وحدت نیوز( لاہور) سربراہ مجلس وحدت مسلمین پاکستان علامہ راجہ ناصرعباس جعفری نے صوبائی سیکرٹریٹ پنجاب میں پریس کانفرنس کرتے ہوئے کہا کہ مجلس وحدت مسلمین ملک کی اعلیٰ ترین عدلیہ ، الیکشن کمیشن اور حکومت سے مطالبہ کرتی ہے کہ زیادہ سے زیادہ ٹرن آؤٹ کے لئے بلدیاتی انتخابات ماہ ربیع الثانی میں منعقد کرائے جائیں۔محرم ، صفر اور ربیع الاول میں بلدیاتی انتخابات کے انعقاد سے عوام کی اکثریت حق رائے دہی استعمال کرنے سے محروم رہ جائے گی جوکہ غیر جمہوری اور غیر آئینی عمل ہوگا ، اگر انتخابات ملتوی نہ کیے گئے تو مجلس وحدت مسلمین بائیکاٹ کرے گی اور حکومت کے اس غیر آئینی اقدامات اور عوام کو اس کے آئینی حق سے محروم کرنے کے خلاف ملک گیر احتجاجی مہم چلائے گی ، مجلس وحدت مسلمین دیگر سیاسی و مذہبی جماعتوں کے ہمراہ بلدیاتی انتخابات کے محرم الحرام میں انعقاد کے فیصلے کے خلاف آئینی پٹیشن دائر کرے گی،اس موقع پر مجلس وحدت مسلمین کے دیگر رہنماؤں اور علمائے کرام ، علامہ سید مبارک علی موسوی،علامہ سید علی محمد نقوی،علامہ علامہ حسنین عارف،علامہ ابوذر مہدوی،علامہ سید حیدر علی موسوی،سید ناصر عباس شیرازی ،علامہ سید حسن مہدی کاظمی،علامہ سید حسن ہمدانی ،علامہ ذاکر حسین ذاکری،علامہ ڈاکٹر مجتبیٰ حیدر ترمذی،علامہ ملک محمد اشفاق ڈھکوبھی موجود تھے۔

پریس کانفرنس سے خطاب کرتے ہوئے مجلس وحدت پاکستان کے مرکزی سیکریٹری جنرل علامہ راجہ ناصر عباس جعفری کا کہنا تھا کہ ہم بلدیاتی انتخابات کے جلد انتخابات کے مخالف نہیں لیکن مسئلہ یہ ہے کہ ملک بھر میں محبان اہل بیت علیہم السلام عزاداری میں مصروف ہیں،یہ غم کے ایام ہیں، محرم اور صفر میں عزادارا ن حسینی عزاداری شہدائے کربلا کوہر دوسرے کام پر ترجیح دیتے ہیں گوکہ ملک میں پانچ کروڑ آبادی شیعہ مسلمانوں پر مشتمل ہے لیکن عزاداری سید الشہداء ایک ایسا مذہبی فریضہ ہے کہ جس میں سنی مسلمانوں کی کثیر تعداد بھی شریک ہوتی ہے۔ لہذ ا ہم یہ سمجھتے ہیں کہ محرم ، صفر اور ربیع الاول میں بلدیاتی انتخابات کی صورت میں مملکت خداداد پاکستان کی غالب اکثریت اس جمہوری عمل میں شرکت نہیں کرپائے گی۔مجلس وحدت مسلمین کے رہنماؤں نے کہا کہ ربیع الاول میں عید میلاد النبی (ص) کی محفلیں اور جلوس برپا کئے جاتے ہیں جشن عید میلاد النبی (ص) کی وجہ سے عوام انتخابی سرگرمیوں میں حصہ نہیں لے سکے گی اور امیدوار اپنی انتخابی مہم نہیں چلا پائیں گے لہذا یہ ممکن نہیں کہ ان تین مہینوں میں بلدیاتی انتخابات میں بھرپور عوامی شرکت ہوسکے۔

علامہ راجہ ناصر عباس جعفری نے کہا کہ محرم ، صفر اورربیع الاول کے مقدس مہینوں میں عوام کی اکثریت زیارات کے لیے کربلا ، نجف ، مشہد اورربیع الاول میں عمرے کے لیے مکہ اور مدینہ کا سفر کرتے ہیں جس کی وجہ سے بہت سے امیدوار اپنے کاغذات نامزدگی جمع کرانے اور عوام ووٹ ڈالنے سے محروم رہ جائیں گے جب عدلیہ صدر کے انتخاب کے لیے امیدواروں کے عمرے پر جانے کی وجہ سے تاریخ میں تبدیلی کی اجازت دے سکتی ہے تو بلدیاتی انتخابات کے انعقاد کی تاریخ کو اس صورتحال کے پیش نظر تبدیل کیا جاسکتا ہے ، انہوں نے کہا کہ مذکورہ حقائق کے علاوہ یہ حقیقت بھی اپنی جگہ موجود ہے کہ صوبائی حکومتیں بلدیاتی انتخابات کے لئے ضروری و لازمی اقدامات نہیں کرپائی ہیں۔ ابھی تک بیلٹ پیپرز کی چھپائی ایک مسئلہ بنا ہوا ہے اورکاغذات نامزدگی کے حصول میں امیدواروں کو دشوار ی کا سامنا ہے ، الیکشن کمیشن کوآگاہ کیا جاچکا ہے کہ بلدیاتی انتخابات کی تیاریاں نہیں ہو پائی ہیں۔ان انتخابات کا مقصد نچلی ترین سطح پر عوام کی اقتدار میں شرکت ہے اور اگر عوام کی بھرپور شرکت نہ ہو تو پھر ان انتخابات کا مقصد ہی فوت ہوجاتا ہے۔ لہذا ہم ملک کی اعلی ترین عدلیہ سے یہ درخواست کرتے ہیں کہ ان حقائق کی روشنی میں ربیع الثانی کے آ غاز میں بلدیاتی انتخابات منعقد کرائے جائیں۔ نئے شیڈول کا اعلان کریں تاکہ بلدیاتی انتخابات میں ووٹرز کا ٹرن آؤٹ زیادہ سے زیادہ ہوسکے۔ اس طرح ملک کے سنی و شیعہ مسلمانوں کی بھرپور شرکت سے بلدیاتی انتخابات کا بنیادی مقصد جوکہ عوام کی نچلی ترین سطح پر اقتدار میں شرکت ہے وہ بنیادی مقصد بھی حاصل ہوگا اور پاکستان میں آئینی اسلامی جمہوریت مضبوط ہوگی اور عوام کے گلی محلوں کی سطح کے مسائل بھی حل ہوسکیں گے۔

علامہ راجہ ناصر عباس کا کہنا تھا کہ ہم پاک فوج اورہزاروں محب وطن شہدا کے سفاک قاتلوں کو شہید قرار دینے کے بیان کی پر زور مذمت کرتے ہیں جو لوگ قیام پاکستان سے ہی ریاست کے مخالف اور بابائے قوم قائد اعظم محمد علی جناح پر کفر کے فتوے لگاتے تھے آج وہی لوگ ہمارے بہادر اور شجاع افواج اور پاکستانی عوام کے قاتل دہشت گردوں کی حمایت اور ریاست کی مخالفت کرکے ثابت کر رہے ہیں ان کا پاکستان وجود کے ساتھ کوئی تعلق نہیں ہیں پاکستان کے شہدا ہمارے قومی ہیرو ہیں ہمارے عظیم شہدا کو ان کٹھ پتلی ملاوُں کے سرٹیفیکٹ کی ضرورت نہیں او ر ہم مطالبہ کرتے ہیں پاک فوج اور ہزاروں شہدا کے خانوادہ گان سے اس شرمناک بیان پر غیر مشروط معافی مانگے۔

وحدت نیوز(بلتستان)مجلس وحدت مسلمین پاکستان بلتستان ڈویژن کے سیکرٹری جنرل علامہ آغا علی رضوی نے مرکزی مجلس عزاء نیورنگاہ اسکردو میں خطاب کرتے ہوئے کہا ہے کہ میدان کربلا میں نواسہ رسول (ص)، جگر گوشہ بتول (س)، حضرت امام حسین (ع) ایک لشکر یا فوج کے مدمقابل میں نہیں تھے بلکہ ظلم، فتنہ، فساد، بدعت، بے دینی، بے حیائی اور بے غیرتی کی ایک دنیا کے مقابلے میں کھڑے تھے۔ آپ (ع) نے ظالم و جابر، خلافت رسول (ص) کے داعی اور انحراف کے ایک جہاں کے دباو کو قبول نہیں کیا اور سب کچھ قربان کرکے اسلام حقیقی کو ہمیشہ کے لیے زندہ کر دیا۔ معرکہ کربلا میں صبر، شکر، شرافت اور غیرت جیسے الہٰی اقدار کو زندگی ملی ہے۔ علامہ آغا علی رضوی نے مزید کہا کہ خدا کا شکر ہے کہ ہمارا تعلق قافلہ عزّ و شرف سے ہے، ذلت ہم سے کوسوں دور ہے، شہادت ہمارے لیے باعث افتخار ہے اور کربلا عزّ و شرف کا راستہ ہے۔ ہم کار حسینی سرانجام دیتے ہوئے زندہ رہیں یا اس راہ میں شہادت نصیب ہو جائے ہر دو صورت میں کامیاب ہیں۔

وحدت نیوز(گلگت) صوبائی ترجمان ایم ڈبلیوایم گلگت بلتستان کا گوجرانوالہ واقعے کی شدید الفاظ میں مذمت کرتے ہوئے کہنا تھا کہ یہ محرم الحرام کو خراب کرنے کی سازش ہے۔گجرانوالہ واقعے کی شدید الفاط میں مذمت کرتے ہیں ،مجلس وحدت مسلمین گلگت بلتستان کے ترجمان سعید الحسنین نے اپنے ایک بیان میں گذشتہ روز گوجرانوالہ میں تین افراد کی شہادت کی شدید الفاط میں مذمت کی اور کہا کہ یہ واقعہ محرم الحرام کو خراب کرنے کی سازش ہے۔ انہوں نے کہا کہ حکومت واقعے میں ملوث دہشت گردوں کو جلد گرفتار کرے۔ دوسری جانب آئی ایس او گلگت ڈویژن کے صدر مدثر عباس نے بھی گوجرانوالہ واقعے کی مذمت کرتے ہوئے کہا ہے کہ واقعہ مجالس عزاء اور عزاداری محدود کرنے کی سازش ہے جو کسی صورت قابل قبول نہیں۔ انہوں نے مزید کہا کہ حکومت جلد ملزمان کو گرفتار کرے اور مجالس عزاء کی سکیورٹی کو مزید سخت بنائے۔

وحدت نیوز(ملتان) مجلس وحد ت مسلمین پاکستان کے مرکزی ڈپٹی سیکرٹری جنرل علامہ سید شفقت حسین شیرازی نے کہا ہے کہ حکمران مٹھی بھر دہشت گردوں سے ڈر کر مذاکرات کرنے کی بجائے فوج اور پولیس کو بااختیار کریں، تاکہ وہ ان دہشت گردوں سے نمٹ سکیں۔ اگر خدانخواستہ محرم الحرام کے ان ایام میں کوئی سانحہ ہوگیا تو 10 محرم کو ہمارا رُخ اسلام آباد کی طرف ہوگا۔ محرم، صفر اور ربیع الاول کے ایام میں شیعہ سنی بھائی متحد ہو کر اپنی مذہبی رسومات ادا کرتے ہیں، بہت کم وقت میں بلدیاتی الیکشن کرانے کی بجائے تین ماہ تک لیٹ کئے جائیں۔ ان خیالات کا اظہار اُنہوں نے مجلس وحدت مسلمین یوتھ ونگ کے مرکزی دفتر گلگشت کالونی میں وحدت یوتھ ونگ کے مرکزی سربراہ سید فضل عباس نقوی کے ہمراہ پریس کانفرنس سے خطاب کرتے ہوئے کیا۔

علامہ سید شفقت حسین شیرازی نے مزید کہا کہ جو دہشت گرد پاکستان کی رٹ کو قبول نہیں کرتے اور پاکستانی پرچم لہرانے نہیں دیتے اور بے گناہ شیعہ سنی اور قانون نافذ کرنے والے اداروں کے افراد کو شہید کرتے ہیں، اُن کے ساتھ مذاکرات کرنے کا کیا جواز بنتا ہے۔ اُنہوں نے کہا کہ جو شعائر اسلام و پاکستان کی بے حرمتی کرتے ہیں اور اولیاء کو قبروں سے نکال کر بے حرمتی کرتے ہیں، جو کل پاکستان کے خلاف تھے، آج وہ پاکستان کے ٹھیکیدار بنے ہوئے ہیں۔ اُنہوں نے کہا کہ پورے ملک میں چالیس ہزار سے زائد شیعہ سنی مسلمانوں کو قتل کیا گیا اور یہاں تک کہ جی ایچ کیو اور دیگر حساس ادارے (پی این ایس مہران) ان سے محفوظ نہیں ہیں۔ ان مجرموں سے مذاکرات کی بجائے انہیں پکڑ کر عدالت کے کٹہرے میں لایا جائے، جو محدود گروہ کے ذریعے ملک کو ہائی جیک کرنا چاہتے ہیں۔ اُنہوں نے کہا کہ یہی آرمی تھی جب اس نے سوات خالی کرایا تو یہی فضل اللہ سوات چھوڑ کر بھاگ گیا تھا۔ خدارا حکمران آرمی اور پولیس کے وقار کو مجروح نہ کریں ورنہ کوئی بھی دشمن کسی وقت ملک کی سالمیت پر حملہ کرسکتا ہے۔

 
اُنہوں نے کہا کہ جب قومی اسمبلی میں متفقہ قراردادیں منظور کی گئی ہیں کہ تمام سیاسی جماعتوں نے رائے دی ہے کہ بلدیاتی الیکشن لیٹ کرائے جائیں، اس پر سپریم کورٹ تمام سیاسی جماعتوں کے فیصلے پر نظرثانی کیوں نہیں کرتی۔؟ اُنہوں نے کہا کہ ہم پاکستان کے اندر خانہ جنگی نہیں چاہتے، امن، اخوت اور بھائی چارے کی فضا کو قائم رکھنا چاہتے ہیں، لیکن مٹھی بھر دہشت گرد اس ملک کو یرغمال بنانا چاہتے ہیں۔ اس موقع پر مجلس وحدت مسلمین کے یوتھ ونگ کے مرکزی چیئرمین فضل عباس نقوی نے کہا کہ ملک بھر میں وحدت اسکائوٹس تشکیل دے دیئے ہیں جو امام بارگاہوں میں ہونے والی مجالس اور جلوسوں پر ڈیوٹی دے رہے ہیں۔ تاہم حکومت اور قانون نافذ کرنے والے اداروں کی ذمہ داری بھی بنتی ہے کہ وہ سکیورٹی کے انتظامات مزید بہتر بنانے کے لیے اپنا کردار ادا کریں۔