The Latest
وحدت نیوز(جڑانوالہ) وائس چئیرمین مجلس وحدت مسلمین پاکستان علامہ احمد اقبال رضوی وفد کے ہمراہ جڑانوالہ پہنچ گئے۔کریسچن کالونی کا دورہ مسیحی رہنماوں سے ملاقات ، سانحہ جڑانوالہ کی تحقیقات کیلئے کمیشن بنانے کا مطالبہ۔
تفصیلات کے مطابق سانحہ جڑانوالہ کے متاثرین سے ہمدردی اور اظہار یکجہتی کیلئے مجلس وحدت مسلمین پاکستان کے وائس چیئرمین علامہ سید احمد اقبال رضوی کی سربراہی میں وفد نے جڑانوالہ کا دورہ کیا۔
اس موقع پہ انہوں نے واقعہ کی بھرپور مذمت کی اور متاثرین سے اظہارِ یکجہتی کیا۔ وفد میں وائس چیئرمین علامہ احمد اقبال رضوی کے ہمراہ مرکزی سیکرٹری سیاسیات سید اسد عباس نقوی ،صوبائی صدر مجلس وحدت مسلمین صوبہ پنجاب سید علامہ علی اکبر کاظمی، صوبائی سیکرٹری سیاسیات سید آغا حسین شاہ زیدی ، صوبائی جنرل سیکرٹری مجلس وحدت مسلمین صوبہ پنجاب سید حسن رضا کاظمی ، ضلعی صدر ضلع فیصل آباد جناب علامہ فضل عباس کاظمی، ضلعی نائب صدر اور تحصیل صدر جناب ڈاکٹر ظفر عباس ، صوبائی آفس سیکرٹری مولانا ظہیر کربلائی اور دیگر شامل تھے ۔
وائس چیئرمین علامہ سید احمد اقبال رضوی نے کہنا تھا کہ قرآن پاک بائبل اور انجیلِ مقدس کی توہین پہ شفاف تحقیقات ہونی چاہیے ۔ ملوث کرداروں کو تحقیقات کے بعد قرار واقعی سزا دی جائے ۔ انہوں نے مزید کہا کہ توہینِ مذہب کے نام پر دہشت گردی قابل قبول نہیں ۔ اگر اس سانحہ میں دو افراد ملوث تھے تو اقلیتی برادری کی بستیوں کو جلانے ، عبادت گاہوں کو نذر آتش اور گھروں کو لوٹنےجیسے واقعات کی اسلام قطعا اجازت نہیں دیتا ۔ اس پہلو سے بھی تحقیقات ہونی چاہیے اور اس میں ملوث کرداروں کو کیفر کردار تک پہنچانے اور انہیں قرار واقعی سزا دلوانے میں پاکستان کے تمام اداروں کو متحرک ہونا پڑے گا ۔اس طرح کے مزید واقعات کی روک تھام کے لئے حکومت کو سخت اقدامات کرنا چاہئیے ۔ پاکستان کے ہر شہری کی جان ،مال ،عزت اور ناموس کی حفاظت حکومت کی پہلی ذمہ داری ہے ۔مگر افسوس سے کہنا پڑتا ہے کہ اس سانحہ میں بہت زیادہ کوتاہی ہوئی ۔خدا کرے ایسے مزید واقعات کو روکنے کے لئے حکومت سنجیدگی سے روک تھام کرے ایسی نرسریوں اور سوچ کی نفی کرنی ہوگی جو تکفیر کے بعد جلاؤ گھیراؤ جیسے اقدامات انجام دیتے ہیں ۔ہم پاکستان میں مسیحی برادری کے خلاف ہونے والے تمام دہشت گردی کے واقعات کی بھرپور مذمت کرتے ہیں اور ان تمام خاندانوں اور بالخصوص ہمارے جڑانوالے کے مسیحی بھائی بہنوں سے اظہار یکجہتی اور اظہار ہمدردی کرتے ہیں ۔ ۔اس تشدد آمیز انتہاء پسند مذھبی جنونی جتھے نے مذھب کے نام پر دھشت گردی کرکے اس بات کو مزید تقویت دی ہے کہ مذھب کے نام پر کوئی غیر ذمہ دارانہ قانون سازی جس میں ابہام بھی پایا جاتا ہو اس طرح کے جنونیوں کے ہاتھ میں ہتھیار دینے کے مترادف جس کا ملک متحمل نہیں ہوسکتا ۔ہم اس دکھ کی گھڑی میں اپنے مسیحی بھائی بہنوں کے ساتھ کھڑے ہیں ۔
مجلس وحدت مسلمین پاکستان کے وفد نے مسیحی برادری فیصل آباد کے سروینٹ آف گارڈ مسٹر یونس سلیمان ، مسٹر افتخار اور دیگر مقامی فادر آف کمیونٹی کے ہمراہ پریس کانفرنس کی ۔ اور متاثرہ جلے ہوئے چرچز اور مختلف گھروں کا بھی وزٹ کیا ۔اس موقع پر سروینٹ آف گارڈز نےمجلس وحدت مسلمین پاکستان کے سربراہان اور وفد میں شامل دیگر اراکین کا شکریہ اداکیا۔ متاثرہ مقامی مسیحی برادری کی خواتین اور جوانوں نے مکتب اہلبیت کے لئے نیک خواہشات کا اظہار کیا اور وفد کا شکریہ اد اکیا ۔
وحدت نیوز(کوئٹہ)سانحہ جڑانوالہ میں مسیحی برادری کے گھروں اور عبادت گاہوں میں توڑ پھوڑ اور یورپی ممالک میں قرآن کریم جلانے کے خلاف بیت ایل میموریل میتھوڈیسٹ چرچ کوئٹہ میں (قرآن سوزی مذاہبِ کی اہانت اور پر امن بقائے باہمی کے لئے خطرہ) کے عنوان سے کانفرنس منعقد ہوئی۔
کانفرنس سے مسیحی رہنما بشپ آف بلوچستان خالد رحمت سابق سینیٹر نوابزادہ حاجی لشکری رئیسانی ،مجلس وحدت مسلمین پاکستان کے مرکزی سیکرٹری تنظیم علامہ مقصود علی ڈومکی، بزرگ قوم پرست رہنما سینٹر میر مہیم خان بلوچ، ڈائریکٹر جنرل خانہ فرھنگ اسلامی جمہوریہ ایران آقا سید ابوالحسن میری ،جماعت اسلامی بلوچستان کے صوبائی امیر اور ملی یکجہتی کونسل بلوچستان کے صوبائی صدر مولانا عبد الحق ہاشمی، وزیر اعلیٰ بلوچستان کے سابق ترجمان بابر یوسف زئی، جماعت اہل سنت بلوچستان کے صوبائی صدر پیر سید حبیب اللہ شاہ چشتی، بزرگ عالم دین علامہ محمد جمعہ اسدی ،جمعیت غرباء اھل حدیث بلوچستان کے صدر مولانا فضل ربی، پاکستان تحریک انصاف کے صوبائی نائب صدر محمد عالم ،بلوچستان شیعہ کانفرنس کے صدر انجینئر جواد رفیعی، شیعہ علماء کونسل پاکستان کے مرکزی نائب صدر علامہ اکبر حسین زاہدی، بلوچستان قبائیلی الائنس کے نائب صدر ڈاکٹر سراج احمد خان یوسف زئی، ایم ڈبلیو ایم بلوچستان کے صوبائی جنرل سیکریٹری علامہ سہیل اکبر شیرازی، سکھ رہنما سردار جبیر جی سنگھ، پادری سائمن بشیر، آئی ایس او کے ڈویژنل صدر و دیگر نے خطاب کیا۔ تقریب کے آغاز میں تلاوت قرآن کریم کی سعادت قاری سجاد حیدری نے جبکہ انجیل مقدس کی تلاوت پادری شارون امانت نے کی۔
کانفرنس سے افتتاحی خطاب کرتے ہوئے علامہ مقصود علی ڈومکی نے کہا کہ سانحہ جڑانوالہ میں مسیحی برادری کے گھروں اور عبادت گاہوں پر حملہ کر کے جلانے والے پیغمبر رحمت صلی اللہ علیہ وآلہ وسلم کے پیروکار نہیں کیونکہ رحمۃ للعالمین نے ہمیں رحمت اور مہربانی کا درس دیا گھروں اور عبادت گاہوں کو آگ لگا کر بے گناہ انسانوں اور بچوں کو خوفزدہ کرنے والوں نے شمر اور حرملہ کا کردار ادا کیا ہے۔ ملک میں جس طرح کالعدم دہشت گرد تنظیموں اور شر پسندوں کو کھلی چھوٹ دی گئی ہے اس سے حالات میں بہتری ممکن نہیں۔
کانفرنس سے خطاب کرتے ہوئے سید ابوالحسن میری نے کہا کہ یورپی ممالک میں قرآن پاک جلانے کے واقعات شرمناک ہیں بعض یورپی ممالک ان مجرموں کی سرپرستی کرتے ہیں جو قرآن سوزی کے جرم کا ارتکاب کرتے ہیں۔ سوئیڈن کی حکومت نے قرآن سوزی کے شرمناک عمل کی حمایت کرکے کروڑوں مسلمانوں کے خلاف اعلان جنگ کیا ہے۔کانفرنس سے خطاب کرتے ہوئے نوابزادہ حاجی لشکری رئیسانی نے کہا کہ ریاستی اداروں کی غلط پالیسیوں کے باعث ملک میں انتہا پسندی کو فروغ ملا۔
وحدت نیوز(گلگت) صدر مجلس وحدت مسلمین گلگت بلتستان آغا علی رضوی کا دو روزہ دورہ گلگت نگر۔صوبائی کابینہ کے ہمراہ دورے کے دوران مرکزی سیکرٹری تعلیم برادر عارف علی جانی کے والد گرامی کی رحلت پر تسلیت پیش کی اور مجلس ترحیم سے خطاب کیا۔
صوبائی کابینہ کے اجلاس کی صدارت کی اور مرکزی امام جمعہ گلگت علامہ سید راحت حسین الحسینی سے ملاقات کی ۔خطبہ جمعہ میں آغا راحت حسین الحسینی کی مجاھدانہ کاوشوں کا خیر مقدم کرتے ہوئے ملت اسلامیہ کےلئے امید کا مینارہ قرار دیا۔اسکے علاؤہ مختلف علماء کرام،سیاسی سماجی شخصیات اور آئی ایس او گلگت کے وفد نے مجاھد ملت سے ملاقات کی۔
وحدت نیوز(گلگت)ایم ڈبلیو ایم کے صوبائی سیکرٹری سیاسیات ورکن جی بی کونسل شیخ احمد علی نوری اور رکن مرکزی کردار سازی کونسل ومعاون تنظیم سازی شیخ محمدجان حیدری نے گلگت، نگر،استور کا پانچ روزہ دورہ کیا۔دورہ کے دوران صوبائی کابینہ سمیت ضلع گلگت ،نگر حلقہ 4،5، اور ضلع استور کے ضلعی برادران سے ملاقات کی۔اور ایم ڈبلیو ایم شعبہ خواھران کے صوبائی اجلاس سے خطاب کیا۔دورہ کے دوران مختلف تعلیمی اداروں کا وزٹ اور مختلف سیاسی شخصیات سے خطاب کیا۔صوبائی کابینہ اجلاس میں آئندہ صوبائی شوری اجلاس،صوبائی شعبوں کی کارکردگی آیندہ پلان،اور اضلاع کی کارکردگی کا جائزہ لیا گیا۔اور گلگت بلتستان میں متوقع بلدیاتی انتخابات کے حوالے سے تفصیلی گفتگو ہوئی۔ضلع استور کے دورے کے موقع پر ضلع کی آرگنائزر کمیٹی،حلقہ2 استور میں سابق وزیر اعلی کی خالی سیٹ پر ہونے والے انتخابات گلگت بلتستان کی مجموعی سیاسی اور امن وامان کے حوالے سے موجود صورتحال کا جائزہ لیاگیا۔اور استور کے بزرگ علماء کرام،ایم ڈبلیو ایم کے ضلعی مسئولین،اور اسلامی تحریک کے ایک وفد سے ملاقات ہوئی۔استور سے واپسی پر بلتستان کے قومی پروجیکٹ فیالونگ واٹر پروجیکٹ کا جائزہ لیا گیا اور وہاں موجود عملہ کی حوصلہ افزائی کی گئی۔اور اس قومی پروجیکٹ کو وقت کی اہم ضرورت قرار دیاگیا۔
وحدت نیوز(راولپنڈی)راولپنڈی کے علاقے رتہ امرال کی امام بارگاہ حیدریہ کشمیریہ میں 30 محرم الحرام سے لے کر 9 صفر تک مجلس منعقد کی گئی جس میں مجلس وحدت مسلمین ضلع راولپنڈی شعبہ خواتین کی سیکرٹری یوتھ خواہر طیبہ اپنی یوتھ کے ساتھ اس مجلس میں خواتین کی سکیورٹی کو یقینی بناتے ہوئے اس پروگرام میں مجلس وحدت مسلمین شعبہ خواتین کی صدر سمیہ بشیر اور نائب صدر شایستہ عباس سیکرٹری میڈیا ایمان فاطمہ اور شعبہ تنظیم کی خواہر آسیہ اور پنڈی کی کابینہ نے بھی شرکت کی۔
وحدت نیوز(گلگت)گلگت بلتستان کونسل کے ممبران ایوب شاہ،شیخ احمد علی نوری ،سید شبیہ الحسنین ،عبدالرحمن،اقبال نصیر اور حشمت اللہ نے سانحہ جڑانوالہ کی پر زور مذمت کرتے ہوئے کہا کہ ریاست و قانون نافذ کرنیوالے ادارے اس دل خراش سانحے کی تحقیقات اور اس میں ملوث افراد کے خلاف سخت قانونی کاروائی کرے۔ہم سب مسلمان بھائی سانحہ جڑانوالہ کے متاثرین سے مکمل اظہار ہمدردی و یکجہتی کرتے ہیں۔
انہوں نے کہا کہ سانحہ جڑانوالہ ملک عزیز کے امن کو سبوتاژ کرنے کی ناکام کوشش ہے۔کسی بھی مذہب میں تشدد کے لیے کوئی جگہ نہیں ہے، تمام عبادت گاہیں، مقدس کتابیں اور شخصیات مقدس ہیں، اِن کا احترام کیا جانا چاہیئے۔انہوں نے مزید کہا کہ واقعے میں ملوث تمام شرپسندوں کے خلاف بلاتفریق قانونی کارروائی کی جائے، اور نقصانات ہوئے ہے انکی فوری بحالی کے لیے اقدامات کیے جائیں۔
وحدت نیوز(کوئٹہ)مجلس وحدت مسلمین پاکستان کے مرکزی سیکرٹری تنظیم سازی علامہ مقصود علی ڈومکی کی قیادت میں تنظیمی وفد نے ڈی آئی جی پولیس کوئٹہ اعتزاز گورایہ سے ملاقات کی۔ وفد میں صوبائی جنرل سیکریٹری علامہ سہیل اکبر شیرازی صوبائی صدر عزاداری ونگ محمد رضا ضلعی نائب صدر آغا سید ضیاء اور ضلعی سیکرٹری تنظیم سید زمان شامل تھے۔اس موقع پر گفتگو کرتے ہوئے علامہ مقصود علی ڈومکی نے کہا کہ کوئٹہ میں ایک مرتبہ پھر دھشت گردی کی وارداتوں میں شیعہ ہزارہ پولیس کے جوانوں کا قتل لمحہ فکریہ ہے۔ دھشت گرد اسلام اور انسانیت کے دشمن ہیں۔ کوئٹہ میں دیرپا امن کا قیام ضروری ہے۔ مجلس وحدت مسلمین قیام امن کے سلسلے میں اپنا بھرپور کردار ادا کرنے کے لئے آمادہ ہے۔انہوں نے تجویز دی کہ ہزارہ پولیس کی ڈیوٹیز اپنے ایریاز میں لگائی جائیں جبکہ بروری تھانے کا ایریا وسیع اور تھانے میں نفری کم ہے جس میں مناسب اضافہ کیا جائے۔اس موقع پر گفتگو کرتے ہوئے ڈی آئی جی اعتزاز گورایہ نے کہا کہ دھشت گردی کے ناسور کے مقابلے اور قیام امن کے لئے پولیس اور عوام کا باہمی تعاون ضروری ہے۔ پولیس کی وردی پہننے کے بعد ہم پر عوام کے جان و مال کے تحفظ کی سنگین ذمہ داری عائد ہوتی ہے جو ہم پوری ذمہ داری سے ادا کرنے کی کوشش کرتے ہیں۔ شہید جوانوں کے قاتلوں کو بے نقاب کرتے ہوئے مجرموں کو قانون کے مطابق کیفر کردار تک پہنچائیں گے۔ انہوں نے وفد کی تجاویز کا خیر مقدم کرتے ہوئے تجاویز پر عمل درآمد کی یقین دہانی کرائی۔اس موقع پر علامہ مقصود علی ڈومکی نے اعتزاز گورایہ صاحب کو عالم اسلام کے جید سنی عالم دین علامہ جلال الدین سیوطی کی کتاب احیاء المیت فی فضائل اہل البیت کا تحفہ پیش کیا۔
وحدت نیوز(کراچی)سانحہ جڑانوالہ کی شدید مذمت کرتے ہیں۔ مسیحی برادری کے ساتھ ہیں۔شر پسندوں اور توہین قرآن کرنے والوں کو گرفتار کیا جائے۔ مختلف مذاہب کے رہنماؤں کا چرچ آف ٹرینیٹی کراچی میں منعقدہ تقریب سے خطاب ۔
تقریب کی صدارت بشپ صادق ڈینئل نے کی، صدر مجلس وحدت مسلمین پاکستان کراچی ڈویژن علامہ شیخ محمد صادق جعفری،جمعیت علماء پاکستان کے علامہ قاضی نورانی ،فلسطین فاؤنڈیشن پاکستان کے ڈاکٹر صابر ابو مریم، ہیومن رائٹس کونسل کے جمشید حسین، معروف مذہبی رہنما معاذ نظامی، سکھ یوتھ کونسل کے صدر مگھن سنگھ، ہندو رہنماوجے مہاراج اور دیگر شریک ہوئے۔
رہنماؤں نے سانحہ جڑانوالہ پر شدید تشویش کا اظہار کیا اور مذمت کی اور کہا کہ کسی بھی مذہب اور مقدسات کی توہین کرنے والے اسلام دشمن قوتوں کے آلہ کار ہیں ۔ ہم سب پاکستانی ہیں اور پاکستان کی سالمیت کے لئے سب متحد ہیں۔ سانحہ جڑانوالہ پر پولیس انتظامیہ کی کارکردگی ناقص رہی۔ سانحہ جڑانوالہ ایک سوچی سمجھی سازش کا حصہ لگتا ہے۔ قرآن پاک کی توہین کرنے والوں اور عباد گاہوں کو نذر آتش کرنے والے شر پسندوں کو گرفتار کیا جائے۔ ملک بھر میں مسلمان اور مسحیحی عوام باہمی محبت اور یکجہتی کا مظاہرہ کریں۔ پاکستان کی مسیحی برادری کا دکھ پاکستان کے تمام مسلمانوں کا دکھ ہے۔
وحدت نیوز(اسلام آباد)مین مجلس وحدت مسلمین پاکستان علامہ راجہ ناصر عباس جعفری سے اسلامی جمہوریہ ایران کے سفیر کی ملاقات، پاکستان میں حالیہ تعینات ہونے والے سفیر رضا امیری مقدم نے اپنے وفد کے ہمراہ ان کی رہائش گاہ پر ملاقات کی اور باہمی دلچسپی کے امور پر تبادلہ خیال کیا۔
اس موقع علامہ راجہ ناصر عباس جعفری نے پاکستان میں بطور سفیر ذمہ داری سنبھالنے پر رضا امیری مقدم کا خیر مقدم کیا اور ایران پاکستان کے درمیان برادرانہ تعلقات کو مزید مستحکم بنانے کی خواہش کا اظہار کیا ۔
انہوں نے مدرسہ جامعہ الولایہ کی زیر تعمیر عمارت کا بھی دورہ کیا اور مختلف شعبہ جات کا معائنہ کیا، ملاقات میں مجلس وحدت مسلمین پاکستان کے مرکزی جنرل سیکرٹری سید ناصر عباس شیرازی، پرنسپل جامعہ الولایہ علامہ سید علی محمد نقوی، ڈپٹی جنرل سیکرٹری ایم ڈبلیو ایم پاکستان سلیم صدیقی اور علامہ سخاوت علی قمی بھی موجود تھے۔
وحدت نیوز(اسلام آباد)سربراہ مجلس وحدت مسلمین پاکستان علامہ راجہ ناصر عباس جعفری حفظہ اللہ سےان کی رہائش گاہ پر فرزندانِ قائد شہید علامہ سید عارف حسین الحسینی رح مولانا سید علی الحسینی اور سید حسین الحسینی کی ملاقات۔
فرزندان ِ شہید قائد نےزیر تعمیر جامعہ الولایہ کی عمارت کا معائنہ کیا اور بزرگ علماء کی جانب سے متنازعہ ترمیمی بل کے خلاف آل پاکستان علما و ذاکرین کانفرنس کے کامیاب انعقاد پر مبارکباد بھی پیش کی ۔
ملاقات میں صوبائی صدر ایم ڈبلیو ایم جنوبی پنجاب علامہ اقتدار حسین نقوی ،مرکزی ڈپٹی جنرل سیکریٹری سلیم صدیقی ، مسئول مرکزی دفتر ارشاد حسین بنگش اور دیگر بھی موجود تھے۔
