وحدت نیوز(باغ)مجلس وحدت مسلمین شعبہ خواتین آزاد کشمیر باغ کے زیراہتمام ولادت با سعادت حضرت فاطمتہ الزہرا سلام اللہ علیھا کے موقع پر جشن اور یوم مادر کا انعقاد کیا گیا۔ ایم ڈبلیو ایم شعبہ خواتین باغ کی جانب سے منعقد ہونیوالی تقریب کا آغاز تلاوت قرآن مجید سے ہوا۔ حضرت فاطمہ سلام اللہ علیہا کی ولادت کی مناسبت سے جشن اور روز مادر کی تقریب میں جناب سیدہ سلام اللہ علیہا کے حضور منقبت کی صورت میں نذرانہ عقیدت پیش کیا گیا۔
محفل میں شریک خواتین سے محترمہ نادیہ بتول اور محترمہ رخشندہ کاظمی نے خطاب کیا اور خاتون جنت سلام اللہ علیہا کی سیرت پر روشنی ڈالی۔ ایم ڈبلیو ایم شعبہ خواتین آزاد کشمیر باغ کی طرف سے مقامی طور پر جاری قرآن سینٹر میں زیرتعلیم خواہران کی حوصلہ افزائی کے لیے ان کے درمیان انعامات بھی تقسیم کیے گئے۔ جشن میلاد کوثر کی مناسبت سے امام بارگاہ کو سجایا گیا تھا۔
