے کہ 10 جنوری 2013ء کو علمدار روڈ کوئٹہ میں انسانی دشمنوں نے یکے بعد دیگرے دو دھماکے کروائے۔ ان دھماکوں کے نتیجے میں 100 سے زائد اہل تشیع شہید اور 200 کے قریب زخمی ہوئے۔ ملک، ملت اور انسانیت کے دشمن ان دھماکوں پر فتح کا جشن منا رہے تھے اور اس وقت کے فرعون صفت وزیراعلٰی ریسانی نے شہداء کے گھروں کو یہ پیغام بھیجا تھا کہ اگر زیادہ رونا دھونا ہے تو میں تمہارے لئے ٹشو پیپر کے ٹرک بھیج دوں۔ یہ زخم اور دکھ ہمیشہ تازہ رہے گا، دشمنوں کے حملے اور طعنے ہم کبھی نہیں بھولیں گے، اس ظلم کے خلاف کوئٹہ کے غیور اور محب وطن لوگوں نے بصیرت اور درایت سے کام لیتے ہوئے، پُرامن دھرنے کا اعلان کیا اور اپنے پیاروں کی لاشوں کے ساتھ گھروں سے باہر نکل آئے، وہ سٹرک پر بیٹھ کر سراپا احتجاج بن گئے، ان کی آواز پر لبیک کہتے ہوئے پورے پاکستان کے اہل تشیع گھروں سے باہر نکل آئے، یہ ایک تاریخی اور حقیقی پرامن دھرنا تھا۔ اس دھرنے نے رئیسانی حکومت کو گرا کر دہشت گردوں اور اُن کے سہولت کاروں کے چھکے چھڑا دیئے، یہ پاکستان کی تاریخ کا ایک مثالی احتجاج تھا، جسے ہمیشہ یاد رکھا جائے گا۔ حجۃ الاسلام محمد موسٰی حسینی نے کہا کہ 10 جنوری 2013ء کا تاریخی دھرنا ہمارے ملی استقلال  کا مظہر ہے۔

وحدت نیوز(لاہور) مجلس وحدت مسلمین پاکستان کے مرکزی سیکرٹری جنرل علامہ راجہ ناصر عباس جعفری نے کہا ہے کہ پیٹرولیم مصنوعات کی قیمتوں میں غیر معمولی اضافہ عوام کی برداشت سے باہر ہے۔حکومت نے نئے سال کے پہلے دن عوام کو مہنگائی کی نوید سناکر اپنے آئندہ کے لائحہ عمل سے باخبر کیا ہے۔حکومت کا یہ فیصلہ واضح کرتا ہے کے انہیں عوامی مشکلات سے کوئی سروکار نہیں۔پیٹرول کی قیمتوں میں اضافہ اشیائے خورد ونوش سمیت ہر شے کو متاثر کرتا ہے۔متوسط طبقہ پہلے ہی ان گنت مشکلات کا شکار ہے۔حکومت کی ناکام پالیسیاں رہی سہی کسر نکال رہی ہیں۔عوام ملک میں بڑھتی ہوئی مہنگائی کے کسی طور متحمل نہیں۔جمہوریت عوامی حکومت کا نام ہے۔عوام پر زندگی تنگ کرنے کو جمہوریت نہیں کہتے۔ پیٹرولیم مصنوعات کی قیمتوں میں اضافے کا فیصلہ غیر دانشمندانہ اور ظالمانہ ہے۔عوام اس فیصلے کو تسلیم نہیں کریں گے۔انہوں نے اپوزیشن جماعتوں سے مطالبہ کیا کہ وہ پیٹرولیم مصنوعات میں اضافے کے فیصلے کو واپس لینے کے لیے حکومت پر دباؤ ڈالیں۔

وحدت نیوز(لاہور) ن لیگ کو ماڈل ٹاون کے شہیدوں کے لہو کا اور ملکی وسائل کے لوٹ مار کا حساب دینا ہوگا،ملک دشمنوں کے ہر سازش کو قومی یکجہتی سے ناکام بنائیں گے،فاٹا اور گلگت بلتستان کے حقوق کے مخالفین وطن دوست نہیں،دہشتگردی کیخلاف جنگ میں سب سے بڑی رکاوٹ دہشتگردوں کے سیاسی سرپرست ہیں جو تاحال حکمرانوں کی مصلحت پسندانہ پالیسیوں کے سبب آزاد ہیں،ایم ڈبلیوایم آنے والے الیکشن میں اپنا بھر پور کردار ادا کریگی،پنجاب میں حکمران جماعت کو سیاسی انتقامی کاروائیوں کا حساب آنے والے الیکشن میں سود سمیت چکا دینگے،ان خیالات کا اظہار مجلس وحدت مسلمین پاکستان کے مرکزی سیکرٹری سیاسیات سید اسد عباس نقوی نے سیاسی کونسل کے اجلاس سے خطاب میں کیا۔

انہوں نے کہا کہ گلگت بلتستان اور فاٹا کے عوام کو قومی دھارے میں شامل کرنا ملکی استحکام کے لئے ناگزیر ہوچکا ہے،اس ایشو پر سیاست کرنے والے ملکی سلامتی کے ساتھ مخلص نہیں،گلگت بلتستان میں عوامی ایکشن کمیٹی کے مطالبات کی ہم بھر پور حمایت کرتے ہیں،انہوں نے کہا کہ ملکی سلامتی کو درپیش خطرات سے نمٹنے کے لئے قومی یکجہتی اور وحدت کو فروغ دینا ہوگا،ہمیں امریکہ اور اس کے اتحادیوں کو خیر باد کہنے کا وقت آگیا ہے،مضبوط خارجہ پالیسی کے ذریعے پاکستان کو اس چنگل سے نکالنا سیاسی جماعتوں اور قومی سلامتی کے اداروں کا فریضہ ہے۔

وحدت نیوز(کراچی) مجلس وحدت مسلمین کراچی ڈویژن کے وفدنے  ڈویژنل سیکریٹری جنرل علامہ محمد صادق جعفری کی سربراہی میں شہدائےوحدت کراچی کی چوتھی برسی کے موقع پر ان کے گھر جاکر اہل خانہ سے تعزیت کا اظہاراورقبور شہداءپر  فاتحہ خوانی کی ،شہید ِ وحدت صفدرعباس کے گھر اہل خانہ اور تنظیمی ذمہ داران سے گفتگو کرتے ہوئے علامہ محمد صادق جعفری نے کہا کہ شہدائے دین  اسلام کی حیات وشہادت  دونوں ہمارے لئے مشعل راہ ہیں، ہمیں کسی صورت ان پاکیزہ شہداءکے راستے کو فراموش نہیں ہونے دینا چاہئے، شہدائے وحدت ملت جعفریہ کی سیاسی واجتماعی شناخت کے حصول کی راہ کے   عظیم شہید ہیں ، جنہوں نے زمانے کے فرعونوں ، نمرودوں اور یزیدوں کو للکاراتھا ۔

انہوں نے مزید کہا کہ کوئی بھی قوم سیاسی واجتماعی میدان میں مضبوط بنیادوں پر کھڑے ہوئے بغیر ظالم وجابر حکمرانوں سے اپنے جائز حقوق حاصل نہیں کرسکتی ، انہوں نے کہاکہ شہدائے وحدت کی یاد کو زندہ رکھتے ہوئے سالہائے گذشتہ کی طرح اس سال بھی برسی کا مرکزی اجتماع چشتی نگر میں آئندہ ہفتے انشاءاللہ منعقد ہوگا، اس موقع پر ڈویژنل ڈپٹی سیکریٹری جنرل علامہ مبشر حسن، آرگنائزر ضلع شرقی علامہ احسان دانش، ڈویژنل پولیٹیکل سیکریٹری میر تقی ظفر،سیکریٹری وحدت یوتھ کراچی کاظم عباس، ڈویژنل سیکریٹری اطلاعات احسن عباس رضوی اور ایم ڈبلیوایم چشتی نگر یونٹ کے ذمہ دارا ن بھی ہمراہ تھے۔

وحدت نیوز (لاہور) مجلس وحدت مسلمین پاکستان کے مرکزی سیکریٹری جنرل علامہ راجہ ناصرعباس جعفری نے ڈاکٹر طاہر القادری کی دعوت پر پاکستان عوامی تحریک کے زیر اہتمام سانحہ ماڈل ٹاون  اور جسٹس باقر نجفی کمیشن رپورٹ پر عمل درآمد کے حوالے سے منہاج سیکریٹریٹ میں منعقدہ آل پارٹیز کانفرنس کے شرکاءسے خطاب کرتے ہوئے کہا کہ  ہم سانحہ ماڈل ٹاون کے روز اوّل سے شہداءکے مظلوم وارثوں  کا ساتھ دیتے آئے ہیں ،انشااللہ آئندہ بھی مظلومین کی حمایت جاری رکھیں گے،ہم اِسی جرم کی پاداش میں اُسی دن سے پنجاب کے ظالم حکمرانوں کے مظالم کا شکار رہے جو کہ تا حال جاری ہے،ہمیں پنجاب اور گلگت بلتستان میں جہاں ن لیگ کی حکومت ہے بدترین سیاسی انتقام کا نشانہ بنایا جارہا ہے۔

انہوں نے کہا کہ مجلس وحدت مسلمین مسلکی تعصب سے بالاتر ہو کر تمام مذاہب ، مسالک اور ادیان کے مظلوموں پر ظلم کے خلاف آواز احتجاج بلند کرتی ہے،ہمارے نذدیک ماڈل ٹاون میں ہونے والی ریاستی دہشت گردی پاکستان کی تاریخ کا بدترین واقعہ ہے، جس میں نہتی خواتین کو منہ پر گولیاں ماری گئیں جن میں ایک خاتون بچے کو جنم دینے والی تھی، یہ ظالم حکمران نا فقط ان خواتین اورمردوں کے قاتل ہیں بلکہ اس ننھی سے جان جو ابھی اس دنیا میں آئی بھی نہیں تھے اس کے بھی قاتل ہیں، انہوں نے کہا کہ دنیا کی کوئی بھی طاقت ہمیں مظلومین کی حمایت سے  نہیں روک سکتی۔ سانحہ ماڈل ٹاون کے ذمہ داروں کو مزید مہلت دینا شہدا ءکے خون کیساتھ غداری اور قانون کی پائمالی ہے۔

انہوں نے مذید کہاکہ تین برس گذرجانے کے باجود شہداءکے ورثاءانصاف کے متلاشی ہیں، چیف جسٹس آف پاکستان، آرمی چیف  سانحہ ماڈل ٹاون میں ملوث وزیر اعلیٰ شہباز شریف ، رانا ثناءاللہ، پولیس حکام، بیوروکریٹس اور انکے حوایوں کے خلاف فوری اقدام اٹھائیں، جسٹس باقر نجفی کمیشن رپورٹ منظر عام پر آجانے کے بعد  وزیر اعلیٰ شہباز شریف اور  رانا ثناءاللہ کے برسراقتدار رہنے کا کوئی اخلاقی جواز موجود نہیں، انہیں فوری طور پر مستعفیٰ ہوجانا چاہئے،  سانحہ ماڈل ٹاون کے مظلومین کو انصاف ملنے تک ہم پاکستان عوامی تحریک اور ڈاکٹر طاہرالقادری کا ساتھ دیتے رہیں گے۔

واضح رہے کہ اس آپ پارٹیز کانفرنس میں مجلس وحدت مسلمین کے علاوہ  سنی اتحاد کونسل، پاکستان مسلم لیگ ق، پاکستان پیپلز پارٹی، پاکستان تحریک انصاف، پاک سرزمین پارٹی ، جماعت اسلامی سمیت دیگر قومی سیاسی ومذہبی جماعتوں کی قیادت شریک تھی، اے پی سی کے اختتام پر اعلامیہ جاری کیا گیا جس کے مطابق شہباز شریف اور  رانا ثناءاللہ کے استعفیٰ کی ڈیڈ لائن میں 31دسمبر کے بجائے 07جنوری تک کی توسیع کردی گئی ہے ، اے پی سی نے مقرر کی گئی ڈیڈ لائن پر آئندہ کے لائحہ عمل کے اعلان کیلئے ایک کمیٹی تشکیل دی ہے جو اے پی سی کی سٹیرنگ کمیٹی کہلائے گی، سٹیرنگ کمیٹی ہنگامی صورتحال میں فیصلے کرنے کی مجاز ہو گی۔ سٹیرنگ کمیٹی کے ممبران  میں
مجلس وحدت مسلمین پاکستان سے مرکزی ڈپٹی سیکریٹری جنرل (ناصر شیرازی) ، پاکستان پیپلز پارٹی( قمر الزمان کائرہ،سردار لطیف خان کھوسہ)،تحریک انصاف(شفقت محمود، عبدالعلیم خان)،عوامی مسلم لیگ(شیخ رشید)، پاکستان مسلم لیگ ق(سینیٹر کامل علی آغا)، جماعت اسلامی (لیاقت بلوچ)پاک سرزمین پارٹی(رضا ہارون)، مسلم کانفرنس(سردار عتیق احمد خان) ،سنی اتحاد کونسل(صاحبزادہ حامد رضا) ،بلوچستان نیشنل پارٹی عوامی سے (سید احسان شاہ)  شامل ہیں،جبکہ  میاں منظور احمد وٹو، جہانگیر ترین ،خرم نوازگنڈاپور سٹیرنگ کمیٹی کے کوآرڈینیٹر ہونگے۔

 (وحدت نیوز (کراچی) مجلس وحدت مسلمین پاکستان صوبہ سندھ کے سیکرٹری جنرل علامہ مقصود علی ڈومکی نے کہا کہ پیٹرولیم مصنوعات کی قیمتوں میں اضافے سے عام آدمی کی زندگی بری طرح متاثر ہوگئی ۔حکومت نے مہنگائی کا بم پھاڑکر عوام کو نئے سال کا تحفہ دیا ہے ۔گھریلو اشیاء خوردو نوش کی خرید وفروخت عام آدمی تو دور کی بات متوسط طبقے کی پہنچ سے بھی دور ہو چکی ہے ۔ علامہ مقصود علی ڈومکی نے کہا کہ وزیر اعظم کے مشیر مالیات آدم خور شخصیت کے حامل ہیں جنہوں نے تاریخی مہنگائی کر کے اپنا اصل چہرہ قوم کو دکھایا ہے ۔نواز حکومت کا اصل مقصد عوام کو لوٹنا ہے نہ کہ ریلف دینا ہے ،نواز حکومت نے غریب عوام کے رہے سہے کپڑے بھی اتار لیے ہیں جو لوگ موٹر سائیکل اور چھوٹی گاڑیا ں چلاتے ہیں وہ اب پیدل سفر کرنے پر مجبور ہوگئے ہیں۔