وحدت نیوز(ڈھاڈر)مجلس علمائے مکتب اہلبیت بلوچستان کے صوبائی نائب صدر مولانا ذوالفقار علی سعیدی نے کہا ہے کہ ہماری عید اس وقت رضائے خدا کے حصول کا سبب بنتی ہے۔ جب ہم ان محروم طبقوں کو اپنی خوشیوں میں برابر کا شریک سمجھیں۔ یہ بات انہوں نے بلوچستان میں ضلع کچھی کی تحصیل ڈھاڈر کے مرکزی امامبارگاہ میں عیدالاضحیٰ کے موقع پر نماز عید کے اجتماع سے خطاب کرتے ہوئے کہی۔
مولانا ذوالفقار علی سعیدی نے کہا کہ عید قربان سنت ابراہیمی کی یاد تازہ کرتے ہوئے دین مبین اسلام کی سربلندی کی خاطر اپنی نفسانی خواہشات کو رضائے خدا کیلئے قربان کرنے کا نام ہے۔
انہوں نے کہا کہ ہمیں چاہئے کہ عید کے دن غریب اور نادار عوام کو بھی اپنی خوشیوں میں شامل کریں۔ ہمارے معاشرے میں غریب اور نادار لوگوں کی ایک بہت بڑی تعداد رہتی ہے۔ ہماری عید اس وقت رضائے خدا کے حصول کا سبب بنتی ہے۔ جب ہم ان محروم طبقوں کو اپنی خوشیوں میں برابر کا شریک سمجھیں اور ان کے مرجھائے ہوئے چہروں پر مسکراہٹ بکھیریں اور ان کی حتمی المقدر مدد کریں۔