وحدت نیوز (فتح پور) مجلس وحدت مسلمین ضلع لیہ کے ڈپٹی سیکرٹری جنرل سید عدیل عباس شاہ نے کہا ہے کہ بلدیاتی الیکشن میں ایم ڈبلیو ایم باکردار، بے داغ ماضی کے حامل اور عوام کی بلاتفریق خدمت پر یقین رکھنے والے نمائندوں کو سپورٹ کرے گی۔ فتح پور میں منعقدہ ایک اجلاس سے خطاب کرتے ہوئے ان کا کہنا تھا کہ حکومت اور ضلعی انتظامیہ ضلع لیہ میں بلدیاتی انتخابات کو شفاف بنانے میں اپنا کردار ادا کرے، الیکشن کمیشن کی جانب سے جاری کردہ ضابطہ اخلاق پر عملدرآمد کیا جائے، انہوں نے مزید کہا کہ مجلس وحدت مسلمین ضلع لیہ میں بلدیاتی الیکشن میں باکردار، بے داغ ماضی کے حامل اور عوام کی بلاتفریق خدمت پر یقین رکھنے والے نمائندوں کو سپورٹ کرے گی، اس حوالے سے مختلف جماعتیں اور آزاد امیدوار ہم سے رابطہ میں ہیں، تاہم ہماری جماعت نے اب تک کسی سے اتحاد کا باقاعدہ اعلان نہیں کیا۔ انہوں نے مزید کہا کہ ہر یونین کونسل میں مقامی تنظیمی سیٹ اپ کی مشاورت سے ہی فیصلہ کیا جائے گا۔

وحدت نیوز (پشاور) تحریک انصاف کی خیبر پختونخواہ حکومت اہل تشیع کے جان ومال کے تحفظ میں مکمل طورپر ناکام ہو چکی ہے ، وزیر اعلیٰ پرویز خٹک  خواب خرگوش کے مزے اڑانے میں مصروف ہیں اور دوری جانب ہماری مائوں بہنوں کے سہاگ اجڑرہے ہیں ، کے پی کے میں ہمارے جوانوں اور بزرگوں کے قاتلوں کو کیفر کردار تک نہ پہنچایا گیا تو ملک گیر احتجاج پر مجبور ہوں گے، ان خیالات کا اظہار مجلس وحدت مسلمین پاکستان صوبہ خیبر پختونخواہ کے سیکریٹری جنرل علامہ سید محمد سبطین حسین الحسینی نے وحدت ہاوس پشاور سے جاری اپنے ایک بیان میں کیا۔

انہوں نے کہا کہ پشاور کی سب سے بڑی ماتمی سنگت کے سالار امداد شاہ کو تکفیری دہشتگردوں نے شہید کردیا ہے، امداد شاہ کا تعلق پشاور شہر کی سب سے بڑی ماتمی سنگت انجمن میر کفایت کے سالار دستہ تھے،پشاور میں شیعہ معززین کی ٹارگٹ کلنگ کے واقعات تسلسل کے ساتھ جاری ہیں لیکن صوبائی حکومت دہشت گرد کاروائیوں پر قابوپانے میں سنجیدہ نہیں ، اب تک کسی ایک شیعہ کے قاتل کو پھانسی نہیں دی گئی، دوسری جانب کالعدم تکفیری گروہ کو صوبے بھر میں مکمل آزادانہ نقل وحرکت کی اجازت حاصل ہے۔

وحدت نیوز (اسلام آباد) امت مسلمہ کے درمیان اتحاد ویگانت پہلے سے زیادہ ضروری امر قرار پایا ہے، دور حاضر میں شرق وغرب جہاد کے نام پر فساد کی لپیٹ میں ہیں ، استکباری قوتوں کی جانب سے دوہرا معیارمسلسل دہشت گردی کا باعث بن رہا ہے، ان خیالات کااظہار مجلس وحدت مسلمین پاکستان کے مرکزی ڈپٹی سیکریٹری جنرل ،رکن  ملی یکجہتی کونسل و رکن اسلامی نظریاتی کونسل علامہ محمد امین شہیدی نےمقامی ہوٹل میں منعقدہ ملی یکجہتی کونسل کے سربراہی اجلاس سے خطاب کرتے ہوئےکیا، اس موقع پر جماعت اسلامی کے امیر سراج الحق، جمیعت علمائے پاکستان کے سربراہ ڈاکٹر ابوالخیرمحمد زبیر، ملی یکجہتی کونسل کے مرکزی رہنما لیاقت بلوچ، ڈاکٹر ثاقب اکبر،شیعہ علماءکونسل کے مرکزی رہنما علامہ عارف واحدی ودیگر بھی موجودتھے۔

علامہ امین شہیدی کا کہنا تھا کہ امت مسلمہ پیرس میں بے گناہوں کے قتل عام کی اسی طرح مذمت کرتی ہے، جیسے شام ، عراق وافغانستان میں شہید ہونے والے بے گناہ مسلمانوں کی، داعش جیسے سنگین فتنے کی تشکیل میں جہاں عالمی استعماری قوت امریکہ، اسرائیل، برطانیہ ملوث ہیں وہیں بعض نام نہاد عرب اسلامی ریاستیں بھی اس سنگین میں گناہ میں ملوث ہیں ، انہوں نے کہا کہ یہ کیسے ممکن ہے داعش کی بربریت کو پیرس میں ہم قابل مذمت جانیں اور شام ، عراق اور افغانستان میں عین اسلام ، اقوام عالم کو انسانیت کی بقاءاور سلامتی کیلئے منافقانہ طرز سیاست سے نجات حاصل کرنا ہو گی ورنہ دنیا مذید تباہی کے دھانے پر پہنچے گی اور کسی کے کچھ ہاتھ نہ آئے گا۔

وحدت نیوز (تہران) رہبر انقلاب اسلامی آیت اللہ العظمٰی سید علی خامنہ ای نے کہا ہے کہ علاقے کے لئے امریکہ کا طویل المیعاد منصوبہ سبھی ممالک اور اقوام بالخصوص ایران اور روس کے لئے نقصان دہ ہے، انہوں نے کہا کہ ہوشیاری اور باہمی تعاون کے ذریعے اس منصوبے کو ناکام بنانے کی ضرورت ہے۔ گیس برآمد کرنے والے ممالک کی تنظیم کے سربراہی اجلاس میں شرکت کے لئے تہران پہنچنے پر روس کے صدر پوتن نے رہبر انقلاب اسلامی سے ملاقات کی۔ رہبر انقلاب اسلامی نے روسی صدر سے ملاقات میں تہران اور ماسکو کے درمیان دوطرفہ علاقائی اور عالمی تعاون میں توسیع کا خیر مقدم کرتے ہوئے علاقائی مسائل خاص طور پر شام کے معاملے میں روس کی موثر موجودگی کی تعریف کی۔ رہبر انقلاب اسلامی نے روس کے صدر پوتن کو آج کی دنیا میں ایک ممتاز شخصیت قرار دیا اور ایران کے ایٹمی معاملے میں روس کی کوششوں کی تعریف کرتے ہوئے کہا کہ یہ معاملہ ایک نتیجے تک پہنچ گیا ہے، لیکن ایران کو امریکہ پر کوئی اعتماد نہیں ہے اور وہ اس معاملے میں پوری دقت کے ساتھ اور آنکھیں کھول کر امریکہ کے کردار و اقدامات پر نظر رکھے ہوئے ہے۔ ایران کے سپریم لیڈر کا کہنا تھا کہ ہم امریکہ کو ہرگز قابل اعتماد نہیں سمجھتے، اسی لئے ہم نہ تو شام کے مسئلے اور نہ ہی کسی اور ایشو پر امریکہ سے دو طرفہ مذاکرات کر رہے ہیں اور نہ مستقبل میں ایسا کریں گے۔

رہبر انقلاب اسلامی نے خاص طور پر گذشتہ ڈیڑھ برسوں کے دوران مختلف مسائل کے بارے میں روسی صدر کے موقف کو صحیح اور جدت پسندی پر مبنی قرار دیا۔ انہوں نے کہا کہ امریکیوں کی ہمیشہ کوشش رہتی ہے کہ وہ اپنے حریفوں کو پسپائی اختیار کرنے پر مجبور کریں، لیکن آپ نے امریکیوں کی اس پالیسی کو ناکام بنا دیا۔ رہبر انقلاب اسلامی آیت اللہ العظمٰی خامنہ ای نے شام کے مسئلے میں ماسکو کے اقدامات اور فیصلے کو بھی علاقائی اور عالمی سطح  پر روس کی ساکھ میں بہتری اور خود روسی صدر پوتن کی مقبولیت میں اضافے کا باعث بتایا۔ رہبر معظم انقلاب اسلامی نے کہا کہ امریکیوں کی کوشش ہے کہ وہ شام پر تسلط جمائیں اور اس کے بعد پورے خطے پر کنٹرول حاصل کریں اور یہ منصوبہ سبھی اقوام اور ممالک خاص طور پر روس اور ایران کے لئے خطرناک ہے۔ رہبر انقلاب اسلامی نے شام کے قانونی اور منتخب صدر بشار الاسد کو حکومت سے ہٹانے کے حوالے سے امریکیوں کے اصرار کو واشنگٹن کی ناکام پالیسیوں میں سے قرار دیا اور کہا کہ شام کے صدر نے پورے ملک میں ہونے والے انتخابات کے ذریعے عوام کے سبھی طبقات کا ووٹ حاصل کیا، اس لئے امریکیوں کو یہ حق نہیں پہنچتا کہ وہ شام کے عوام کی خواہشات اور فیصلے کو نظر انداز کریں۔

روس کے صدر ولادیمیر پوتن نے بھی اس ملاقات میں رہبر انقلاب اسلامی کے گرانقدر تجربات کی جانب اشارہ اور ان سے اپنی ملاقات پر خوشی کا اظہار کرتے ہوئے کہا کہ وہ روس اور ایران کے درمیان مختلف میدانوں بالخصوص ایرو اسپیس اور جدید ٹیکنالوجی کے میدان میں روز افزوں تعاون سے مطمین ہیں۔ انہوں نے کہا کہ علاقائی اور عالمی مسائل کے حل میں بھی روس ایران کے ساتھ تعاون سے خوش ہے۔ روسی صدر کا کہنا تھا کہ روس ایران کو اپنا اطمینان بخش اور قابل بھروسہ اتحادی سمجھتا ہے۔ ولادیمیر پوتن نے کہا کہ روس اپنے اتحادیوں کی پشت میں خنجر نہیں گھونپتا۔ روس کا اگر کسی ایشو پر اپنے دوستوں کے ساتھ اختلاف نظر ہو تو ہم اسے گفتگو اور مذاکرات کے ذریعے حل کرنے پر یقین رکھتے ہیں۔ ولادیمیر پوتن نے رہبر انقلاب اسلامی کے اس موقف کہ امریکہ میدان جنگ میں اپنے اہداف حاصل کرنے میں ناکامی کو مذاکرات کی میز پر محقق کرنا چاہتا ہے، کاملاً اتفاق کیا اور کہا کہ ہم اس طرف پوری طرح متوجہ ہیں اور ہرگز امریکہ کو ایسا نہیں کرنے دیں گے۔ روسی صدر نے شام کے معاملے میں ایران اور روس کے موقف کو بہت قریب بتایا اور کہا کہ روس کا موقف ہے کہ شام کا بحران صرف سیاسی طریقے سے ہی حل ہوسکتا ہے۔

وحدت نیوز (اسلام آباد) مجلس وحدت مسلمین پاکستان کے مرکزی جنرل سیکرٹری علامہ راجہ ناصر عباس جعفری نے کہاہے کہ طالبان ،داعش اور القاعدہ کے خاتمے کی آڑ میں امت مسلمہ کی نسل کشی میں مصروف ہے۔یہود و نصاری کے گٹھ جوڑ سے اس وقت تک عراق،افغانستان، شام ،یمن اور دیگر مسلم ممالک میں لاکھوں مسلمان لقمہ اجل بن چکے ہیں۔امریکہ دہشت گردی کا خاتمہ نہیں چاہتا بلکہ اسے اپنے مقاصد کے لیے استعمال کر رہا ہے۔شام اور عراق میں دہشت گردی کے مراکز کو امریکہ سمیت صیہونی طاقتوں کی بھرپور حمایت حاصل ہے۔صدر اوبامہ کا یہ بیان کہ شام سے بشار الاسد کو جانا ہو گا امریکی ایجنڈے کو واضح کر رہا ہے۔امریکہ خطے میں اسرائیلی بالادستی کی راہ ہموار کرنا چاہتا ہے ۔شام کی موجودہ حکومت اسرائیلی عزائم کی تکمیل میں سب سے بڑی رکاوٹ ہے۔ شام کے صدر بشار الاسد کو اسرائیل مخالف قوتوں کی حمایت پر امریکہ سیخ پا ہے۔ مسلم حکمرانوں کو اب امریکہ کے خلاف بلا تاخیر متحد ہونے کی ضرورت ہے۔جو حکمران امریکہ سے دوستی کے سہانے خواب دیکھنے میں مصروف ہیں انہیں اس حقیقت کو سمجھ لینا چاہیے کہ مسلمانوں سے امریکہ کی دوستی اس کے مفادات کی تکمیل تک ہی قائم رہتی ہے۔انہوں نے کہ شام میں داعش کے ٹھکانوں کا امریکہ کو بخوبی علم ہے۔روس سمیت تمام عالمی طاقتوں کو دہشت گرد گروہوں کی سرکوبی میں کردار ادا کرنا ہو گا لیکن دہشت گردی کے خاتمے کے نام پر معصوم اور بے گناہ افراد کو قتل کرنے کی اجازت نہیں دی جا سکتی۔

وحدت نیوز (قم) چہلم سیدالشہداؑ کے موقع پر زائرین کربلا سے سرکاری اہلکاروں کا رشوت وصول کرنا انتہائی شرمناک فعل ہے۔ ان خیالات کا اظہار گذشتہ روز ایم ڈبلیو ایم قم کے اراکین کابینہ نے ایک ہنگامی اجلاس میں کیا ہے۔ تفصیلات کے مطابق گذشتہ روز پاکستان سے قم پہنچنے والے زائرین نے ایم ڈبلیو ایم کے سیکرٹری جنرل گلزار احمد جعفری اور دیگر مسئولین سے ملاقاتوں کے دوران بتایا ہے کہ پاکستان سے ایران آنے والے زائرین کو ستانا اور لوٹ مار کرنا سرکاری کارندوں کا معمول بن چکا ہے، کانوائے کو رشوت بٹورنے کے لئے ایک ہتھکنڈے کے طور پر استعمال کیا جا رہا ہے۔ ٹرانسپورٹر حضرات سواریوں سے چندہ اکٹھا کرکے سرکاری چوکیوں پر رشوت جمع کراتے ہیں۔ قدم قدم پر زائرین کو رشوت لینے کے لئے ہراساں کیا جاتا ہے۔ کہیں پر کوئی پرسانِ حال نہیں ہے۔

زائرین نے افسوس کرتے ہوئے کہا کہ اب تو پاکستان آرمی کے جوان بھی پولیس کی طرح رشوت کی دوڑ میں شامل ہوگئے ہیں۔ اس صورتحال پر ایم ڈبلیو ایم قم نے فوری طور پر ایک ہنگامی اجلاس بلایا، جس میں یہ طے کیا گیا ہے کہ صدر پاکستان، چیف آف آرمی سٹاف اور وزیراعظم سمیت تمام اعلٰی حکام کو فوری طور پر صورتحال کی سنگینی سے آگاہ کیا جائے اور حکام سے مطالبہ کیا جائے کہ فوری طور پر زائرین کو پریشان کرنے والے اور رشوت خور اہلکاروں کے خلاف کارروائی کی جائے۔ ایم ڈبلیو ایم قم کی ایکشن کمیٹی نے زائرین کے بیانات کو قلمبند اور دیگر شواہد کو جمع کرکے بین الاقوامی اداروں اور انسانی حقوق کی تنظیموں کی طرف رجوع کرنے کے پروگرام پر عملدارآمد شروع کر دیا ہے۔