وحدت نیوز (بھکر)  مجلس وحدت مسلمین پاکستان کے مرکزی سیکرٹری جنرل علامہ راجہ ناصرعباس جعفری نے کہا ہے کہ پاکستان میں قانون بھی موجود ہے اور ادارے بھی موجود ہیں لیکن اپنا کردار ادا نہیں کر رہے، مرکزی حکومت شریف فیملی کے تحفظ کے لئے کوشاں ہے، مزدور کا استحصال ہوتا ہے تو ہو جائے، کسان مرتا ہے تو مر جائے، ہاری کی عزت برباد ہوتی ہے تو ہو جائے، لیکن شریف فیملی کو بچنا چاہیے۔ پاکستان کا المیہ یہ ہے کہ ملک کے تاجر سیاستدان بن گئے ہیں، اپنے مفادات کو ترجیح دیتے ہوئے ملک اور قوم کا استحصال کر رہے ہیں، ملک پر سیاسی فرعونوں، معاشی قارونوں اور مذہبی ملاں جو دنیا پرست اور بدکردار ہیں، قابض ہیں اور یہ معاشرے کا استحصال کرتے ہیں، اس وقت قانون پائوں تلے روندا جا رہا ہے، ہسپتالوں کی صورت حال ناگفتہ بہ ہے، سیاستدان اپنے اقتدار کے لئے عوام کو لڑاتے ہیں، شیعہ سنی تفرقہ پیدا کرکے اپنی حکومت کو مستحکم کرتے ہیں، ہماری ذمہ داری ہے کہ اس کے سدباب کی کوشش کریں۔ ان خیالات کا اظہار اُنہوں نے دورہ جنوبی پنجاب کے موقع پر بھکر میں پریس کانفرنس سے خطاب کرتے ہوئے کیا۔ علامہ ناصر عباس جعفری نے مزید کہا کہ سرائیکی خطے کی محرومیاں ناقابل بیان ہیں، ہم سرائیکی صوبے کی مکمل حمایت کرتے ہیں، اس الیکشن میں ہم سرائیکی صوبے کے حوالے سے خصوصی مہم شروع کریں گے۔ زراعت ہماری معیشت میں ریڑھ کی ہڈی کی حیثیت رکھتی ہے، کسان اس وقت بے حال اور اپنی فصلیں جلانے پر مجبور ہیں، شوگر ملوں کے مالکان تو طاقتور اور امیر ترین ہوتے جا رہے ہیں، لیکن گنے کی کاشت کرنے والا کسان خودکشی اور ٹھوکریں کھانے پر مجبور ہے، یہ قانون پر عملدرآمد نہ ہونے کی وجہ سے ہے، ادارے اپنا کام نہیں کر رہے ہے۔

اُنہوں نے کہا کہ بھکر میں 71 اہل تشیع اور 41 اہلسنت افراد کو شیڈول فورتھ میں ڈالا گیا ہے، جس میں اینٹ کے بھٹے پر کام کرنے والا مزدور، کسان اور غریب شامل ہیں، قانون شکن اور لٹیروں کو فورتھ شیڈول میں نہیں ڈالا جاتا، اگر قانون استعمال کرنے والے اچھے انسان نہ ہوں تو قانون کی دھجیاں اُڑائی جاتی ہیں، کاش ان غریبوں کی بجائے شوگر ملوں کے اُن مالکان کو ڈالا جاتا جو عوام کے پیسے کھاتے ہیں، کاش عوام کے ووٹ لے کر تفرقہ بازی پیدا کرنے والے سیاستدان کو شیڈول فورتھ میں ڈالا جاتا، شیڈول فورتھ میں دہشتگردوں کو ڈالا جائے اور محب وطن افراد کے خلاف اوچھے ہتھکنڈے استعمال کرنا بند کئے جائیں، مجلس وحدت مسلمین اتحاد اور وحدت کی علامت ہے، ہم اس اتحاد کے لئے ہر قسم کی قربانی دینے کے لئے تیار ہیں، یہ ملک کسی مسلک کا نہیں بلکہ تمام مذاہب اور مسالک کے پیروکاروں کا ہے، ہمیں آج قائداعظم اور علامہ اقبال کے بیانیے کو زندہ کرنے کی ضرورت ہے، ہمیں تعصب، تقسیم اور نفرتوں کی دیواروں کو گرانا ہوگا، ملک میں میرٹ کی حکمرانی ہونی چاہیے، جنرل ضیاء الحق کی پالیسی ملک کو بربادی کی جانب لے گئی ہے، ورنہ پاکستان آج ترقی کی منازل طے کر رہا ہوتا، آج نہ مسجد محفوظ ہے، نہ چرچ محفوظ ہے، نہ امام بارگاہ محفوظ ہے، نہ عبادت خانے محفوظ ہیں، اسلام آباد ہمارا دارالحکومت ہے لیکن وہاں کتنی چیک پوسٹیں ہیں؟ یہ تو ہمارے پایہ تخت کی صورتحال ہے، باقی حصوں کی کیا صورتحال ہوگی، ہم ضیاء الحق کی پالیسیوں کا خمیازہ بھگت رہے ہیں۔

علامہ ناصر عباس نے کہا کہ ایم ڈبلیو ایم جمہوری جدوجہد پر ایمان رکھتی ہے، اس ملک کو جمہوریت کی ضرورت ہے، اداروں کا احترام ضروری ہے، نواز شریف کی جانب سے اداروں پر حملے ملک کو کمزور کرنے کی سازش ہے، اس سے اداروں کا احترام ختم کرنے کی کوشش کی جا رہی ہے، نواز شریف تین مرتبہ وزیراعظم رہے، کھربوں پتی ہیں، اُنہیں اپنے اقدامات پر نظرثانی کی ضرورت ہے، پنجاب میں سیاسی مخالفین کے خلاف جو اقدامات کئے جا رہے ہیں، ان سے ہمارے اداروں کی عزت میں کمی آئے گی، ایم ڈبلیو ایم انتخابات کے ذریعے ملک میں تبدیلی کی خواہاں ہے، آنے والے الیکشن میں اپنا بھرپور کردار ادا کریں گے، محب وطن افراد کو پارلیمنٹ میں بھیجنے کے لئے اپنا کردار ادا کریں گے، آئندہ الیکشن میں اتحاد کے حوالے سے سوال کے جواب میں علامہ ناصر عباس نے کہا کہ ہمارے مختلف جماعتوں کے ساتھ رابطے جاری ہیں، الیکشن میں نواز شریف اور اُن کی جماعت کا راستہ روکیں گے، ان کے مقابلے میں کھڑے ہوں گے، ان کی شکست میں مرکزی کردار ادا کریں گے، اس موقع پر مرکزی سیکرٹری تربیت ڈاکٹر یونس حیدری، جنوبی پنجاب کے سیکرٹری جنرل علامہ اقتدار نقوی، مولانا ہادی حسین ہادی، مزمل حسین، سفیر حسین شہانی اور دیگر بھی موجود تھے۔

وحدت نیوز (گلگت) مسلم لیگ حکومت جب سے اقتدار میں آئی ہے کرپشن، اقربا پروری اور تعصب کو فروغ دے رہی ہے۔اقربا پروری اور کرپشن میں لیگی حکومت نے پیپلز پارٹی کو پیچھے چھوڑ دیا ہے،سرکاری ملازمتوں میں میرٹ کو پائمال کرکے تعصبانہ بنیادوں پر بھرتیاں جاری ہیں۔محکمہ فشریز میں میرٹ کی دھجیاں اڑائی گئی ہیں اور من پسند افراد کو نوازا جارہا ہے۔مجلس وحدت مسلمین گلگت بلتستان کے ترجمان محمد الیاس صدیقی نے کہا ہے لیگی حکومت نے اداروں کو مفلوج کرکے اختیارات اپنے ہاتھ میں لی ہوئی ہیں۔کسی بھی ادارے میں ملازمتوں پر تقرریاں میرٹ پر انجام نہیں پائی ہیں۔محکمہ ہیلتھ، پولیس ڈیپارٹمنٹ اور دیگر اداروں میں بھرتیوں میں میرٹ کو پائمال کیا گیا۔اب محکمہ فشریزمیں بھی من پسند افراد کو نوازا جارہا ہے جس کی ہرگز اجازت نہیں دی جائیگی۔

انہوں نے کہا کہ انصاف کے تقاضوں کو پورا نہ کرنے کی وجہ سے علاقے کا امن تباہ ہوتا جارہا ہے جس کی تمام تر ذمہ داری حکومت پر عائد ہوگی۔ماضی کی حکومت کی طرح کرپشن کو فروغ دیا جارہا ہے اور ترقیاتی منصوبے بھی تعصب کی نذرہیں۔میرٹ کو برقرار نہ رکھنے کی وجہ سے نوجوان نسل احساس محرومی کا شکار ہوچکی ہے اور بیروزگای سے تنگ نوجوان دوسرے وسائل کا سہارا لینے پر مجبور ہیں۔ انہوں نے ذمہ دارآفیسروںسے اپیل کی ہے کہ وہ سرکاری ملازمتوں میں بغیر کسی دبائو کا شکار ہوئے میرٹ پر تعیناتی عمل میں لائیں۔سیاسی نسبت اور غیر قانونی راستے سے ملازمت حاصل کرنے والے جان لیں کہ خدا کا غضب کسی بھی انہیں لپیٹ میں لے سکتا ہے۔انہوں نے چیف سیکرٹری سے اپیل کی ہے کہ وہ اپنے منصب کا لحاظ رکھتے ہوئے ماتحت اداروں میں میرٹ کو یقینی بنائیں۔

وحدت نیوز(بھکر) پاکستان کو کمزوررکھنے کیلئے بھارت کو طاقتورکیا جارہاہے،اگر اداروں کا احترام ختم کردیاجائے تو تباہی ہوتی ہے، یہ 22کروڑ کا مسلم ملک ہے جو خطے کی بہت بڑی طاقت ہے، پاکستان کو کمزور کرنا اس کے دشمنوں کی ضرورت ہے،ان خیالات کا اظہار مجلس وحدت مسلمین پاکستان کے مرکزی سیکریٹری جنرل علامہ راجہ ناصرعباس جعفری نے ڈسٹرکٹ بارایسوسی ایشن ضلع بھکر میں وکلاءکے اجتماع سے خطاب کرتے ہوئے کیا، اس موقع پر مرکزی سیکرٹری شعبہ تربیت ڈاکٹر یونس ، معاون مرکزی سیکریٹری سیاسیات برادر محسن شہریار،صوبائی سیکریٹری جنرل علامہ اقتدار نقوی، ضلعی رہنماسفیر حسین شہانی اور احسان اللہ بلوچ بھی ہمرا ہ تھے۔

انہوں نے مزیدکہاکہ ہمارا کلچر ختم کیا جارہاہے، ہمارے کلچرکو نقصان پہنچانے کیلئے بیرونی ثقافت کو پروان چڑھایا جارہاہے، بھارتی اور ترکش ڈرامے ہمارے معاشرے کو تباہی کی جانب لے جارہے ہیں، انہوں نے کہاکہ ہر حال میں آئین کی حکمرانی ہونی چاہئے، آئین کے ذریعے حدودکا تعین کیا جائے، قانون کے بغیر معاشرہ جنگل بن جاتا ہے،عدل وانصاف کا قیام قانون کے ذریعے ہی ہوسکتا ہے، افسوس ہمارے ملک میں جو قانون شکن ہے وہی سب سے بڑا حکمران ہے ۔

وحدت نیوز(لاہور) جمعیت علمائے پاکستان( نیازی) کے زیر اہتمام لاہور پریس کلب میں یوم پاکستان کے مناسبت سے سمینار کا انعقاد کیا گیاجس میں مجلس وحدت مسلمین پاکستان کے مرکزی ڈپٹی سیکرٹری  سید ناصر عباس شیرازی نے خصوصی خطاب کرتےہوئے انہوں نے کہاکہ شیعہ اور سنی وحدت کے ذریعے تکفیری قوتوں کاراستہ روکیں گے ،پاکستان کو حقیقی معنوں میں آزاد اور خود مختار ملک بنائیں گے ،قومی بیانیہ درست سمت میں استوار کرنے کی ضرورت ہے ،اسلام اور پاکستان کو اپنی شناخت اور مرکز تکریم قرار دیں گے ،اس وطن کا فطری دفاع ہیں ،اس کی نظریاتی اور جغرافیائی سرحدوں کی حفاظت کریں گے،اس موقع پر مرکزی سیکرٹری سیاسیات سید اسد عباس نقوی بھی موجود تھے ،بعد ازاں ناصر عباس شیرازی اور برادر اسد نقوی نے علماء و مشائخ کو پھولوں کے ہار پہنائے ،علاوہ ازیں تمام اسلامی مسالک اور نمائندہ جماعتوں کی شرکت نے تقریب کو چار چاند لگا دیے ،تقریب کا اختتام ملکی سلامتی کی دعا اور وطن کے ساتھ تجدید عہد سے ہوا۔

وحدت نیوز(سکردو) مجلس وحدت مسلمین پاکستان گلگت بلتستان کے زیراہتمام 23 مارچ یوم پاکستان کی مناسبت سے ایک پروقار تقریب کا انعقاد یوم پاکستان کانفرنس کے عنوان سے اسکردو میں ہوگا۔ ذرائع کے مطابق کانفرنس 25 مارچ کو بروز اتوار، بوقت 2:30 پی ٹی ڈی سی کے ٹو ہوٹل حمید گڑھ اسکردو میں منعقد ہوگی۔ اس پروگرام میں تمام مکاتب فکر کے علماء و زعماء اور مختلف سیاسی جماعتوں کے رہنماوں کی شرکت کی اطلاع ہے۔ یوم پاکستان کانفرنس میں مقصد حصول پاکستان اور اسلاف کی قربانیوں کے علاوہ وطن عزیز پاکستان کے حصول کے لئے کی جانے والی سیاسی جدوجہد پر گفتگو کی جائے گی۔ پروگرام میں پاکستان کی موجودہ صورتحال پر روشنی ڈالی جائے گی اور ملکی استحکام و سربلندی کے لئے شہریوں کی ذمہ داریوں پر بھی روشنی ڈالی جائے گی۔ اس سلسلے میں ایم ڈبلیو ایم جی بی کے ترجمان فدا حسین کا کہنا ہے کہ یوم پاکستان کانفرنس کی تیاری آخری مراحل میں ہے اور یہ اپنی نوعیت کا ایک اہم پروگرام ثابت ہوگا۔

وحدت نیوز (جیکب آباد) مجلس وحدت مسلمین جیکب آباد کے زیراہتمام ۲۳ مارچ کے موقع پرسٹی آف نالج پبلک اسکول جیکب آباد میں ( یوم پاکستان سیمینار) منعقد ہوا۔ سیمینار سے مجلس وحدت مسلمین سندہ کے سیکریٹری جنرل علامہ مقصودعلی ڈومکی ، مولانا منور حسین سولنگی، سید شبیر علی شاہ کاظمی و دیگر نے خطاب کیا۔ اس موقعہ پر (یوم پاکستان سیمینار) سے خطاب کرتے ہوئے علامہ مقصودعلی ڈومکی نے کہا کہ برصغیر کے مسلمانوں نے طویل جدوجہد کے ذریعے انگریز سامراج کی غلامی سے نجات حاصل کی، قائد اعظم محمد علی جناح ، حکیم الامت علامہ اقبال ؒ اور فاطمہ جناح کی قیادت و رہنمائی میں پاکستان حاصل کیا گیا۔ یہ وطن آج جن مسائل و مشکلات میں گھرا ہوا ہے، ان مشکلات سے نکلنے کے لئے ہمیں مشترکہ جدوجہد کرنی ہوگی۔ سامراجی اور امریکی غلامی سے آزاد پاکستان جہاں امن اور اخوت کی فضا ہو ہمارا خواب ہے۔ہم 23 مارچ( یوم پاکستان )کے موقع پر وطن عزیز پاکستان سے اپنی محبت کابھرپور اظہار کرتے ہوئے ملکی استحکام اور ترقی کے عزم کا اعادہ کرتے ہیں۔