وحدت نیوز(اسلام آباد) مجلس وحدت مسلمین پاکستان کے مرکزی سیکرٹری جنرل علامہ راجہ ناصر عباس جعفری نے گلگت بلتستان میں شفاف اور پرامن انتخابات کے انعقاد پر اداروں کو خراج تحسین پیش کیا ہے۔انہوں نے کہا کہ ہماری اتحادی جماعت کی کامیابی ہم پر عوام کے اعتماد کا مظہر ہے۔پاکستان تحریک انصاف اور مجلس وحدت مسلمین جی بی میں مل کر حکومت بنائیں گے۔خواتین اور ٹیکنوکریٹ سمیت ہمارے پاس تین نشستیں موجود ہیں۔

ان کا کہنا تھا کہ ہم نے علاقے کے عوام کو نوجوان قیادت فراہم کی ہے تاکہ پوری لگن، ولولے اور جانفشانی کے ساتھ علاقے کے عوام کی خدمت کی جا سکے۔عوام کی طرف سے اعتماد کے اس اظہار پر اس عہد کے ساتھ شکریہ ادا کرتے ہیں کہ ان کے حقوق کے لیے اپنے اصولی موقف پر انچ بھی پیچھے نہیں ہٹیں گے۔ماضی میں بھی ہر پلیٹ فارم پر جی بی کے عوام کے حقوق کے لیے آواز بلند کی ہے آئندہ بھی اپنی اسی روش کو برقرار رکھا جائے گا۔

انہوں نے کہا کہ عوام نے ان سیاسی شعبدہ گروں کو مسترد کر دیا ہے جنہوں نے اپنی زبان کے زہر کو خوشنما لفظوں میں چھپا رکھا تھا۔ جی بی کے آئینی صوبے کی بات ہوتے ہی وہ تمام کردار کھل کر سامنے آ گئے جو بظاہر جی بی کے حقوق کی بات کرتے تھے لیکن فکری اعتبار سے وہ مودی کے پیروکار تھے۔

انہوں نے کہا کہ گلگت بلتستان کے عوام کے حقوق کے حوالے سے ہمارا موقف دو ٹوک اور اٹل ہے۔خطے کو آئینی صوبہ قرار دے کر صوبائی اختیارات تفویض کرنا ہماری اولین ترجیح ہے۔جی بی حکومت کے قیام کے فوراً بعد عوام کے دیگر مسائل کے حل کے لیے عملی کوششوں کا آغاز کر دیا جائے گا۔انہوں نے کہا گلگت بلتستان کے عوام کی خواہشات کا احترام ہمیں ہر حال میں مقدم ہے۔انہیں کبھی مایوس نہیں کریں گے۔

وحدت نیوز(ملتان)مجلس وحدت مسلمین جنوبی پنجاب کی صوبائی کابینہ کااجلاس جامع مسجد الحسین نیو ملتان میں منعقد ہوا، اجلاس کی صدارت صوبائی سیکرٹری جنرل علامہ اقتدار حسین نقوی نے کی جبکہ اجلاس میں ایم ڈبلیو ایم کے مرکزی سیکرٹری تنظیم سازی کے معاون ایڈووکیٹ آصف رضا نے خصوصی شرکت کی۔ اجلاس میں ڈپٹی سیکرٹری جنرل سلیم عباس صدیقی،محمد اصغر تقی، سیکرٹری تربیت علامہ قاضی نادر حسین علوی،زعیم حیدرزیدی، اجمل حسین شاہ،ثقلین نقوی، سید ندیم عباس کاظمی،ایڈووکیٹ فہیم جعفر سرائی،سید علی رضا زیدی،طاہر خورشید نے شرکت کی۔

 اجلاس میں گزشتہ فیصلہ جات کی روشنی میں کارکردگی کا جائزہ لیا گیا،اور آئندہ کا لائحہ عمل طے کیا گیا، اجلاس سے مجلس وحدت مسلمین پاکستان کے سیکرٹری جنرل علامہ راجہ ناصر عباس جعفری نے خصوصی ٹیلیفونک خطاب کیا۔

علامہ راجہ ناصر عباس جعفری نے کہا کہ وطن عزیز کی سالمیت اپنی جان سے بھی زیادہ عزیز ہے، یہ ملک ہے تو ہم ہیں ، ایل او سی کے دونوں اطراف بھارتی جارحیت انسانی حقوق کی خلاف ورزی ہے، ہمیں محروموں اور مظلوموں کی مددکے لیے آگے بڑھنا ہے، عالمی حالات کی تبدیلی کے اثرات پاکستان پر مرتب ہوں گے۔ اجلاس میں فیصلہ کیا گیا کہ آئندہ ماہ تک جن اضلاع کے اجلاس ضلعی شوریٰ نہیں ہوئے اُنہیں کرایا جائے ۔

وحدت نیوز(کراچی) مجلس وحدت مسلمین سندھ کے صوبائی سیکرٹری جنرل علامہ باقر عباس زیدی نے اسرائیل کو تسلیم کرانے کے لیے عرب ممالک کے پاکستان پر دباؤ کو امت مسلمہ سے سنگین غداری قرار دیا ہے۔انہوں نے کہا کہ عرب حکمرانوں کی پاکستان کے داخلی معاملات میں مداخلت کے بھیانک نتائج دہشت گردی اور شدت پسند جماعتوں کی صورت میں قوم آج تک بھگت رہی ہے۔اسرائیل کے حوالے سے بانی پاکستان قائد اعظم محمد علی جناح کا  واضح موقف موجود ہے۔اسرائیل پر کسی بھی قسم کی لچک بانی پاکستان کے نظریات سے انحراف ہو گا۔

انہوں نے کہا کہ موجودہ حکومت نے مسئلہ فلسطین پر اپنے اٹل نظریات اور اصولی موقف سے اقوام عالم کو آگاہ کررکھا ہے کہ اسرائیل کو کسی صورت تسلیم نہیں کیا جا سکتا۔اسرائیل ایک ناجائز ریاست ہے اس کو تسلیم کرنے کا مطلب مقبوضہ کشمیر کے مسلمانوں کے حق خودارادیت سے دستبرداری اور بھارت کے غاصبانہ قبضے کو تسلیم کرنا ہے۔

پاکستان اور عرب ممالک کے عوام یہود و ہنود کی اسلام دشمن پالیسیوں سے سخت نالاں ہیں۔عرب ممالک کے حکمران ذاتی خواہشوں کے اسیر ہیں اور طاقت و اختیارات کے زور پر عوامی خواہشات کے برعکس من پسند فیصلوں کو اپنا حق سمجھتے ہیں۔انہوں نے کہا اگر یہ صورتحال نہ بدلی تو بہت جلد عرب ممالک کے عوام اپنے حکمرانوں کے خلاف اٹھ کھڑے ہوں گے۔

وحدت نیوز(اسلام آباد) مجلس وحدت مسلمین پاکستان کے مرکزی ترجمان مقصود علی ڈومکی نے کہا ہے کہ کشمور سانحہ ملک کے اندر جاری ان المناک سانحات کا تسلسل ہے جو اخلاقی پستی اور گراوٹ کی شرمناک داستان ہے۔ انہوں نے کہا کہ اس طرح کے سانحات کی روک تھام کے لیے پاکستان کے اندر تعلیمی اداروں میں اخلاقی تعلیم و تربیت کو نصاب کا حصہ بنایا جائے اور میڈیا کے اندر اخلاقی تعلیمات پر زور دینا چاہیے خوف خدا گناہوں سے روکنے کا موثر ترین عامل ہے۔ اسلامی تعلیم اور تربیت کے ذریعے ہم اس طرح کے سانحات کی بہتر انداز میں روک تھام کر سکتے ہیں۔

 انہوں نے کہا کہ معاصر قانون سازی قانون پر عملدرآمد اخلاقی تعلیم اور تربیت دین اسلام کی اعلی تعلیمات کے پرچار اور خوف خدا کے ذریعے معاشرے کی اصلاح پر توجہ دی جائے انہوں نے کہا کہ علماء کرام حکومت اور میڈیا کی مشترکہ ذمہ داری بنتی ہے کہ وہ معاشرتی برائیوں کے خلاف اعلان جہاد کریں۔ منشیات ناپ تول میں کمی ملاوٹ بددیانتی اور دیگر سماجی جرائم کے خلاف معاشرے کے باشعور طبقات کو اپنا کردار ادا کرنا ہوگا۔

 انہوں نے کہا کہ سانحہ کشمور ظلم اور بربریت کی المناک داستان ہے اس سانحے کے پیش نظر حکومت اور قانون ساز اداروں کو ملک کے اندر موثر قانون سازی کے ساتھ ساتھ ان عوامل کا بھی بغور جائزہ لینا ہوگا جو اس طرح کے المناک اور شرمناک سانحات کا سبب بنتے ہیں۔

انہوں نے کہا کہ عدالتوں کی کارکردگی سے مایوسی کی اس سے بڑی دلیل کیا ہو سکتی ہے کہ مجرم کو موقع پر ہی قانون نافذ کرنے والے اداروں نے ٹھکانے لگا دیا انہوں نے کہا کہ ہمارے عدالتی نظام کے ذمہ داران کو بڑی سنجیدگی کے ساتھ اپنے نظام عدل کی کارکردگی کا جائزہ لینا ہوگا تاکہ عوام کے اندر عدلیہ پر پر اعتماد پیدا ہو۔