وحدت نیوز (کراچی) مجلس وحدت مسلمین ضلع ملیر کے فلاحی شعبے خیرالعمل فائونڈیشن اورڈونر محترمہ بشریٰ مبین صاحبہ کے اشتراک عمل سےضلع ملیر کے مضافاتی علاقے بگٹی گوٹھ میں شیعہ سنی مساجد اور چوراہوں پر پانی کی فراہمی کےایک لاکھ روپے کی لاگت سے پانچ ہینڈ پمپ نصب کردیئے گئے، ایم ڈبلیوایم ضلع ملیر کے سیکریٹری فلاح وبہبود اسدعلی زیدی نے وحدت نیوز سے گفتگوکرتے ہوئے کہا کہ بگٹی گوٹھ کے رہائشی عوام پینے کے صاف پانی کی تلاش میں دور دور بھٹکنے پر مجبور تھے، چھوٹے چھوٹے بچے کودور دراز علاقوں سے پانی بھر کر لانا پڑتا تھا ،الحمد اللہ  خیر العمل فائونڈیشن کی نشاندہی اور اپیل پر محترمہ بشریٰ مبین صاحبہ نے بگٹی گوٹھ کے پانچ مقامات جن میں مسجدو امام بارگاہ  پنجتنی (ع)،مسجد حضرت عمرفاروق اور دیگر تین چوراہوں پر پینے کے صاف پانی کے ہینڈ پمپ لگاکر عوام کی مشکلات کو حل کرنے میں ہمارے ساتھ تعاون کیا، امید ہے کہ محترمہ بشریٰ مبین آئندہ بھی فلاحی کاموں میں خیر العمل فائونڈیشن کے ساتھ اپنا تعاون جاری رکھیں گی۔

وحدت نیوز( ابراہیم زئی ہنگو)  تحریک فقہ جعفریہ کے بانی صدر اور معروف عالم دین علامہ حسین الاصغر مرحوم کی دوسری برسی کی تقریب سے سے خطاب کرتے ہوئے مجلس وحدت مسلمین صوبہ خیبر پختونخوا کے سیکرٹری جنرل علامہ سید سبطین حسینی نے کہا ہے کہ زمین و زمان کی کہنگی اور گزشت لیل و نہار علماء کی یادیں محو نہیں کر سکتی بلکہ وہ آفتا ب عالم کی طرح اُفق عالم پر روشنیوں کو مینار بن کر لوگوں کے دلوں میں زندہ و جاوید رہتے ہیں، اللہ کی راہ میں شہادت بلند ترین مرتبہ ہے اور اس لئے کہ انسان فطرتاً ہر چیز اپنی جان پر فدا کر لیتا ہے، لیکن شہید اپنی جان اپنے عقیدے اور وطن کی راہ میں قرب الی اللہ کی خاطر فدا کر دیتا ہے، لیکن فرامین معصومین (ع) کی روشنی میں علماء کا درجہ بلند اور رفیع ہے، علماء انسانوں کی روح کے محافظ ہیں، اور دوام روح کو ہے جسم کو نہیں، اس لئے علماء لوگوں کے دلوں میں زندہ ہوتے ہیں، مرحوم مولانا حسن الاصغر صاحب بھی علاقہ بنگش کے مومنین کے دلوں میں زندہ رہیں گے، اس لئے کہ انہوں نے اپنی زندگی ملت کی سرخروئی اور ملت کو معارف آل محمد سے روشنائی کے لئے بیش بہا خدمات انجام دیں، جامعۃ البنات رئیسان کا قیام مرحوم کی کاوشوں کا بہترین مظہر و عکاس ہے، کہ جس میں طالبات علوم آل محمد سے سیراب ہو کر لوگوں کو دین سے روشنا س کرانے کے لئے ہمہ تن گوش ہیں۔ ملت پاکستان بالعموم اور علاقہ بنگش کے عوام بالخصوص علامہ صاحب کو ہمیشہ یاد رکھیں گے۔

علاوہ ازیں لودی خیل ہنگو میں شہید قائد علامہ عارف حسین الحسینی کی برسی کی تقریب سے خطاب میں مجلس وحدت مسلمین صوبہ خیبر پختونخوا کے سیکرٹری جنرل علامہ سید سبطین حسینی کا کہنا تھا کہ قائد شہید علامہ عارف حسین الحسینی رضوان اللہ علیہ ستائیس سال گزرنے کے باوجود آج بھی ہمارے دلوں پر حکمرانی کر رہے ہیں، شہید کی یاد و فکر زندہ ہے، شہید قائد نہ صرف ایک شہید تھے بلکہ وہ ایک عظیم عالم دین بھی تھے، شہید نے اپنی مجاہدانہ اور عالمانہ زندگی میں قوم کو سرخروئی اور سرفرازی سے نوازا، ایک سوئی قوم کو بیدار کیا اور اسے اعلیٰ مقام دیا، ملت تشیع پاکستان کو ایک شناخت دی، اور اقوام عالم میں تشیع کا نام روشن کیا، شہید قائد کی بابصیرت قیادت نے ملک میں تشیع کو ایک سیاسی پلیٹ فام دیا، شہید کی یہ ہی چاہت تھی کہ پارلیمنٹ میں بھی ہمارے نمائندے موجود ہوں، جو تشیع کی ترجمانی کریں، جو تشیع کو موقف اور ان کا عقیدتی موقف اور ان کا نظریاتی و سیاسی موقف پارلیمنٹ اور باقی اداروں میں اجاگر کریں۔

وحدت نیوز (کراچی) پاکستان پیپلز پارٹی پی ایس127-کے صدراورزکواۃ وعشرکمیٹی ضلع ملیر کے چیئرمین نعمان عبداللہ مرادکی مجلس وحدت مسلمین کی دعوت پر وحدت ہاوس جعفرطیار سوسائٹی آمد، ایم ڈبلیوایم ضلع ملیرکے سیکریٹری جنرل سید احسن عباس رضوی سے ملاقات،دونوں رہنماؤں کے درمیان علاقائی مسائل، واٹرسپلائی پروجیکٹ اور بلدیاتی انتخابات میں سیٹ ایڈجسٹمنٹ کے حوالے سے تفصیلی گفتگو ہوئی، ملاقات کے بعد دونوں رہنماوں نے جعفرطیارواٹرسپلائی پروجیکٹ پر جاری ترقیاتی کام کا جائزہ بھی لیا، اس موقع پر پاکستان پیپلز پارٹی کے وفد میں محمد علی گلگتی ، حبیب شاکر، کیپٹن عارف اور ایم ڈبلیوایم کی جانب سے ضلعی سیکریٹری امورسیاسیات حسن عباس، سیکریٹری روابط سعید رضا، رضاعلی، عارف رضا زیدی، حامد حسین اور کاظم نقوی موجود تھے۔

اس موقع پر مجلس وحدت مسلمین ضلع ملیر کے سیکریٹری جنرل احسن عباس رضوی کاپی پی پی کے رہنما نعمان عبداللہ مراد سے گفتگو کرتے ہوئے کہنا تھا کہ جعفرطیارواٹر سپلائی پروجیکٹ کی تکمیل سے اہلیان سوسائٹی کا دیرینہ مسئلہ حل پذیر ہوگا، پروجیکٹ آئندہ ماہ کے رواں ہفتے میں پایہ تکمیل کو پہنچ جائے گا، انشاء اللہ افتتاحی تقریب ایم ڈبلیوایم اور پیپلز پارٹی کی میزبانی میں آئندہ ماہ منعقد ہوگی، جس میں دونوں جماعتوں کے رہنما اور علاقہ معززین شرکت کریں گے، نعمان عبداللہ مراد کا کہنا تھا کہ پی پی پی عوامی خدمت پر مکمل یقین رکھتی ہے، جعفرطیار سوسائٹی کیلئے واٹر سپلائی پروجیکٹ بھی اسی خدمت کا تسلسل ہے ہمارے والد شہید عبداللہ مراد کی خواہش تھی کے اہلیان جعفرطیار کو میٹھے پانی کی فراہمی کا منصوبہ تحفہ کریں ، لیکن عوام دشمن قوتوں نے انہیں ہم سے چھین لیا ،لیکن آج ہمیں خوشی ہے کہ مجلس وحدت مسلمین کے تعاون سے ہم اپنے شہید بابا عبد اللہ مراد کا خواب مکمل کررہے ہیں ۔

وحدت نیوز(جامشورو) مجلس وحدت مسلمین کی جانب سے اندرون کے سیلاب متاثرین کی بحالی کے لئے ہنگامی بنیادوں پر اقدامات جاری ہیں ، ا س حوالے سے ایم ڈبلیوایم کراچی ضلع وسطی کی جانب سے لاکھڑا پاور اسٹیشن ضلع جامشورو میں 42متاثرہ خاندانوں میں ایک ماہ کا راشن فراہم کیا گیا، امدادی سامان ضلعی سیکریٹری جنرل برادر زین رضا کی سربراہی میں کراچی سے جامشورو پہنچا، وفد میں ایم ڈبلیوایم کراچی ڈویژن کے رہنما مولانا صادق جعفری ، مظاہر حسین اور دیگر بھی شامل تھے، جبکہ ایم ڈبلیوایم صوبہ سندھ کے سیکریٹری فلاح وبہبود بردار الفت عالم کربلائی نے امداری کاروان کا استقبال کیا، اس موقع پر ضلعی سیکریٹری جنرل جامشورو برادر کاشف حسین الحسینی بھی اپنی کابینہ کے اراکین کے ہمراہ موجود تھے، عالم کربلائی کا متاثرین سیلاب سے خطاب کرتے ہوئے کہنا تھا کہ ایم ڈبلیوایم مظلوموں اور محروموں کی آواز ہے ، ہم کسی مشکل وقت میں اپنی اہل وطن کو تنہا نہیں چھوڑیں گے، انشاءاللہ بہت جلد مزید سیلاب متاثرہ علاقوں میں بھی امدادی سرگرمیاں شروع کردی جائیں گیں ۔

وحدت نیوز (لاہور) پنجاب حکومت دہشت گردی کیخلاف آپریشن کو متاثر کرنے کے لئے ملت جعفریہ کے خلاف کریک ڈاوُن کر رہی ہے،ملک میں دہشت گردی کے سب سے زیادہ متاثر فریق کیخلاف کی جانے والی کاروائیاں ایک منظم سازش کا حصہ ہے،ہمارے تین ہزار سے زائد شہداء کے قاتلوں کی سرپرستی اب بھی پنجاب حکومت کے صوبائی وزیر ہی کر رہا ہے،جنوبی پنجاب میں عالمی دہشت گرد داعش کیخلاف کاروائی سے پنجاب حکومت گریزاں ہے،شہید شجاع خانزادہ کو اصل دہشت گردوں اور دہشت گردی کے مراکز کیخلاف کاروائی پر راستے سے ہٹایا گیا،ہمارے خلاف کاروائی دہشت گردوں کی خوشنودی کے لئے کیا جا رہا ہے،ان خیالات کا اظہار مجلس وحدت مسلمین پنجاب کے سیکرٹری جنرل علامہ عبدالخالق اسدی نے صوبائی کابینہ کے ہنگامی اجلاس سے خطاب میں کیا،انہوں نے کہا کہ پنجاب سے کئی اضلاع سے ہمارے بے گناہ محب وطن سینکڑوں کارکنوں کو گرفتار کیا گیا ہے،چادر اور چار دیواری کے تقدس کو پامال کیا جا رہا ہے،ہم پنجاب حکومت کی اس ریاستی ظلم کیخلاف خاموش نہیں رہیں گے،کرنل شجاع خانزادہ کی شہادت کے بعد پنجاب کابینہ میں شامل دہشت گردوں کے سیاسی سرپرست وزیر ملت جعفریہ کیخلاف ایک دفعہ پھر انتقامی کاروائی پر اتر آیا ہے،پنجاب بھر سے بانیاں مجالس ،عزادار،علمائے کرام،ذاکرین عظام اور عمائدین کا ہنگامی اجلاس طلب کر لیا ہے ،آج (26 اگست )کی اہم پریس کانفرنس میں ہم اپنے لائحہ عمل کا اعلان کریں گے۔

وحدت نیوز (اسلام آباد) مسلم لیگ نواز نے ہمیشہ عوامی مینڈیٹ پرشب خون مارا، این اے 122سے متعلق کمیشن کےفیصلے نے ن لیگی دھاندلی کا بھانڈا پھوڑ ڈالاہے، ایاز صادق کی صداقت خیانت میں تبدیل ہو چکی ہے،موقف میں شاندار کامیابی پر پاکستان تحریک انصاف اور عمران خان کو مبارک باد پیش کرتے ہیں ، گلگت بلتستان میں بھی نواز لیگ نے عوامی مینڈیٹ  کاکھلم کھلا قتل عام کیا، ان خیالات کا اظہار مجلس وحدت مسلمین کے مرکزی سیکریٹری امور سیاسیات سید ناصرعباس شیرازی نے حلقہ این اے122میں ن لیگ کے رکن قومی اسمبلی اور اسپیکر پارلیمنٹ ایاز صادق کے انتخاب کو کالعدم قرار دینے کے فیصلے کے بعد مرکزی سیکریٹریٹ سے جاری اپنے بیان میں کیا۔

ان کا کہنا تھا کہ پاکستان تحریک انصاف کا انتخابی دھاندلی کے حوالے سے چار حلقوں کی تحقیق کا مطالبہ وقت گذرنے کے ساتھ ساتھ سچ ثابت ہوا، این اے 122میں الیکشن کمیشن اور ن لیگ کی مشترکہ دھاندلی مہم کےنتیجے میں کامیاب قرار پانے والے اسپیکر قومی اسمبلی ایاز صادق کا جعلی مینڈیٹ آج عوام کے سامنے آشکار ہوگیا ، ن لیگ اور پیپلز پارٹی دھاندلی کنگ ہیں ، جو چوری کرکے ثبوت  مٹانے کے ماہر ہیں، گذشتہ برس ن لیگی حکومت کے جعلی مینڈیٹ اور ماڈل ٹاون سانحے کے خلاف عوامی درعمل نے ثابت کردیا تھا کہ عوام اب کسی قسم کی حکومتی جعل سازی کو قبول نہیں کریں گے، انہوں نے پاکستان تحریک انصاف کے کارکنان اور عمران خان کو اصولی موقف میں فتح پر مبارک پیش کی اور اس امید کا اظہار کیا کہ پی ٹی آئی عوامی امنگوں پر پورا ترنے کیلئے اپنے تمام وسائل بروئے کار لائے گی۔