وحدت نیوز (ملتان) مجلس وحدت مسلمین جنوبی پنجاب کے سیکرٹری جنرل علامہ اقتدار حسین نقوی نے کہا ہے کہ لاہور میں ایک اور دہشتگردی کا واقعہ پنجاب حکومت کی جانب سے دہشتگردوں کو پالنے کا تحفہ ہے، پنجاب حکومت دہشتگردوں کی سرپرست بننے کی بجائے پاکستانی عوام کی سرپرست بنے، سانحہ چیئرنگ کراس کے بعد ڈیفنس میں ہونے والا واقعہ پنجاب حکومت کی آنکھیں کھولنے کے لیے کافی ہے، یہ دہشتگرد کسی کے دوست نہیں ہیں، علامہ اقتدار نقوی نے پاک فوج کی طرف سے دہشت گردی کے خلاف آپریشن ردالفساد کے فیصلہ کو لائق تحسین قرار دیتے ہوئے اسے حالات کے عین متقاضی قرار دیا۔ انہوں نے کہا کہ دہشت گردوں کی سرکوبی کے لیے پاک فوج کے موثر اقدامات عوامی خواہشات کی ترجمانی کرتے ہیں۔ دہشت گردی کے خاتمے میں اگر حکومت کی طرف سے سنجیدہ اقدامات کیے جاتے تو آج ملک کو اتنے سانحات نہ دیکھنے پڑتے۔ شرپسندوں کے خلاف آپریشن میں رینجرز کو مکمل اختیار دیے جانے چاہیے تا کہ سیاسی دباؤ سمیت کوئی بھی بیرونی مداخلت ان پر اثرانداز نہ ہوسکے۔ انہوں نے دہشت گردی کے خلاف فوج کے عزم کی تعریف کرتے ہوئے کہا کہ آپریشن ردالفساد مطلوبہ نتائج کے حصول تک جاری رہنا چاہیے، تا کہ وطن عزیز دہشت گردی کی لعنت سے پاک ہو سکے۔ ماضی میں اچھے برے طالبان کے نام پر منفی قوتوں کی سرپرستی کی گئی جس کے نقصانات پوری قوم کو اٹھانا پڑے۔ آرمی چیف کی طرف سے بلاتفریق آپریشن کا اعلان اس لحاظ سے خوش آئند ہے کہ اس میں کسی بھی ملک دشمن قوت کے لیے کوئی نرم گوشہ نہیں۔ پنجاب سمیت ملک کے مختلف علاقوں میں مذکورہ آپریشن کے نتائج یقینا حوصلہ افزاء ہوں گے۔ نیشنل ایکشن پلان کے تمام نکات پر عمل آپریشن رد الفساد کی کامیابی کی ضمانت سمجھا جائے گا۔ انہوں نے کہا دہشت گردی کے خلاف جنگ میں پوری قوم پاک فوج کے ساتھ کھڑی ہے۔

وحدت نیوز(بھکر) مجلس وحدت مسلمین ضلع بھکر کے سیکرٹری جنرل سفیر حسین شہانی ایڈووکیٹ نے کہا ہے کہ پاک فوج کا ضرب عضب آپریشن کی کامیابی کے بعد آپریشن ردالفساد ملکی سلامتی، عوام کے جان مال کے تحفظ اور بدامنی ختم کرنے میں نہایت مفید ثابت ہو گا۔ پہلی بار اس بڑے آپریشن میں بری فوج، پاک فضائیہ، بحریہ، رینجرز اور دیگر قانون نافذ کرنے والے اداروں کا بھی شامل ہونا ایک بہترین حکمت عملی ہے، مجلس وحدت مسلمین مطالبہ کرتی ہے کہ آپریشن کا مقصد نیشنل ایکشن پلان پر عمل درآمد اور بلاتفریق دہشت گردی کا خاتمہ ہو نا چاہیے، دہشت گردی کو ہمیشہ کے لیے جڑ سے اکھاڑ کر پھینکا جائے۔ اپنے ایک بیان میں ان کا کہنا تھا کہ مجلس وحدت مسلمین پاکستان نے سب سے پہلے پنجاب میں آپریشن کیلئے آواز بلند کی اور ہر فورم پر مظلوم کی حمایت کا علان کیا، چاہیے ظالم کتنا طاقتور کیوں نہ ہو اسکو کیفر کردار تک پہنچانے میں مجلس وحدت مسلمین پاکستان اپنا کردار ادا کرتی رہیگی۔

انہوں نے مزید کہا کہ وطن عزیز سے دہشت گردی جیسی لعنت کو ختم کرنے کے لئے ردالفساد جیسا آپریشن معانی خیز ہے۔ وطن عزیز کو دہشت گردی، بارود و اسلحہ سے بالکل پاک کیا جائے تاکہ آنے والی نسلیں امن اور سکون سے زندگی بسر کر سکیں، پاک فوج کی جرات و بہادری کو مجلس وحدت مسلمین پاکستان اور پاکستان سے باہر سکونت رکنے والے کروڑوں کارکنان خراج تحسین پیش کرتے ہیں، مجلس وحدت مسلمین پاکستان نے ہر فورم پر دہشت گردوں کو بے نقاب کیا ہے اور ہر جگہ پر وطن کی حفاظت کے لیے خون کا نذرانہ دیا ہے، اب خدا کا انتقام ہے کہ دہشت گردوں کے سروں پر موت آن پہنچی ہے۔ مجلس وحدت مسلمین آپریشن ردالفساد کی مکمل حمایت کرتی ہے۔

وحدت نیوز(لیہ) مجلس وحدت مسلمین جنوبی پنجاب کے سیکرٹری تنظیم سازی سید عدیل عباس زیدی نے پاک فوج کی جانب سے دہشتگردوں کیخلاف آپریشن ’’ردالفساد‘‘ شروع کرنے کے اعلان کو انتہائی خوش آئند قرار دیتے ہوئے کہا ہے کہ یہ آپریشن آخری دہشتگرد کے خاتمہ تک جاری رہنا چاہیے، وطن عزیز پاکستان میں پائیدار امن کیلئے پوری قوم کو متحد ہونا ہوگا۔ اپنے ایک بیان میں ان کا کہنا تھا کہ دہشت گردوں کی سرکوبی کے لئے پاک فوج کے موثر اقدامات عوامی خواہشات کی ترجمانی کرتے ہیں۔ دہشت گردی کے خاتمے میں اگر حکومت کی طرف سے سنجیدہ اقدامات کئے جاتے تو آج ملک کو اتنے سانحات نہ دیکھنے پڑتے۔ شرپسندوں کے خلاف آپریشن میں رینجرز کو مکمل اختیار دیئے جانے چاہیے، تاکہ سیاسی دباؤ سمیت کوئی بھی بیرونی مداخلت ان پر اثر انداز نہ ہوسکے۔ انہوں نے دہشت گردی کے خلاف فوج کے عزم کی تعریف کرتے ہوئے کہا کہ آپریشن ردالفساد مطلوبہ نتائج کے حصول تک جاری رہنا چاہیے، تاکہ وطن عزیز دہشت گردی کی لعنت سے پاک ہوسکے۔ ان کا مزید کہنا تھا کہ دہشتگرد انسانیت کے دشمن ہیں اور سکیورٹی فورسز کے جن باہمت اہلکاروں نے دہشتگردوں سے لڑ کر اپنی جانوں کا نذرانہ پیش کیا ہے، پوری قوم کو ان پر فخر ہے، مجلس وحدت مسلمین دہشتگردی کے خلاف مہم میں سکیورٹی اداروں کے شانہ بشانہ ہے۔

وحدت نیوز (سہیون شریف) مجلس وحدت مسلمین صوبہ سندھ ضلع جامشورو کے زیر اہتمام درگاہ شریف حضرت لعل شہباز قلندر میں تحفظ مزارات  اولیاء اللہ کانفرنس سے خطاب میں گدی نشین درگاہ حضرت لعل شہباز قلندر سید ولی محمد شاہ نے کہا کہ ملک بھر میں سکیورٹی کے نام پر بند کیے جانے والے مزارات کو زائرین کیلئے فورا کھولا جائے۔ دہشتگردی کرنے والے اسلام و ملک دشمن ہیں خون کے آخری قطرے تک ان ملک و اسلام دشمن طاقوں کے خلاف اعلان حق کرتے رہیں گے ۔

انہوں نے کہا واقعہ میں ملوث دہشتگردوں اور ان کے پس پردہ قوتوں کی فوری گرفتاری عمل میں لائی جائے اوردرگاہ کی سیکورٹی میں اضافہ کیا جائے سیکورٹی کے نام پر زائرین کی مشکلات میں اصافہ نہ کیا جائے،انہوں نے بروقت تحفظ مزارات اولیاءاللہ کانفرنس کے انعقاد پر مجلس وحدت مسلمین اور علامہ راجہ ناصرعباس جعفری کو خراج تحسین پیش کیااور شہدائے سانحہ سہیون شریف کے دکھ میں شریک ہونے اور تعزیت کیلئے خود تشریف لانے پر شکریہ ادا کیا،کانفرنس سے علامہ مختار امامی سمیت دیگر مذہبی و سیاسی شخصیات نے خطاب کیا۔

وحدت نیوز(مظفرآباد) قائم مقام سیکریٹری جنرل مجلس وحدت مسلمین آزاد کشمیر مولانا سید طالب حسین ہمدانی نے کہا ہے کہ علامہ تصور جوادی پر حملہ کرنے والوں کو فوری گرفتار کیا جائے ، مجرمان کی گرفتاری آزاد کشمیر کے امن کے لیے انتہائی ضروری ہے، علامہ تصور جوادی پر حملہ امن کی فضا کو خراب کرنے کی بڑی سازش ہے۔ کشمیر کے باسی پرامن اور محب وطن ہیں ، یہاں کوئی شیعہ سنی تفریق ہے نہ ہونے دیں گے ۔ ہم اتحاد بین المسلمین کے لیے کام کرتے ہیں اور کرتے رہیں گے ۔ علامہ تصور جوادی کا مشن و مقصد ہی یہی تھا ، کہ امت مسلمہ ایک پیج پر ہو ، اغیار کی سازشوں کو بھانپتے ہوئے انہیں اپنی صفحوں میں نہ گھسنے دے۔ شہر مظفرآباد امن کی علامت کے طور پر سمجھا جاتا تھا ، مگر ایک شریف النفس درویش صفت انسان کو گولیوں کا نشانہ بنا کر دن دیہاڑے فرار ہو جانا انتظامیہ کی کارکردگی پر بھی سوالیہ نشان چھوڑ گیا ہے، پر زور مطالبہ ہے کہ جلد از جلد دہشت گردوں کو گرفتا ر کر کے سامنے لایا جائے ، عدم تحفظ کی فضا کو ختم کیا جائے، ان خیالات کا اظہار انہوں نے مجلس وحدت مسلمین آزاد کشمیر کے دفتر میں آئے ہوئے مختلف وفود سے خطاب کرتے ہوئے کیا۔

 انہوں نے کہا کہ ہم حسینی قوم ہیں ، میدان میں نکلنا جانتے ہیں ، حکومت فوری طور پر سراغ لگائے ورنہ جب یہ قوم میدان میں نکل جائے تو پھر اسے کوئی نہیں بھگا سکتا ۔ مولانا طالب ہمدانی نے کہا کہ ایکشن کمیٹی نے پانچ دن کی ڈیڈ لائن دی تین روز گزرنے کو ہیں تا حال کوئی پیش رفت نہیں ، اس ڈیڈ لائن کے گزر جانے کے بعد راست اقدام اٹھائیں گے ، مجلس وحدت مسلمین پرامن جمہوری جماعت ہے ، مگراپنے محبوب رہنما کا خون رائیگان نہیں جانے دے گی ۔ مجلس وحدت مسلمین آزاد کشمیر کے ہر کارکن کے اندر شدید اضطراب پایا جاتا ہے۔ حالات کی نزاکت کو سمجھتے ہوئے معاملے کا فوری حل نکالا جائے بصورت دیگر ہم سڑکوں پر آئیں گے پھر اس وقت تک واپس گھروں کو نہیں لوٹیں گے جب تک علامہ تصور جوادی پر حملہ کرنے والے قانون کی گرفت میں نہ ہوں ۔ ہم انتظامیہ کے ساتھ ہیں ، مکمل تعاون کے لیے آمادہ ہیں ، مگر حکومتی بے بسی پر حیران کن ہیں ، اتنا بڑا سانحہ ہوجانے کے باوجود ایک وزیر ایک رکن نے بھی تعزیت و تسلیت کی زحمت گوارہ نہیں کی ۔ مولانا طالب حسین ہمدانی نے کہا کہ علامہ تصور حسین نقوی الجوادی صحت بہتری کی جانب گامزن ہے ، مگر قوم سے اپیل ہے دعاؤں کا سلسلہ جاری رکھے ۔ انشاء اللہ وہ وقت دور نہیں کہ جب پھر ہمارا ہر دلعزیز رہنما ہمارے درمیان ہو گا ۔

وحدت نیوز(مظفرآباد) مجلس وحدت مسلمین آزادکشمیر کے سیکرٹری جنرل علامہ سید تصور حسین نقوی الجوادی پر قاتلانہ حملہ کرنے والے ملزمان چھ روز گزرنے کے باوجود گرفتار نہ ہونے پرتمام مکاتب فکر سے تعلق رکھنے والے افراد پر مشتمل قائم’’ انسداد دہشت گردی پبلک ایکشن کمیٹی مظفرآباد ڈویژن‘‘ نے حکومت کو ملزمان کی گرفتاری کیلئے پانچ دن کی ڈیڈ لائن دے دی ۔ ملزمان گرفتا رنہ ہوئے تو دما دم مست قلندر ہوگا،یو این و مبصر مشن تک لانگ مارچ کرنے پر مجبور ہونگے ۔

گزشتہ روز مرکزی ایوان صحافت میں پر ہجوم پریس کانفرنس سے خطاب کرتے ہوئے تمام سیاسی و مذہبی جماعتوں کے نمائندوں ،تاجروں کے ذمہ داران ،سول سوسائٹی،طلباء تنظیموں ،سنٹرل بار ایسوسی ایشن کے نمائندگان مجلس وحدت مسلمین کے رہنماطالب ہمدانی ، سید شجاعت کاظمی، علامہ فرید عباس نقوی ، مولانا عبدالعزیز علوی، شوکت نواز میر ، راجہ ثاقب مجید ، سید نذیر حسین شاہ ،  عبدالرزاق خان، قاضی محمد فہد چشتی ،اصغر نثار میر ،سید تصور عباس موسوی، حافظ کفایت نقوی ، نصیر ہمدانی ،کامران بیگ،سید تبریز کاظمی، سید قلب عباس ،سید مجاز شاہ ، علامہ تصور جوادی کے لواحقین و دیگرنے کہا کہ مظفرآباد شہر امن و رواداری کا شہر ہے جس پر حملہ کیا گیا ، اس دھرتی کو دہشت گردوں کے حوالے کسی بھی صورت نہیں کر سکتے ۔تخریب کاروں کے نا پاک عزائم کو اس دھرتی کے باشعور عوام نے ناکام بنا دیا ۔دکھ کی اس گھڑی میں حکمران جماعت کی طرف سے کسی وزیر یا ایم ایل اے نے متاثرہ خاندان سے اظہار ہمدردی تک نہیں کیا ،اور نہ ہی اس حوالہ سے کوئی سنجیدہ اقدام اٹھایا گیا ہے۔ جس مقام پر یہ واقعہ پیش آیا وہاں سے ملزمان کا گاڑی سمیت فرار ہونا پولیس انتظامیہ اور دیگر متعلقہ اداروں کی کارکردگی پر کئی سوالات اٹھا رہا ہے ۔شہریان مظفرآباد نے اپنے حصے کا بھر پور کردار ادا کیا لیکن حکومت کی جانب سے مایوسی کے سوا کچھ نہیں ملا ۔

انہوں نے کہا کہ اگر پانچ دن میں ہمارے مطالبات منطور نہیں کیے جاتے تو ہم راست اقدام اٹھانے پر مجبور ہونگے ۔احتجاجی تحریک کا آغاز کرینگے ، دھرنے دیئے جائیں گے ، جلسے جلوس اور ریلیاں نکالی جائیں گی۔شٹر ڈاؤن ،پہیہ جام کرنے کے ساتھ ساتھ UNOکے مبصر مشن تک مارچ کرینگے اگر ضرورت محسوس ہوئی تو  ہم مظفرآباد اور اسلام آباد کے پارلیمنٹ کی جانب لانگ مارچ کرنے اور دھرنا دینے کا حق بھی محفوظ رکھتے ہیں ۔ انہوں نے کہا کہ آزادکشمیر بھر کی سیکیورٹی سخت کی جائے تمام انٹری پوائنٹس خفیہ کیمروں کی تنصیب کے ساتھ چیکنگ کا نظام بہتر کیا جائے ، تمام مزارات اور خانقاہوں پر پولیس نفری تعینات کی جائے ۔

انہوں نے آرمی چیف سے مطالبہ کیا کہ دہشت گردوں کے خلاف جاری آپریشن کا دائرہ کار آزادکشمیر تک بڑھاتے ہوئے دہشت گردوں اور ان کے سہولت کاروں کو منطقی انجام تک پہنچایا جائے ۔انہوں نے حکومت پاکستان سے مطالبہ کیا کہ علامہ تصور جوادی پر ہونے والے حملہ کی وفاقی سطح پر تحقیقات کی جائیں۔ آخر پر انہوں نے لاہور ،سہون شریف ،پشاور،چارسدہ سمیت ملک بھر میں جاری دہشت گردی کی شدید الفاظ میں مذمت کی۔