وحدت نیوز (اسلام آباد) مجلس وحدت مسلمین پاکستان کے مرکزی سیکریٹری تربیت علامہ اعجاز بہشتی نے کہا ماہ صیام تزکیہ نفس کا مہینہ ہے۔اس مقدس مہینہ میں اللہ تعالیٰ ہمیں موقعہ عطا کرتا ہے کہ ہم صوم و صلوۃ اور عبادات کے ذریعے اپنی اندرونی کثافتیں دور کریں۔ رمضان المبارک رحمتوں اور برکتوں کا مہینہ اور اللہ تعالی کی طرف سے خصوصی انعام ہے۔ محض جسمانی عبادات سے اس ماہ کی برکتوں کو مکمل طور پر نہیں سمیٹا جا سکتا بلکہ یہ مقدس مہینہ آپس کے معاملات میں صبرو تحمل رواداری، اخوت ،عجز و انکساری کا بھی تقاضہ کرتا ہے۔

انہوں نے کہا اس ماہ مبارک میں ہمیں ایثار و قربانی کے جذبات کا عملی مظاہرہ کرنا چاہیے۔سحری و افطاری کے اوقات میں عزیز و اقربا کی ضروریات کو بھی پیش نظر رکھا جائے۔ جو لوگ رمضان کے دنوں میں چوربازاری اور خود ساختہ مہنگائی کرتے ہیں ۔وہ روزداروں کی مشکلات میں اضافہ کا باعث بنتے ہیں ۔اس طرح کے اعمال روزہ کی قبولیت میں مانع ہیں۔ایسے لوگوں روزہ کے روحانی فوائد سے محروم رہ جاتے ہیں۔روزہ محض بھوکا رہنے کا نام نہیں بلکہ اپنے تمام اعضا کو غیر شرعی امور سے دور رکھنے کا نام ہے ۔انہوں نے کہا کہ صبر، برداشت اور رواداری اس مقدس مہینے کے خصوصی انعام ہیں۔ روزے کا حقیقی لطف ان انعامات کے حصول میں ہے اور یہ تب ہی حاصل ہوتے ہیں جب نفس کے ساتھ جہاد میں ثابت قدمی اور استقامت اختیار کیا جائے۔انہوں نے کہا کہ رمضان المبارک کے دوران وطن عزیز کی ترقی و استحکام کے لیے بھی خصوصی طور پر دعا کی جائے۔

وحدت نیوز(ڈیرہ اسماعیل خان) مجلس وحدت مسلمین کے سیکرٹری جنرل نے کوٹلی امام حسین ؑ پر صوبائی وزیر علی امین گنڈاپورکی طرف سے بنائے جانے والے پارک کے حوالے سے جاری بیان میں کہا ہے کہ علی امین اور دیگر جنہوں نے کوٹلی امام حسین ؑکے ساتھ خیانت کی ہے ہم اس کی سخت الفاظ میں مزمت کرتے ہیں۔کوٹلی امام حسینؑ قبرستان اور عزاداری امام حسین ؑکے لیے وقف ہے ہم اس میں پارک یا کسی اور تعمیرات کی سخت الفاظ میں مزمت کرتے ہیں۔علی امین سے یہ امید ہے کہ وہ اپنے گھر کو پارک کے لیے وقف کریں گے اور کوٹلی امام حسین ؑپر نظریں نہیں لگائیں گے۔اس کے علاوہ انہوں نے محکمہ اوقاف کو بھی تنقید کا نشانہ بناتے ہوے کہا ہے کہ محکمہ اوقاف اپنی ہٹ دھرمی سے باز آ جائے وگرنہ ہم قانونی چارہ جوئی اور عوامی احتجاج کا حق محفوظ رکھتے ہیں۔

وحدت نیوز(کراچی) خیرالعمل ویلفیئر اینڈ ڈیولپمنٹ ٹرسٹ شعبہ فلاح وبہبودمجلس وحدت مسلمین پاکستان کراچی ڈویژن ان ماہ مبارک رمضان میں شہر قائد کے ایک ہزار مستحق خاندانوں میں راشن بیگ تقسیم کرے گی اور تین ہزار شہریوں کو روزہ افطار کروائے گی ، ان خیالات کا اظہار خیر العمل ویلفیئر ٹرسٹ کراچی ڈویژن کے سیکریٹری سید زین رضا رضوی نے ’’وحدت نیوز‘‘کے نمائندے سے ٹیلیفونک گفتگوکرتے ہوئے کیا، ان کاکہنا تھا کہ خیر العمل ویلفیئر ٹرسٹ انسانی خدمت کی اپنی سابقہ روایات کو برقرار رکھتے ہوئےاس ماہ مبارک رمضان میں بھی دکھی انسانیت کی خدمت میں کوئی کسر نہیں اٹھا رکھے گی، ضرورت مند گھرانوں میں راشن کی تقسیم ویسے بھی سارا سال جاری رہتی ہےلیکن رمضان المبارک میں اس کام میں کئی گناہ اٖضافہ ہو جا تا ہے ، انہوں نے مذید کہا کہ کراچی کے تمام چھ اضلاع میں یہ رمضان راشن بیگ تقسیم کیئے جائیں گے،جبکہ مختلف مساجد میں تین ہزار سے زائد روزےدار نمازیوں کو افطار کروایا جائے گا، اس کار خیر میں تعاون کیلئے مخیر حضرات ایم ڈبلیوایم کے دفاتر سے رابطہ قائم کرسکتے ہیں ۔

وحدت نیوز(ملتان) مجلس وحدت مسلمین جنوبی پنجاب کے سیکرٹری جنرل علامہ سید اقتدار حسین نقوی نے اپنے بیان میں کہا کہ وزیراعظم نواز شریف کی حکومت کا پیش کردہ بجٹ سہانے خوابوں پر مشتمل ہے۔ موجودہ حکمران بجٹ میں مختلف وعدے کر کے آنے والے انتخابات میں اپنا راستہ بنانے کی کو شش کے علاوہ کچھ نہیں۔ آج حکومت 100 نئے ہسپتال بنانے کا اعلان کر رہی ہے لیکن عوام یہ پوچھنے میں حق بجانب ہیں کہ پچھلے 3 سالوں میں حکومت نے کتنے نئے ہسپتال تعمیر کیے۔ اسی طرح اب حکمران تسلسل کے ساتھ پاور پروجیکٹس کے دھڑا دھڑ افتتاح کر رہے ہیں۔ یہ مختلف اوقات میں بجلی پیدا کرنے کے خواب دکھانے کے علاوہ کچھ بھی نہیں۔ صورتحال یہ ہے کہ نشتر ہسپتال اپنے قیام کے وقت کے مقابلہ میں آج 100 گنا زیادہ مریضوں کا بوجھ اٹھائے ہوئے ہے لیکن پچھلے تین سالوں میں حکومت نے کوئی توسیع نہیں کی۔ بجٹ بھی نشتر ہسپتال کی ابتدائی کپسٹی کے مطابق دیا جا رہا ہے اسی طرح کارڈیالوجی انسٹی ٹیوٹ توسیع کے اعلانات کے باوجود توسیع سے محروم ہے۔ اسی طرح جنوبی پنجاب کا دل ملتان شہر میں کوئی ایک کینسر ہسپتال نہیں ہے۔ ہم یہ سمجھتے ہیں کی جنوبی پنجاب کے ساتھ سوتیلی ماں جیسا سلوک کیا جا رہا ہے۔ جنوبی پنجاب کے عوام کے ساتھ وعدہ کیا گیا تھا کہ ہم جنوبی پنجاب کے لوگوں کو ان کے حقوق دیں گے۔ لیکن ہم یہ دیکھتے ہیں کہ جنوبی پنجاب کا سارا ترقیاتی بجٹ لاہور منتقل کر دیا جاتا ہے۔ اسی طرح ہائوس بلڈنگ فنانس کا دفتر ملتان سے بند کر دیا گیا جس کے نتیجے میں لوگ تخت لاہور حاضری بھرنے پر مجبور ہیں۔ ظلم یہ کہ ملتان سوئی گیس ڈیپارٹمنٹ کے ڈیمانڈ نوٹس وصول کرنے کا اختیار بھی لے کر لاہور منتقل کر دیا گیا ہے۔ ہم حکمرانوں سے مطالبہ کرتے ہیں کہ وہ عوام کو بتائیں کہ انہوں نے اپنے منشور میں کیے گئے وعدوں پر کہاں تک عملدرآمد کیا ہے۔ ان کے اپنے کارخانے اور ملوں میں دن رات اضافہ ہو رہا ہے لیکن قومی ادارے تباہ و برباد ہو رہے ہیں۔

وحدت نیوز (کراچی) مجلس وحدت مسلمین پاکستان کے مرکزی سیکرٹری اطلاعات سید علی احمر زیدی رمضان المبارک کے آغاز سے ہی ملک بھر میں بجلی کی غیر اعلانیہ اور طویل بندش پر کڑی تنقید کا اظہار کرتے ہوئے کہا کہ کراچی کی پہلی سحری کے دوران بجلی کی بندش کے باعث پورا شہر تاریکی میں ڈوبا رہا۔کے الیکٹرک نے وزیر اعلی کورمضان المبارک کے دوران لوڈشیڈنگ نہ کرانے کی یقین دہانی کرائی تھی اس کے باوجود بجلی کی بندش وزیر اعلی کے اختیارا ت کو چیلنج کرنے کے مترادف ہے۔لوڈشیدنگ کی وجہ سے پورے شہر کو پانی کے بحران کا بھی سامنا ہے ترقیاتی کام التوا کا شکا ر ہیں۔بجلی کی آنکھ مچولی سارا دن جاری رہی جس نے عوام کی زندگی اجیرن کر رکھی ہے۔ایک طرف مہنگائی اور ناجائز منافع خوروں نے عوام کی ناک میں دم کر رکھا ہے۔ ضروری اشیائے خورد ونوش خریدنا عام آدمی کی دسترس سے باہر ہوتا جا رہا ہے تو دوسری طرف لوڈ شیڈنگ نے گھریلو صارفین کو اضطراب کا شکار اور صنعتوں کو تباہی کے دھانے پر پہنچا دیا ہے۔سرکاری ادارے اپنے پیشہ وارانہ ذمہ داریوں سے دانستہ طور پر غافل بنے بیٹھے ہیں۔ایئر کنڈیشنز کمروں میں بیٹھ پر عوام کی تکلیف کا اندازہ نہیں کیا جا سکتا۔انہوں نے کہا کہ سخت ترین گرمی میں بجلی کی مسلسل بندش عوام میں بے چینی پیدا کر رہی ہے۔ہمارا حکومت سے مطالبہ ہے کہ رمضان المبارک کے دوران لوڈشیڈنگ پر پابندی لگائی جائے تاکہ عوام کی مشکلات کا ازالہ ہو۔

وحدت نیوز(اسلام آباد) مجلس وحدت مسلمین پاکستان کے مرکزی سیکرٹری جنرل علامہ راجہ ناصر عباس جعفری نے مقبوضہ کشمیر میں بھارتی دہشت گردی کے نتیجہ میں 13افراد کی شہادت پر شدید غم و غصے کا اظہار کرتے ہوئے اسے بدترین ریاستی دہشت گردی قرار دیا ہے۔انہوں نے کہا ہے کہ نہتے کشمیریوں پر بھارتی مظالم پر اقوام عالم کی خاموشی متعصبانہ طرز عمل کاواضح ثبوت ہے۔اقوام متحدہ سمیت عالمی برادری کو بھارت کے ان سنگین جرائم کا نوٹس لینا چاہیے۔رمضان کے آغاز میں مسلمانوں کے خون سے ہولی کھیلا جانا بھارت کے مکروہ اور جارحانہ عزائم کا تسلسل اور بنیادی انسانی حقوق کی شدید خلاف ورزی ہے۔مقبوضہ کشمیر کے حوالے سے پاکستان کو واضح اور دو ٹوک موقف اختیار کرنا ہوگا۔مقبوضہ کشمیر میں بھارتی جارحیت روکنے کے لیے پاکستان کے ساتھ سعودی عرب اور امریکہ کا ہم آواز نہ ہونا اس حقیقت کا عکاس ہے کہ ان دونوں ممالک کی دوستی خودغرضی اور ذاتی مفاد سے جڑی ہوئی ہے۔انہوں نے کہا کہ مسئلہ کشمیر سے حقیقی دوستوں اور موقعہ پرستوں کی شناخت کی جا سکتی ہے۔بھارت سے جغرافیائی تنازعہ ہمیں اس بات کی قطعاََ اجازت نہیں دیتا کہ افغانستان اور ایران سے دوستانہ تعلقات کو سازشوں کی نذر کیا جائے۔مسئلہ کشمیر کے پائیدار اور مستقل حل کے لیے عالمی قوتوں کو اعتماد میں لیا جائے۔ مسئلہ کشمیر کا فیصلہ خطے کے عوام کی مرضی کے مطابق ہی ہونا چاہیے۔حکومت پاکستان مقبوضہ کشمیرکے مسلمانوں کو بھارت کی ریاستی دہشت گردی سے بچانے کے لیے مثبت کوششوں کا فورا آغاز کرے۔