وحدت نیوز  (کوئٹہ)  مجلس وحدت مسلمین پاکستان کو ئٹہ ڈویژن کے زیر اہتمام نماز جمعہ کے بعد امام بارگاہ کلان کوئٹہ میں زائرہ زبیدہ کے مبینہ قتل کیخلاف، فرزند پاکستان سابق سنیٹر سید فیصل رضا عابدی کی گرفتاری کیخلاف اور زائرین کی کوئٹہ تفتان آمد و رفت میں رکاوٹیں ڈالنے کیخلاف پر امن احتجاج کیا گیا ،اس احتجاج میں مرکزی رہنما مجلس وحدت مسلمین پاکستان امام جمعہ علامہ سید ہاشم موسوی علامہ محمد جمعہ اسدی کوئٹہ کے مومنین سمیت زائرین کی کثیر تعداد نے شرکت کی ۔

شرکاء احتجاج نے بینرز اٹھا رکھے تھے جس پر زائرہ زبیدہ کے قتل میں ملوث پولیس اہلکار کو قرار واقعی سزاء دینے فیصل رضا عابدی کی گرفتاری کیخلاف نعرے درج تھے ،علامہ محمد جمعہ اسدی نے شرکاء سے خطاب میں کہا کہ فیصل رضا عابدی پر جھوٹے مقدمات ختم کیا جائیں اور انہیں با عزت رہا کیا جائیں ،انہوں نے کہا کہ وفاقی وزیر داخلہ جناب شہر یار آفریدی خود کوئٹہ تشریف لائے تھے انہوں نے زائرین کے مسائل کو حل کرنے کا وعدہ کیا تھا لیکن افسوس کہ تا حال زائرین کے مسائل میں کمی نہیں آئی ۔

علامہ سید ہاشم موسوی نے شرکاء احتجاج سے خطاب میں کہا کہ پنجاب پولیس نے جس طرح جواتین کی مجلس عزاء میں چادر و چار دیواری کی تقدس کو پامال کیا کسی صورت قابل برداشت نہیں اس واقع میں ملوث پولیس اہلکاروں کیخلاف کاروائی کی جائیں ۔علامہ سید ہاشم موسوی نے کہا کہ ہم ملک بھر میں جاری عزاء داری سید الشہداء کیخلاف کسی قسم کی پابندی کو برداشت نہیں کریں گے ،سابق سنیٹر فیصل رضا عابدی نے ہمیشہ سے پاکستانی مفادات کی بات کی ہے پاک افواج کے حق میں بات کی ہے ان پر جعلی قسم کے مقدمات واپس لیا جائیں اور انہیں باعزت رہا کیا جائیں ،آخر میں علامہ سید ہاشم موسوی نے قتل ہونے والی زائرہ زبیدہ سمیت جملہ شہداء کی ایصال ثواب کیلئے فاتحہ خوانی کی انہوں نے عالم اسلام اور پاکستان کی سلامتی کیلئے دعا کی۔

وحدت نیوز (اسلام آباد)  بہاولنگرتحصیل فورٹ عباس میں مجلس عزا پر پولیس گردی کے خلاف مجلس وحدت مسلمین پاکستان کے مرکزی سیکرٹری سیاسیات سید اسدعباس نقوی کا وفاقی وزیر داخلہ کو احتجاجی مراسلہ ،وزیر قانون پنجاب راجہ بشارت سے رابطہ اور آئی جی پنجاب سے ملاقات ، وزیر قانون پنجاب نے آئی جی پنجاب اور علاقہ ڈی پی او سے واقعہ کی رپورٹ طلب کر لی، تفصیلات کے مطابق بہاولنگرکی تحصیل فورٹ عباس میں دوروز قبل مجلس عزا پرپولیس کے حملے اور چادر اور چار دیواری کی پامالی کے بعد خواتین عزاداروں پر بدترین تشدد کے خلاف مجلس وحدت مسلمین کے مرکزی پولیٹیکل سیکریٹری اسدعباس نقوی نے علامہ راجہ ناصرعباس جعفری کی ہدایت پر وزیر مملکت برائے داخلہ شہریارآفریدی کو احتجاجی مراسلہ جاری کیا ہے، جبکہ انہوں نے آئی جی پولیس پنجاب سے بھی ملاقات کی اور انہیں واقع میں ملوث پولیس اہلکاروں کے خلاف فوری کاروائی کا مطالبہ کیا، بعد ازاں اسدعباس نقوی نے وزیر قانون پنجاب محمد بشارت راجہ سے بھی رابطہ کیا اور انہیں واقع کی تفصیلات سے آگاہ کرتے ہوئے ، خواتین کی توہین اور ان پر تشدد میں ملوث پولیس اہلکاروں کے خلاف قانونی کاروائی کا مطالبہ کیا ہے، جس پر، وزیر قانون پنجاب نے آئی جی پنجاب اور علاقہ ڈی پی او سے واقعہ کی رپورٹ طلب کر لی۔

وحدت نیوز (اسلام آباد) پاکستانی وزارت خارجہ کے زائرین کو درپیش ویزہ مسائل پر برادر اسلامی ملک عراق کی وزارت خارجہ سے رابطہ کرنےاور وزیر خارجہ شاہ محمود قریشی کی عراقی سفیر سے ملاقات اور زائرین کے مسائل کو اجاگر کرنے پر شکریہ اداکرتے ہیں،ان خیالات کا اظہارمجلس وحدت مسلمین پاکستان کے مرکزی پولیٹیکل سیکریٹری سید اسد عباس نقوی نے مرکزی سیکریٹریٹ سےمیڈیا کو جاری بیان میں کیا، انہوں نے کہاکہ ملک بھر سے لاکھوں زائرین ویزا نہ ملنے کے سبب تاحال پریشان ہیں، زائرین کو درپیش مشکلات کے مستقل حل کے لئے برادر اسلامی ممالک سے ملکر ایک جامع میکینزم بنایا جائے،

انہوں نے کہاکہ زائرین کی مشکلات کا تدارک مجلس وحدت مسلمین کی اولین ترجیح ہے، اس حوالے وفاقی حکومت سے مسلسل رابطے میں ہیں ، وزیر خارجہ شاہ محمود قریشی کی زائرین کو درپیش مشکلات اور مسائل کے حل کیلئے سنجیدہ کوششوں کو قدر کی نگاہ سے دیکھتے ہیں اور ان کے مشکور ہیں، انہوں نے کہاکہ وزرات داخلہ تفتان بارڈر اور بلوچستان بارڈر پر زائرین کو درپیش غیر قانونی مشکلات کو فوری حل کرے،جیکب آباد میں شہید ہونے والی زائرہ زبیدہ خانم کے قاتل پولیس اہلکاروں کیخلاف فوری کاروائی عمل میں لایا جائے۔

وحدت نیوز(لاہور) مجلس وحدت مسلمین پاکستان کے مرکزی ڈپٹی سیکریٹری جنرل سید ناصرعباس شیرازی نے وفدکے ہمراہ پاکستان تحریک انصاف کے رہنما اور وزیر بلدیات پنجاب عبد العلم خان سے ان کی رہائش گاہ پر ملاقات کی اور بہاولنگر کی تحصیل عباس فورٹ میں چادر اور چار دیواری کی پامالی ،خواتین عزاداروں پر پولیس کے تشدد ، فحش کلامی اور بے گناہ عزاداروں پر بلاجواز مقدمات کے قیام کے حوالے سے تفصیلی بات چیت کی، اس موقع پر ایم ڈبلیوایم کے مرکزی پولیٹیکل سیکریٹری سید اسدعباس نقوی ، شیعہ شہریان پاکستان کے کنوینئرسید وقارالحسنین نقوی اورایم ڈبلیوایم شعبہ خواتین کی مرکزی سیکریٹری جنرل اور رکن پنجاب اسمبلی محترمہ سیدہ زہرا نقوی بھی موجود تھیں، ایم ڈبلیوایم کے رہنمائوں نے خواتین عزاداروں پر پولیس کے تشدد، چادر اور چار دیواری کے تقدس کی پامالی کا فوری نوٹس لینے اور سخت تادیبی کاروائی کا مطالبہ کیا،ر وزیر بلدیات عبد العلیم خان نے ایم ڈبلیوایم کے وفد کو بہاولنگر میں ہونے والے واقعے پرحکومت پنجاب کی طرف سے فور ی تحقیقات اور کاروائی کی یقین دہانی کروائی ہے ۔

وحدت نیوز(لاہور) مجلس وحدت مسلمین پاکستان شعبہ خواتین کی مرکزی سیکریٹری جنرل اور رکن پنجاب اسمبلی محترمہ سیدہ زہرا نقوی نے ضلع بہاولنگر میں خواتین عزاداروں پر پولیس کے تشدد اور فحش کلامی پر تحریک التوائےکار اسپیکر پنجاب اسمبلی چوہدری پرویز الہٰی کے پاس جمع کروادی ہے، بعد ازاں انہوں نے اسمبلی فلور پرصوبائی وزیر قانون محمد  بشارت راجہ سے ملاقات کی اور ان سے معاملے کا فوری نوٹس لینے اور سخت تادیبی کاروائی کا مطالبہ کیا،وزیر قانون پنجاب بشارت راجہ نےزہرانقوی کو بہاولنگر میں ہونے والے واقعے پرحکومت پنجاب کی طرف کاروائی کی یقین دہانی کروائی ہے ۔

وحدت نیوز (اسلام آباد) مجلس وحدت مسلمین پاکستان کے پولیٹیکل ونگ کی کوششوں کے سبب وزیر خارجہ شاہ محمود قریشی نے عراق کے پاکستان میں سفیر ڈاکٹر علی یاسین محمد کریم سے اہم ملاقات کی ہے جس میں زائرین کو ویزہ نہ ملنے کی شکایات کا معاملہ اٹھایا ہے۔ ترجمان دفتر خارجہ سے جاری بیان میں بتایا گیا ہے کہ وزیر خارجہ شاہ محمود قریشی اور عراقی سفیر کے درمیان دفتر خارجہ میں ملاقات ہوئی، اس ملاقات میں وزیر خارجہ شاہ محمود قریشی نے زائرین امام حسین علیہ السلام کو ویزہ کےحصول میں مسائل پر تفصیلی بات چیت کی ہےاور زائرین کو بروقت ویزے کے اجراءکا مطالبہ کیا۔ اس موقع پر عراقی سفیر نے وزیر خارجہ کو یقین دلایا کہ ان کی طرف سے مکمل تعاون کیا جائے گا، اور ویزے کے شفاف اجرا ءکو بروقت یقینی بنایا جائے گا۔

واضح رہے کہ اربعین امام حسین ؑ پر پاکستان بھر سے لاکھوں زائرین بذریعہ سڑک اور ہوائی جہاز کربلا جانے کی خواہش رکھتے ہیں، جن میں ہزاروں زائرین تاحال عراقی ویزے کے حصول میں ناکام ہیں ، ان زائرین کے ہوائی ٹکٹس بھی ضائع ہوچکے ہیں جس بناءپر زائرین کو کروڑوں روپے کے نقصان کا سامنا ہے، جبکہ بذریعہ سڑک براستہ ایران کربلا جانے والے زائرین ویزوں کے اجراءمیں تاخیر کے باعث بروقت کربلا نہیں پہنچ سکیں گے، اس صورت حال میں زائرین انتہائی تشویش اور کشمکش میں مبتلا ہیں،اس صورت حال میں مجلس وحدت مسلمین پاکستان کے مرکزی قائدین علامہ راجہ ناصرعباس جعفری، ناصرشیرازی اور اسد نقوی نے پاکستان تحریک انصاف کی موجودہ حکومت بالخصوص وزیر خارجہ شاہ محمود قریشی سے رابطہ کرکے عراقی حکومت پر بروقت زائرین کو ویزے اجراءاور بہتر سفری سہولیات کی فراہمی کے لئے سفارتی کردار اداکرنے کی گذارش کی تھی ،جس کے نتیجے میں وزیر خارجہ شاہ محمود قریشی نے پاکستان میں متعین عراقی سفیر ڈاکٹر علی یاسین محمد کریم سے ملاقات کی ہے ۔