وحدت نیوز (سکردو) مجلس وحدت مسلمین پاکستان بلتستان ڈویژن کے سیکریٹَری جنرل علامہ آغا علی رضوی نے پاکستان کے معروف عالم دین اور ایم ڈبلیو ایم پاکستان کے مرکزی ڈپٹی سیکرٹری جنرل علامہ محمد امین شہیدی کے خلاف وارنٹ گرفتاری پر غم و غصے کا اظہار کرتے ہوئے کہا کہ نواز حکومت کی جانب سے علامہ امین شہیدی کو دہشتگردوں کی مخالفت کرنے اور دہشتگردوں کے خلاف آپریشن کی حمایت کرنے کی سزا دی جا رہی ہے۔ علامہ امین شہیدی نے ہمیشہ نظریہ پاکستان کا دفاع کیا، ملک دشمن عناصر کے خلاف ملک بھر میں زمینہ سازی کی، دہشتگردوں کے خلاف آپریشن کرنے والی آرمی کی اخلاقی پشت پناہی کی اور ملک بھر میں قائم فوجی عدالتوں پر میڈیا میں ہونے والے حملوں کا دفاع کیا۔
انہوں نے میڈیا پر اپنے دلائل کے ذریعے روح آئین پاکستان کو زندہ کرنے کی کوشش کی اور اقبال کے پاکستان کی نظریاتی حفاظت کی۔ آج ان کے خلاف وارنٹ گرفتاری دراصل دہشتگردوں کے سیاسی ونگ کی جانب سے انتقامی کارروائیوں کا شاخسانہ ہے۔ آغا علی رضوی نے کہا کہ سانحہ راولپنڈی کی آڑ میں شیعہ شخصیات بالخصوص علامہ امین شہیدی کو پابند سلاسل کرنے کی حکومتی کوشش کامیاب نہیں ہونے دیں گے، نواز حکومت شیعہ دشمنی میں اندھی ہوچکی ہے۔ گلگت بلتستان میں بھی صوبائی حکومت اسی پالیسی پر کاربند ہے۔ میں گلگت بلتستان کے عوام کو ہوشیار رہنے کی تاکید کرتا ہوں اور واضح کرتا ہوں کہ علامہ امین شہیدی کے خلاف وارنٹ گرفتاری کے بعد نواز حکومت کا چہرہ واضح ہوگیا ہے۔ نواز شریف کی صوبائی حکومت گلگت بلتستان میں بھی ضیاء کے دور کو تازہ کرنے کی کوشش میں ہے اور فرقہ واریت کو ہوا دینا چاہتی ہے، عوام ہوشیار رہیں۔
وحدت نیوز(گلگت) مجلس وحدت مسلمین کے رہنماؤں پر غداری کی جھوٹی ایف آئی آر درج کروانے والے پاکستان دشمن اور اس ملک کے وفادار نہیں ،الیکشن سے قبل تک ایمپاورمنٹ آرڈر کی مخالفت میں بیانات دینے والوں کو صرف اپنے مفادات سے غرض ہے۔ محب وطن افراد کو محض سیاسی مخالفت کی بناء پر پاکستان مخالف قرار دینے کی مذموم کوشش ہرگز کامیاب نہیں ہوگی۔ان خیالات کا اظہار مجلس وحدت مسلمین گلگت بلتستان کے سیکرٹری جنرل علامہ نیئر عباس مصطفوی اور شیخ محمد بلال سمائری نے صوبائی،ڈویژنل اور ضلعی عہدیداروں کے مشترکہ اجلاس سے خطاب کرتے ہوئے کیا۔
انہوں نے کہا کہ حکومت جھوٹی ایف آر کی آڑ میں مجلس وحدت مسلمین سے سیاسی انتقام لے رہی ہے جس کی انہیں بھاری قیمت چکانا پڑے گی،ہماری شرافت سے کوئی ناجائز فائدہ اٹھانے کی کوشش نہ کرے۔ہم نے سیاست کو عبادت سمجھ کر سیاسی میدان میں قدم رکھا ہے اور مخالفین کی ہر سازش کا منہ توڑ جواب دیا جائیگا۔انہوں نے کہا کہ مجلس وحدت مسلمین کے رہنماؤں اور کارکنوں کے خلاف بغاوت کی جھوٹی ایف آئی آر سوچی سمجھی سازش کا حصہ ہے ،انتخابی عمل میں ن لیگ کی پالیسیوں کی مخالفت کی پاداش میں علماء کرام اور بے گناہ رہنماؤں کو پابند سلاسل کیا گیا ہے جو جمہوریت کی دعویدار جماعت کی قلعی کھولنے کے لئے کافی ہے۔انہوں نے کہا کہ حکومت انتقامی کاروائیوں سے باز آئے اور خطے کی محرومیوں اور استحصال کا سد باب کرے ورنہ حکومت کی انتقامی پالیسیوں سے علاقے میں احساس محرومی اور آبادی کے مختلف طبقات کے مابین نفرتوں کی بنیاد جو حکمرانوں نے ڈالی ہے اس میں اضافہ ہوگا۔اجلاس میں علامہ امین شہیدی کے جھوٹے مقدمے میں وارنٹ گرفتاری کی شدید مذمت کرتے ہوئے اسے فوری طور پر واپس لینے کا مطالبہ کیا گیا۔
وحدت نیوز (گلگت) ڈسٹرکٹ ہیڈ کوارٹر ہسپتال غریب مریضوں کیلئے عزرائیل بن گیا ہے،لیڈی ڈاکٹرز کی عدم دستیابی اوروقت پر ہسپتال نہ پہنچنے کی وجہ سے اس ہفتے دو ڈیلوریز ضائع ہوگئیں،جگہ جگہ گندگی کے ڈھیر لگے ہوئے ہیں جس سے مریض اور ان کی دیکھ بھال کرنے والوں کو سخت تکلیف کا سامنا ہے۔دوائی نام کی کوئی چیز میسر نہیں ،وقت پر ڈاکٹرز اپنی ڈیوٹی پر حاضر نہیں ہوتے ہیں اور ایمرجنسی کیسز کیلئے گھروں سے ڈاکٹرز کو بلانا پڑتا ہے۔ایسا لگ رہا ہے کہ موت و حیات کی کشمکش میں مبتلا مریضوں کو زندگی کی نوید دینے والا یہ ادارہ بالکل بے آسرا ہے اورحکومت کی عدم توجہ نے اس ادارے کو بے حال کردیا ہے۔ان خیالات کا اظہارمجلس وحدت مسلمین کی رکن صوبائی اسمبلی بی بی سلیمہ نے ڈسٹرکٹ ہیڈ کوارٹر ہسپتال کے دورے کے بعد کیا۔
انہوں نے کہا کہ بیشتر ڈاکٹر ز اپنے ذاتی کلینک میں زیادہ ٹائم دیتے ہیں اور اکثر ہسپتال سے غائب رہتے ہیں جس سے مریضوں کو سخت پریشانی کا سامنا ہے۔ ڈی ایچ کیو ہسپتال خواتین ونگ میں تین لیڈی ڈاکٹرز تعینات ہیں لیکن یہ اکثر ڈیوٹی سے غیر حاضر رہتی ہیں اور اگر کوئی ایمرجنسی پیش آئے تو ان کو گھروں سے بلانا پڑتا ہے۔ ایک ایل ایچ وی نے تمام ہسپتال کا نظام سنبھالا ہوا ہے اور وہ بغیر ڈاکٹر کے تمام ڈلیور یز سرانجام دیتی ہیں۔انہوں نے کہا کہ شہر کا واحد ہسپتال ہے جہاں مریضوں کی سب سے زیادہ تعداد رخ کرتی ہے لیکن جدید سہولتوں اور ماہر ڈاکٹر ز کے فقدان کی وجہ سے آئے روز شکایات موصول ہوتی رہتی ہیں۔انہوں نے کہا اس ادارے سے قابل اور ماہر ڈاکٹرز کا فوری طور پر تبادلہ کیا جاتا ہے جو غریب مریضوں کے ساتھ انتہائی زیادتی ہے،ڈاکٹرز کی تعداد انتہائی کم ہونے سے مریضوں کو گھنٹوں لائن میں کھڑا رہ کر ا پنی باری کا انتظار کرنا پڑ رہا ہے اور کمزور مریض اپنی باری آنے تک بے حال ہوجاتے ہیں ۔انہوں نے وزیر صحت اور چیف سیکرٹری سے ادارے کو جدید سہولتوں سے مزین کرنے اور مریضوں کی بہتر نگہداشت کی خاطر فوری نوٹس لینے مطالبہ کرتے ہوئے کہا کہ ہسپتال میں ڈاکٹرز کی تعداد بڑھائی جائے خاص طور لیڈی ڈاکٹرز ،جن کی کمی کی وجہ سے مریض انتہائی پریشان رہتے ہیں۔
وحدت نیوز(لاہور) اسرائیلیوں کی جانب سے مظلوم فلسطینی بچے کو زندہ جلائے جانے کے واقعہ کے بعد مسلم حکمرانوں کی خاموشی شرمناک ہے، امریکہ کی جانب سے اسرائیلیوں کو لائنس ٹو کل دیا ہوا ہے اور ایسا محسوس ہوتا ہے کہ فلسطینی عوام کا خون پانی سے بھی سستا ہے، اسرائیل کا وجود کسی مکڑی کے جالے سے بھی زیادہ کمزور ہے مگر افسوس اس امر کا ہے کہ عرب حکمران امریکی آلہ کاروں کا دوسرا نام ہے، ان خیالات کا اظہار مجلس وحدت مسلمین پنجاب کے سیکرٹری جنرل علامہ عبدالخالق اسدی نے بیداری امت و استحکام پاکستان کانفرنس کے سلسلے میں رابطہ مہم میں کارکنوں کے اجلاس سے خطاب میں کیا. انہوں نے کہا کہ اسرائیل سے توجہ ہٹانے کے لئے یمن اور شام میں تنازعہ کھڑا کیا گیا اور اب صیہونی ظالموں کو پوچھنے والا کوئی نہیں۔ صہیونیوں نے ہمیشہ مسلمانوں کے خلاف شازشیں کی ہیں اور آج بھی دنیا بھر میں فساد کی وجہ صہیونی لابی ہی ہیں جو عالم اسلام کے خلاف ایک منظم منصوبے کے تحت کام کر رہے ہیں، داعش، النصرہ، بوکو حرام، طالبان جیسے وحشی گروہوں کی سرپرستی اسرائیل اور امریکہ ہی کرتے ہیں تاکہ اسلام کا روشن چہرہ مسخ کر سکے.
انہوں نے کہا کہ افسوس اس بات کا ہے کہ صیہونی طاقتوں کا سب سے بڑا آلہ کار اس وقت عرب ممالک بنے ہوئے ہیں اسرائیل کی بقا کے لئے امریکی اشارے پر یمن میں نہتے مسلمانوں پر شب خون مارا جا رہا ہے جبکہ فلسطینیوں کو اسرائیلی مظالم سہنے کے لئے تنہا چھوڑ دیا گیا ہے۔ علامہ اسدی کا کہنا تھا کہ مسلم حکمرانوں نے آج تک فلسطینیوں کے درد کو نہیں سمجھا بلکہ ہر ملک اپنے ذاتی مفاد اور تعصب کی جنگ لڑ رہا ہے، قبلہ اول کی آزادی اور فلسطینی مسلمانوں پر اسرائیلیوں کے مظالم کی روک تھام کے لئے تمام مسلمانوں کو ایک موقف اپنانا ہو گا، دنیا میں امن اور انسانیت کی بقا کے لئے ضروری ہے کہ انبیاء کی سرزمین اور قبلہ اول پر قابض صہیونی دہشت گردوں کیخلاف متحد ہوں اور انسانیت کو ان درندوں کی چنگل سے آزاد کرانے کے لئے کردار ادا کریں۔
وحدت نیوز(سکردو) اسد عاشورا کے سلسلے میں مرکزی مجلس عزا امامیہ اسٹوڈنٹس آرگنائزیشن پاکستان بلتستان ڈویژن کے زیراہتمام منعقد ہوئی، جس میں ایم ڈبلیو ایم بلتستان کے سربراہ آغا علی رضوی نے خطاب کیا۔ آغا علی رضوی نے اپنی تقریر میں کہا کہ عزاداری ظلم کے خلاف قیام کا نام ہے، عزاداری وقت کے یزید کے خلاف اٹھ کھڑے ہونے کا نام ہے، عزاداری انسان کو انسانی اور الہٰی اقدار کی خاطر جان دینے کا درس دیتی ہے، عزاداری سے انسانوں کو جرائت ملتی ہے، عزاداری سے ہمت ملتی ہے، عزاداری سے شجاعت ملتی ہے اور مکتب تشیع کی توانائیوں کا سرچشمہ ہی عزاداری ہے، عزاداری امام حسین ؑ تشیع کی حفاظت کے ضامن ہے، دنیا کی مخالفت کے باوجود اگر کربلا والے زندہ ہیں تو عزاداری کی وجہ سے ہے۔ انہوں نے اپنے خطاب میں عالمی حالات پر روشنی ڈالتے ہوئے کہا کہ ایران اور چھ عالمی طاقتوں کا ایٹمی معاہدہ ایران کی کمزوری نہیں بلکہ ایران کی فتح کی علامت ہے اور یہ صلح حدیبیہ کی طرح اسلام دشمن طاقتوں کی شکست کا پیش خیمہ ثابت ہوگا۔ ایران نے اس معاہدہ کے ذریعے دنیا کے سامنے ایٹمی ملک کی حیثیت کو تسلیم کروایا ہے اور امریکہ ایسا کرنے پر مجبور ہوگیا ہے۔ اس معاہدہ کے بعد بھی رہبر معظم کے نزدیک امریکہ شیطان بزرگ ہے اور عالم اسلام سمیت پاکستان کا دشمن امریکہ ہی ہے۔
انہوں نے کہا دنیا میں اسلام کو کمزور کرنے کے لئے امریکہ و اسرائیل داعش اور القاعدہ کو وجود میں لائے اور اسلام کا منحوس چہرہ پیش کر دیا۔ آج بھی ان درندوں کے ہاتھوں عراق، شام، یمن، افغانستان اور پاکستان محفوظ نہیں ہے۔ ہم ملک بھر میں دہشتگردوں کے خلاف اٹھائے جانے والے اقدامات کا خیر مقدم کرتے ہیں اور پاکستان آرمی کو خراج تحسین پیش کرتے ہیں۔ انہوں نے کہا کہ سعودی شہنشاہوں کی ہمنوائی میں داعش یمن میں بھی بے گناہوں کو قتل کرنے میں مصروف ہے اور تین مہینے سے ان پر جنگ مسلط کی ہوئی ہے، رمضان جیسے بابرکت مہینے میں بھی یہ جنگ جاری رہی اور اس جنگ میں پاکستان آرمی کو دھکیلنے کی کوشش کی جو کہ پارلیمنٹ کے مشترکہ اجلاس نے ناکام بنا دی۔ انہوں نے کہا کہ یمن میں سعودی جارحیت کے خلاف گلگت میں نکالی والی ریلی کے مقررین کی گرفتاری افسوسناک اور شرمناک عمل ہے، اگر گلگت بلتستان انتظامیہ نے ان گرفتار ہونے والوں کو رہا نہ کیا اور مقدمات ختم نہیں کئے تو پورے گلگت بلتستان میں صوبائی حکومت کے خلاف تحریک چلائی جائیگی۔
وحدت نیوز(اسلام آباد) سنی اتحاد کونسل کے چیئرمین صاحبزادہ حامد رضا نے سوشل میڈیا پر سماجی رابطے کی ویب سائٹ ٹوئٹرپر جاری اپنے پیغام میں مجلس وحدت مسلمین کے مرکزی رہنما علامہ امین شہیدی کے انسدادی دہشت گردی عدالت کی جانب سے راجہ بازار سانحے کے جھوٹے مقدمے میں وارنٹ گرفتاری جاری ہونے پرشدید درعمل کا اظہار کرتے ہوئے کہا کہ علامہ امین شہیدی کے وارنٹ گرفتاری تکفیری اقلیت کو خوش کرنے کی کوشش ہے،علامہ امین شہیدی اتحاد امت کے داعی اور شیعہ سنی وحدت کے سرخیل ہیں ، انہیں راجہ بازار کے واقعے میں ملوث قرار دے کر ن لیگ کی حکومت کالعدم تکفیری عناصرکے زخمیوں پر مرہم رکھنے کی کوشش کررہی ہے، جس کی ہم پر زور الفاظ میں مذمت کرتے ہیں ۔
