وحدت نیوز(سکردو)پاکستان تحریک انصاف گلگت بلتستان کے وفد کی مجلس وحدت مسلمین گلگت بلتستان کے مرکزی سیکرٹریٹ آمد۔پاکستان تحریک انصاف گلگت بلتستان کے وفد نے معروف عالم دین مجاہد ملت آغا علی رضوی سے خصوصی ملاقات کی۔

 اس موقع پر انہوں نے آغا علی رضوی کو مجلس وحدت مسلمین گلگت بلتستان کا صوبائی صدر منتخب ہونے پر مبارکباد پیش کی۔وفد کی جانب سے سابق وزیر اعلیٰ خالد خورشید کا خصوصی پیغامِ تہنیت بھی آغا علی رضوی تک پہنچایا گیا۔

ملاقات میں علاقائی ہم آہنگی، بین المسالک اتحاد، اور عوامی خدمت کے جذبے کو مزید مضبوط بنانے پر زور دیا گیا۔وفد نے آغا علی رضوی کے لیے نیک تمناؤں اور کامیابیوں کا اظہار کیا اور امید ظاہر کی کہ وہ اپنے کردار سے گلگت بلتستان میں امن، بھائی چارے اور ترقی کے نئے باب رقم کریں گے۔